حه‌فزلا کوڕکی شه‌هــــیدێ زینــــــــدی و قــاره‌مانــــێ شــوڕشـــێ
سەنتەرێ کۆماتە یێ دەکۆمێنتکرنا دیرووکا شۆڕشێ د بەردەوامیا کار و چالاکیێن خوە دا ل رێکەفتی 1/3/2023 هەڤدیتنەكێ دگەل پێشمەرگە و خەباتکەرێ دێرین حەفزوللا کوڕکی ئەنجامددەت و دیرووکا خەباتا وی مینا بەلگەنامەیەکا گرنگ تۆماردکەت و ژ ناڤچوونێ دپارێزیت
حەفزوللا حەسەن شوکری، یێ ناسیار ب حەفزوللا کوڕکی ل ساڵا 1957 ل گوندێ کوڕکا یێ سەر ب دەڤەرا باتیفا ڤە هاتیە سەر دنیایێ.
ل گۆره‌ی ئاخفتنا کاک حه‌ڤزلای، ل ده‌ستپێکا شوڕشا ئه‌یلولێ 25 زەلامێن خەلکێ گوندێ کوڕکا دبنه پێشمەرگە، ژ وان ژی خورشیدێ برایێ حەفزوللای و مامێ وی.
ل دوماهیا سالا 1974 حەفزوللا بخوه ژی دبیته پێشمه‌رگه لگەل شه‌هید عەبدولرەحیم جەسیم ل دەڤەرا ئاکرێ و پشکداریێ د چەندین شەڕا دا دکەت. محه‌مه‌دێ میرانێ (محمد ابراهیمێ نەڤیێ حەجی سادقێ برۆی) فەرماندەیێ سریا وان بوو. ئێک ژ وان شه‌ڕێن وی پشکداری تێداکری ل گه‌لی زه‌نته‌ی بەرسینگێ هێرشا دوژمنی دگرن و هێرشا دوژمنی دشکێنن.
هەتا دوماهیا شۆڕشا ئەیلۆلێ ژمارا پێشمه‌رگێن گوندێ کوڕکا دبنه 31 پێشمەرگە، 4 کەس ژ وان ژ مالا حەفزوللای بوون.
پشتی شکەستنا شۆڕشێ ل ئاردارا ساڵا 1975 حەفزوللا ڤەدگەڕیته ڤه گوندێ کوڕکا. لێ ئه‌و چەکێ خوە ڤەدشێریت و ڕاده‌ستی دوژمنی ناکه‌ت. پاشی ئه‌و دچیتە گوندێ بەهنوونە، ل دەف محەمەد تاهرێ حه‌جی سادقێ برۆی خوه دپارێزیت.
پاشی 13 مالێن خه‌لکێ گوندێ کوڕکا بڕیارێ دده‌ن کو بچنە ئیرانێ ل ده‌ف سه‌رکردایه‌تیا شوڕشێ. حەفزوللا ژی دگەل مامێ خوە و برایێ خوە، دگەل وان مالان ئه‌و ژی دچنه ئیرانێ.
ئه‌و دناڤ باکوورێ کوردستانێ ڕا ب قه‌چاغی خوه دگه‌هیننه ڕۆژهه‌لاتێ کوردستانێ. لێ وی ده‌می هه‌ر که‌سه‌کێ ژ باشوور دگه‌هه‌شته ڕۆژهه‌لاتێ کوردستانێ، حکومه‌تا ئیرانێ ئه‌و دگرتن و ڕاده‌ستی حکومه‌تا ئیراقێ دکرن. لۆما ئەو نەچاردبن کو ب دزیڤە بچنە دناڤ ئۆردیگایێ (که‌مپا) زێوە دا و خوە دناڤا خەلکی دا ڤەدشێرن. رۆژا پاشتر رژێما ئیرانێ مرۆڤ و گوندیێن حەفزوللای هەمیا دگریت و دبه‌ت ل سه‌ر سنووری ڕادەستی رژێما ئیراقێ دکەت. لێ حەفزوللا بخوە ناهێته گرتن. پشتی کو حکومه‌تا ئیرانێ په‌نابه‌رێن باشوور دووردئێخیته باژێڕێن ئیرانێ، وی ژی دبەنە باژێڕێ قەزوین. پشتی هینگێ ب دوو مه‌ها وی دبەنە باژێڕێ جەهرۆم ل باشوورێ ئیرانێ.
حەفزوللا کوڕکی هەتا وه‌غه‌را دوماهیێ یا بارزانیێ نەمر ل ساڵا 1979 ل ناڤبەرا جەهرۆم، ئەسفەهان و مبارەکێ دا دژیت. پاشی پشتی وەفاتا بارزانیێ نەمر دچیتە کوردستانێ. خورشیدێ برایێ حەفزوللای ل ساڵا 1979 پشکداریێ د کۆنگرێ 9ێ یێ پارتی دا دکەت و پشتی هینگێ دچیتە کوردستانێ، ژبەرکو بابێ وی چووبوو بەر دلۆڤانیا خودێ ئەو دایکا خوە ب قەچاخی ددبەتە رۆژهەلاتێ کوردستانێ.
حەفزوللا و برایێ خوە، مالێن خوە دئینە زێوە و ل لژنا ناوچا زێوە ل ده‌ڤه‌را مه‌رگه‌ڤه‌ڕ و ل وێرێ دبنه پێشمەرگە. وی دەمی تەیب ئاکرەیی بەرپرسێ لژنا ناوچا زێوە بوو.
خورشید و 8 پێشمەرگێن دی ژ لایی رژێما ئیراقێ ڤە دهێنە گرتن.
خورشیدێ برایێ حه‌فزلای ده‌مێ کو پێشمه‌رگه بوویه ل باشوورێ کوردستانێ، ئه‌و و 8 پێشمەرگێن دی ب ناڤێن: سالح بلێجانی، عەونی بلێجانی، خورشید سۆری، سەلیم کوڕکی، جەعفەر کوڕکی، عەلی غلبیشی و سادق) ل ئاسۆسێ دکەڤنه بۆسەیه‌کا دوژمنی و دهێنه گرتن. ده‌ستپێکێ وان دبه‌نه زاخۆ، دهۆك و پاشی بۆ هه‌یئا کەرکووکێ و ل وێرێ ب سێدارەدانێ تێنه حوکم کرن.
به‌ری وان ب ده‌مه‌کێ کێم حکومه‌تا ئیراقێ شه‌هید خدر مه‌حمود هرۆری به‌رپرسێ ڕێکخراوا پێشکه‌فتن لگه‌ل 8 هه‌ڤالێن وی سێداره‌دا دابوون. لێ به‌ری بڕیارا سێداره‌دانێ ل سه‌ر خورشیدی و هه‌ڤالێن وی بهێته جیبجیکرن، ڕژێما ئیراقێ لێبوورینەکێ ددەت و ل شوونا سێدارەدانێ، وان ب 23 سالان زیندانی دکەت.
بەری مالا حەفزوللای ژ مبارەکێ بهێته ڤەگوهازتن، کوڕکەکێ وی یێ ساڤا ل ئەسفەهانێ دمریت. پشتی تێته زێوە ژی، ل وێرێ خانما وی ژی وه‌غه‌را دوماهیێ دکه‌ت.
سەرۆك مەسعود بارزانی دێ زارۆکێن خورشیدی بخودان کەت
پشتی خورشید و هەڤالێن خوه دهێنه گرتن، جه‌نابێ سه‌رۆک مه‌سعود بارزانی دبێژیته حه‌فزلای: ئه‌ز دێ زارۆکێن خورشیدی یێن کوڕ مینا زارۆکێن خوە بخودان کەم، بلا کچ ژی خەما ژنبرا تە بن. لێ ژ بەر کو کوڕکێن خۆرشیدی زارۆك بوون و 3 و 4 ساڵی بوون، ده‌یکا وان ڕازی نابیت.
پشتی خورشید هاتیه گرتن، حه‌فزلا ژن و زارۆکێن وی ژی ڤڕێدکه‌ته باشوورێ کوردستانێ، دا کو بشێن سه‌ردانا وی بکه‌ن و ل ناڤ مرۆڤێن خوه بێنه خودانکرن.
حەفزوللا بتنێ دمینیت، لێ ئه‌و ژی به‌رێ خوه دده‌ته باشوور
کوڕ و ژنکا حه‌فزلای وه‌غه‌را دوماهیێ دکه‌ن. خورشیدێ برایێ وی ژی تێته‌گرتن و ژن و زاڕۆکێن برایێ وی ژی دچنه کوردستانێ. ئێدی ئه‌و بتنێ دمینیته ل ڕۆژهه‌لاتێ کوردستانێ.
ل ساڵا 1980 حه‌فزلا لگه‌ل هێزه‌کا پێشمه‌رگه‌ی ب سه‌رپه‌رشتیا مسته‌فا نێروه‌ی تێته باشوورێ کوردستانێ و ل باره‌گایێ پێشمه‌رگه‌ی ل چه‌متوی بنه‌جـهـ دبن. که‌سه‌ک ل وێرێ حه‌فزلای ئاگه‌هدار دکه‌ت کو حکومه‌تا ئیراقێ برایێ وی خورشید یێ سێداره‌دای. ئه‌ڤه ژی دبیته شۆکه‌ک و خه‌مه‌کا مه‌زن بۆ وی.
به‌ری ئه‌و بڕێبکه‌ڤن بۆ باشوور، سەرۆك مه‌سعود بارزانی وێنەیه‌کی بارزانیێ نەمر و نامەیه‌کێ بۆ ماجد بەگێ چەلی و پۆستێ لقا ئێك ژی دگەل حه‌فزلای دهنێریت.
حه‌فزلا لگه‌ل دوو پێشمه‌رگێن دی ژ چه‌متوی دده‌نه ڕێ، دا کو بێنه ده‌ڤه‌را لقا ئێک، پۆستێ لقێ و ماجد به‌گێ چه‌لی بگه‌هینن و پسیاره‌کێ ل برایێ خوه خورشیدی ژی بکه‌ت. ئه‌و دکه‌ڤنه ڕێ بۆ باره‌گایێ پێشمه‌رگه‌ی ل نێزیک گوندێ شیکە. زستانه‌کا گرانه و ناڤتەنگەکا بەفرێ یا کەتی. ئەو و هه‌ردوو هه‌ڤالێن خوه ژ برسادا دکه‌ڤن. دا کو ژ برسا دا نه‌مرن، ئه‌و نه‌چاردبن کو هەلزێ (جۆره گیایه‌که دده‌نه په‌زی) ژ بن بەفرێ بیننە دەرێ و بخۆن. پاشی ل جهه‌کی ئه‌و ب سه‌ر ماله‌کا بتنێ هه‌لدبن و ل وێرێ هنده‌ک خوارنێ دخۆن و خوه گه‌رم دکه‌ن و دیسا دکه‌ڤنه‌ڤه ڕێ و پشتی ده‌مه‌کی دگه‌هنه باره‌گایێ شیکه، کو هینگێ هێزه‌کا پێشمه‌رگه‌ی ب سه‌رپه‌رشتیا عه‌لی تێلی نێروه‌ی ل وێرێ بوو.
ئه‌و د وێ زستانا گران و چیایێن ئاسێ و ب قه‌چاغی، قۆناغ ب قۆناغ، دناڤ باکوورێ کوردستانێ ڕا، ب رێیا رێکخستنێن پارتی خوە دگەهینیتە گوندێ مەلێسێ، ل ده‌ڤه‌را کۆماته‌ی.
به‌ری حه‌فزلا بگه‌هیته ده‌ڤه‌را چه‌لێ، ئه‌و بڕێڤە دزانیت کو ماجد بەگێ یێ چوویە ئەنقەرە، لۆما ئەو پۆستێ ماجد بەگێ ڕادەستی کەسەکێ جهێ باوەریێ دکەت، دا کو بگەهینیتە دەستێ وی.
حەفزولا ژ مەلێسێ دگەل تاهر دێشێشی به‌رێ خوه دده‌ته بارەگایێ لقێ ل کۆماتەی. وی ده‌می ئاڤا ڕووبارێ خابووری گەلەکا ڕابووی، لێ حەفزوللا، ل وێ سڕ و سه‌قه‌مێ و ئاڤا بۆش، خوە ل ئاڤێ ددەت و دەربازی ئالیێ دی دبیت.
دکتۆر جەرگیس بەرپرسێ لقێ یە، ئەو حەفزوللای ئاگەهداردکەت کو خورشیدێ برایێ وی نەهاتیە سێدارەدان. پاشی د. جه‌رگیس وی دهنێریتە دەف سەعدۆ کوڕکی ل گوندێ هەدریشێ یێ باکوور. ژنبرا حەفزوللای ژی پشتی ژ ڕۆژهه‌لات هاتی، یا ل گوندێ چەمانێ یێ باکوور مایە ئاسێ. به‌فره‌کا زۆرا که‌فتی و کەس نه‌شێت وێ و زارۆکێن وێ ده‌ربازکه‌ت. حەفزوللا دچیته چه‌مانێ و هه‌ردوو زارۆکا پێکڤه گرێدده‌ت و دده‌ته پشتا خوه و به‌فرێ دکه‌لێشیت و زارۆکا و ژنبرا خوه دئینیت و به‌رێ خوه دده‌ته ڕێکا گوندێ هەدریشێ. سەعدۆ کوڕکی ژی سێ کەسا د دووڤ وان ڕا دهنێریت و وان ژ به‌فر و باڕۆڤێ ڕزگاردکه‌ن و دئیننە هەدریشێ.
ل وێرێ حه‌فزلا دزانیت کو برایێ وی خورشیدی ل زیندانێ دانپێدان ل سه‌ر پێشمه‌رگاتیێ نه‌کریه و د ئیفادێ خوه دا یا گۆتی؛ ئه‌ز شڤانێ گوندێ هه‌دریشێ مه.
شەڤا پاشتر حەفزوللا ئیفادا نیشا ژنبرا خوە ددەت، کو ئەو ژی بچیت خوه ڕاده‌ستی حکومه‌تا ئیراقێ بکه‌ت، ژ به‌ر خورشیدی و بێژیت کو؛ ئه‌م ل هه‌ردیشێ بووین و خورشید شڤان گوندێ هەدریشێ بوو. حه‌فزلا وان دبەتە نێزیکی گوندێ کوڕکا، دا بچیت خوە رادەستی ڕژێمێ بکەت.
پشتی ژنبرا حەفزوللای خوە ڕادەست دکەت، ژ لایێ رژێمێ ڤە دهێتە گرتن و ڤەکۆلین دگەل دهێتەکرن. ئیفادێن وێ و یێن خورشید ئێکو دوو دگرن و پشتی هینگێ ئه‌و دهێتە ئازادکرن.
خورشید پشتی چوار سالا د زیندانێ ڤە دمینیت، پاشی ب لێبوورینەکێ دهێتە ئازادکرن و جارەکا دی دچیته‌ڤه ناڤ شۆڕشێ و دبیته پێشمه‌رگه.
ئێدی حەفزوللا ژی ل لژنا زاخۆ و ل سنوورێ لقا ئێک به‌رده‌وامیێ دده‌ته پێشمه‌رگاتیا خوه.
ڕۆژا 12/1/1981حەفزوللا کوڕکی، سەگڤان مستەفا محه‌مه‌د باتیفی و که‌ریم درباز کوڕکی ل ده‌ڤه‌را بێگۆڤا دچنه چاڤنێڕیا بنگه‌هه‌کێ دوژمنی، ژ بۆ ئه‌نجامدانا چالاکیه‌کێ. مینه‌ک ل بن پێن سه‌گڤانی دپه‌قیت و وان هه‌رسێیا بریدار دکه‌ت. حەفزوللا ب برینداریڤە سەگڤانی ڕادکەت و دبەت. پاشی ڤەدگەڕیت دا که‌ریمی ژی ببه‌ت، مینەکا دی ژی ب وی ڤە دپەقیت. بەفر ژ مێترەکێ پتر یا ل ئەردی و سه‌رمایه‌کا گه‌له‌ک دژواره. ئێدی ب مینا دووێ حەفزوللا ژ پێ و دەست و سەروچاڤێن خوە ژی برینداردبیت.
سەگڤان هێشتا گه‌نجه و زاڤایێ هەژدە رۆژا یە، ئەو هندی دشێت بڕێڤە دچیت، لێ پشتی ژ هێز و شەنگەها دکەڤیت ئێدی دکەڤیتە ئەردی و شەهید دبیت. فیشەکا ل بەر کلاشینکۆفا سەگڤانی و یا سیارکریە و هەشت ساجۆرێن ل پشتا وی و دگەل دوو نارنجۆکا. د وی ده‌می دا ئێدی له‌شکه‌رێ دوژمنی ل دووڤ ده‌نگێ په‌قینا مینان د دووڤ وان دا تێن. حەفزوللای و که‌ریمی ئاگەهـ ژ دەنگێ پێژنا سەربازێن دوژمنی هەیە.
ئێدی حەفزوللا ژی دکه‌ڤیت و نه‌شێت زیده‌تر بچیت، لۆما ئه‌و داخوازێ ژ کەریمی دکەت کو خوە قورتالکەت و نارنجۆکێن وی ژێ وەردگریت، دا کو ئه‌گه‌ر دوژمن هاته سه‌ر که‌له‌خێ وی ئه‌و ب وان نارنجۆکا شه‌ڕی بکه‌ت. ئەو بڕیارێ ددەن کو ب ساخی خوە ڕادەستی دوژمنی نەکەن. کەریم خوە دگەهینیتە شکەفتا ئاستەنگا گوندێ رویسێ و ئه‌و ژی ل وێرێ دکه‌ڤیت. پشتی هینگێ حەفزوللا ژی هێدی هێدی، ب وان بریناڤه خوه ڕادکێشیت و پشتی ده‌مه‌کی ئه‌و ژی خوه دگه‌هینیته شکه‌فتێ.
سپێدێ ئیبراهیمێ ڕویسی لگه‌ل 3 که‌سێن دی بسه‌ر وان هه‌لدبن و حەفزوللای و کەریمی دکەنە پشتا خوە و وان دبەنە جهەکێ ئەولەتر. پاشی هه‌ر ئه‌و زه‌ڵام دچن ته‌رمێ شه‌هید سەگڤانی ژی دبینن و ته‌رمێ شه‌هیدی و هه‌ردوو برینداران دبەنە لژنا زاخۆ.
پاشی دکتۆر رزگار و نووژداره‌کا ژن یا پارتییا کۆمونیستا ئیراقی، ژ لقێ دچن برینێن وان ده‌رمان دکه‌ن.
دختۆرا دڤێن پیێ حەفزوللای ببڕن
پشتی نووژدار ژی دچنه ده‌ف وان، هه‌ر خوینا برینا پیێ حەفزوللای ڕاناوەستیت. دختۆران ژبۆ راوەستاندنا خوینا برینا وی دڤێت پیێ وی ببڕن. لێ ئه‌و نووژدارا ژن کو خەلکێ سلێمانیێ بوو پێشنیاردکەت کو پیێ وی بکەنە دناڤ خوێ دا، د ڤی حالەتی دا یان دێ خوینا وی ڕاوەستیت و یان ژی دێ مریت!
حەفزوللا کوڕکی نەمر، به‌لێ هەستیێ پیێ وی شکه‌ستبوو، هنده‌ک پارچێن هه‌ستی دکتۆر رزگاری ئه‌و ب پلایسی ئینانه‌دەر.
ئه‌و هه‌ر ژ مه‌ها ئێك هەتا مه‌ها پێنج/گولانێ د ڤێ رەوشێ دا ما. هەرچەندە کوردەکێ ژیرکی یێ باکوورێ کورستانێ دڤیا وی ل سەر خەرجیا خوە ببەتە ستەمبۆلێ بۆ چارەسەریێ، لێ فەتاح گولی قەبۆل نه‌کر.
پشتی هینگێ وی دهنێرنە رۆژهەلاتێ کوردستانێ و پاشی ته‌هران. هه‌تا دگه‌هیته وێرێ کرم دکه‌ڤنه برینێن پێ وی. کاک ئیدریس بارزانی ل ته‌هران چاڤدێریا چاره‌سه‌ریا وی دکه‌ت.
من بکوژه به‌لێ پێ من نه‌بڕه
ده‌مێ کو نووژدار ل ته‌هران دا نشته‌رگه‌ریێ بۆ وی دکه‌ت، حه‌فزلا دبێژیته دختۆری: پیێ من نەبڕە، ئەگەر دێ بڕی شرینقەکێ بۆ من دانه و من بکوژە. چونکە من نە دایکە و نە بابە و نە هەڤژینە و نە زارۆکن. دختۆر ژ بەر وی دکەتە گری و سۆزێ ددەتێ، ئەوا ژ دەستێ وی بهێت بۆ وی بکەت. دختۆر چار نشتەرگەریا بۆ حەفزوللای دکەت و ئه‌و 9 رۆژان ل خەستەخانێ دمینیت. به‌لێ ئه‌و 14مه‌ها ژی دکەڤیتە ژێر چاڤدێریا دختۆری. کاك ئیدریس بارزانی ب بەردەوامی سەره‌دانا وی دکەت و هاریکاریا ویا دارایی ژی دکه‌ت.
حه‌فزلای په‌رله‌مانێ ئیرانێ په‌قاندیه؟
هێشتا حه‌فزلا ل خه‌سته‌خانا که‌ره‌ج ل بن چاره‌سه‌ریێ بوو. دیاره وی ده‌می په‌قینه‌ک ل په‌رله‌مانێ ئیرانێ چێبوویه. پاسدارێن ئیرانێ تێن وی دگرن و دبه‌ن ب گۆمانا په‌قاندنا په‌رله‌مانی. پشتی د. شه‌وکه‌ت بامه‌ڕنی به‌رپرسێ لقا 8 پارتی ل که‌ره‌ج و به‌رپرسێ په‌یوه‌ندیان لگه‌ل ئیرانێ، بێهیڤی دبیت و تشته‌کی ژ حه‌فزلای نزانیت، کاک ئیدریس بارزانی بخوه د. شه‌وکه‌تی لگه‌ل خوه دبه‌ت و دچیته باره‌گایێ هه‌والگیریا ئیرانێ. لێ ئه‌و ئینکارێ دکه‌ن کو حه‌فزلا ل ده‌ف وان بیت. ده‌نگێ کاک ئیدریسی دچیته حه‌فزلای. ئه‌و ب ده‌نگه‌کێ بلند گازی کاک ئیدریسی دکه‌ت. بڤی شێوه‌ی کاک ئیدریس وی ژ ده‌ستێ هه‌والگیریا ئیرانێ رزگار دکه‌ت و دبەتە لقا 8 یا پارتی.
دیسان ڤه‌‌گه‌ڕا کوردستانێ
پشتی چارەسەریا حەفزولای دهێتە کرن، ئەو ل ساڵا 1983 ڤەدگەریتەڤە کوردستانێ و ل گەڤەڕۆکێ ل بارەگایێ لژنا ناوچا زاخۆ درێژیێ ب خەباتا خوە ددەت. پشتی هینگێ باره‌گایێ وان دچیته چیایێ سپی ل گەلیێ هارینا. حه‌فزلا بۆ ده‌مێ 4 ساڵان ل باره‌گایێ لژنێ بکارێن ئیداری و لوجستیک ڕادبیت. هه‌روه‌سا دوو جارا، ژ بۆ ئینانا چه‌ک و ته‌قه‌مه‌نیان، دگەل شەهید عەمەرێ لەعلێ دچیتە سوریێ.
ل ساڵا 1984 هێرشه‌کا مه‌زنا له‌شکه‌ر و جاشێن ئیراقێ تێته سه‌ر باره‌گایێن هه‌ردوو لژنێن زاخۆ و دهۆک. حه‌فزلا ل میحوه‌رێ لێفێ پشکداریه‌کا کارا دڤی شه‌ڕی دا دکه‌ت، کو ل دوماهیێ دوژمن دشکێت و زیانه‌کا مه‌زن دده‌ت. هه‌ر ل وێ ساڵا 1984 حەفزوللا ژیانا هه‌ڤژینیێ پێکتینیت. پاشی ئه‌و دبیته بابێ دوو زارۆکان.
د ڤی ماوەی دا حەفزوللا کوڕکی پشکداریێ دگەلەك شەڕ و داستانێن پێشمەرگەی دا دکەت وەکی: گرتنا باره‌گایێ فەوجا جاشا ل دێمکا، بۆسێن ل ناڤبەرا بێگۆڤا و باتیفا، شەڕێ زرێزە، هەردوو داستانێن گرتنا فه‌وجێن جاشا ل شەرانش ….هتد
ل ئەنفالان فرۆکێن حکومه‌تا ئیراقێ گوندێ تویکا ل ده‌ڤه‌را زاخۆ ب چەکێ کیمیاوی بۆمبەباران دکەن، ئیسماعیل تەعبیر به‌رپرسێ ڕێکخراوه‌کا پێشمه‌رگه‌ی و 13 پێشمەرگێن دی ل وێرێ شەهیددبن. پشتی هینگێ حەفزوللا و هەڤالێن خوە جەنازێن شەهیدا ڕادکەن و دبەنە گوندێ پیرەکا ڤەدشێرن. پشتی هینگێ ڕژێما ئیراقێ جەنازێن شەهیدا ژ گۆڕێن وان ئینانە دەر و برن.
ل ده‌ستپێکا ئه‌نفالان حەفزوللا دچیتە مالا خوە ل گوندێ کوڕکا، دبینیت کو گوندێ چووله و که‌س تێدا نه‌مایه. گولکێ وان هێشتا ب سنگی ڤە یێ گرێدایە. ئه‌وهەفسارێ گولکی دبڕیت. مریشک و عەلۆکێن گوندی وەکی پەزی ب دووف حەفزوللای دکەڤن بۆ سەر جادێ.
پاشی ئه‌و ژی خوه دگه‌هینیته سنوورێ باکوور و باشوور و لگه‌ل خه‌لکێ دی دچنه که‌مپا ئامه‌دێ یا په‌نابه‌رێن ئه‌نفالان.
پشتی سه‌رهلدانێ، حەفزوللا کوڕکی ل ساڵا 1993 ڤەدگەریتەڤە کوردستانێ و دەست ب بازرگانیا پەزی دکەت. پشتی هینگێ ل سەر داخوازا شەهید بەهجەت نایف باڕهولی دچیتە لژنا ناوچا زاخۆ و ئەرکێ چاڤدێریا ڕێکا براهیم خەلیل – زاخۆ ب وی دهێتە دان.
حەفزوللا کوڕکی دگەل فەتاح گولی دبیتە فەرماندێ مەفرەزەکا پێشمەرگەی و پشکداریێ د شەرێن به‌ڕه‌ڤانی دا دکه‌ت، کو تیرۆرستێن پەکەکێ ل دژی کوردستانا ئازاد ئه‌نجامدده‌ت. د وان شه‌ڕان ژی دا جاره‌کا دی ئه‌و بریندار دبیت.
حەفزوللا کوڕکی ل ساڵا 2003 دگەل محەمەد خالد بۆسەڵی پشکداریێ د شەرێ ئازادیا ئیراقێ دا دکەت و دگەل هێزێن ئەمریکی دچیتە بەرتڵە.
پشتی هینگێ ل حەریرێ هەتا سالا 2007 درێژیێ ب ئەرکێ خوە یێ پێشمەرگاتیێ ددەت.
حەفزوللا کوڕکی ل ساڵا 2014 وەکو خوەبەخش پشکداریێ د شەرێ ل دژی تیرۆریستێن داعش دا دکەت، هەر وەسا ل ساڵا 2017 پشکداریێ د شەڕێ ل دژی حەشدا شەعبی ژی دادکەت.
نوکه ژی ئه‌و وه‌ک رائیدێ په‌ککه‌فتی خانه‌نشینه. لێ مخابن ئه‌و تووشی نەخۆشیا پەنجەشێری بوویە دوماهی سالێن ژیانا خوە ل زاخۆ دەربازدکەت.
