حه‌مید شه‌ریف خه‌باتکه‌ره‌کی دێرین و خودانێ کۆمه‌کا شه‌هیدان
سەنتەرێ کۆماتە یێ دەکۆمێنتکران دیرووکا شۆڕشێ د بەردەوامیا بزاڤ و چالاکیێن خوە دا ل ڕۆژا ٢١/١١/٢٠٢٢ ل باژێڕێ زاخۆ دبیتە مێڤانێ پێشمەرگە و تێکۆشەرێ دێرین، شەهیدێ زیندی و بابێ شەهیدی و برایێ سێ شەهیدا و هەلگرێ میدالیا بارزانی مام حەمید شەریف سندی و هەڤدیتنەکا ڤیدیۆیی دگەل وی سازدکەت و دیرووکا خەبات و تێکۆشینا وی تۆماردکەت و ژ ناڤچوونێ دپارێژیت.
مام حەمید شەریف سندی ل ساڵا ١٩٤٥ ل گوندێ قەسرۆکا سندیا هاتیە سەر دنیایێ. ژ بەر نەبوونا قوتابخانان ل گوندێن کوردا، دەلیڤا خواندن و نڤێسینێ بۆ وی چێنەبوویە.
مام حەمید ژ مالباتەکا ناڤدارا دەڤەرا سندیایە، مالباتا وان د کەڤندا پاراستن ل کرستیانێن دەڤەرێ ژ زۆرداریێ و دەستدرێژیێ کریە، لۆما کرستیانێن دەڤەرێ هەردەم رێزەكا تایبەت بۆ وان هەبوویە.
تێکەلیا مالباتا مام حەمیدی دگەل خەباتا شۆڕش و کوردایەتیێ، بۆ پشتی ڤەگەریانا بارزانیێ نەمر ژ ئێکەتیا سۆڤیەتی یا بەرێ زڤڕیت. هینگێ سەیدایێ سالح یوسفی پەیوەندیێ ب رەحمەتیێ بابێ وی دکەت و وی، فەتاح ئاڤدەل، ئەحمەد سادق، ئیسماعیل محەمەد و محەمەد حامد، د ناڤ رێزێن پارتی دیموکراتی کوردستان دا رێکدئێخیت. بابێ مام حەمید دبیتە بەرپرسێ ڕێکخستنێن پارتی ل گوندێ قەسرۆکێ.
دگەل دەستپێکرنا شۆڕشا ئه‌یلولێ، خەلکێ دەڤەرا زاخۆ هەمی ملێ خوە ددەنه بەر شۆڕشێ. وی دەمی دەڤەرا مچولیا یا تێر چەك بوو. ١٦٢ چەکدارێن وێ دەڤەرێ ل مالا بابێ مام حەمیدی کۆمدبن. بابێ مام حەمیدی لەشکەریا لێڤی کربوو و گەهشتبوو پلا ئەفسەریێ د ناڤ سوپایێ ئنگلیزی دا. لۆما بەری بارزانیێ نەمر بگەهیته دەڤەرێ و هەڤدەم دگەل ئازادکرنا زاخۆ، ئه‌و وان چەکداران ل سەر بنەمایێ ڕێکخستنا لەشکەری رێکدئێخیت و سەرپەرشتیا وان دکەت د گرتنا بارەگایێن مەخفەرێن ڕژێمێ ل سەناتێ و ل بەهنوینەیا سندیان. ئەو د وان چالاکیان دا ٢٧ پارچێن چەکێ سڤك، سێ ڕەشاشێن برێن، سێ ئسترلنگ، دوو دەمانجێن سمیت دگەل دووربینەکێ، کو هەتا نوکە ل دەف مام حەمیدی پاراستییە، دەست بسەردا دگرن.
مام شەریفێ بابێ حه‌میدی پشتی ڤان چالاکیا وی چەکی و وان چەکداران دگەل خوە دبەت و دچیتە پێشیا هێزێن هێرشبەرێن ڕژێمێ ل گەلیێ زاخۆ. پشتی دوژمن جارەکا زاخۆ د ئێخیتەڤە ژێر کۆنترۆلا خوە. مام شەریف لگه‌ل عبدالرحمن دینۆ، رەئۆف مەلا جامی شەرانشی، عەبدولکەریم حامد و عەلی هالۆ ڤەدگەرنەڤە گوندێ قەسرۆکێ و خوە ل چییای ئاسێ دکەن. فرۆکێن دوژمنی گوندێ قەسرۆکێ بۆمباران دکەن. قەسرا وان ژی یاکو ژ ٢٤ ژۆران پێكدهات، ڕاستی بۆمبارانا فرۆکێن دوژمنی دبیت. مامێ حەمید شه‌ریفی و خەلکێ گوندی، پێخەمەت پاراستنا گوندی و گوندیان ژ بۆمبارانا فرۆکێن دوژمنی، فشارێ ل سەر بابێ مام حەمیدی چێدکەن، داکو چەکێ ڕژێمێ بزڤرینیت و ئەو و هەڤالێن خوە بهێن خوە ڕادەست بکەن. مام شەریف نەچاردبیت هندەك ژ وی چەکی ل گوندک وجەلالا ڕادەست دکەت. حەجی سادقێ برۆی ژی ل دەڤەرا باتیفا خوە ل چییای دابوو.
پاشی پشتی وان گڤاشتنێن ده‌ردۆرا مام شه‌ریف، عبدالکریم حامد و ره‌ئوفێ مه‌لا جامی، ل هیزاڤا هەڤدوو دبینن و پێکڤە بڕیارێ ددەن کو خوە ڕادەستی ڕژێمێ بکەن. پشتی ئەو ل زاخۆ خوە ڕادەست دکەن، ڕژێم وان دگریت و دبەتە مۆسل. ل مۆسل حاجی ئاغا دبیتە کەفیلێ وان و دهێنە ئازادکرن. وی دەمی بارزانی ل دەڤەرا بەرواریا بوو، خەلك ژ هەمی دەڤەران پەیوەندیێ ب وی دکەن. ڕژێما ئیراقێ ژی دڤێت عەلی هالۆی بتەلێفیت، لۆما ئەو ژی دگەهیتە بارزانی ل دەڤەرا بەرواریا.
ل ساڵا ١٩٦٢ هێز ل دەڤەرێن بەهدینان دهێنە دانا، عیسێ سوار دبیتە فەرماندێ هێزا زاخۆ. مام حەمید ژی دبتە بەرپرسێ هێزا بەرگری مللی ل دەڤەرێ.
ل ساڵا ١٩٦٣ دەمێ شەڕێ چیایێ مەتینا دەستپێدکەت، ئەسعەد خۆشەڤی، نامەکێ بۆ مام حەمیدی دهنێریت و داخوازێ ژ وی دکەت کو ٢٠ زەلاما ژ مرۆڤێن خوە، دگەل خوە ببەت و پەیوەندیێ ب هێزێن پێشمەرگەی بکەت ل چییایێ مه‌تینا. مام حەمید ژی فەرمانا ئەسعەدی جیبجی دکەت. ئەرکێ مام حەمیدی ل چیایێ مه‌تینا دکەڤیتە سەرێ ناڤێلا ل هنداڤی گوندێ ئەرەدنا، لێ بەری ئەو بگەهنه وێرێ، دوژمن دشکێت و به‌رڤ بامه‌ڕنێ و ئامێدیێ و قدشێ ڤه دڕه‌ڤیت، لۆما وی و هێزا د هنێرنه کانی بۆتکێ ل هنداڤی بامه‌ڕنێ، ل شوینا هێزا سەلمانێ حەجی مەحمودێ بامەڕنی. ڕژێمێ بەری هینگێ ئەو جهە ب تانکێن تیزابێ بومبەبارانکربوو، رەبیەکا دوژمنی ژی گەلەك نێزیکی وانە. پشتی ئەو دچنه وێرێ، ڕۆژا پاشتر هێرشا دوژمنی دهێتە سەر وان.
دەمێ مام حەمید ل کانی بۆتکێ، هێڕشا جاشان دچیتە سەر گوندێ وی قه‌سرۆکێ و هندەك ژ مرۆڤێن وی ل گوندی ب دەستێ جاشان دهێنە شەهیدکرن. مام حەمید دچیتە دەف ئەسعەد خۆشەڤی و دا رێ بدەتێ بچیتە گوندێ خوە، دا تشتەکی ژ کەس و کارێن خوە بزانیت، لێ ئەسعەد ژ بەر دژواریا شەڕێ چییایێ مەتینا مولەتێ نادەتێ. پشتی شەڕێ مەتینا ب دوماهی دهێت مام حەمید ڤەدگەڕیتەڤە گوندێ خوه.
ل ساڵا ١٩٦٤ عیسێ سوار بڕیارێ ددەت، کو ژ هەر بابکەکێ عه‌شیرا سندیا پەلەکا له‌شکه‌ری چێکەت. هەر ئێك ژ عبدالرحمن دینۆ، سەعدۆ سالح، فەرحۆ کەشانی و یوسف موسایێ مامێ مام حەمیدی دبنه سەپەل. موسایێ برایێ مام حەمیدی ژی دبیتە جێگرێ وی. مام حەمید نابتە پێشمەرگە، لێ ل بەرپرسیاریا هێزا بەرگری مللی بەردەوام دبیت، ب بەردەوامی ژی ئەرکێ پێشمەرگاتیێ ب پێش مام و برایێ خوە ڤە دگریت.
عیسێ سوار پشتبەستنەکا مەزن د کۆمکرنا پێزانینان و دابینکرنا ئاسایشا دەڤەرێن سنووری ل سەر مام حەمید دکەت.
پشتی ل ساڵا ١٩٧٢ ئالۆزی ل سەر کوشتنا قائیمقامێ شه‌نگالێ دناڤبەرا شۆڕش و ڕژێما ئیراقێ دا دەردکەڤن، شاندەکێ (مکتب تنفیذي) یێ شۆڕشێ دهێتە دەف عیسێ ل زاخۆ و بریارا دامەزراندنا ٤ سریێن بەرگری مللی دهێتە دان.
مام حەمید دبیتە فەرماندێ سریەکێ ژ وان و ب فەرمانا عیسێ ئەرکێ سریا وی دکەڤیتە بەرزیرێ ل باکوورێ زاخۆ و هەتا ساڵا ١٩٧٤ ل سەر ئەرکێ خوە بەردەوام دبیت.
پشتی دەستپێکرنا شەڕی ل ساڵا ١٩٧٤ ل ناڤبەرا شۆڕش و ڕژێمێ دا، ل گەوریا عەمەر ئاغای تۆپەکا دوژمنی ب ناڤ کۆمەکا پێشمەرگەی دکەڤیت. د ئەنجامدا ٧ پێشمەرگە شەهیددبن، ئێك ژوان حەسەنێ برایێ مام حەمیدی بوو. عیسێ بۆ گەهاندنا بەهدارییا خوە، رەمەزان عیسا بارزانی ب پێش خوە ڤە دنهنێریتە مالا مام حەمیدی.
مام حەمید دوماهی جار ل ئەرمشتی عیسێ سواردبینیت. عیسێ د وێ هەڤدیتنێ دا، مام حەمیدی ڤاڕێدکەت و دبێژیتێ: من غەدرا ل تە کری، خەلك ژی یێ بێ وژدانە، ئەگەر خودێ ژ من ئینا، من ل بەرە تشتەکێ مەزن بۆ هەوە بکەم.
مام حەمید ل ئێڤاریا شکەستنا شۆڕشێ، سەردانا ئەسعەد خۆشەڤی دکەت ل گوندێ تنێ نێزیک بامه‌ڕنێ. د ڕێ دا ده‌ما ئه‌و به‌ره‌ڤ باره‌گایێ ئه‌سعه‌دی دچیت. سەبری کو کرستیانەکێ دەڤەرێ یە دبینیت. سەبری مام حەمیدی ئاگەهداردکەت، کو شۆڕش ڕاستی پیلانگێریەکا مەزن بوویە و یا بدوماهی هاتی. مام حەمید باوەرناکەت و خوە ل وی تۆڕەدکەت. لێ پشتی دگەهیتە دەف ئه‌سعه‌د خۆشه‌ڤی، ئه‌و پشتڕاست دبیت کو ئو ئه‌و نووچه ڕاسته. ل وێرێ ئه‌سعه‌د خۆشه‌ڤی بڕنۆیەکێ ددەتە مام حەمیدی و ئەو کەسێن د گەل وی ژی هەر ئێکی ١٠ پاکیتێن فیشەکا ددەتێ و دبێژیتە وی: ئەگەر هەوە ئنیەتا چوونا ئیرانێ یە، پێدڤیە د ماێ ١١ ڕۆژان دا خوە بگەهیننه سنوورێ ئیرانێ، چونکە پشتی هینگێ دێ سنوور هێنه گرتن. مام حەمید دبێژیتێ: ئەگەر ئەز نەهاتمه ئیرانێ ژی دێ ل تورکی چاڤەڕێی فەرمانا وە بم.
مام حەمید ب دلەکێ شکەستی ڤەدگەریتە دەڤەرا زاخۆ، خەلك ل وی خرڤەدن. ئەو ژی ڕاستیێ دبێژیتە خەلکی. مام حەمید دچیتە شەرانشێ، ل وێرێ ئوسمان قازی، مەلا تاها و حەبیب کەلەش ل وێرێ چاڤەڕێی زڤڕینا وی نە، چونکە ئەو ژی ئاگەهداری چ نینن. دەمێ مام حەمید دگەهیتە دەف وان، ژ زاردەڤێ ئەسعەد خۆشەڤی وان ئاگەهداردکەت کو شۆڕش شکەستیە و دبێژتە وان، کو ئیران ژی پشتی ١١ ڕۆژێن دی دێ سنوورێن خوە گریت.
موسایێ برایێ مام حەمیدی پێشمەرگەیە ل چییایێ سپی، هێشتا ئەو ژی ئاگەهداری چ نینە. موسا درەنگی شەڤ دگەل ٥٠ پێشمەرگا ڤەدگەڕیتە گوندی، ئه‌و گەلەکێ پوسیدە و دامایی بوو، دەمێ مام حەمید وی دبینیت، پسیار ژێ دکەت کا وی چیە. موسا ب چاڤێن تژی ڕۆندکڤە دبێژیتە مام حەمیدی:کو عیسێ سوار هاتە شەهیدکرن. موسا دبێژیت ئەڤە ئەم ژی یێن هاتین ڤێرە، دا بزانین کا دێ چکەین و کیڤە چین.
عەبدی ئاغا، بشار ئاغا، ئوسمان قازی، مەلا تاها و هەمی گرگرێن دەڤەرێ ل شەرانش کۆمدبن. ئەو د هنێرنه دویف مام حەمیدی ژی ڕا، دا کو پێکڤە بڕیارەکێ بدەن. رەئیا هەمیا ئەوە کو خوە ڕادەستی ڕژێمێ بکەن. مام حەمید ڤەدگەڕیتە مال و دبێژیتە کەس و کارێن خوە: چەکێ خوە یێ پاقژ ڤەشێرن و یێ بێسەروبەر ژی ڕاکه‌ن، حالێ مە ب حالێ خەلکی هەمیێ، ئەم ژی دێ خوە ڕادەستی ڕژێمێ کەین. مام حەمید و مرۆڤێن خوە دچنه زاخۆ و ل وێرێ ب چەکێ خوەیێ بێسەروبەر ڤە خوە ڕادەستی ڕژێمێ دکەن.
پشتی مام حەمید ڤەدگەڕیتە مال، ب چەند ڕۆژا ڕەشەکێن ڕژێمێ ب چەند ترۆمبێلا ب سەر مالا وی دا دگرن و مام حەمیدی دگرن. دەمێ مام حەمیدی دگرن، دەمانجەکا سمیت یا دبەر شویتکا وی ڕا، لێ کەس نابینیت. مام حەمید ب هێجەتا گهوڕینا جلکێن خوە دچیتە د ژوورڤە و دەمانجێ دهێلیتە د خانی ڤە و پاشی دەردکەڤیت. رەشەکێن ڕژێمێ مام حەمیدی د هاڤێژنە د پشتا زیلەکێ دا و وی دبەنە بارەگایێ ئەمنا زاخۆ. پشتی هینگێ ب دوو ڕۆژا وی دبەنە ئەمنا دهۆکێ. ل بارەگایێ ئەمنا دهۆکێ، هەر بێنەکێ کەسەك دهێتە دەف مام حەمیدی و پسیارا ناڤێ وی دکەت. دەمێ ئەو ناڤێ خوە دبێژیتە وان ئەو دبێژنە وی، ئاها تویی حەمید شەریف. ل دوماهیێ ئەفسەرەك ب جلوبەرگێن سڤیل دهێتە دەف وی و دەمانجا خوەیا سمیت د کەتە د سەرێ مام حەمیدی ڕا و وی ددەته بەری خوە و دبەتە د ژوورەکێ ڤە.
ئەو ئەفسەر ڤەکۆلینێ دگەل مام حەمیدی دکەت و ژێ دپرسیت کا وی چ پەیوەندی دگەل مەلا مستەفای و ئیدریس بارزانی هەیە؟ پاشی دبێژیتە مام حەمیدی: پشتی برایێ تە هاتیە (کوشتن) تو یێ چوویە ده‌ف بارزانی و وی دوو تڤەنگێن داینە تە، ئەفسەر پسیارا وان تڤەنگا ژ مام حەمیدی دکەت. ل دوماهیێ ئەو ئەفسەر هەمی ئەو ڕوودانێن کو ل زاخۆ قەومین ددەتە پال وی و عبدالرحمن سالح.
پاشی ئەمنا دهۆکێ مام حەمیدی پشتی دوو ڕۆژا ئازاددکەت، لێ پلانەکێ ژبۆ ژناڤرنا وی ددانیت. دەمێ مام حەمید دهێتە ئازادکرن، ئه‌و دچیتە ئۆتێلا ڕه‌شید مزووری ل دهۆکێ. وی دڤێت خوارنەکێ بخۆت و سەر و جلکێن خوە بشۆت و بچیتە مال، لێ ڕەشید مزووری رێ نادەتە وی کو بچیت، بەلکو وی ل دەف خوە دهێلیت. ڕەشیدی دزانی کو ئەمنا ڕژێمێ وەسا ب ساناهی دەست ژ مام حەمیدی بەرنادەن. هەر وەکی ڕەشید مزووری پێشبینیکری، ڕەشەکێن ئەمنا ڕژێمێ چاڤەرێی دەرکەتنا مام حەمیدی بوون ژ ئۆتێلێ، دا بڕێڤە دربەکی لێبدن و بکوژن و ل دوماهیێ بێژن یێ ڕەڤی. لێ ب مانا وی ل ئۆتێلێ، پلانا دوژمنی سەرناگریت. ل نیڤا شەڤێ ڕەشەکێن ڕژێمێ ب سەر ئۆتێلێ دا دگرن و مام حەمیدی دگرنەڤە و وی ب (تاوانا) ڕەڤینێ گونەهباردکەن و دبەنە ڤە زیندانا ئەمنا دهۆکێ.
مام حەمید پشتی ٤٦ ڕۆژا دزیندانێ دا دمینیت، لێ پشتی ئەو دانپێدانێ ب چ ناکەت و جاراللە مزووری بەڕه‌ڤانیێ ژێ دکەت و دبیتە کەفیلێ وی، ئه‌و دهێتە بەردان.
پشتی مام حەمید دگەهیتە مال ب هەفتیەکێ، ل ٤/٧/١٩٧٥ ئەو و برایێن خوە موسا، محەمەد، تەمەر، شەریف و سلێمان، چەکێ خوەیێ ڤەشارتی دهەلگرن و پێکڤە دچنه گوندێ بلکا ل کوردستانا باکوور. بڕیارا وان ئه‌و بوو کو بچنە ئیرانێ، لۆما چەکێ خوه ل دەف هندەك دۆستێن خوە دهێلن و بەرەڤ ئیرانێ بڕێدکەڤن. ئەو دگەهنە گوندێ سێرۆ ل سه‌ر سنوورێ باکوور و رۆژهه‌لات و دبنە مێڤانێن جانگیر ئاغایی. پێش وەخت کاك ئیدریس بارزانی و ئەسعەدێ خۆشەڤی جانگیر ئاغا ئاگەهدارکریە کو هەر کورده‌کێ بهێتە ئیرانێ ڕژێما شاهێ ئیرانێ دێ وان گریت و ڕادەستی رژێما ئیراقێ که‌ن. جانگیر ئاغا، مام حەمید و برایێن وی ب بڕیارا ڕژێما ئیرانێ ئاگەهداردکەت و دبێژیتە وان: کو حەجی قادۆ گراڤی ژی، ب ڤی رەنگی یێ رادەستی ڕژێما ئیراقێ کری.
مام حەمید برایێن خوە پاریەکێ نانی دخۆن و جارەکا دی ڤەدگەڕنەڤە گوندێ بلکا.
ژ به‌ر ڤێ ئه‌گه‌رێ ئه‌و نه‌چار دبن کو جاره‌کا دی ب قه‌چاغی چدناڤ باکوورێ کوردستانێ ڕا خوه بگه‌هیننه ڤه گوندێ بلکا ل سه‌ر سنوورێ ناڤبه‌را زاخۆ-سلۆپی. لێ مخابن چەکێ وان ژی نه‌مابوو، لۆما ئه‌و نەچاردبن سەر و ژ نوی چەکی بۆ خوە بکرنەڤە. مام حەمید برایێن خوە ب قەچاخی دچنە دەڤەرا سندیا دا کەس و کارێن خوە ل سەر چارەنڤیسێ خوە ئاگەهدارکەن. هێشتا چ بەحسێ شۆڕش و ڕێکخستنێ نینە، ئەو ب قەچاخی ب تنێ ل دەڤەرێ دمینن.
ل ناڤبەرا مەها ١١ و١٢ ساڵا ١٩٧٥، سولاقە دێرەشیشی و ئیبراهیم شەرانشی و محەمەد رەئوف جانگیر پەیوەندیێ ب مام حەمید و برایێن دی دکەن. لێ ژ به‌ر کو ئه‌و ژیانا وانا ب قه‌چاغی ل وان سه‌ر سنووران گه‌له‌کا ب مه‌ترسی بوو، لۆما وان شیانێن ژیانا قەچاخی وەکی مام حەمید و برایێن وی نینن، ژبه‌ر هندێ ئەو هەرسێ بڕیارا خوه دده‌ن و دچنه سوریێ.
نامەیه‌ك ژ مام جەلال و عەلی شه‌نگالی دگەهیته مام حەمیدی
دەمێ سولاقە و ئیبراهیم و محەمەد رەئوف دگەهنه سوریێ، ئەو حسێن بابە شێخ و بۆزێ میرا ل قامشلۆ دبینن و وان ئاگەهداردکەن کو مام حەمید و هەر چار برایێن خوە، چەکدارن و بتنێ ب قەچاخی ل کوردستانێ مانە.
حسێن بابە شێخ و بۆزێ میرا، محەمەد رەئوف ل دەف خوە دەستەسەر دهێلین، سولاقه‌ی و ئیبراهیمی ژی دگەل نامەیه‌کێ بۆ مام حەمیدی دهنێرنه کوردستانێ.
مام حەمید و برایێن خوە دچنه گوندێ بلکا یێ باکوور، کەسەکێ کرستیان وێ نامێ ل بلکا دگەهینیته وی و دبێژیتە وی کو: ئەڤە مه‌هەك پترە سولاقه و ئیبراهیم یێ ل وی دگەڕهن. مام حەمید نامێ ڤەدکەت و ددەت خواندن، دبینیت کو رەخەکێ وێ نامێ مام جەلال نڤێسیە و رەخەکێ دی ژی عەلی شه‌نگالی نڤێسیە.
مام جەلال د نامێ دا نڤێسیە، کو وی و هەڤالێن خوە ئێکه‌تیا نیشتمانی (اتحاد وطني) دامەزراندیە و داخواز ژ مام حەمیدی کریە، ئەو وەکو مالباتەکا خەباتکەر و شۆڕشگێڕ جهێ خوە د ناڤا حزبا وی دا بگرن. عەلی شه‌نگالی ژی، دناما خوه ب توندی هێرشکریە سەر سه‌رکردایه‌تیا پارتی، ئه‌وا وی بناڤێ (قیادا عەشائیری) بناڤ کری.
مام حەمید، مام جەلالی نانیاسیت، لێ دزانیت کو عەلی شه‌نگالی، بەری شکەستنا شۆڕشێ، بەرپرسێ لقا ئێك بوو. داکو مام حەمید ڕاستیا وێ نامێ و تشتێن وان نڤێسی بزانیت، وی دڤێت بچیته سوریێ دا عبدالرحمن سالح ببینیت، کو وی دەمی ئەو یێ ل سوریێ بوو، ل دوماهیێ ژی بڕیارێ ددەت کو بچىیته سوریێ.
مام حەمید و برایێ خوە موسا به‌رێ خوه دده‌نه سوریێ، پاشی ئه‌و ناما مام جەلال و عەلی شه‌نگالی دگەل خوە دبەن و دچنە دەف عبدالرحمن سالح ل سوریێ. سولاقه و ئیبراهیم شەرانشی و مەلا عەبدالغنی شەرانشێ ژی دگەل وان دچن.
عبدالرحمن سالح، مام حەمیدی ل سەر ڕەوشا سیاسی یا وێ قۆناغێ ئاگەهداردکەت و دبێژیتە وی:ڕاستە مام جەلالی حزبەكا ب ناڤێ ئێکەتی نیشتیمانی کوردستان دامەزراندیە، ئو ل ڤێرێ ل سوریێ ژی ڕێکخستنێن مە هێشتا یێن د ناڤێك دا. هه‌روه‌سا عبدالرحمن سالح، مام حەمیدی ئاگەهداردکەت کو خولەکا لەشکەری یا ل شامێ ڤەبووی و داخوازێ ژ وی دکەت، کو پشکداریێ تێدا بکەت.
بەرپرسێ وێ خولێ نه‌قیب ئیبراهیم عەزۆیە. وی دڤێت مام حەمید و موسایێ برایێ وی ببەتە دەف مام جەلال ل شامێ، مەلا عبدالغنی و عبدالرحمن سالح ژی دگەل وان دچن. عبدالرحمن سالح دبێژیتە مام حەمیدی: هەر داخوازەکا مام جەلال ژ تە بکەت، بێژێ بەلێ، دا ئه‌م ئنیەتێن وی بزانین کانێ وان چ ل به‌ره.
دەمێ ئەو دگەهنه شامێ، ئیبراهیم عەزۆ تێلەفۆنا مام جەلال دکەت و وی ب گەهشتنا مام حەمید ئاگەهداردکەت. ئیبراهیم عەزۆ ل سەر داخوازا مام جەلالی، مام حەمید و هەڤالێن وی دهنێریتە بارەگایێ وی.
مام حەمید د ڤێ دیدارێ دا دبێژیت:ئارمانجا مام جەلال ژ هنارتنا نامێ بۆ من ئەو بوو، کو ب ڕێیا من جهێ پێ خوە ل دەڤەرا بەهدینان بکەت، وی گەلەك ب بەژن و بالا من و مالباتا مە گۆت. وی پسیارکربوو، کا کی دێ شێت ب ڤی ڕۆلی ڕابیت، وەدیارە هندەکا ناڤێ من دابوو وی. ده‌مێ ئه‌م دگه‌ل وی ڕوینشتین، وی هندەك نامیلکەیێن ئێکەتیێ ل سەر شکەستنا شۆڕشێ نڤێنسیبوون، دانەف من و موسای. وی داخواز ژ عەلی شه‌نگالی کر کو وان نامیلکا، بۆ مە بخوینیت و شرۆڤەبکەت. عەلی شه‌نگالی ژی ئەو نامیکە بۆ مە خواندن و شرۆڤەکرن و هێرشێن توند کرنە سەر بارزانیێ نەمر. ژبلی عەلی شه‌نگالی، عادل مراد ژی ئامادەیی ڕوینشتنا مە دگەل مام جەلالی بوو.
مام جەلال دبێژیتە مام حەمیدی، دەرگەهێ شۆڕشێ زاخۆ یە و تو کلیلکا وی دەرگەهیی.
مام جەلال، مام حەمید، موسای، مەلا عبدالغنی و عبدولرەحمان سالح، مه‌هەکێ ل دەف خۆ دهێلیت و ڕۆژانە وان دبینیت و سمینارەکێ بۆ وان دخوینیت.
پشتی هینگێ مام جەلال، چانتکا مام حەمیدی ژ بەلاڤۆکێن ئێکەتیێ تژی دکەت و هەژمارەکا ناما بۆ مختار و کەسایەتیێن وان گوندێن سنووری یێن باکوورێ کوردستانێ دنڤێسیت و داخوازێ ژ مام حەمیدی دکەت کو بچیتەڤه کوردستانێ. مام جەلال دبێژیتە مام حەمیدی:تو نوینەرێ مەیی ل کوردستانێ، هەمی چەك و مەفرەزێن پێشمەرگێن مە دێ ب ڕێیا تە هێنە کوردستانێ و داخوازێ ژ وی دکەت، ڕێکخستنێن ئێکەتیێ ل کوردستانێ ئاڤابکەت.
مام حەمید و موسا و مەلا عبدالغنی و عبدالرحمن سالح ڤەدگەرنه ڤه قامشلۆ. ل وێرێ عبدالرحمن سالح مام حەمیدی ئاگەهداردکەت کو وی، ناما مام جەلال و عەلی شه‌نگالی بۆ کاك ئیدریسی هنارتیە ئەمریکا. مام حەمید بەری ڤەگەڕیته کوردستانێ ل قامشلۆ، محەمەد خالد بۆسەڵی ژی دبینیت. عبدالرحمن سالح ١٣ نامێن کاك ئیدریس بارزانی ژی ددەته‌ف مام حەمیدی و داخوازێ ژ وی دکەت، وان ناما دگەل ٣٠ دیناران بگەهینیتە مەلا حسێن ئاڤدەلێ بێزهی، بابێ شەهید ڕێبەری. هه‌روه‌سا عبدالرحمن سالح وی ئاگەهدار ژی دکەت کو وان سەید حەمیدێ هنارتیه ئیرانی، هەر دەمێ ڤەگەڕیا دێ پەیوەندیێ ب وی کەت.
حسێن بابە شێخ و بۆزێ میرا، هاریکاریا مام حەمیدی دکەن و وی ل سنووری دەربازدکەن بۆ کوردستانێ.
مام حەمید و موسایێ برایێ خوە دزڤڕنه ڤه کوردستانێ و دچنه گوندێ بلکا. پشتی مه‌هەکێ، داخوازەك بۆ وی دهێت، کو بچیتە مالا مەلا عەبدولەتیف ل باتمانێ. پشتی ئه‌و دگه‌هیته باتمانێ مەلا عەبدولەتیف وی ئاگەهدار دکەت کو ئەڤه دوو مه‌هە جەهوەر نامق و کەریم شه‌نگالی یێ ل وی دگەڕهن.
مەلا عەبدولەتیف بەرپرسێ PDK یا باکوورێ کوردستانێ بوو. پاشی ئەو مام حەمیدی دگەل پیرەمێرەکی د هنێریتە مدیادێ، پاشی ژ وێرێ دچنە ئێسترێ. ل ئێسترێ دچنە مالەکا ئاخێ یا دوو ژووری. کەسەك ب ناڤێ حسێن حەسۆ خوە د مام حەمیدی وەردکەت. مام حەمید ل وێ مالێ جەهوەر نامق و کەریم شه‌نگالی دبینیت. عبدالرحمن گوندکی ژی دهێتە وێرێ.
جەهوەر و کەریم، بەیانا ئێکێ یا شۆڕشا گولانێ، ئەوا ب خەتدەستێ جەنابێ سەرۆك مەسعود بارزانی ل ژێر ناڤێ کوردستان مه‌یدانا ڕاسته‌قینه‌یا خه‌باتێ یه (کوردستان الساحة الحقیقیة للنضال...) هاتیە نڤێسین، ڕادەستی مام حەمیدی دکەن و داخوازێ ژ مام حەمیدی دکەن کو بچیتە کوردستانێ و دەست بڕێکخستنێ بکەت و وێ بەیانێ ژی بەڵاڤبکەت.
جەهوەر نامق و کەریم شه‌نگالی هەمی دەستهەڵاتێ ددەنه مام حەمیدی و وی ئاگەهداردکەن، کو هەمی پەیوەندی دگەل ڕێکستنا دێ ب ڕێیا وی بن.
مام حەمید وان ناما دگەل ٣٠ دیناران دگەل ئیسماعیل ئەحمەدێ خوارزایێ خوە دهنێریتە دەستێ مەلا حسێن ئاڤدەلێ بێزهی ل زاخۆ. مەلا حسێن ل دەستپێکێ وان ناما وەرناگریت، لێ پشتی دزانیت کو مام حەمیدی ئەو نامە یێن هنارتین باوەریا خوە ب وی دئینیت و ناما ژ وی وەردگریت.
د هه‌مان ده‌م دا مام حه‌مید که‌سه‌کێ دی بناڤێ سه‌لیم کو ئه‌و ژی هه‌ردبیته خوارزایێ وان، وێ به‌یانا ئێکێ یا شۆڕشێ، دده‌ته ڤێ و سەلیم وێ بەیانێ دبه‌ت ب پرا دەلال ڤە دهەلاویسیت، هەروەسا ل بەر دەرێ بنگەهێ پۆلیسێن زاخۆ و هندەك جهێن دی ژی بەڵاڤدکەت. ئه‌ڤه بۆ جارا ئێکێ بوو به‌ڵاڤۆکێن شۆڕشێن ل زاخۆ بێنه به‌ڵاڤکرن، ل شۆرشا گولانێ.
مام حەمید دەست ب ئاڤاکرنا تۆڕێن ڕێکخستنا پارتی ل دەڤەرا زاخۆ دکەت. گوندێ بلکا دبیتە بارەگا و ناڤەندا کار و چالاکیێن وی. پەیوەندیا وی ژی دگەل جەهوەر نامق و کەریم شه‌نگالی بەردەوامە.
ئەو کادرێن سەرکردایەتیا کاتی یێن سه‌رکردایه‌تیێ دڤێت بۆ دەڤەرێن جودا جودایێن کوردستانێ بهنێریت، ب تایبه‌تی یێن ده‌ڤه‌را زاخۆ، ب ڕێیا مام حەمیدی دهێتە ئەنجامدان. مام حەمید، مەحمود ئێزدی، عادل مزووری، عەبدوللا سالح و جاسم جاسم ل دویف ڕاسپاردا سەرکردایەتی د هنێریته دەڤەرێن شێخان، دهۆك و زاخۆ.
پاشی حەمید مەفرەزەکا ٢٥ کەسی چێدکەت، ٤ ژ وان برایێن وی بخۆنه. ئه‌و دچینە بێرمانێ ل دەف جەهوەر نامق. مام حەمید دبێژیتە جەهوەر نامقی، ئەم ب کارێ پۆست و بەڵاڤۆکا ڤه بێزاربووینە، پێتدڤیە ئێدی مەفرەزێن مە بچنە کوردستانێ و چالاکیێن لەشکەری ئەنجامبدەن.
پشتی مام حەمید رەزامەندیێ و ڕێنمایان ژ جەهوەر نامق وەردگریت، ئەو و مەفرەزا خوە وعەبدوللا سالح دچنە کوردستانێ.
مام حەمید ل ٢٥گولانا ساڵا ١٩٧٦ ئێکەم چالاکیا خوە یا لەشکەری ل گەلیێ سەناتێ ئەنجام ددەت. د وێ چالاکیێ دا ئه‌و هەژمارەکا پۆلیسێن رژێمێ دکوژن و ٤ پارچێن چەکی ژی رادکەن.
پشتی ڤێ چالاکیێ ل نێزیکی گوندێ قەسرۆکێ بۆسەیه‌کێ ل پێشیا ترۆمبێلەکا لەشکەری ددانن، هەژمارەکا سەربازێن ڕژێمێ دکوژن و چەکێ وان ژی ڕادکەن.
مام حەمید بەرپرسیاریا لەشکەری و ڕیکخستنا دەڤەرا زاخۆ دکەت و سێ بارەگایێن دەمکی ل دەڤەرا پسئاغا ڤەدکەت.
عەبدوللا سالح بۆ دەڤەرا بەرواری بالا دهێتە ڤەگوهازتن، سەرکردایەتیا هەرێما ئێك ١٠-١٥ پێشمەرگێن خەلکێ رۆژئاڤایێ کوردستانێ دی دگەل چەك و تەقەمەنی بۆ مام حەمیدی دهنێریت. ئەو پێشمەرگە شەهرەزایی ئەندازیاریا مینان بوون. مام حەمید ژ وان پێشمه‌رگا ب تنێ محەمەد سەعید سوری دگەل خوە دهێلیت.
مام حەمید و مەفرەزا خوە ل ساڵا ١٩٧٧ ب بڕیارا سەرکردایەتیا کاتی سێ مینا ل بەهبوینا سندیا و دەشتەتەخێ ل پێشیا ترۆمبێلێن ڕژێمێ ڤەددەن.
هەر ل ساڵا ١٩٧٧ مام حەمید دگەل کەریم شه‌نگالی و حەجی قادۆ گراڤی و وان ١٤ شەهرەزایێن ئەندازیاریا مینان، گەڕەکێ دبەنە دەڤەرا زاخۆ. ئەو دچنه گەلیێ کویشەی و پاشی دچنه پشتا خامتیری. کەریم شه‌نگالی د ڤێ گەڕێ دا نەخشەیەکی، ب هەمی بنگەهـ و بارەگایێن لەشکەری یێن ڕژێمێ، ئەوێن ل وێ دەڤەرێ چێدکەت.
پشتی کەریم شه‌نگالی ڤەدگەڕیت، مام حەمید درێژیێ ب گەڕا خوە ل دەڤەرێ ددەت. ئەو و مەفرەزا خوە دچنه بەهونوینا سندیان، ل ویرێ مینەك ل بن پیێ مام حەمیدی دپەقیت، دئەنجامدا ئەو ب گرانی ژ پیێ خوە بریندار دبیت، ئیسفێ عەبدوی و ئیسف عەلی ژی ب سڤکی بریندار دبن.
مام حەمید بۆ وەرگرتنا چارەسەریێ بۆ مێردینێ دهێتە هنارتن. بەری چارەسەریێ وەربگریت، میتا تورکا پێ دزانیت و ل وی دگەڕهن دا وی بگرن. عبدالرحمن گوندکی و مستەفایێ کۆکێ د دویف وی دا دچن و وی ژ مێردینێ دڕه‌ڤینن و دبەنە قزلتەپە. پیێ مام حەمیدی ژ بێ چارەسەری دڕزیت. پشتی هینگێ ئەفسەرەکێ دختۆر وی چارەسەر دکەت. دیسا ژاندورمێن تورکا ل وی دگەڕن، عبدالرحمن گوندکی و مستەفا وی ل گوندێن دەڤەرا مێردینێ ڤەدشێرن.
مام حەمید پشتی سێ مه‌ها ڤەدگەڕیته‌ڤه گوندێ بلکا، لێ هێشتا برینا وی چارەسەر نەبوویە. جابەك دگەهیتە وی کو مەفرەزا عبدالرحمن سالح و موسایێ برایێ وی یا کەتیە سەر مینا، مام حەمید ب برینداری ڤە دگەل هەردوو برایێن خوە ل تانا وان دچن. ئەو ژی جاره‌کادی دکەڤنه‌ڤه سەر مینان و هەردوو برایێن وی، تەمەر و سلێمان ژی برینداردبن.
ل وێرێ مام حەمید دزانیت کو عبدالرحمن سالح یێ شەهید بووی و موسایێ برایێ وی ژی یێ برینداربووی.
ئه‌و بریندارێن خوه ڕادکه‌ن و دئینن به‌ره‌ڤ باکوور ڤه دا کو ببنه جهه‌کی برینێن وان ده‌رمان بکه‌ن، وان ل سنووری ل تۆمبێله‌کێ سوار دکه‌ن. لێ ل سێ گرکێن تایێ دکەڤنه بۆسه‌یا ژاندورمێن تورکا. ژاندورما وان ژ ترومبێلێ دئینە خوارێ. برینا تەمەر یا گرانبوو، ئەو ل سەر داربەستێ یێ سووری ترۆمبێلێ کری. ئەو نەچار دبن، تەمەری ب داربەست ڤە ژ ترۆمبێلێ بینە خوارێ. پاشی ب هه‌لو و بزاڤێن خه‌لکێ دلسۆز تێنه به‌ردان و و دچنە گوندکێ مەلێ ل ده‌ڤه‌را شه‌رنه‌خێ. جەهوەر نامق ژی ژ سوریێ د هێتە وێرێ.
هه‌لبه‌ت مام حەمید و هەرسێ برایێن خوە د مهەکێ دا برینداردبن.
پشتی وەغەرا دوماماهیێ یا بارزانیێ نەمر، جەهوەر نامق هەژمارەکا پێشمەرگا دگەل خوە دبەت و دچیتە ڕۆژهەلاتێ کوردستانێ. مام حەمید و موسا و عەبدوللا سالح ژی دگەل کەریم شه‌نگالی دچنه رۆژهه‌لاتێ کوردستانێ.
سەرۆك مەسعود بارزانی پسیارا مام حەمیدی دکەت و داخوازا دیتنا وی دکەت. دەمێ مام حەمید دچیتە دەف جەنابێ سەرۆکی، سامی عبدالرحمن و جەهوەر نامق ژ دەف سەرۆکی دەردکەڤن. ئەو دبێژنە مام حەمیدی، کو سەرۆك یێ پسیارا وی دەکەت و دبێژنە وی، کو وان هەمی تشت گەهاندیە سەرۆکی.
دەمێ مام حەمید و موسایێ برایێ خوە دچنە دەف سەرۆکی، سەرۆك دەستەکێ مام حەمیدی و دەستەکێ موسای دگریت و دبێژیتە وان: ئەز نزانم هەوە دانم کیڤە، هەوە دانم سەر ملێن خوە هێشتا بۆ خزمەتا هەوە کێمە، ئەز نزانم بەرامبەر خزمەت و خوینا هەوە بۆ هەوە چ بکەم. سەرۆك بۆ فراڤینی وان ل دەف خوە دهێلیت.
مام حەمید نەساخ دبیت و شەش مه‌ها ل ئیرانێ دمینیت. چارەسەریا وی ل ئورمیێ ناهێته‌کرن، ئەو نەچار دبیت بچیتە کەرەج. ئەو ل وێرێ کاك ئیدریسی دبینیت، کاك ئیدریس دگەل وی دچیتە تەهران و دچیتە وەزارەتا جەنگا ئیرانێ و رەزامەندیا وەزیری وەردگریت داکو مام حەمید ل نەخوەشخانا لەشکەری یا سەر ب وەزارەتا جەنگا ئیرانێ ڤە بهێتە چارەسەرکرن. مام حەمید ب هاریکاریا کاك ئیدریس بارزانی ل وێرێ دهێنەتە چارەسەرکرن.
پشتی کۆنگرێ ٩ێ جەهوەر و کەریم ل کەرەج مام حەمیدی دبینن، ئەو دبێژنە وی: مە خزمەتا تە گەهاندیە کاك مەسعودی، ئەم ژی دێ هەیامەکی چین. مام حەمید دەمێ بۆ جارائێکێ جەهوەر و کەریمی ل ئێسترێ دبینیت گۆتبوو: وان دەست ژ مللەتی بەرنەدەن، چونکە ئەز دزانم، پاسپۆرتێن هەوە یێن دبەریکا هەوە دا، هەر دەمێ ل هەوە نەخوەش هات، دێ مللەتی هێلن و چن. مام حەمید بیرا وان ل وێ ئاخفتنا خوە دئینیت. جەهوەر و کەریم د بەرسفا مام حەمیدی دا دبێژن: ڤانا پێچێنابێت شۆڕشێ بکەن، پشتی دەمەکێ کێم دێ زڤرینەڤە، هوین ژی خوە نەدەنە کوشتن هەتا ئەم دزڤڕین. پاشی پسیارا مام حەمیدی دکەن کا دێ ئەو چ کەت!
پشتی کۆنگرێ، سەرۆك مەسعود بارزانی دگەل کادرێن لەشکەری یێن شۆڕشێ کۆمدبیت، کو مام حه‌مید ژی ئێک ژ وان بوو. سه‌رۆک وان هانددەت کو بچنه کوردستانێ و درێژیێ ب شۆڕشێ و خەباتا خوە بدەن.
ل ساڵا ١٩٨٢ موسایێ برایێ مام حەمیدی ل گرکاشا ب دەستێ حزبا دیموکراتا کوردستان-ئیران دهێتە شەهیدکرن. شەهیدبوونا موسای کو برایێ دووێ یێ مام حەمیدیە، پشتی شەهید حەسەنی شەهید دبیت، کاریگەریەکا مەزن ل سەر مام حەمیدی دکەت.
مام حەمید د ڤێ دیدارێ دا دبێژیت:ژبەر کێمخەمیا هندەك بەرپرسێن پارتی یێن لەشکەر ل شنۆ موسا هاتە شەهیدکرن. ئەو ل سەر ڤێ مەسەلێ گەلەك تۆڕەدبیت و دەستڤەکێشانا خوە ژ پارتی پێشکەشدکەت.
گەلەك هەوڵێن مەزن دهێنە دان، دا مام حەمید ڤەگەڕیتە ڤە ناڤ پارتی، لێ هەمی دبێ سۆد بوون، چونکە مەرجێ مام حەمیدی سزادانا وان کەسا بوو، ئەوێن کێمخەمی د شەهیدکرنا موسایێ برایێ وی دا کری.
سامی عبدالرحمن تۆڕەبوونا مام حەمید ب دەرفەت دزانیت، لۆما ئەو هەر زوی پەیوەندیێ ب وی دکەت. مام حەمید ژی ب کەس و کارێن خوە ڤە ژ ئەنجامێ تۆرەبوونێ پەیوەندیێ ب پارتی گەل دکەن و پەیوەندیا وی دگەل پارتی دهێتە بڕین.
پشتی وەغەرا دوماهیێ یا کاك ئیدریس، مام حەمید ژبۆ گەهاندنا بەهداری و سەرخوەشیا خوە، دچیتە مالا سەرۆک مه‌سعود بارزانی ل سلێڤانا. سەرۆك ب دیتنا مام حەمیدی گەلەك کەیف خوەشدبیت و ب گەرمی پێشوازیێ ل وی دکەت.
سەرۆك بارزانی د گوهێ کاك نیچیرڤان دا دئاخڤیت، پشتی هینگێ عەلیێ خەلیل ل سەر فەرمانا سەرۆکی دچیتە دەف مام حەمیدی و دبێژیتە وی، سەرۆکی دڤێت سوبەهی تە ببینیت. ئێك ژ وان کەسێن مام حەمید ل سه‌ر بێخه‌می و سستیێ گوننەها شەهیدبوونا برایێ خوە موسای ئێخستیە ستوهێ وی عەلیێ خەلیلە، لۆما مام حەمید ڕازی نابیت. پشتی هینگێ رەشید عارف ژی ب هەمان مەبەست دچیتە دەف وی، لێ دیسا مام حەمید، بێی سزادانا وان کەسا ڕازی نابیت.
مام حەمید د ناڤ پارتی گەل دا دبیتە ڕاوێژکارێ سامی عبدالرحمن و ل دوماهیا سالا 1989 پشکداریێ د کۆنگرێ ٢ ێ یێ پارتی گەل دا دکەت.
پشتی سەرهەلدانێ و هەتا ساڵا ١٩٩٣ ئه‌و بەرپرسیاریا هێزا لەشکەری یا پارتی گەل ل دەڤەرا زاخۆ وەردگریت.
دەمێ دانوستاندنێن ئێکگرتنا پارتی ژ لایەکی و پارتی گەل، سوسیالست و پاسۆك ژ لایەکێ دی ڤە دهێنە کرن، سامی عبدالرحمن د کۆمبوونەکێ دا دبێژیت: ئەگەر سێ ڕووبارێن بچویك بکەڤنە دناڤێك دا دێ ڕووبارەکێ مەزن ژێ چێبیت.مام حەمید بەرسڤا سامی ددەت و دبێژیتە وی:ئەگەر سێ ڕووبارێن بچویك بکەڤنە دناڤ دەریایەکێ دا، دێ بەرزەوبن و دبێژیتە سامی عبدالرحمن:ئەگەر هوون بچنه دناڤ پارتی ژی، ئەز ب خوە ناهێم. سامی دبێژیتێ: من باوەرنه‌دکر، ئەز ئاخفتنەکێ بێژم و تو ل دژی من دەرکەڤی.
ل دوماهیێ سەرۆك بارزانی، فازل میرانی ڕادسپێریت، دا مام حەمیدی قایلکەت. هۆسا ئه‌و جاره‌کادی دزڤڕیته‌ڤه ناڤ پارتی.
پشتی هینگێ شەهید شەوکەت شێخ یەزدین، ل سەر فەرمانا سەرۆك بارزانی دهنێریتە دویف وی ڕا. مام حەمید دگەل حەمید خواستی، محەمەد خالد بۆسەڵی، مستەفا نێروەیی و عەریف دەروێش، بلندترین پلا سەربازی یا وی سەردەمی کو پلا لیوا بوو، ددەتە وان و هەر ئێکی ژ وان ١٠ زێرەڤانا ژی بۆ قەیددکەت.
پشتی شەڕێ ئازادیا ئیراقێ کار ب ڤێ بڕیارێ ناهێتەکرن، لێ کاك نێچیرڤان بارزانی، ژ دەف خوە هەر ئێكی ژ وان مۆچەیه‌کی بۆ دڤەبڕیت.
پشتی هینگێ مام حەمید، جەنابێ سەرۆکی دبینیت و گازندێن خوە دگەهینیتە وی. جەنابێ سەرۆکی، وەزارەتا پێشمەرگەی ڕادسپێریت کو مام حەمیدی ل سەر میلاکێ خوە ب پلا عەمید خانەنشین بکەت. نوکە وی پلا لیوا هەیە، لێ مۆچێ وی هەر یێ عەمیدی یە.
مام حەمید شەریف، پشتی خەباتەکا درێژ ل ساڵا ١٩٩٩ ل کۆنگرێ ١٣ ب میدالیا بارزانی دهێتە خەلاتکرن.
د شەرێ دژی تیرۆرستێن داعش دا کورێ وی یێ جانەمەرگ، رائید رکن هەوار شەهیددبیت. شەهیدبوونا کوڕێ وی پشتا وی دشکێنیت و کاریگەریەکا مەزن ل وی دکەت. مام حەمید گەلەك ب ئاخ و حەسەرەت ڤە بەحسێ شەهیدبوونا کورێ خوە هەواری دکەت.
مام حەمید د ڤی کاروانێ درێژێ خەباتێ دا دوو جارا بریندار بوویە و هەژمارەکا شەهیدا ژی داینە، کو ئەڤە ناڤێن وانن:
١-برایێ وی حەسەن شەریف، ل گەوریا عەمەر ئاغای ل ساڵا ١٩٧٤ شەهیدبوویە.
٢-برایێ وی موسا شەریف، ل سالا ١٩٨٢ شەهید بوویە.
٣-برایێ وی ئەنوەر شەریف ل ساڵا ١٩٧٥ ب دەستێ جاشا شەهید بوویە.
٤-کورێ وی رائد رکن هەوار حەمید شەریف، ل ساڵا ٢٠١٤ ب دەستێ تیرۆرستێن داعش ل کەسکێ شەهید بوویە.
مام حەمید شەریف نوکە ژی شانازیێ ب خەبات و شەهیدێن خوە دکەت و هەمی هیڤی و ئومێدێن وی ئەون کوردستان و مللەتێ کورد د پاراستی بن.
سه‌نته‌رێ کۆماته
یێ دێکومهنت کرنا دیرووکا شۆڕشێ
کار و ئهرکێ سه‌نته‌رێ کۆماته دێکۆمێنت کرن و پاراستنا دیرووکا شوڕشێ یه ژ مرن و ژناڤچوونێ.
ڤی سهنتهری ب ستافهکێ بچووک و شیانێن ساده، لێ ب ڤیان و باوهریهکا مهزن، وهک پێنگاڤا خوه یا کاری یا ئێکێ، دهست ب کۆمکرن، دێکۆمنێت کرن و تۆمارکرنا دیرووکا خهبات و شۆڕشا کوردستانێ کریه.
