سه‌ید سه‌عیدێ شه‌ریفی

سه‌ید سه‌عیدێ شه‌ریفی، که‌سه‌کی جامێر و پێشمه‌رگه‌یه‌کی قاره‌مان

سەنتەرێ کۆماتە یێ دەکۆمێنتکرنا دیرووکا شۆڕشێ، د بەردەوامیا تۆمارکرن و ئەرشیفکرنا دیرووکا شۆڕشی دا، ل رۆژا ٣٠/١١/٢٠٢٢ ل ئۆفیسا خوە، مێڤانداریا پێشمەرگێ خەباتکەر سەید سەعید شەریفی دکەت و دیدارەکا ڤیدیۆیی دگەل وی سازدکەت و پەردێ ل سەر سەربۆڕێن خەباتا وی دهەلینیت و تۆماردکەت و ژ ناڤچوونێ دپارێزیت.

  سەعید عەلی رەجەب یێ ناسیار ب سەید سەعیدێ شەریفی ل سالا ١٩٦٠ ل گوندێ شەریفا یێ سەر ب  ئامێدیێ ڤە هاتیە سەر دنیایێ. وی خواندنا سەرەتایی ل گوندێ بێبادێ بدوماهی ئینایە و پۆلا ئێکێ ناڤنجی ژی ل ئامێدیێ دەستپێکریە، لێ ژبەرکو وی  ڕۆژانە ب پیا هاتن و چوونا قوتابخانێ دکر، نەشیا بەردەوامبیت و خواندنا خوه‌ ببه‌ته‌ سه‌ری.

  بیرا سەید سەعیدی باش ل ڕێکەفتنا 11 ئادارا ساڵا 1970 دهێت. هەر چەندە ئەو هێشتا زارۆك بوو، لێ ئەو ژ گوندێ شەریفا ب پیا دچیتە مێرستەکێ، ل رۆژئاڤایێ ئامێدیێ و پشکداریێ د ئاهەنگا خەلکێ دەڤەرێ دا دکەت، بهه‌لکه‌فتا ڕێککه‌فتنا 11 ئادارێ.

سەید سەعید شەریفی ل ساڵا ١٩٧٤ تڤەنگەکێ وەردگریت، لێ هند نامینیت و شۆڕش ڕاستی شکەستنێ دهێت.

ل دەستپێکا شۆڕشا گولانێ بابێ وی، سه‌ید عه‌لی، دبیته‌ ئه‌ندام د ناڤ ڕێکخستنێن نهێنی یێن پارتی دیموکراتی کوردستان دا. پشتی هینگێ و هه‌ر ل ساڵا ١٩٧٦ سەید سەعید بخوه‌، سەید عەلی، سەید حەسەن و سەید ئۆسمان ژ گوندێ شەریفا ب ڕێیا مەلا حسێن دێرەشی، ئه‌و ژی دبنه‌ ئه‌ندامێن ڕێکخستنێن نهێنی یێن پارتی.

پشتی کو به‌رپرسێ وان یێ ڕێکخستنێ مەلا حسێن دێره‌شی ژ لایێ ڕژێما به‌عس ڤە تێته‌ گرتن، سەید سەعید، خوە ڤه‌دگوهێزیته‌ ڕێکخراوا مه‌یدان یا کو عەبدولستار مەلا زەکی شێلازی بەرپرسیاریا وێ دکر.

  ل ساڵا ١٩٧٩ سه‌ید سه‌عید تێته‌ ڤه‌خواستن بۆ له‌شکه‌ریا ئیراقێ یا نه‌چاری. مه‌هه‌کێ پشتی کو ناڤێ سه‌ید سه‌عیدی بۆ له‌شکه‌ریێ تێت، کادرێ شۆڕشا گولانێ عادل مزووری دگەل تاهر ئامێدی و هەژمارەکا پێشمەرگا دچنە گوندێ شەریفا. سەعید ژی هەتا کێریێ سه‌رێ ئامێدیێ دگەل وان دچیت و بڕێڤە خوە ب وان ددەتە نیاسین کو ئه‌و ئه‌ندامێ ڕێکخستنێن پارتی یه‌ و ناڤێ وی ژی بۆ له‌شکه‌ریا ئیراقێ هاتیه‌.

سه‌ید سه‌عیدی نه‌ڤێت بۆ دوژمنێ داگیرکه‌رێ کوردستانێ له‌شکه‌ریێ بکه‌ت. لۆما د ناڤبەرا مالێ و چیایێ مه‌تینا دا ب قەچاخی دمینیت و بۆ ده‌مه‌کی درێژ خوه‌ ل وان ده‌را دپارێزیت، هەتا  ساڵا 1981.

ل ساڵا 1981 سەید سەعید شەریفی، سەید عەلیێ شه‌ریفی، یاسین شه‌ریفی و کەمال شه‌ریفی، هه‌رچه‌ند پێکڤه‌ بڕیارێ دده‌ن کو ببنه‌ پیشمه‌رگه‌ و دچن و ل گوندێ بازێ، پەیوەندیێ ب لژنا ناوچا ئامێدیێ دکەن و دبنه‌ پێشمەرگە.

سەید سەعید و سەید عەلی دچنە دگەل ڕێکخراوا شەهید ئەنوەر مایی، ئەوا شەهید شەعبان غەفار بەرپرسیاریا وێ دکر. سەید سەعید ئێکەم گەڕا خوە د گەل ڕێکخراوا شەهید ئەنوەر مایی بۆ دەڤەرا بەرێ گاره‌ی ئەنجامددەن. پشتی هینگێ ژی چەندین گەڕێن دی بۆ دەڤەرێن بەرێ گاره‌ی و بەرواری باڵا دبەن.

ل رۆژا ١٢/٩/١٩٨٢ سه‌ید سه‌عید ئێکەم چالاکیا خوە یا لەشکەری دگەل ڕێکخراوا شەهید ئەنوەر مایی، ل سەرێ شەریفا ئەنجامددەت. د وێ چالاکیێ دا ئه‌و هێرشی سه‌ر رەبیا دوژمنی یا بناڤێ شێخ سه‌ینی دکه‌ن و ڕه‌بیێ دگرن. دڤێ چالاکیێ دا ئه‌و سەبازەکی دیلدکەن و ئاربیجیەکێ و ٦ کلاشینکۆفان و هەژمارەکا تەقەمەنیان وەکو دەستکەفت دگرن.

پشتی شەهیدبوونا شەعبان غەفارێ به‌رپرسێ ڕێکخراوا وان، ل رۆژا 29.3.1983، ژ به‌ر کو هه‌ژمارا پێشمه‌رگێن ڕێکخراوێ گه‌له‌کا زێده‌ بوو، ژ به‌ر هندێ، پێشمه‌رگێ ڕێکخراوێ دبیته‌ دوو پشک؛ پشکه‌ک هه‌ر دمینیت وه‌ک ڕێکخراوا شه‌هید ئه‌نوه‌ر مایی و شه‌هید عه‌لی ئه‌بابه‌کر ئیسفکی دبیته‌ به‌رپرسێ وێ و شه‌هید مراد قه‌دشی ژی دبیته‌ جێگرێ به‌رپرسی و شه‌هید خالد توفیق ژی دبیته‌ کادرێ ڕێکخستنی-سیاسی یێ ڕێکخراوێ. ڕێکخراوا دووێ ژی ب ناڤێ ڕێکخراوا شه‌هید شه‌عبان غه‌فار تێته‌ دامه‌زراندن و شه‌هید حه‌مدی به‌گ شێلازی دبیته‌ به‌رپرسێ ڕێکخراوێ و نجم الدین کێسته‌یی دبیته‌ جێگرێ به‌رپرسێ ڕێکخراوێ و رزگار کێسته‌یی ژی دبیته‌ کادرێ ڕێکخستنی-سیاسی یێ ڕێکخراوێ. سەید سەعید ژی دچیتە دگەل ڕێکخراوا نوی یا بناڤێ شەهید شەعبان غەفار.

ل رۆژا 18/8/1983 سه‌ید سه‌عید لگه‌ل ڕێکخراوا خوه‌، ڕێکخراوا شه‌هید شه‌عبان غه‌فار، ڕێکخراوا شه‌هید شه‌عبان عومه‌ر و ڕێکخراوا شه‌هید خدر مه‌حمود، کو هه‌رسێ ڕێکخراو سه‌ر ب لژنا ناڤچا ئامێدیێ ڤه‌ بوون، باره‌گایێن هه‌ردوو فه‌وجێن دوژمنی یێن ڕاڤینا و باتیفا سه‌یدا دئێخنه‌ بن ئاگرێ تۆپ و دۆشکێن خوه‌ و د هه‌مان ده‌م ژی دا هێرشی سه‌ر هه‌ردوو ڕه‌بیێن دوژمنی یێن سه‌رێ چیایێ گابنێرکی دکه‌ن و د ئه‌نجامێ هێرشا پێشمه‌رگه‌ی دا 30  له‌شکه‌رێ دوژمنی ل هه‌ر چار بنگه‌هان تێنه‌ کوشتن و هه‌ردوو ڕه‌بیێن دوژمنی تێنه‌ گرتن و دوو له‌شکه‌ر ژی تێنه‌ دیلکرن و تۆپه‌کا 60ملم، ڕه‌شاشه‌کا گرینوف، 3 کلاشینکۆف و کۆمه‌کا فیشه‌ک و گولله‌ و پیدڤیێن دیێن له‌شکه‌ری ژی دبنه‌ ده‌ستکه‌فتێن پێشمه‌رگه‌ی. مخابن دڤێ چالاکیێ دا هه‌رسێ پێشمه‌رگه‌؛ محه‌مه‌د سادق چه‌لکی، جه‌عفه‌ر عبدالرزاق و سه‌لمان ئه‌حمه‌د شه‌هید دبن و 5 پێشمه‌رگه‌ ژی بریندار دبن.

هه‌ردیسان سه‌ید سه‌عیدی دگه‌ل ڕێکخراوا خوه‌، ڕێکخراوا شه‌هید شه‌عبان غه‌فار، سه‌ر ب لژنا ناڤچا ئامێدیێ، شه‌هید شه‌عبان عومه‌ر سه‌ر ب باره‌گایێ لقێ، شه‌هید ئه‌حمه‌د حاجی حسێن و شه‌هید وه‌یسی بانی سه‌ر ب لژنا ناڤچا دهۆک و ڕێکخراوا شه‌هید عه‌لی عه‌بو یا سه‌ر ب لژنا شێخان ڤه‌، ل ئێڤاریا رۆژا 10/4/1984، هێرشی هه‌رسێ ڕه‌بیێن دوژمنی؛ ڕه‌بیا به‌رێ کۆترێ، ڕه‌بیا سه‌رێ ناڤسه‌رێ و ڕه‌بیا کۆرا به‌رێ ته‌حتێ کرن، ل ده‌ڤه‌را مێرگا هه‌له‌فیێ، ل ناڤبه‌را سه‌رسنکێ و ئاشه‌وا ل قۆنتارا چیایێ گاره‌ی. دڤێ چالاکیێ دا پێشمه‌رگه‌ شیان ئێک ژ هه‌رسێ ڕه‌بیا بگرن و تۆپه‌کا 60ملم، ئارپیجیه‌کێ و کلاشینکۆفه‌ک وه‌ک ده‌ستکه‌فت بگرن. لێ مخابن ل ره‌بیا سه‌رێ ناڤسه‌رێ چه‌ند مینه‌کێن ڤالمارا ب پێشمه‌رگاڤه‌ په‌قین و هه‌رچار پێشمه‌رگه‌؛ فریق عثمان عبدالقادر تیله‌ری، ژ ڕێکخراوا شه‌هید شه‌عبان عومه‌ر، ئه‌حمه‌د عومه‌ر ئه‌حمه‌د بێدهی، ژ هه‌مان ڕێکخراوێ، سالح سه‌لیم سالح ئاسهی، ژ هه‌مان ڕێکخراوێ و محه‌مه‌د تاهر سه‌لیم پیرۆ تراوانشی ژ ڕێکخراوا شه‌هید شه‌عبان غه‌فار شه‌هید بوون و 9 پێشمه‌رگێن دی ژی برینداربوون. سەید سەعید لگه‌ل هه‌ڤالێن خوه‌ پێشمەرگێ بریندار محەمەد تاهر سەلیم پیرۆ تروانشی دهەلگرن و ژ جهێ شەڕی دویردئێخن، لێ مخابن ل ئه‌و ل نیڤا چیایێ گارەی ژ ئەگەرێ دژواریا برینێن خوە شەهید دبیت.

دیسان سه‌ید سه‌عید ل رۆژا 29/10/1984 لگه‌ل ڕێکخراوا خوه‌ یا شه‌هید شه‌عبان غه‌فار، ڕێکخراوێن شه‌هیدان ئه‌حمه‌د میرزا و شه‌عبان عومه‌ر ژ باره‌گایێ لقا ئێک، ڕێکخراوێن شه‌هیدان سه‌عید سپینداری، خدر مه‌حمود، عبدالرحمن حه‌مدی، شه‌عبان غه‌فار و ئێکه‌تیا قوتابیان، ژ لژنا ئامێدیێ، پشکداریێ د گرتنا هەر چار رەبیێن دوژمنی یێن؛ دەریکێ کەری، خەلاڤا، چاربیا و باره‌گایێ سریا سەرێ ئامێدیێ دا دکەت، ل سه‌رێ ئامێدیێ.

دڤێ هێرشا پێشمه‌رگه‌ی دا هه‌رچار ره‌بیێن دوژمنی هاتنه‌ گرتن. ده‌ستکه‌فته‌کێ مه‌زن ژی که‌فته‌ ده‌ستێ پێشمه‌رگه‌ی، ژ وان ژی؛ تۆپه‌ 82ملم، 2 تۆپێن 60ملم، 2 ئاربیجی، ڕه‌شاشه‌کا تکتاریوف، 2 ڕه‌شاشێن ئاربیکه‌ی، 28 کلاشینکۆف، ده‌زگایه‌کێ بێته‌لێ لگه‌ل 16 کولاڤێن خوه‌ پاراستنێ ژ چه‌کێ کیمیاوی. لگه‌ل بده‌هان بارێن ده‌واران ژ گولله‌ و ته‌قه‌مه‌نی و پێدڤیێن له‌شکه‌ری. 8 له‌شکه‌رێن دوژمنی ژی هاتنه‌ دیلکرن. مخابن دڤێ چالاکیێ دا هه‌ردوو پێشمه‌رگه‌؛ ئه‌حمه‌د مسته‌فا ئورمانی ژ ڕێکخراوا شه‌هید شه‌عبان عومه‌ر و ئه‌حسین عبدالله‌ دووتازایی ژ ڕێکخراوا شه‌هید عبدالرحمن حه‌مدی، شه‌هید بوون و 7 پێشمه‌رگه‌ ژی برینداربوون، کو حسێن ته‌یار هرۆری و وه‌حید حسێن دێریشکی بگرانی و یێن دی ژی ب سڤکی بریندار ببوون.

دیسان ل هه‌ر ل پایزا ساڵا 1984 و ل مه‌ها چریا دووێ، سەید سەعید لگه‌ل ڕێکخراوا خوه‌ و هنده‌ک ڕێکخراوێن دیێن لژنا ئامێدیی، پشکداریێ د هێرشا سه‌ر هه‌ردوو ره‌بیێن گرێ کانی سێڤکێ و گرێ ڕه‌زێ عه‌ره‌بی دا دکه‌ت، ل هنداڤی قه‌دشێ. مخابن د وێ چالاکیێ دا پێشمه‌رگه‌ نه‌شێن ئارمانجێن خوه‌ بگرن، چونکی به‌رپرسێ ڕێکخراوا شه‌هید ئه‌نوه‌ر مایی، عه‌لی ئه‌بابه‌کر ئیسفکی شه‌هید دبیت.

ل ساڵا ١٩٨٦ سه‌ید سه‌عید پشکداریێ د تۆپبارانکرنا رەبیا کانیا تا دا دکەت.

هه‌ر ل ساڵا ١٩٨٦ نەجمدین کێستەیی دبیتە بەرپرسێ ڕێکخراوا شەهید شەعبان غەفار و پاشی ناڤێ وێ ژی بۆ ڕێکخراوا ١١ ئادارێ دهێتە گهۆڕین. سەید سەعید شەریفی ژی دبیتە ئەندامێ وێ ڕێکخراوێ.

دیسان سه‌ید سه‌عید ل رۆژا 6/12/1986 پشکداریێ د بۆسه‌یا دەشتا چەقەلا دا دکەت، ل سه‌ر ڕێیا بێگۆڤا-کانیماسێ. د وێ چالاکیێ دا  دوو تۆمبێلێن ئیڤایێن له‌شکه‌رێ ئیراقێ دکه‌ڤنه‌ بۆسه‌یا پێشمه‌رگه‌ی و ئه‌و هه‌ردوو ب ئێکجاری تێنه‌ ژناڤبرن. ئه‌فسه‌ره‌ک ولگه‌ل 18 له‌شکه‌ران تێنه‌ کوشتن و 3 له‌شکه‌ر ژی تێنه‌ دیلکرن. هه‌ژماره‌کا باش ژ چه‌کێ ناڤنجی و سڤک وه‌ک ده‌ستکه‌فت دکه‌ڤیته‌ ده‌ستێ پێشمه‌رگه‌ی. ژ وان ژی 1 ئاربیجی، 1 تۆپا 60ملم، ڕه‌ساشه‌کا ئاربیکه‌ی، 10 کلاشینکۆف لگه‌ل ده‌زگایه‌کێ بێته‌لێ. لێ مخابن پشتی هینگێ فرۆکێن هه‌لیکۆپته‌رێن دوژمنی هاتن و ل ناڤبه‌را گوندێن گرکا و خشخاشا چار که‌س شه‌هیدکرن، کو ئه‌ڤه‌ بوون: عزه‌ت سادق بێتکاری/پێشمه‌رگه‌. محمه‌مه‌د نه‌زیف پیرۆ بێتکاری/پێشمه‌رگه‌. سه‌دیق حه‌جی عه‌زیز بێتکاری/به‌رگری مللی و عسمه‌ت مسته‌فا بێتکاری/ به‌رگری مللی.

پشتی ڤێ چالاکیێ سەید سەعید شەریفی پشکداریێ د بۆسه‌یه‌کا دی دکه‌ت، ل ده‌شتا خێراتێ، ل بن ئه‌لکیشکێ، ل سه‌ر ڕێیا بێگۆڤا-کانیماسێ. دڤێ چالاکیێ ژی دا تۆمبێله‌کا ئیڤا دکه‌ڤیته‌ بۆسه‌یا وان و ب ئێکجاری تێته‌ ژناڤبرن و هندی له‌شکه‌رێن تێدا تێنه‌ کوشتن.

 ل بهارا ساڵا 1987 ده‌مێ ڕژێما ئیراقێ  ب هه‌موو چه‌ک و هێزێن خوه‌ هێرشێ دکه‌ته‌ سه‌ر ده‌ڤه‌رێن ڕزگارکری، سەید سەعید شەریفی، لگه‌ل ڕێکخراوا خوه‌ کو ناڤێ وێ ببوو ڕێکخراوا 11 ئادارێ، ل مەها ٤/١٩٨٧ ل میحوەری خشخاشا و تشیشێ، پشکداریێ د بەرسینگرتنا هێرشا دوژمنی بۆ سەر ده‌ڤه‌رێ دا دکەت و بۆ ده‌مه‌کێ درێژ ل وی به‌ره‌ی شه‌ڕێن مه‌زن لگه‌ل جاش و له‌شکه‌رێن دوژمنی دکه‌ن.

دیسان ل  شه‌ڤا4-5 /5/1987 پشکداریێ د داستانا فەوجا سۆتکی دا دکەت، د ڤێ چالاکیێ دا ئەو و نەجمدین کێستەیی ژبۆ رێگریکرنێ ل هاتنا هێزێن دوژمنی ژ لایێ بێگۆڤا ڤە، ل ناڤبەرا تشیشێ و خشخاشا  بۆسەیه‌کێ ل پێشیا هێزێن دوژمنی دا ددانن.

هێزێن پێشمەرگەی ڕۆژا پشتی ستاندنا فەوجا سۆتکی، فرۆکەیەکا دوژمنی دئێخنە خوارێ و چانتکا فرۆکەڤانی دکەڤیتە دەستێ سەید سەعیدی. د وێ چانتکێ دا چەقۆکەك، لایێتەك، هەژمارەکا وێنێن گوندێن ژ لایێ دوژمنی ڤە هاتینە سۆتن تێدابوون.

پاشی ل شه‌ڤا 26-27/5/1987 سه‌ید سه‌عید لگه‌ل ڕێکخراوا خوه‌ هێزێن دیێن پێشمه‌رگه‌ی پشکداریێ د داستانا فرۆکه‌خانا بامه‌ڕنێ دا دکه‌ت و ئه‌و هێرشی سه‌ر ره‌بیێن دوژمنی یێن باشوورێ فرۆکه‌خانێ دکه‌ن و وان دگرن. دڤێ چالاکیێ ژی دا ده‌ستکه‌فت و دیلێن زۆر دکه‌ڤنه‌ ده‌ستێ پێشمه‌رگه‌ی، لگه‌ل دوو زریپۆشان.

دیسان سه‌ید سه‌عید ل شه‌ڤا 12-13/8/1987 لگه‌ل ڕێخکراوا خوه‌ و هێزێن دیێن پێشمه‌رگه‌ی پشکداریێ د داستانا بێبادێ دا دکه‌ت، کو ل وێرێ ژی باره‌گایێ فەوجه‌کا جاشا و لگه‌ل کۆمه‌کا رەبیێن وێ ده‌ڤه‌رێ دگرن و دیسان ده‌ستکه‌فته‌کێ مه‌زن لگه‌ل کۆمه‌کا دیلان دگرن.

ل سپێده‌یا رۆژا ٥/٩/١٩٨٧ هێزه‌کا مه‌زنا دوژمنی ب پشته‌ڤانیا تۆپخانا سه‌رسنکێ هێڕشه‌کا مه‌زن و ژ نشکه‌کێ ڤه‌ دکه‌نه‌ سه‌ر گوندێ ئه‌رادنا ژووری. خه‌لکێ گوندی و به‌رگری مللیێن گوندی شه‌ڕه‌کێ مێرانه‌ دکه‌ن، تا کو هێزێن پێشمه‌رگه‌ی ژ مشارا به‌رواری بالا دگه‌هنه‌ هه‌وارا گوندی و هێزا دوژمنی دۆرپێچ دکه‌ن و ب ئێکجاری ژناڤ دبه‌ن. سه‌ید سه‌عید دگه‌ل ڕێکخراوا خوه‌ و ڕێکخراوێن دیێن پێشمه‌رگه‌ی پشکداریێ د وی شه‌ڕی دا دکه‌ن و نیزیکی 48 ته‌رمێن دوژمنی ل مه‌یدانا شه‌ڕی دمینن و پیشمه‌رگه‌ ده‌ستکه‌فته‌کێ باش ژ چه‌کێ ناڤنجی و سڤک بده‌ست خوه‌ڤه‌ دئینن.

هەر ل ساڵا ١٩٨٧ ل ناڤبەرا سواراتوکا و ئاشاوادا، ئه‌و پشکداریێ د چالاکیا هێرشا سه‌ر ره‌بیا گەلی بێتکارکی یا جاشا دا دکەت. مخابن د وێ چالاکیێ دا هه‌ڤالێ وان پێشمه‌رگێ قاره‌مان سەعید فەخری مایی شەهید دبیت.

ل شەڤا ١٣ لسە ١٤/٩/١٩٨٧ پشکداریێ د داستانا کانیماسێ دا دکەت. سەید سەعید شەریفی د وێ داستانێ دا دگەل نەجمدین کێستەی و شەهید محەمەد سالح بۆتی، عزەدین سەعدۆ و عەلی قادۆ، لگه‌ل هه‌ڤالێن لگه‌ل وان دا، ئه‌و هێرشی سه‌ر رەبیا گرێ سۆر دکه‌ن، ئه‌وا دکه‌ڤیته‌ ده‌روازێ کانیماسێ. ئه‌و ڕه‌بیه‌ ژ ئالیێ له‌شکه‌ری ڤه‌ گه‌له‌کا ئاسێ بوو. ژ به‌ر هندێ بەری لێدانا رەبیێ شەهید محەمەد سالح بۆتی دبێژیتە نەجمدین کێستەیی: پسمام ئه‌ز دبێژم رەبیا گرێ سۆر دێ ئه‌ڤ شه‌ڤه‌ مە سۆرکەت!

هەر وەکی شەهید محەمەد سالح بۆتی پێشبینیکری، ئەو ل وێ رەبیێ شەهید دبیت، نەجمدین کێستەیی، جەعفەر بێسری، تەیب ڕاڤینی و سەید سەعید شەریفی و هەژمارەکا دیا پێشمه‌رگا ژی برینداردبن. سەید سەعید هەم ژ دەستێ خوە و هەم ژی ژ پشتا خوە برینداردبیت.

پشتی ڤێ داستانێ سەید سەعید شەریفی، ژبۆ وەرگرتنا چارەسەریێ، پتر ژ مه‌هەکێ ل مالێ دمینیت.

پاشی ژی ل ئێڤاریا رۆژا ١١/١/١٩٨٨ پشکداریێ د داستانا مه‌زن و بناڤوده‌نگا دێرەلووکێ دادکەت. کو مخابن د وێ داستانێ دا کۆمه‌کا کادرێن له‌شکه‌ری یێن بژاره‌ شه‌هید دبن.

سه‌ید سه‌عید پشتی داستانا دێرەلووکێ بۆ ڕێکخراوا سەلاحەدین دهێتە ڤەگوهازتن و دبیتە ئەندامێ وێ ڕێکخراوێ. پشتی هینگێ بریارا وی بۆ وەرگرتنا بەرپرسیارا وێ ڕێکخراوێ دەردکەڤیت، لێ ئەنفال ب سەر دەڤەرێ دا دهێن.

دەمێ ئەنفال دەستپێدکەن مالا وی ل کانیا بەستێ بوو، ل نێزیک گوندێ خرابه‌ی. دوژمن ده‌ڤه‌را وان ب بۆمبێن کیمیاوی بۆمباران دکه‌ت و سێ که‌سان ل کانیا سویر ل نێزیکی ماڵێن وان شه‌هید دکه‌ت. سەید سەعید دچیتە مالێ، ژ ئەگەرا چەکێ کیمیاوی چاڤێن وی دسۆژن و ڕۆندکا دکەن. پاشی ئه‌و دگەل مال و کەس و کارێن خوە قەستا سنوورێن باکوورێ کوردستانێ دکەن. ئەو نێزیکی ١٠٠٠ کەسا تێهەبوون. ل دەستپێکێ دچنه‌ گوندێ تروانش، پاشی دچنه‌ بەڕ‌هێ ل سه‌ر زیێ و پاشی دچنه‌ گوندێ بیادرێ ل ده‌ڤه‌را چه‌لێ، هەتا دگەهنه‌ گەڤەڕێ. ئەو هەتا مەها ١٢ ل گەڤەڕێ ل بن چادرا دمینن. پشتی هینگێ تێنه‌ ڤه‌گوهاستن بۆ کەمپا مێردینێ.

سەید سەعید و مال و کەس و کارێن خوە هەتا ساڵا ١٩٩٢ ل کەمپا مێردینێ دمینن. پاشی ل ساڵا ١٩٩٢ هەتا ساڵا ١٩٩٤ ل کەمپا سلۆپی دهێنه‌ ئاکنجیکرن. پاشی ل ساڵا 1994 ڤەدگەڕنه‌ کوردستانێ.

سەید سەعید جارەکا دی دبیتە ڤە پێشمەرگە ل لژنا سێمێلێ و پاشی ل گه‌له‌ک جهێن دی ژی پێشمه‌رگاتیا خوه‌ به‌رده‌وام دکه‌ت، تا کو ل سالا ٢٠٠٨ ب پلا نەقیب دهێتە خانەنشینکرن.