ئیسماعیل بامەڕنی پێشمەرگە و خەباتکەرێ خودانێ چیرۆکێن بالکێشێن خەبات و بەرخوەدانێ وەغەرا دوماهیێ کر

پشتی ل ڕۆژا 5/1/2022 سەنتەرێ مە دیدارەکا ڤیدیۆییا درێژ دگەل ئەنجامدای و دیرووکا شۆرەشگێڕیا وی تۆمارکری و ژ ناڤچوونێ پاراستی. ژبەر ڕۆلێ ویێ کاریگەر د دەستپێکا شۆڕشا گولانێ دا و چیرۆکێن گەلەک بالکێشێن ویێن قارەمانیێ ل دژی داگیرکەرێن ئیراق و ترکی، ل چیا و ل زیندانێ و شەهیدکرنا هەڤالێن وی ب خیانەت و گەلەک چیرۆکێن دیێن بالکێش کو د وەختی دا مە د پۆستەکی دا د فێسبووکا سەنتەری دا بەڵاڤکرینە، ئەو ب چیرۆکێن خوەڤە بوو جهێ سەرنجراکێشانا مەدیایێ و دەزگایێن دی، ب تایبەت تورا میدیایی یا رووداو.

هۆسا ژی پێشکەشکارێ پروگرامێ پەنجەمۆر کاک کاوە ئەمین ب هاریکاریا سەنتەرێ کۆماتە پرۆگرامێ پەنجەمور لگەل تۆمارکر کو هێشتا نەهاتیە بەڵاڤکرن. هەر دیسان پشکا دەکۆمێنتاریا رووداو ب هەڤکاری لگەل سەنتەرێ مە بەرنامە دانا بوو کو فلمەکێ دەکومێنتاری ژی ل سەر ژیان و خەبات و چیرۆکێن ڤی خەباتکەری چێکەت، لێ مخابن نەخۆشیا پەنجەشێرێ کو رەوشا وی گەلەک خراب کربوو، ڕێ نەدا کو ئەڤ کارە بگەهیتە ئەنجامی و ب مخابنی ڤە ئەڤرۆکە نووچەیەک گەهەشتە مە کو پێر 13/3/2022 ڤی قارەمانی ل وەڵاتێ ئیرانێ وەغەرا دوماهیێ کریە و وی دیرووکەکا زێڕین ل دووڤ خوە هێلا.

د دەمەکی دا ئەم وەک سەنتەرێ کۆماتە گەلەک خەمبار بووین ب وەغەرا دوماهیێ یا ڤی قارەمانی، د هەمان دەم دا ووژدانا مە یا ئارامە کو ئەم بەری وەفاتا وی ڤێرا گەهەشتین و مە دیرووکا ویا زێڕین و بالکێش تۆمارکر و ژ مرنێ رزگار کر و د هەمان دەم دا مە گەلەک دەزگایێن دی ژی ب ڤی قارەمانێ ووندا حەساندن.

ئەم سەرەخۆشیێ ل مالباتا کاک إسماعیل و هەموو هەڤال و هەڤچەپەر و کەسوکارێن وی دکەین.

گۆڕا وی ب گول و گولزار بیت جهێ وی بهەشت بیت.