مەزن ژیا، مەزن وەغەر کر

عبدالباقیێ بامەڕنی د بیرەوەریێن خوە دا دبێژیت:” ل ساڵا 1945 پشتی شەرێن گران و ڕیەکا دوور و برس و سەرمایێ، ئەم گەهەشتینە دەڤەرا مەرگەڤەرا رۆژهەلاتێ کوردستانێ.

ئەم هێزەکا مەزن بووین ب سەرپەرشتیا بارزانی. ب شەڤ ئەم ل قۆنتارا چیایێ کەچەلەی بووین. ئەم ژ برسا و وەستیانێ ژ هێز و شەنگە کەتبووین. بارزانی گۆتە مە: ئەڤە پەزێ منێ لگەل مالا هاتی یێ ل نێزیکی مە، ئێک ژ وە هەڕن بۆ مە پەزەکێ بینن، دا سەرژێکەین و بخۆین هەتا سپێدێ خوارن دگەهیتە مە. هەرچەندە بارزانی گۆتبا مە خوە پاڤێژنە ناڤ ئاگری، هەمیا ئێکسەر فەرمانا وی بجی دئینا. لێ وێ شەڤێ هێز و زاخ د کەسێ ژ مە دا نەمابوو. لۆما کەسێ د خۆڕا نەدیت رابیت بچیت پەزەکێ بینیت.

مە دیت بارزانی بخوە چوو و پشتی چەندەکێ زڤری، پەزەکا ئینای. ئێکسەر وی بخوە پەز سەرژێکر و کەتە بەر گۆشت هویرکر و بۆ چێکرنێ ئامادەکر. ئێدی ئەم ژی رابووین ل وان بەتەنا مە هندەک تڕک و گوینی کۆمکرن و ئاگر هەلکر و گۆشتێ خوە نیڤ کەلی و نیڤ خاڤ مە خوار. ئەز باوەر دکەم ئەگەر وێ شەڤێ چەلەنگیا بارزانی نەبا دبیت گەلەک ژ مە ژ برسا و سەرما ب ئێکجاری کەتبان”.

گۆڕا تە ب گول و گولزار بیت

جهێ تە بهەشت بیت

هیڤیدارم ئەو رێبازا تە یا پاک و جوان هەرا بەردەوام بیت.