کاوه بامه‌ڕنی و بیردانکه‌کا پڕی پێزانین و نهێنیێن نه‌بهیستی
سەنتەرێ کۆماتە یێ دەکۆمێنتکرنا دیرووکا شۆڕشێ د بەردەوامیا بزاڤ و کارێ خوە یێ مەیدانی دا ل ڕێکەفتی ٣/١١/٢٠٢٢ دبیتە مێڤانێ پێشمەرگێ دێرین کاوە عبدالباقی بامەڕنی و هەڤدیتنەکا ڤیدیۆیی دگەل وی سازدکەت و دیرووکا خەباتا وی یا شۆڕشگێڕی تۆماردکەت و ژ ناڤچوونێ دپارێزیت.
کاك کاوە کوڕێ تێکۆشەرێ دێرن عبدالباقی بامەڕنی یە. بابێ وی ئەندامێ پارتیا هیوا بوویە و پشکداری د سەرهەلدانێن ١٩٤٣و١٩٤٥یێن بارزان دا کریە. عبدالباقی بامەڕنی کەسەکێ نێزیکێ بارزانیێ نەمر بوویە و ئێک ژ پێشمه‌رگێن کۆمارا کوردستان بوویه ل مهابادێ. عبدالباقی بامەڕنی ل کۆمارا کوردستان دبیتە نوینەرێ بارزانیێ نەمر لگه‌ل حکومه‌تا کۆمارا کوردستانێ و هەروەسا ئەو و هەڤالێ خوە سەعید دبنه ته‌ته‌رێن بارزانیێ نه‌مر دناڤبه‌را بارزانیێ نه‌مر ل مهابادێ و باشوورێ کوردستانێ دا. مام عبدالباقی خودانێ ب ده‌هان چیرۆک و سه‌رهاتیێن خه‌باتێ یێن سه‌یر و سه‌مه‌ره‌یه. سه‌نته‌رێ کۆماته ب هه‌ڤکاری لگه‌ل کاک کاوه‌یێ کوڕی وی، بیره‌وه‌ریێن وی ئاماده‌کرینه ژ بۆ چاپێ کو ب ڤان نێزیکان دێ هێنه چاپ و به‌ڵاڤکرن.
کاوە عبدالباقی دەستپێکا خواندنا خوە یا سەرەتایی ل گوندێ بێقۆلکێ یێ سەر ب دەڤەرا کانیماسێ ڤە دەستپێدکەت.
کاوە بامەڕنی ل ساڵا ١٩٦٩ پۆلا ئێکێ ل گوندێ بێقۆلکێ دخوینیت. پشتی رێکەفتنا ١١ ئادارێ ل ساڵا ١٩٧٠ ڤەدگەڕنە ڤە بامەڕنێ و هەتا پۆلا چارێ ناڤنجی ل بامەڕنێ دخوینیت.
کاوە عبدالباقی ل دوماهیا ساڵا ١٩٧٧ دبیته ئه‌ندامێ ڕێکخستنێن پارتی دیموکراتی کوردستانا و بزاڤ و چالاکیێن خوە د ناڤ شانا شەهید سالح بامەڕنی دا ئەنجامددەت. ژبلی کاوە بامەڕنی و حەمدی تەیب بامەڕنی، سالم ئەحمەد و ئەحمەد سەعید عبدالکریم ژی د ناڤ وێ شانێ دا ڕێکخستی بوون.
ڕژێمێ ل ساڵا ١٩٧٩ ل بامەڕنێ ب زۆری قوتابی دکرنە (طلائع). کاك کاوە و هەڤالێن خوە پێگیریێ ب بڕیارا ڕژێمێ ناکەن. جلکێن (طلائع)ا د (مرکزشباب) یێ سەر پارتیا بەعسا ڕژێمێ ڤە بوون. پێشمەرگە دهێتە بامەڕنێ و وێ ناڤەندێ دسۆژن. پشتی هینگێ ڕژێم ٢٨ کەسا دگریت. وی چاخی هاڤین بوو، هەر چەندە کاوە هێشتا یێ گەنج بوو، لێ وی دگەل بەڵیندەرا، کارێ ڕێك و بانا ل بامەڕنێ دکر. ئێڤاری دەمێ ئەو دهێتە مال، ئەو ل ناڤا بازاڕی ل بەر دەرێ چایخانەکێ، ترۆمبێلەکا جێب یا ئیستخباراتا لیوا ٤٤ یا بامەڕنێ دبینیت. کاوە دبینیت کو خالێ وی شەعبان (بابێ شەهید رەمەزان) یێ گرتیە د ترۆمبێلێ دا، ل بەر دەرێ چایخانێ کاوەی ژی دگرن.
به‌عسی (تاوانا) هاریکاریکرنا رەمەزانێ کوڕخالێ وی، ئەوێ دگەل پێشمەرگەی هاتی بامەڕنێ و (مرکز شباب) سۆتی، دده‌نه پاڵ کاوه‌ی کو وی پێزانین ل سەر (مرکزشباب) داینە رەمەزانی. ژ بلی کاوەی و خالێ وی شەعبان، سەردار رەشید، ئەحمەدێ برایێ فەوزی، مستەفایێ ئیبراهیم ، محەمەد عەباس، لەزگین یوسف رەشید وئەبابەکر یوسف ڕەشید و شەهید عوبەید پیرمۆس و زێرەڤانێ ئاڤاهیێ مرکز شباب، کو ناڤێ وی تەیب یوسف بوو و گەلەکێن دی دهێنە گرتن.
شەعبان پیرەمێرەکێ بێچارەبوو، لۆما زوو دهێتە ئازادکرن، لێ کاوە و هەڤالێن خوە یێن دی دکەڤنە بەر لێدان و ئەشکەنجەکا دژوار. تەیبێ زێرەڤانێ ئاڤاهی ژ هەمیا پتر دهێتە ئەشکەنجەدان و پشتی هینگێ ژبەر وێ ئەشکەنجێ گیانێ خوە ژ دەستددەت.
پشتی ١٠ ڕۆژا کاوە و هەڤالێن خوە دهێنه بەردان. حەمدی تەیب و ئەحمەد سەعید پەیوەندیا ب شۆڕشێ کریو یێن بووینە پێشمەرگە.
کاوە و سالم و هەڤالێ وان ئەنەس سەعدوللا هرۆری و قەهرەمان ڕەشید پێکڤە شانەکا نهێنی یا ڕێکخستنێ دادمەزرینن. ل ١/٣/١٩٨٠ ڕژێم هێزێن خوە ل بامەڕنی بەڵاڤەدکەت و دکەڤنە دویف کاوەی و هەڤالێن وی. کاوە دبێژیتە سالم و قەهرەمانی، هەر دەمێ ئێك ژ هەوە بهێته گرتن، ئەز دێ چمه ناڤ شۆڕشێ و دێ بمه پێشمەرگە، هەر چەندە هەڤالێن وی دەست دلێ وی ددەن، لێ کاوە دبێژیتە وان، ئەو دویڤچوونا ڕەشەکێن ڕژێمێ نەیا ئاسایی یە. وێ ڕۆژێ هەمیێ ڕەشەکێن ڕژێمێ دیڤچوونا وان دکر.
بشەڤێ کاوەی دڤێت ل مالێ نەمینیت، کو ئەگەر هاتوو بۆ گرتنا وی بهێن، دا یێ ل مالێ نەبیت. لێ بابێ وی دبێژیتێ دەرنەکەڤە، چونکە سوپایێ ڕژێمێ گوندێ دوورپێچکری. پشتی هینگێ ب نیڤ سەعەتێ ئیڤا یەکا لەشکەی و جێب قیادەکا ئەمنێ ل بەر دەرێ خانیێ وان ڕادوەستن و دچنه سەر بانێ خانیێ وان و ژ بانی خوه دهاڤێژنه د حه‌وشێ دا. ل دەستپێکێ کاوەی دگرن، پشتی هینگێ دچن دا هەڤالێ وی شڤان موسای ژی بگرن، لێ یێ ل مال نەبوو، پاشی لقمان ڕەشید دگرن ،هەروەسا مامۆستایێ وان یێ زمانێ کوردی محسن، کو کوردەکێ نیشتیماپەروەر بوو و خەلکێ دەڤەرا سۆران بوو، وی ژی دگرن. وێ شەڤێ وان هەر سێیا دبەنه باره‌گایێ لیوایا له‌شکه‌ری ل فڕۆکەخانا بامه‌ڕنێ. ڕۆژا پاشتر بابێ شڤانی، شڤانێ کوڕێ خوە دئینیت و ڕادەستی ڕژێمێ دکەت. سپێدێ وان هەر چارا دبەنە دەف فه‌رماندێ لیوایێ بامەڕنێ جەواد ئەسعەد شێتنەیی. دوو کەسێن مەدەنی ژی ل دەف وی د ئامادە بوون. جەواد دبێژیتە وان ئەم دزانین کو چ تشت ل سەرهەوە نینە، دێ هەوە ئازادکەین و پسیار دکەت کا کیە کاوە و دبێژیتە وی، عوبەیدێ هەڤالێ هەوە چوو گەهشتە پێشمه‌رگه‌ی(مخەربا) ئەگەر تشتەك ل سەر تە با دا تو ژی چی. کاوە ژی دبێژیتە وی، چ ل سەر مە نینە و ئەم قوتابی نە و مژوولێ خواندنا خوە نە. جەواد جارەکا دی دبێژیە وان، چ نینە دێ هەوە بەردەین. دەمێ جەواد گۆتی دێ هەوە بەردەین، ئەو هەر دوو زەلامێن سڤیلێن ل دەف وی سەر ب ئەمنێ بوون، داخواز ژ جەوادی دکەن کو کاوەی و هەڤالێن وی ڕادەستی وان بکەت. ئێدی ئەو هەردوو ڕەشەکێن ئەمنێ وان وەردگرن و سواری ترۆمبێلەکێ دکەن و وان دبەنه ئه‌منا سەرسنکێ. ل دەستپێکێ محسنێ مامۆستایێ وان برە د ژۆرەکێ ڤە و پشتی ١٠ خولەکا وی بەرددەن. کاوە و هەردوو هەڤالێن وی یێن دی کرنە د پشتا لاندرۆڤەرەکێ دا و برنە ئامێدیێ. ل وێرێ ئەمنێ ئەو گەلەك ئێشاندن. پشتی هینگێ هەژمارەکا دی یا بامەڕنیان کو هەمی قوتابی بوون، گرتن و ئه‌و ژی برنە وێرێ.
کاوە و هەڤالێن خوە د ئەمنا ئامێدیێ ڤە دمینن و کەس و کارێن وان ژی چ ژ وان نزانن. عبدالباقیێ بابێ کاوەی دچیتە دەف شێخ ئۆسمان بارزانی ل بەغدا. شێخ ئۆسمان، کوڕێ خوە عیمادی ڕادسپێریت کو بەرگەڕیانا کاوەی و هەڤالێن وی بکەت. پشتی هینگێ کاوە و هەڤالێن خوە دهێنە بەردان. ئەڤە ددەمەکی دا کو ڤەکۆلینا کاوەی و هەڤالێن وی یا ب دوماهی هاتی و ئیفادێن وان یێن چووینە دەف (دادوەری) و دادوەر وان دبینیت و دبێژیتە وان ئەڤە ئیفادێن هەوەنە. کاوە دبێژیتە دادوەرێ ڕژێمێ، ئەگەر تو ژی ل جهێ مە بای دا ئیفادێن تە ژی ئەو بن. چونکە تشتێ وان ڤییای یا ل سەر مە نڤێسی و ب مە دایە ئیمزاکرن.
ل سەر هەولێن عیماد شێخ ئۆسمان کاوەی و هاڤالێن وی دبەنه بارەگایێ ئەمنا ڕژێمێ و ب کەفالەت وان بەرددەن.
پشتی حەفتیەکێ کاوە دەست ب خواندنا خوە دکەتەڤە، لێ ڕەشەکێن ڕژێمێ ل ٢٢/٤/١٩٨٠ جارەکا دی بۆ گرتنا وی و سالم دچنه قوتابخانێ. چونکە ئەو هەردوو بتنێ ڕێکخستی بوون. سالم و کاوە خوە نادەنه دەست ڕژێمێ و سالم د سەر دیوارێ قوتابخانێ ڕا خوه دهاڤێت و کاوە ژی د ناڤ گێله‌شووکا قوتابیان ڕا خوە خلاسدکەت و هەردوو خوه ده‌رباز دکه‌ن و قەستا ناڤ شۆڕشێ دکەن.
کاوه و سالم هه‌ر ئێک ژ وان یێ بخوه چووی و که‌س ژ وان چ یێ دی نزانیت. کاوه ل ده‌رێ گه‌لیێ بازێ خوه دگه‌هینیته گرۆپه‌کا پێشمه‌رگا کو درباز قه‌دشی، عومه‌ر قه‌دشێ و مه‌حمود قه‌دشی دناڤ وان بوون. ئەو چیرۆکا خوە بۆ پێشمەرگەی ڤەدگێڕیت.ئەو ژی دبێژنە وی، تو یێ بچویکی بۆ پێشمەرگاتیێ. کاوە دبێژیتە وان، ئەزێ هاتیم و ڤەناگەڕم.
کاوە پسیارا زوهەیر بامەرنی، دکەت و هزردکەت، کو ئەو یێ دگەل مەفرەزا ئەحمەد چەلکی. وێ شەڤێ هندەك ژ هەڤالێن وان دێ هێتە بێلیزانێ و هندەکێن دی ژی یێن ل هەترشێ. هێشتا کاوەی و سالم ئێکو دوو نەدیتیە. کاوە دچیتە مالا سۆفی حسێن ل هەترشێ، هەردوو پێشمەرگێن شەهید، مەناف چەلکی و شوکری چەلکی ل وێرێ دبینیت. پێ مەنافی سۆتبوو، شوکری ژی ژ بەر وی یێ ل وێرێ. ڕۆژا پاشتر دێ هەڤالێن وان هێن وێرێ دا مەنافی دگەل خوە ببەته کۆماتەی دا پێ وی چارەسەرکەن. کاوە ل دەف وان دمینیت. ڕۆژا پاشتر ئەحمەد چەلکی و مەفرەزا خوە دهێن وێرێ، کاوه دبینیت کو هه‌ڤالێ وی سالم ژی یێ دگەل وان. کاوە خوە ددەتە دگەل وان، دا بچیته کۆماتەی. بەرێ سپێدێ یە. سوپایێ ڕژێمێ ل گرکا و خشخاشا بەڵاڤ دبیت، پێشمەرگە ژی خوە ددەته چیای هەتا سوپایێ ڕژێمێ خوە ژ دەڤەرێ ڤەدکێشیت. سالم پێش وەخت چیرۆکا رەڤینا خوە و کاوەی یا بۆ ئەحمەد چەلکی گۆتی و ئەو یێ هاتی وەرگرتن، لێ دەمێ ئەو کاوەی دبینیت، دبێژیتە وی، تو یێ بچویکی و ئەم تە وەرناگرین. جڕەك ل ناڤبەرا ئەحمەد چەلکی و پێشمەرگێن وی یێن بامەڕنی چێتبیت. کاوە ژی دبێژیتە ئەحمەد چەلکی، تو من وەرنەگری ژی ئەز هەر نازڤرمڤە ناڤ ڕژێمێ، چونکە مرنا من یا تێدا، پاشی وی دگەل خوە دبەنە کۆماتەی.
کاوە بامەڕنی ل ٢٥/٤/١٩٨٠ دگەهیتە کۆماتەی باره‌گایێ لقا ئێک. وی دەمی گەلەك کەسا پەیوەندیا ب شۆڕشێ کری. ل ژۆرا نووهاتیا جهێ حەواندنێ نینە. کاوە ل دەف شەهید رەمەزانی دمینت.
ڕۆژا پاشتر کاوە وەکی هەموو نووهاتیا دکەڤیتە بەر کارێ بارەگای و دارا کێشانێ بۆ باره‌گایێ لقێ. هێشتا دەستێ کاوەی ل شوینا کلامچان یێ بریندارە و لفافا پێڤە. دەمێ سەید سالح ئه‌ندامێ لقێ، کاوەی دبینیت، وی نیاسیت و دبێژیته وی، وان دارا پاڤێژە و دبێژیتە سەعید دمبۆیێ به‌رپرسێ دارکێشانێ، ئێدی تو کاوەی نابەیە دارکێشانێ.
پشتی هینگێ سەید سالح، کاوەی و سالم دگەل هندەك بریندارا د هنێریتە رۆژهه‌لاتێ کوردستانێ. سەید سالح دڤیا ئەو بچن به‌لکی ده‌لیڤه‌یه‌ک ل وارا بۆ وان په‌یدا ببیت بشێن بخوینن، چونکە ئەو د بچویکن.
کاوە و سالم پشتی ١٣ ڕۆژان دگەهنه ڕۆژهەلاتێ کوردستانێ.
ل دەستپێکێ دچنه راژان باره‌گایێ مه‌کته‌با سیاسیا پارتی، پشتی هینگێ دچنه زێوە. وان دڤێت پشکداریێ د خۆلا کادران دا بکەن، لێ دەمێ ئەو گەهشتینه ڕاژان، پسیارا زهێر بامەڕنی دکەن. ئەو نزانن، کو پشتی کۆنگرا ٩یا پارتی و ڤه‌قه‌تانا سامی عبدالرحمن و هنده‌ک کادرێن دی ژ پارتی، زهێر ب بڕیارا سامی عەبدولرحمان، پەیوەندی یا ب حزبا دیموکراتا کوردستانا ئیرانێ کری. لۆما ڤێ چەندێ ژی گومان ل سەر وان چێکر و ئێدی ئه‌و دکەڤنه ژێر چاڤدێریێ.
کاوە هەتا مەها ٧ ل وێرێ دمینیت، ئەو هەتا هینگێ ژی یێ ب پەنترۆن و قەمیسی و یێ بێ پارەیە و پەیوەندی ژی دگەل مالا خوە نەمایە.
ئەحمەد چەلکی و سادق حامد هرۆری بۆ چارەسەره‌یێ دچنه رۆژهه‌لاتێ کوردستانێ، ئەو ل وێرێ کاوەی دبینن. مەکتەبا سیاسی هەژمارەکا تڤەنگا ددەتە ئەحمەد چەلکی، ئەو ژی دبێژیتە کاوەی، ئەگەر دگەل من ڤەگەڕی کوردستانێ دێ تڤەنگەکێ دەمە تە.
کاوە هەست ب فەرامۆشکرنێ دکەت، رەوشا وی گەلەك خرابدبیت. حەمید عەبدالجلیل بامەڕنی دبێژیته وی، هەڕە ڕاژان داخوازا دیتنا سەرۆکی بکە. کاوە دچیته ڕاژان و خوە ددەتە نیاسین و چەندین جارا داخوازا دیتنا سەرۆکی دکەت، لێ ڕێکێ ناده‌نێ کو سەرۆکی بینیت. دەمێ سەرۆك ژ ژۆرا خوە دەردکەڤیت، کاوە هەوڵددەت وی ببینیت، لێ زێرەڤانێن سەرۆکێ ڕێ نادەنێ.
ل دوماهیێ کاوە بڕیارێ ددەت کو ڤەگەڕیته‌ڤه کوردستانێ. نەجم الدین یوسڤی کو وی دەمی بەرپرسێ لژنا ناوچا زێوە بوو، دزانیت کو کاوەی بڕیارا چوونا کوردستانێ دایە، لۆما داخوازێ ژ وی دکەت ل بڕیارا خوە لێڤەببیت، لێ کاوە ل سەر بڕیارا خوە ڕژددبیت. ل دوماهیێ سەیدایێ نجم الدین ١٥ دینارا بۆ خەرج دکەت. کاوە ژنویکا دەستەکێ جلکێن کوردی دکڕیت، ئەحمەد چەلکی ژی بڕنۆیەکێ ددەتێ و دگەل وی ڤەدگەڕیتە کوردستانێ.
پشتی ئه‌و دگەهیته کوردستانێ، دگەل ئەحمەد چەلکی دبیته پێشمەرگە و پشکداریێ د هەژمارەکا چالاکیێن لەشکەری دا دکەت وەکی:
بۆسا قەسرا سادەی، ل نێزیکی گوندێ تشیشێ
لێدانا هێزێن دوژمنی ل کەلا شخۆ ل مەها ٨ ساڵا ١٩٨٠، ئەڤە و چالاکیەکا دی یا تایبەت بوو، کاوە، حەمدی، سەید عسمەت و لەزگین یوسف ڕەشید، سالح ئاشەوی تێدا پشکداربوون.
لێدانا مراباتێن ڕژێمێ ل سەرێ حەمێ و ڕاکرنا ٢ کلاشینکۆفان ل مەها ٩ ساڵا ١٩٨٠.
د هەمان سال دا کاوە دگەل هەژمارەکا پێشمەرگە و نووهاتیان دکەڤنه بۆسەکا (جیش الشعبی) یێن دوژمنی ل بامەڕنێ، د وێ بۆسێ دا هه‌ڤالێ وان ئیحسان سالح عاشوور بامه‌ڕنی شەهید دبیت. پاشی پشکداریێ د لێدانا مراباتێن دوژمنی ل سەر پرا هەمزا دا دکەت.
پشتی هینگێ کاوە و هەڤالێن خوە چالاکیەکا هەڤپشك دگەل مەفرەزا (ابو لیلی) یا پارتیا کومۆنیستا ئیراقی ل بامەڕنێ ئەنجامددەن. د ڤێ چالاکیێ هێزێن هەڤپشکێن پارتی و کومۆنیستان ل بارەگایێ رێکخراوا حزبا بەعس ددەن.
ل ٩/٦/١٩٨١ ل دەستپێکا دانانا ڕێکخستنێن پارتی گەلی دیمۆکراتی کوردستان ب رێبه‌ریا سامی عبدالرحمن، ئەحمەد چەلکی، فوزی بامەڕنی و حەمدی بامه‌ڕنی دچنه گوندێ بێرمانێ یێ باکوورێ کوردستانێ. ئەو ل وێرێ (شەمۆی) دبینن کو کادره‌کێ پارتی گه‌له، عبداللە سالح کو ئێک ژ سه‌رکردێن پارتی گه‌له لگه‌ل شه‌موی هەژمارەکا نامان یێن بۆ وان هنارتین دا کو بچن بگه‌هنه پارتی گه‌ل.
د ڤی ده‌می دا زهێر بامەڕنی ژی دەستێ ژحزبا دیمۆکراتا کوردستانا ئیرانێ به‌رداین و مالا خوە ژ رۆژهه‌لاتێ کوردستانێ یا ئینایه گوندێ ئارۆشی ل سه‌ر سنوورێ باکوور و باشوور.
کاوە عبدالباقی د ڤێ دیدارێ دا دبێژیت:مە بخوە چ هزر نەبوون، ل دەرڤەی پارتی چ بزاڤا بکەین، بەلکو بتنێ پێکڤەگرێدانا مە یا گەنجێن بامەڕنێ بوو، دەمێ مەفرەزا مە هەمیا بڕیاردای کو پەیوەندیێ ب پارتی گەل بکەن، ب کاریگه‌ریا هه‌ڤالینیێ ئەز ژی بووم پشکەك ژ وێ بڕیارێ. زۆربەیا مە ژی چ پێزانین ل سەر پارتی گەل و دامەزراندنا وێ نەدزانین.
دیسان دبێژیت:بڕیار وەسا بوو کو هەردوو مەفرەزێن ئەحمەد چەلکی و زهێر بامەڕنی بچنه سوریێ و پەیوەندیێ ب پارتی گەل بکەن، لێ زهێر بامەڕنی برایێن خوە دهنێریت و ئەو ب خوە ناچیت.
کاوە ژی دبیتە ئیك ژ وان کەسێن کو بڕیار دای کو بچنه سوریێ بگه‌هنه پارتی گه‌ل. یا بۆ وان هاتیە گۆتن کو ئەو دێ دگەل وان سەرکردێن ل کۆنگرێ نەهێ جودابووین و ژ پارتی دەرکەتین، ژ سوتیێ زڤرنەڤە کوردستانێ، زێدەی ڤێ چەندێ وان چ پێزانینێن دی نەبوون.
کەسەك ب ناڤێ (عبدالجلیل) کو سەر ب ڕێکخستنا (کۆکێ) یا باکوورێ کوردستانێ ڤە بوو، هاریکاریا وان دکەت و دناڤ باکوورێ کوردستانێ را، وان دەربازی ئالیێ سوریێ دکەت. بڕیارا د ناڤبەرا کۆکێ و سامی عبدالرحمن دا وەسا بوو، کو هەڤالێن وی، بەرامبەر، چەکێ وان دەربازی سوریێ بکەت.
ل دەستپێکێ گرۆپێ مراد کێستەیی و پاشی یێ ئەحمەد چەلکی دەربازدبن، لێ کاوە و ئەو گرۆپێ ئەو دگەل ٤٠ ڕۆژان ل بناڤیکێ ل نێزیکی شه‌رنه‌خێ دمینن. هندی پارە دگەل وان دا هەبوو، ئه‌و وی پاره‌ی ددەنه ب نان و دخۆن. پشتی هینگێ ئەو ژی دەربازدبن. ئەو هەڤالێن وان یێن کو بەری وان دەربازبووین، ژ سوریێ دچنه نەمسا و پشکداریێ د کۆنگرێ دامەزراندنا پارتی گەل دا دکەن، لێ کاوە و هەڤالێن خوە یێن دی ڤێڕاناگەهن و ل قامشلی دمینن. ئەو کەسێن نەچووینە کۆنگرا دامەزراندانا پارتی گەل، بۆ پشکداریکرنێ د خولەکا مەشقا لەشکەری دا دچنه لبنانی.
کاوە عبدالباقی و هەڤالێن خوە ژی، پشتی کۆنگرێ پشکداریێ د خولێن ڕۆشەنببیری دا دکەن. پشتی هینگێ دگەل ڕێکخراوا ئازادیخوازیا فەلستینی دا ل شامێ پشکداریێ د خولەکا لەشکەری دا دکەت و مەشق و ڕاهێنانێ ل سەر هەمی جۆرێن چەکێ سڤک، ناڤنجی و گراندا دکەت. هەر د بەر ڤێ خولێ ڕا رۆژانە جەعفەر ئێمینکی و نێروان بامەڕنی سمینارا ل سەر په‌رتووکا سامی عبدالرحمن یا بناڤێ ئالته‌رناتیڤێ شۆڕشگێڕی (البدیل الثوري) بۆ پشکداربوویێن خولا لەشکەری پێشکەشدکرن.
پشتی خولا وان ب دوماهی دهێت، ڕێکخراوا فەلستینی، جلکێن نوی یێن لەشکەری و جەمەدانیا فەلستینیا ل سەر وان پارڤەدکەن و بڕیارێ ددەت، کو وان بۆ پشکداریکرنێ د شەڕێ دژی ئیسرائیل دا ببه‌ته (صور و صیدا) ل لبنانی داکو ب کریار وی چەکێ وان ڕاهێنان ل سەر کری بکاربینن. هەر چەندە بەری ڤێ خولێ کۆمەكا هه‌ڤالێن وان بۆ لبنان هاتبوو هنارتن، لێ کاوە و هەڤالێن خوە ل دژی ڤێ بڕیارێ ڕادوەستن و جیبجی ناکەن.
ئەو ڤەدگەڕنه‌ڤه بارەگایێ پارتی گەل ل قامشلی و ل وێرێ درێژیێ ب خولێن ڕۆشەنبیری ددەن. مەحمود عیدۆ بەرپرسێ گشتیێ بارەگایەکی بوو، کاوە ژی دبیتە بەرپرسیاریێ ئیداریێ وی بارەگای. جەعفەر ئێمینکی ژی بەرپرسێ گشتی یێ بارەگایەکێ دی یێ پارتی گەل بوو.
کاوە د ڤێ دیدارێ دا دبێژیت:بەرپرسێ فێعلی یێ پارتی گەل عبداللە سالح بوو، کاك سامی ل شامێ بوو. ژبلی عبدالله‌ی مە کەسەکێ دی نەدیت.
بەری پارتی گه‌ل هێزا خوه یا پێشمه‌رگه‌ی ڤرێکه‌ته سەناتێ ل ده‌ڤه‌را زاخۆ، وان چەند مەفرەزێن پێشمەرگه‌ی ڤڕێکربوونه دەڤەرا شەنگالێ، لێ پێشمەرگەیه‌ك ژ وی گرۆپی ژلایێ ڕژێمێ ڤە دهێته گرتن و پاشی دهێته سێدارەدان.
هنارتنا پێشمەرگێن پارتی گەل بۆ سەناتێ
ل ده‌ستپێکا هاڤینا ساڵا ١٩٨٢ پارتی گەل ب بڕیارا سامی عبدالرحمن ١١٧ پێشمەرگێن خوە، کو پێشتر هەمی پێشمەرگێن سەرکردایەتیا کاتی یا پارتی بوون، دکەتە دوو گرۆپ. گرۆپەك ل ژێر سەرپەرشتیا کەریم شەنگالی، و گرۆپێ دی ل ژێر سەرپەرشتیا عبداللە سالح و وان دهنێریتە سەناتێ ل ده‌ڤه‌را زاخۆ.
کاوە دبێژیت: د بەرسفا ڤان پسیارا دا، کاك سامی دگۆت، “مە هەماهەنگی دگەل پارتیا کۆمونیستا ئیراقی هەیە ومە ب ڕێیا وان پەیوەندی یا ب پارتی کریە و دلنەوایی ژ پارتی وەرگرتیە کو شەڕ چێنابیت”.
کاوە عبدالباقی دکەڤیتە دگەل گرۆپێ کەریم شەنگالی کو هەژمارا وان ٥٦ کەس بوون.
ل پێشیێ عبداللە سالح و گرۆپا خوە دەربازدبن، ژبلی چەکێ سڤک دوو دۆشکە و ئاربیجی ژی دگەل وان دا هەنە.
کاوە دبێژیت:بەری ئەم برێبکەڤین، جەعفەر ئێمینکی، ئەز و هندەك هەڤالێن مە برینە بارەگایەکێ فەوجەکا لەشکەری یا سوپایێ سوریێ، ئەم برینە د کۆگەهەکا مەزن یا چەکی ڤە، هەموو جورێن چەکێ سڤك و ناڤنجی و گران تێدا هەبوون، هەتا دوشکێن ١٤،٥ یێن دوو لوولی ژی تێدا هەبوون. مە جلکێن ئێك فۆرم، چانتکێن لەشکەری، مەتەرێن ئاڤێ و کلاشینکۆف و هندی شیاین مە چەکێ سڤك و تەقەمەنی هەلگرتن. ئەو چەك ژ لیبیا بۆ مە هاتبوو.
کاوە دبێژیت:ئەم ل ٦/٦/١٩٨٢بەرەف دێرکێ برێکەتین و ب ئاگەهداریا مخابراتا سوریێ ب بەلەما، دبن جزیرێ ڕا ل ئاڤێ دەربازبووین و بەرەف چییایێ جودی، دناڤبەرا جزیرێ و سلۆپیا دا چووین.
کاوە خوە ل بەندا چار هەڤالێن خوە ئەوێن ڤەمای دگریت و دڤێت ئەو خوە بگەهیننه چیایێ جودی بەری ڕۆژهەلاتێ. کاوە و هەڤالێن خوە ل جادێ دەربازدبن و قەستا هێلا بۆڕیا پەترۆلێ دکەن. زریپۆشەکا لەشکەری د بەر وان ڕا دەربازدبیت، ئەو ناگەهنە هەڤالێن خوە، لۆما خوە د هاڤێنە د شیڤەکێ دا. دنیا ڕۆن دبیت و هێشتا ئەو قۆناغا چار دەمێرا ژ چیای د دوورن. هه‌ڤالێ وان سەگڤانێ ژ پیا دکه‌ڤیت و ئێدی نەشێت ب ڕێڤە بچیت. ئەو ڕێك ڕۆژانە ژ لایێ ژاندرمان ڤە دهێتە خرماشەکرن دا بزانن کانێ شوونپێ یێن نوو لێ هه‌نه یان نه، ڕێبه‌رێ وان ژی وان دهێلیت و ژاندرمە ل دەوسا وان دچنە هنداڤ سەرێ وان. لێ ئەو ل دەوسا بۆشتر یا هەڤالێن وان دچن. پشتی ژاندرمە نه‌په‌نی دبن، کاوە و هەڤالێن خوە پیرەمێرەکی دبینن و قەستا وی دکەن. پیرەمێر دبێژیتە وان: هێرڤه نەهێن، ما هوون نزانن، تژی ڤێرە ژاندرمەنە؟ پیرەمێر دچیتە دەف وان و پشتی هینگێ ژنکا دهنێریت دەورووبەرا دا بزانیت کا ژاندرمە ل دەڤەرێ ماینە یان نە. ئەو پیرەمێر، خوارنێ بۆ وان دئینیت و ڕێکێ ژی نیشا وان ددەت.
هەڤالێ وان لقمان هروری (پالە) بتنێ یێ ل دەف جەنازێ شەهید ئەکرەم بەندی مای. ڕێبه‌ری لقمان یێ دیتی، لێ نەگۆتیه وی کا هەڤالێن وی ل کیڤە نە. پشتی هینگێ کاوە هەڤالێن خوە ڕێبه‌ری دبینن، لێ هەتا ئێڤاری ژی نابێژیتە وان ژی، کو وی لقمان یێ دیتی و یێ مایه ل ده‌ف ته‌رمێ شه‌هیدی.
کاوە گەلەك ژ ڕێبه‌ری تۆڕە دبیت و وی ب زۆرێ ددەتە بەری خوە و بەرەف چیایێ جودی دکەڤنە ڕێ. پشتی ئەو دگەهنه چیای، کاوە دەستووریا ڕێبه‌ری ددەت. ڕێکا وان دکەڤیته زۆمەکێ، سەگڤان هەر نەشێت ب ڕێڤە بچیت، گارە سازکار (سەباح عەلۆ) دچیت زۆمێ کەره‌کی دئینیت و سەگڤان لێ سوار دکەن و سەردکەڤنە سەرێ چیایێ جۆدی. کاوە ژ وێرێ وێڤە ل وێ دەڤەرێ شەهرازایە، ئێدی ئەو ڕێبەریا هەڤالێن خوە دکەت. ئەو ل ڕۆژا چارێ دگەهنه گوندێ بناڤیکێ ل نێزیک شه‌رنه‌خێ. هەردوو هێزێن وان یێن دگەل کەریم و عبداللە سالح ل وێرێ ڤێكدکەڤن. ئەو ل بناڤیکێ بارەگایەکێ دەمکی چێدکەن، کاوە ل وێرێ ژی کارێ ئیداری دکەت.
پشتی چەند ڕۆژا، هێزا وان هه‌موو پێکڤه ل هیزلی دەربازدبن و دچنه سەناتێ ل ئالیێ باشوورێ کوردستانێ، ئەو مەفرەزێن خوە ل چیایا بەڵاڤدکەن، فەوجەکا ڕژێمێ ل بنێ دەشتە تەخێ هەبوو. مەفرەزا شەمۆی، خالەکێ ل سەرێ چیای ددانیت. ئەو دەڤەر ژ زار دەڤێ کاوەی هەمی مینڕێژکریە ژ لایێ ڕژێما ئیراقێ ڤە.
پشتی ٢٠ ڕۆژان ژ مانا وێ هێزێ ل سەناتێ، پێزانین دگەهنه وان، کو پارتی دیمۆکراتی کوردستان دێ هێزێ ل دژی وان بکار ئینیت، ئەگەر ئەو وێ دەڤەرێ چوولنەکەن. هێزێن پارتی دگەهنه زۆمێن ئاڤا گویزێ و ڕۆژا پاشتر دێ گەهنه سەناتێ.
کاوە دبێژیت:تشتێ جهێ پێکەنینی ئەو بوو، دناڤ مە دا پرۆپەگاندە دهاتە کرن کو، ئەگەر هاتوو شەڕ ژی دناڤبەرا مە و پارتی دا چێبوو، سادق عەمەر و زهێر بامەرنی و گەلەک به‌رپرسێن دیێن له‌شکه‌ری یێن پارتی هەڤالێن مەنە و دێ هاری مە کەن و دێ پارتی شکێنین.
به‌لێ دەمێ هێزێن پارتی نێزیك بووین، هێزێن پارتی گەل ئەو دەڤەر بەردا، بیێ کو کەسەك مە ئاگەهداربکەت. کاوە و هەڤالێن خوە ئەوێن دگەل شەمۆ بتنێ هەتا ل وان دبیتە سپێدە ل جهێ خوە دمینن، پشتی هینگێ ژنوی وان ئاگەهداردکەن.
کاوە دچیتە دەف کەریم شەنگاری دا تشتەکی ژ ره‌وشێ بزانیت، دەمێ کاوە دگەهیتە دەف وی، دبینیت کو تاهرێ برایێ عەندوللا سالح یێ ژ زاخۆ هاتی و یێ ل دەف. کەریم جگارێن رۆسمەن و کێنت ددەتە کاوەی و دبێژیتە وی: چ شەڕ چێنابن و ل جهێ خوە بمینن، ئەگەر هێرشەك هاته سەر هەوە بەڕه‌ڤانیێ ژ خوە بکەن. پشتی کاوە ڤەدگەڕیته دەف هەڤالێن خوە، شەمۆ دبێژیتە وان کو دێ شەڕ چێبیت. ل ڕۆژئاڤا هێزێن پارتی گەل هەمی خوە ڤەدکێشن. هندەك ژ پێشمەرگێن وان پتپتێ ب سەرێ عبداللە سالح دا دکەن، عبداللە سالح دبێژیتە وان، کەس گەنگەشێ نەکەت، دێ دبەر پێشمەرگێن پارتی ڕا چین و کەس تەقێ نەکەت. ئەو دبەر پێشمەرگێن پارتی ڕا دچن، هەردوو ئالی تەقێ ناکەن و هێزێن پارتی گەل سەردکەڤن و دچنه جهەکێ دی ل ڕۆژئاڤایێ سەناتێ.
مەفرەزەکا پارتی خوە نێزیکی خالەکا وان دکەت، هێزێن پارتی گەل ب دۆشکا تەقێ ل وان دکەن. هێزێن پارتی ژی وان تۆپباران دکەن و ئاگر بەردبیتە پەلەخی. هێزێن پارتی گەل بێ خوارن ماینە. هێزێن پارتی گەل نەچاردبن ژ وێرێ ژی پاشەکشێ بکەن و جارەکا دی ل چەمێ هیزلی دەربازببن و بچنه گوندێ بلکا ل ئالیێ باکوورێ کوردستانێ.
سەرکردایەتیا وێ هێزا پارتی گەل (کەریم شەنگالی، عبداللە سالح، ئەحمەد زێباری، جەعفەر ئێمینکی و موسا کێستەیی) و لقا وان، کۆمبوونەکێ دکەن. پشتی کۆمبوونێ خوە دکەنه سێ گرۆپ، گرۆپەكا ٤٠ کەسی دگەل عبداللە سالح دمینن، ئەو ژی خوە ل سەر چەند مەفرەزا دابەشدکەن و گرۆپا دی دگەل کەریم دێ زڤڕنەڤە سوری، چەند کەسەك ژی دێ ل بناڤیکێ ل نێزیک شه‌رنه‌خێ مینن.
بڕیار دهێتەدان کو گرۆپا عبداللە سالح بچیته دناڤا باشوورێ کوردستانێ دا. مەفرەزا شەمۆی کو کاوە عبدالباقی ئێك ژ وانە و ژ ١٠ کەسان پێكدهێت، ئه‌و ژی سه‌ر ب گرۆپا عبدالله سالحی نه، کەسك ب ناڤێ عەلی سندی ڕێبەریا وان دکەت. ئەو ل رووبارێ هیزلی دەربازدبن و دچنە د شکەفتا خەرزێ ڤە. ژاندرمێن تورك ئالیێ دیێ ئاڤێ ل وان دگرن، شەمۆ ب تورکی دگەل وان دئاخڤیت و دهەمان دەمدا هندەك پێشمەرگا ڕادسپێریت کو بەرێ ئاربیجیێ بدەنه وان و گەفا ل وان بکەن. ئەو ب ڤی رەنگی دەربازدبن و دچنه دەحلکی، ئەو دبرسینە، حسێن سلێڤانەیی و نزار بامەڕنی دچنه گوندی دا خوارنەکێ بۆ خوە و هەڤالێن خوە بینن. چەند پێشمەرگێن پارتی ل بێنڤه‌دانێ ل گوندی بوون. ئەو پێشمەرگە هه‌ردوو هه‌ڤالێن پارتی گه‌ل دگرن. پێشمەرگێن پارتی گەل ژی گرێن هنداڤی گوندی دگرن و داخوازا بەردانا هەڤالێن خوە دکەن. هەڤالێن وان بێ چ شەڕ چێببیت دهێنە ئازادکرن. ئەو ل ڕۆژئاڤا دچنه گوندێ گرکێ ل سه‌ر جادا زاخۆ-هیزاوا، هەتا هینگێ ئەو هەر ٤٠ پێکڤەنە ل گرکی تاهر ژوان ڤەدقەتیت و دچیتە زاخۆ. ل وێرێ گرۆپێ ئەحمەد چەلکی و سەعید چەلکی کو هەژمارا وان ١٥ کەس بوون، ژ وان ڤەدبن. پاشی ئەو ب ناڤبەینکاریا مرۆڤێن خوە دچنە ناڤ پارتی و چه‌کێ دوشکایێ ژی ئەوێ ل سەناتێ ڤەشارتی دگەل خوە دبەن. ئەڤێن مایی ژی دچنه هشارەکێ ل نیزیکی گوندێ سەرکۆ.
کۆمه‌کا دی کو ماجد رەمەزان، حمدی تەیب، قادر کێستەیی و عەزیز ئەرزی بوون، ئه‌و ژی ژ وان جودا دبن. ١٠ کەس دگەل شەمۆی دمینن، ٥ کەس ژی دگەل سەید عەزۆی وعبداللە سالح. ئەو ژ وێرێ دچن خێلافتێ و پاشی دچن گوندێ چەم باهیڤ، ل باشوورێ رۆژهه‌لاتێ زاخۆ ل وی گوندی هندەك مرۆڤێن شەمۆی لێبوون. ئەو د ناڤ چەمێن گوندی دا خوە ڤەدشێڕن، بەری فراڤینێ تاهرێ برایێ عبداللە سالح و نسرەدینێ بابێ سەید عەزۆی ژ زاخۆ دهێنە دەف وان. ئەو ل حزۆرا کاوەی و هەڤالێن وی،چ سوحبەتا ناکەن و بڕیارە ئێڤاری ژێکڤەببن. کاوە و هەڤالێن خوە نزانن کا عبداللە سالح دێ چ کەت و دێ کیڤە چیت.
عبداللە سالح بۆ وان د ئاخڤیت و چەند ڕێنمایان ددەتە وان:
١-هوین دێ چنه دەڤەرێ، دێ ب تنێ کارێ ڕێکخستنێ کەن، هوین هێڕشا ناکەنه سەر کەسێ، و ب چ رەنگا خوە تووشی شەڕا ناکەن، نە دگەل پارتی و نە ژی دگەل ڕژێمێ. هەر جهێ هوین بزانن کو دێ ل وێرێ تووشی شەڕی بن، نابیت بچنە وێرێ.
٢-هەر کەسەکێ بڤێت کو ببیته ئه‌ندام د ناڤ ڕێکخستێن پارتی گەل دا، ناڤێ وان بنڤێسن و ب ڕاپۆرت بۆ مە بهنێرن، هەتا ئەم بەرسفێ ل سەر ددەین.
٣-بەڵاڤۆکێن خوە بەڵاڤ بکەن و سمینارا ل سەر سیاسەتا حزبێ دبەن و بدەنە دیارکرن کو ئەم ل دژی ڕژێما ئیراقێ نە و ل دژی پێشمەرگەی و پاتی نینین و مە نەڤێت شەڕێ براکوژیێ بکەین.
٤- وێ ژی بزانن کو هوین مە نابینن و جهێ مە نزانن، هەوڵ نەدەن کو ل مە بگەرهن، ئەم دێ هەوە ئاگەهدارکەین کا دێ کەنگی و ل کیڤە مە بینن.
کاوە و هەڤالێن خوە دچنە گوندێ دۆلا، ٢-٣ پێشمەرگێن پارتی ل وێرێ بوون، شەمۆ ل گوندێ دۆلا سمینارەکێ ددەت گوندیان. پاشی دچنه گوندێ ئەرمشتێ، گوند یێ تژیە ژ پێشمەرگێن پارتی، زێرەڤانێن گازی وان دکەن و ژ وان دپرسن کا ئەو کی نە.گەنگەشەك د ناڤبەرا وان دا چێتبیت، ئەو نەچاردبن ب پشت گوندی بکەڤن. پشتی هینگێ دچنه گوندێ دوبانکێ، ئەو گوند ژی یێ تژییە ژ پێشمەرگێن پارتی.
کاوە د ڤێ دیدارێ دا دبێژیت:پلانا پارتی ئەوە، کو پێشمەرگێن خوە ل سەر هەمی گوندان بەڵاڤکەت، لۆما هەر گوندێ ئەم دچووینێ، یێ تژی بوو ژ پێشمەرگێ پارتی. پلانا مە ژی ئەو بوو، جهێ پێشمەرگە لێبیت، نەچینێ دا شەڕ دناڤبەرا مەدا چێنەبیت. هەتا ئەم زڤڕینە سوریێ ژی، ل گۆرەی ڕێنمایێن عەبدوللا سالح، مە خوە تۆشی چ شەڕا نەکر.
ل دوبانکێ عەلی سندی ژ وان ڤەدبیت، شەمۆ ژی بڕیارێ ددەت کو بچنە دەڤەرا سێمێلێ. ئه‌و دچنه گوندێ برجینێ، دوو ڕێکخراوێن پێشمه‌رگێ پارتی ل وێرێ بوون کو سادق گەلناسکی و عیسا زێوەیی به‌رپرسێن وان ڕێکخراوا بوون. ئه‌و ژ به‌ر پێشمه‌رگێ پارتی نەشێن بچنە د گوندی دا و ئه‌و دبرسی نە. ئه‌و ل ناڤ باخچێن گوندی هندەك کەڕکێن باجانا دخۆن و دچنە سەرێ گەلیێ کواشێ و ب شەڤێ دچنە گوندێ جۆمجهانێ. شەڤا بەری هینگێ پێشمەرگێن پارتی بۆ لێدانا ترۆمبێلەکا دوژمنی، هاتبوونە د گوندی دا. خەلکێ گوندی دبێژیتە وان کو دێ دوژمن هێرشێ کەتە سەر گوندی. هێشتا ئەو د گوندی دا بوون، دەنگێ تەقێ دهێت، نەچاردبن ژ گوندی دەردکەڤن. بڕیار وەسایە، ئەو نە ل سەر رێکا و نە ژی ل سەر کانیا ڕانەوەستن.
پشتی هینگێ ئه‌و دچنه گەرماڤۆکا حاجی ئاغای، ل وێرێ ب سەر مەفرەزا مستەفا کێڤلی هەلدبن، لێ چ دناڤبه‌را وان ڕووناده‌ت. ئەو ل گەرماڤۆکێ دچنە ما لا هەڤالێ خوە (سالح سیتۆی) . سالح یێ ل سوریێ. پشتی هینگێ دچنه کێڤلا و ژ وێرێ دچن مالتایی و د ناڤ چەماڕا دچنە قەسارا. ئەو گەلەك برسی و وەستیاینە، ژ هێز و شەنگەهێ دکەڤن، خوارنێ ل وێرێ دخۆن و دچنە کەلەبەدرێ و شاریا. ئەو د گەلیەکێ دا ل پشتا شاریا کۆمدبن، هەڤالێن وان دبێژن، ئەم ب ڤی ڕەنگی نەشێن پێشمەرگاتیێ بکەین، دوو هەڤالێن وان تڤەنگێن خوە ددانن و دچن.
هەژمارا مەفرەزا شەمۆی ژ ١١ کەسا ٨ کەس دمینن. پشتی هینگێ ئه‌و دچنه گوندێ سینا، خوارنێ دخۆن و شەمۆ سمینارەکێ ددەته گوندیان. پشتی سمینارێ ٥-٦ کەس هەڤسۆزیا خوە دگەل وان دیاردکەن و دبنه هەڤالێن وان و هشارەکێ نیشا وان ددەن. ئێدی ئەو کەس ڕێبەریێ بۆ وان دکەن. مەفرەزا شەمۆی ٢٠ ڕۆژا ل وێ دەڤەرێ دمینیت، لێ محەمەد سالح پێدەیی و کەسەکێ دی یێ خوڕکی ژی ژوان ڤەدبن و ب چەك ڤە دچن. ژ مەفرەزا وان ب تنێ ٦ کەس دمینن.
شەمۆ بڕیارێ ددەت بچیتە سێمێلێ، ئەو بەهزاد سلێڤانەیی و حسێن عەزیز سلێڤانەیی (رزگار) دگەل خوە دبەت. کاوە، سیامەند و غەریب ب تنێ دمینن. کاوە و هەردوو هەڤالێن خوە ڤەدگەڕنه سینا. بەهزاد سلێڤانەیی ژی خوە ل سێمێلێ ڕادەستی ڕژێمێ دکەت. پشتی چەند ڕۆژا شەمۆ ڤەدگەڕیتەڤە و دچنه کەلەبەدرێ. ژنویکا نامەك ژ عبداللە سالح دگەهیتە وان. دنامێ دا هاتیە کو ل ٢/٩ ل وی جهێ ئەو لێ ژێك ڤەبووین ئامادەببن، لێ نامە ل ٥/٩ دگەهیتە وان. پشتی هندەك هەڤالێن وان دچن، چەکێ زێدە دگەل وان دمینیت، ئەو نەچاردبن وی چەکی ل دەف هەڤالەکی دانن و کودەکی ددەنه وی هەڤالی و د ناڤ دەڤەرا هاجا د بن سێمێلێ ڕا دچن گوندێ مەوانا، پاشی خوه دگه‌هیننه گوندێ دۆلا ل پشتا چیایێ سپی. دۆلا یا تژیە ژ پێشمەرگێ پارتی، لۆما ئه‌و نەچاردبن بچنە چەمباهیڤێ. پتنێ پێنج پێشمەرگە ژ مەفرەزا سەمۆی ماینە.
ل چەمباهیڤا دچنه مالا هەڤالێ خوە (ئەحمەد). ئەحمەد دبێژیتە وان: هوین هاتینە ڤێرێ مالا من خرابکەن! و دبێژیتە وان، هوین جاشن، ما هوین شەرمێ ژ خوە ناکەن!! ئه‌ز دێ هەوە ڕادەستی پێشمەرگەی کەم.
کاوە و هەڤالێن خوە دبێژنە ئەحمەد: کا مە تێبگەهینە کا بۆچی ئەم جاشین؟
ئەحمەد دبێژیتە وان:هەر وەکو هوین خوە خشیم دکەن! ئەو دبێژنە وی:ئەم خوە خشیم ناکەین و ئەم نزانین چ چێبوویە، ئەو ڕۆژا ئەم ژ ڤێرە چووین، ئێدی مە کەس نەدیتیە. کا بۆ مە بێژە کا چ چێبوویە؟
باوەری بۆ ئەحمەدی جێدبیت کو ڤێ کۆمێ ئاگەهـ ژ چ نینە، لۆما وان دهنێریتە جهەکی ئەولە ل ڕۆژئاڤایێ چەمباهیڤی. ئەو ژی هەڤالێ خوە شەهید حسێن، ژبۆ دویڤچوونا ڤی بابەتی دهنێرنه زاخۆ. حسێن عەزیز خەلکێ زاخۆ یە و شەهرەزایە و لەشکەری ل سەر نینە. حسێن ریهێن خوە دتراشیت، ب شەلوالەکێ کوردی و کراسه‌کی دچیتە د زاخۆ دا، دا هەوڵ بدەت عبداللە سالح و سەید عەزۆ یان بەهائیددینی کو ئەندام لق بوو ببینیت.
حسێن ئێڤاریەکا درەنگ ڤەدگەڕیت، هندەك کەل و پەلێن بۆ هەڤالێن خوە دگەل خوە ئیناین. شەهید حسێن ل زاخۆ بتنێ بەهائەدینی دبینیت، کو ئه‌و ژی کادره‌کێ وانێ پێشکه‌فتی بوو و خوه ڕاده‌ستێ ڕژێما ئیراقێ کریه. بەهائەدین نامەیه‌كێ بۆ شەمۆی دگەل شەهید حسێنی دهنێریت، د ناما بەهائەدین دا هاتیە: هوین عەزیزترین هەڤالێن منن، دلێ من یێ ب جەحلینیا هەوە ڤە، لۆما من ئەڤ نامە بۆ هەوە نڤێسیە، ل کوردستانێ ژ هەوە پێڤە، کەسەکێ دی ب چەك ڤە دگەل (حزب الشعب) نەمایە.
بەهائددین وان ئاخڤفنێن ئەحمەد گۆتینە وان، هەمیا پشتڕاست دکەت و دبێژیتە وان کو:عبداللە سالح و سەید عەزۆ یێن ل زاخۆ، باشترە کو هوین ژی خوە بۆ کەسێ نەدەنه کوشتن و پێشنیار دکەم کو یان هوون ژی خوه ڕاده‌ستی پارتی بکه‌ن، یان ژی حکومه‌تا ئیراقێ، لێ ب دیتنا من بۆ وه باشتره کو هوین خوە ڕادەستی حکومه‌تێ بکەن.
کاوە و هەر پێنج هەڤالێن خوە یێن دی کۆمبوونەکێ دکەن، دا بڕیارەکێ ل سەر چارەنڤیسێ خوە بدەن.
شەمۆ دبێژیت: ئه‌ز بخوه نە دچمه نەڤ پارتی و نەژی خوە ڕادەستی دوژمنی دکەم، ئەوێن دی ژی هەمان بڕیار دا. سیامەند کۆچەر و شەمۆی پێکنەدکر،جڕەك توند دناڤبەرا وان دا چێبوو و وان کلاشینکۆف ل ئێکودوو کێشان. سیامەند، دبێژیتە وان:ئەز دگەل هەو ناهێم و وان دهێلیت و دچیت، لێ پشتی هینگێ دچیتە سوریێ وپاشی دگەل وان ١٣ کەسێن هاتین گرتن ژ لایێ ڕژێمێ ڤە دهێتە ل سێدارەدان.
کاوەی و هه‌ڤالێ خوه عزەت بامه‌ڕنی وان دڤێت نیشانەکێ بۆ مالێن خوە ڤڕێکەن کو هێشتا دساخن.
مرۆڤەکێ شەمۆی ناڤێ وی رەجەب دەستمری بوو دچیتە بامەڕنێ، برایێ کاوەی و بابێ عزەت دبینیت، رۆژا پاشتر هەردوو دهێنە دەف وان. کاوە و عزەت وان ئاگەهداردکەن کو ئەو دێ چنه‌ڤه سوریێ. هینگێ کاوە یێ ب ئێشا مەلاریا کەتی، غەریب شرینقێن مسەکەن بۆ وی ژ زاخۆ دئینیت. کاوە نەخوەشیا خوە ل برایێ خوە دڤەشێریت. بابێ حسێنی زۆریێ ل کوڕێ خوە دکەت و وی دبەت ڕادەستی ڕژێمێ دکەت. شەمۆ، عزەت و کاوە ب تنێ دمینن.
ئێدی ئه‌و به‌رێ خوه ددنه سنوورێ سوریێ بۆ ده‌رباز بوونێ. ئەو ژی دچنه گوندێ خەربەرنیرێ ل قۆنتارا چیایێ سپی یا باشوور، مالەکا کورد بتنێ ل وێرێ یە. پاشی ئه‌و خوه دگه‌هیننه به‌ر دیجله‌ی و ل ئاڤا دیجله‌ی دەربازدبن. کاوەی شرینقەك بتنێ مایە، ئەو دەمژمێر دوویێ شەڤێ دگەهنه گوندێ گرگامش ل ئالیێ سوریێ. ژ وێرێ بۆزێ میرانی (ئێکەتی) بوو، وان ب ترۆمبێلێ دبەته قامشلی.
دەمێ ئه‌و دگەهنه قامشلی، ئه‌و ل وێرێ سەید عەزۆی و مەحمود عیدۆی دبینن. دەمێ ئەو کاوەی و هاڤالێن وی دبینن، ڕەنگێ وان دکەڤیت. کاوە و هەڤالێن خوە پسیارا کاك سامی ژ وان دکەن، ئەو ژی دبێژنە وان کو ئەو یێ ل دێرکێ. کاوە و هاڤالێن خوە دگەل سەید عەزۆی و مەحمود عیدۆ ب وی سەروبەری ڤە دچنه دێرکێ. ب رێڤە سەید عەزۆ دانپێدان کرن کا وان چ کریە، گوتن کو مخابراتێن ئیراقێ ئەو یێن دەربازی سوریێ کرین. مەحمود عیدۆ ژی ئاخفتنا سەی عەزۆی پشتڕاستدکەت و دبێژیتە وان کو ئەو ب (ڤی) دەستی یێ چوویە دەستێ ئەفسەرێ مخابراتا ئیراقێ و هەمی پێزانینێن ل سەر هاتن و چوونا سەید عەزۆی و عەبدوللا سالح دانە وان.
پێشوەخت کاوەی ڕاپۆرتەکا درێژ ل سەر وان هەموو ڕوودانێن وی دیتین و بهیستین نڤێسیە و نیشا شەمۆی و عزەتی ژی دایە و وان ژی واژۆکریە. دەمێ ئەو دگەهنه دەف سامی عبدالرحمن، کاوە وێ ڕپۆرتێ ددەتەف وی. پشتی سامی ڕاپۆرتێ دخوینیت، ددەتەف جەنگۆی. پشتی هینگێ سامی دبێژیت: دڤێت ڤی بابەتی بێدەنگ بکەن هەتا ئەز هەوە ئاگەهداردکەم و بژاندنەکا ناڤخۆیی دەردکەم.
سامی بەری بچیتە شامێ، کاوەی و عزەتی ڕادسپێریت کو بچن سەید عەزۆی ببینن، چونکە وەك سامی گوتیە وی، گەلەك نهێنیێن نەدرکاندی ل دەف وی هەنە. سامی داخواز ژوان دکەت، سەید عەزۆی ڤەکۆلن و وان نهێنیێن ڤەشارتی ژ وی بزانن و بگەهینن وی.
عزەت و کاوە دچنه دەف سەید عەزۆ، ئەو دبێژیت وان، ئەز دزانم هوین باوەر ژ من ناکەن، لێ پشتڕاست بن، هەر جارا ئەز چوویمە دەف سامی، من ئەو ب هەموو کار و بزاڤێن عبداللە سالح ئاگەهدارکریە، لێ سامی گۆتیە من، تو دگەل عبداللە سالح، یێ کەڕی، یێ کوورەیی و یێ ڵاڵی و نابیت ئێک ئاخفتن ژی ژ ده‌ڤێ ته ده‌رکه‌ڤیت و دێ بتنێ فەرمانێن وی جیبجی کەی.
دیسان سەید عەزۆ دبێژیتە وان،کو عبدالله‌ی ل زاخۆ پەیوەندیێ دگەل فرقا له‌شکه‌ریا زاخۆ چێکرین و گۆت، کو عبداللە سالح ژ زاخۆ دگەل مخابراتێ چوویە مۆسل و بڕیار وەسا بوو، کو ئەم (پارتیگەل) ب هەماهەنگی دگەل مخابراتێن ڕژێمێ بارەگایەکێ ل چیایێ سپی ڤەکەین و وی چەکێ ل سوریێ دەربازکەین و ئەو کەسێن ژ لەشکەریێ د ڕەڤن وەرگرین و بینینه وی بارەگای، مەشق ڕاهێنانێن سەربازی ب وان بکەین هەتا هێزا خوە یا لەشکەری ئاڤادکەین هینگێ ئەم ب خو دێ جهێ خوە کەین.
کاوە د ڤێ دیدارێ دا دبێژیت:ئەو پسیارا من دڤیا بەرسفا وێ بزانم ئەوبوو، ئەرێ ڕژێما ئیراقێ بەرامبەری چ دێ ڤی تشتی هەمیێ بۆ مە کەت؟
دەمێ کاوە و هەڤالێن خوە دگەهنه سوریێ، ئه‌و هەوڵددەن کو عبداللە سالح ببین دا ڕاستیێ بزانن، لێ وی نابینن، سامی عبدالرحمن مانا عبداللە سالح ل سوریێ، هەم ب مەترسی ل سەر خوە وهەم ژی ل سەر پەیوەندیێن پاتی گەل و سوریێ دیبنیت، لۆما دەملدەست وی د هنێریتە هۆلەندا.
سەید عەزۆ ژی دزڤریتە ناڤ پارتی و ل سەر ئێزگەیێ دەنگێ کوردستانێ وان هەموو نهێنیێن پارتی گه‌ل دگه‌ل ئه‌من و ئیستخباراتا ئیراقێ ئاشکرادکەت.
سامی عبدالرحمن ب ڕێیا دەرکرنا بژاندنەکا ناڤخۆیی، بڕیارێ ددەت کو چێنابیت هیچ ئەندامەکێ پارتی گەل، بەحسێ وی بابەتی بکەت. پشتی هینگێ بژاندنەکا دی دەردکەت، ئەو ئاماژێ ب ب زڤرینا وان سێ هەڤالێن ژ کوردستانێ هاتین ددەت، لێ چ ئاماژە ب ڕاپۆرتا کاوەی نادەت. سامی سۆزێ ددەتە کاوەی، کو ڕاپۆرتا وی بکەتە ئێکەم خالا کۆنگرێ پارتی گەل و هەر کەسێ پشتی ڕویدانێن سەناتێ سەرپێچیەك کربیت و بوویە ئەگەرێ ژ ناڤچوونا وێ هێزێ و وان کادرا سزابدەت.
کاوە هەتا مەها ٦/١٩٨٣ل سوریی دمینیت، ل بارەگایێ دێرکێ کۆمبوونەکێ دکەن، کاوە ب ترۆمبێلێ دگەل سامی و وریا ساعاتی دچیتە قامشلی. ئێك ژ پێشنیارێن ڕاپۆرتا کاوەی ئەوبوو، کو هندەك کادرێن ڕێکخستنێ یێن شەهرەزا، بچن خوە ڕادەستی ڕژێمێ و پارتی بکەن و ل باژێڕا کارێ رێکخستنێ بکەن، نە مەفرەزە بچن و ببنە ئەگەرێ شەڕێ براکوژیێ. بڕێڤە سامی ڤێ پێشنیارێ بۆ وریای دبێژیت.
بڕیاردهێتە دان کو ١٣ کەس دگەل وریا ساعاتی بچنه کوردستانێ.
دلێر لبیب دزانیت کو ڕەوشا کاوەی نەیا باشە و بۆ کاك سامی پێشنیار دکەت، بۆ دەمەکی مۆلەتێ بدەن کاوەی و وی بۆ بێنڤەدانێ ڤڕیکەن شامێ. لێ کاوە دبێژیته وان کو:وی نەڤێت بچیتە شامێ، بەلکو وی دڤێت بچیتە کوردستانێ. ئارمانجا کاوەی ئەوە بچیت کوردستانێ و نەزڤڕیتەڤە.
کاوە، جەنگۆ و وریا و هەژمارەکا دی ل مەها ٧/١٩٨٣ ل ئاڤێ دەربازدبن و دگەهنه چیاێ سپی. کاوە و هندەك هەڤالێن خوە ل گەلی دەربازدبن، لێ وریا، فەوزی بامه‌ڕنی، حەسەن عەلی حەیدەر بامه‌ڕنی و هەژمارەکا دی، ل چیایێ سپی دمینن. بڕیار وەسابوو کو وریا و هه‌ڤالێن دی ل چیایێ سپی هندەك کەسا ببینن و پاشی ئەو ژی دویف کاوەی و هاڤالێن وی دا بچن.
لێ پاشی ئەو کۆما دگەل وریای ژ گەلی دەربازنابن، کاوە، سەید عسمەت و هندەك هەڤالێن دی دچنه بامەڕنی، چەند ڕۆژا خوە ل وێرێ دڤەشێرن. موسا کێستەیی بەری وان چوویە بامەڕنێ. کاوە و سەید عسمەت ل بن گویزێن جندیا ل بامه‌ڕنێ، موسا کێستەیی دبینن، ئەو ئەندام لق بوو، کاوە ل وێرێ دەستڤەکێشانا خوە پێشکەشی موسای دکەت. عبدالباقیێ بابێ کاوەی، دڤێت وی دگەل سەلمانێ حەجی مەحمود بۆ لژنا ناوچا ئامیدیێ یا پارتی بهنێریت. برایێ کاوەیێ مەزن وی ئاگەهدار دکەت کو لژنا ئامێدیێ بڕیار یا دای، یان دڤێت کاوە ١٠٠٠ دیناران بهایێ تڤەنگا پارتی بدەت یان دێ هێته گرتن.
ئەو تڤەنگا بڕنۆ ئەحمەد چەلکی ل ڕاژان دابوو کاوەی، لێ کاوەی دابوو شەهید قاسم بامەڕنی و نەبربوو سوریێ، وی ژی دابوو زهێرمستەفا بامەڕنی، قاسم و زهێر پێکڤە ل ساڵا ١٩٨٢ل بن گوندێ گولێ شەهیددبن و دوژمن وێ تڤەنگێ ل سەر جەنازێ شەهید زوهەیر ڕادکەت.
کاوە ژ بەر بابەتێ تڤەنگێ نەڤێت بچیتە لژنا ئامێدیێ، بەلکو دگەل برایێ ئەبو ئیڤان دچیتە بارەگایێ فەوجا سێ یا حزبا شۆعی ل گه‌لیێ هه‌سپا و دگەل وان دبیتە پێشمەرگە.
حزبا شوعی ژی باوەریێ ب وی نائینیت و دبێژنە وی، ئەگەر تە بڤێت دێ تە هنێرین سوریێ، ئەگەر تە بڤێت ژی ل ڤێرە وەك مێڤان بمینە. هەر چەندە کاوە دبێژیتە وان کو وی دەست ژ پارتی گەل بەردایە، لێ باوەریێ پێ نائینن. کاوە هەیامەکێ درێژ ل بارەگایێ فەوجا سێ دمینیت.
کاوە پشتی شەڕێ پشتئاشان دچیتە دگەل مەفرەزا ئەبو ئیڤان و پشکداریێ د هەمی چالاکیێن سریا ئێك دا دکەت. پشکا پتر یا ڤان چالاکیا، بۆسە و چاندنا مینا بوون د ڕێیا سوپا و ڕەشەکێن ڕژێمێ دا. هەروەسا پشکداریێ د لێدانا رەبیێن ماسیکێ، لێدانا رەبیە و بارەگایێ ڕێکخراوا ئەمنا ڕژێمێ ل مانگێشکێ و لێدانا بارەگایەکێ جاشا ل بێرسڤێ، سۆتنا جێب قیادەکێ ل گەلی بێتکارکی، لێدانا دوو ئیڤایێن (جیش الشعبی) ل ئینشکێ، بۆسا پرا دویلیا، بەرسینگگرتنا هێرشا دوژمنی بۆ سەر لژنا ناوچا دهۆکێ و شێخان، چالاکیا سەرێ ئاشاوا، تۆپبارانکرنا بارەگایێن ڕژێمێ ل بامەڕنێ و سکرینێ. لێدانا رەبیا نێزیك پرا ده‌لا ل زاخۆ، لێدانا دوو ئیڤایێن لەشکەری ل ئینشکی.
د ڤی ماوەی ژی دا پارتی گەل ب بەردەوامی پەیوەندیێ ب کاوەی دکەن.
رۆژەکێ ل ناڤبەرا هه‌ردوو گوندێن شرتێ و داودیێ ل نێزیک بامه‌ڕنێ، جەنگۆیێ کادرێ پارتی گه‌ل وی دبینیت و وی ئاگەهداردکەت کو کاوە مەجلمەختی یێ شەهیدبووی، کاوە مەجلمەختی هەڤالەکێ گەلەك نێزیکی وی بوو، لۆما ئەو ژ بەر شەهیدبوونا وی گەلەك خەمگیندبیت. جەنگۆ داخوازێ ژ کاوەی دکەت کو ڤەگەڕیتەڤە ناڤ پارتی گەل. پاشی سەید عسمەت بامه‌ڕنی، نامەکا سامی عەبدولرەحمان دگەهینیتە کاوه‌ی، سامی دبێژیتە وی، هەر جهێ تو لێبی، تو کادرەکێ مەیی و داخوازێ ژ وی دکەت، وان نهێنیێت ل دەف وی بپارێزیت.
ل ساڵا ١٩٨٦ سەرۆك مه‌سعود بارزانی دهێتە دەڤەرا لقا ئێك، بابێ کاوەی، عبدالباقی بامەڕنی دچیتە دەف وی، پشتی هینگێ کاوە و حەمدی تەیب دچنە دەف. سەرۆك دبێژیتە کاوەی، چه‌وا تو کۆڕێ عبدالباقی بامەڕنی بی و تۆ گەهشتیە ڤان؟ کاوە ژی چیرۆکا خوە بۆ سەرۆکی دبێژیت.
پشتی ڤێ سەرەدانێ، کاوە و حەمدی هەردوو، حزبا شۆعی دهێلن. کاوە ل لژنا ناوچا ئامێدیێ دبیتە پێشمەرگە و ئەرکێ وی دکەڤیتە دگەل ڕێکخراوا بارەگایێ لژنێ.
پشتی کاوە پەیوەندیێ ب پارتی دکەت، پشکداریێ د چەندین شەڕ و داستانان دا دکەت.
وەکی سۆتنا ئیڤایەکێ ل مێکرێ ل سه‌ر جادا کانیماسێ-بێگۆڤا، ل نێزیک گوندێ گرکا. لێدانا رەبیێن هنداڤ گوندێ شمایلا دوو جارا، لێدانا بارەگایێ ئەمنا ڕژێمێ و بارەگایێ (جیش الشعبی) ل مانگێشکێ، بەرسینگگرتان هێرشا هێزا مەلکۆی بۆ سەر گوندێ ئەرەدنا هەروەسا پشکداری داستانا بامەڕنی دا دکەت.
کاوە بامەڕنی د ڤێ دیدارێ دا دبێژیت:هەر ئاخفتنەکا من د ڤێ دیدارێ دا گۆتی، وەکو پێزانین منا گۆتی، دەربارەی وێ ڕاپۆرتا من دایە کاك سامی ژی، ئارمانجا من ئەو بوو، ئەز هندەك راستیا بزانم، هەوڵدانێن من ژبۆ دیتنا کاك عبداللە سالح ژی هەر پێخەمەت وەرگرتنا بەرسڤا هندەك پسیارا بوون، لێ مخابن، من ئەو بەرسڤ چ جارا وەرنەگرتن. کاوە خوە و هەژمارەکا گەنجێن خوین گەرم وەکو قوربانیێن ڤان شاشیا دبینیت.
هیڤی و ئومێدێن کاك کاوەی ئەوە، ئەو سەرکردێن پشکدار د ڤان ڕویدانان دا، ڕۆژەکێ ئەو ب خوە، ڕاستیا ڤان ڕوودانان بۆ خەلکی ڤەگێڕن، چونکە هێشتا هندەك ژ وان دساخن.
ل سالا ١٩٨٥ڕژێم ب نڤێسینەکا نهێنی بڕیارا گرتنا هەمی قوتابخانێن ل دەڤەرێن ڕزگارکری دەردکەت. وی دەمی برایێ کاك کاوەی نڤێسەرێ قوتابخانەکێ بوو، خویشکا وی ژی ل پەروەردا دهۆکێ کاردکر. ڕۆژا دووێ ژ دەرکەتنا وێ بڕیارێ، ناڤه‌رۆکا بڕیارێ ل ئێزگێ دەنگێ کوردستانێ دهێته خواندن. ڕژێم ٤ کەسا ب تاوانا ئاشکراکرنا ڤان نهێنیان دگریت، کو ئەو ژی مامۆستا حوسنا ئه‌حمه‌د مه‌لا رەشید بامه‌ڕنی، مەیان محەمەد مەلا رەشید و برا و خۆیشکا کاوەی بوون.
ڕژێم خویشكا کاوەی و هەڤالێن وێ دبەتە کەلها ئالۆکا و برایێ وی ژی دبەتە بارەگایێ ئەمنا دهۆکێ. پشتی هەیڤەکێ د زیندانێ دا دمینن، دانپێدانێ ناکەن و دهێنە ئازادکرن.
کاوە بامەڕنی ل ڕۆژا بەری ئەنفالێن بەهدینان دەستپێبکەن، ل ڕۆژا ٢٤/٨/١٩٨٨ ل بارەگایێ لژنا ناوچا ئامێدیێ بوو. وی دەمی مالا وان ل گوندێ گویلکا بوو، مالا وان دچیتە گوندێ ئۆرە. کاوە ل شەڤا ٢٥/٢٦ دگەل ڕێکخراوا سەلاحەدین دچیتە گوندێ ئەلکویشکێ سەر جادا گشتی. ب شەڤێ دەمێ کاورانێ تانکێن ڕژێمێ رادوەستیان، وان خێزانێن خەلکی کۆمدکرن و ب هەماهەنگی دگەل رەبیەکێ، ل جادێ دەربازدکرن. و دێ شەڤێ دا گەلەك زارۆك ژ خێزانێن خوە ڤەدقەتیێن و بەرزەدبن و گەلەك ژی نەشیان ل جادێ دەربازببن.
لژنا ئامێدیێ دهێتە بەردان، کاوە و هەژمارەکا پێشمەرگەی هەتشەڤا ٢٧/٢٨/٨/١٩٨٨ ل بنێ گەلیێ دێرا ل نێزیکی ئیسنادا لژنا ئامێدیێ دمینن.
ڕێ دهێنە گرتن، هەژمارەکا خەلکی ل گەلیێ بازێ ئاسێ دمینن. ئێك ژ وان کەسێن کاوەی داخواز ژێ کری کو دگەل وی ل جادێ دەربازببیت، قەهار گویلکی بوو، دسەر هندێ ڕا کو خێزانا وی ژی ل جادێ دەربازببوو، لێ خێزانەکا وی یا دی ل دهۆکێ بوو. وی دڤیا تشتەکێ ژ وێ بزانیت، لێ مخابن قەهار دگەل کاوەی ناچیت و دهێتە گرتن و ئەنفالکرن.
کاوە ب کلاشینکۆفا خوە ڤە، ئاربیجیەك و گولەك ژی یا دگەل وی، دگەل پێشمەرگێن لژنا ئامێدیێ د ڕێیا گرکا ڕا ل جادێ دەربازدبن.
ئەو دگەهنە گوندێ قومریێ و ل وان دبیتە سپێدە، ئەو ل وێرێ بێهنا خوە ڤەددەن. ل وێرێ جاش دگه‌هنه ده‌ف وان و شه‌ڕ ده‌ستپێدکه‌ت و ئه‌و ب شه‌ڕ خوه ده‌رباز دکه‌ن.
پشتی کو ئه‌و سه‌ردکه‌ڤنه چیای، کاوە ب بەردەوامی ب دووربینێ تماشەی دەڤەرێ و جم وجۆلێن ڕژێمێ دکەت و دبینیت دەمێ فڕۆکێن ڕژێمێ نزم ل هنداڤی جادا گشتی دفڕین و ئاگری بەرددەن گوندا. هێزێن ڕژێمێ بۆ رەخێ هرۆرێ ژی دچن، هەر چەندە گەلەك خێزان و پێشمەرگە ل وێ سەنتا هنداڤ قومریێ و تەبالا چبوون، لێ هێزێن ڕژێمێ بۆ وی ئالی ناچن. ئەگەر بۆ وی ئالی ژی چبان، دا ژ نەچاری شەڕ ژی چێبیت و دا گەلەك خێزان ژی کەڤن دەستێ ڕژێمێ.
کاوە و هەڤالێن خوە دچنه خەنووکەی ل سه‌ر سنووری، پاشی ب چەك ڤە دچنە د گوندێ ئارۆشێ دا. پشتی هینگێ کاوە و دایك و باب و خێزانا خوە ڤێكدکەڤن و ڕژێما تورکیا ژی وان دبەتە کەمپا مێردینێ و چار ساڵا ل وێرێ دمینن.
کاوە عبدالباقی بامەڕنی ل ساڵا ١٩٩٢ دگەل مالباتا خوە، ڤەدگەڕیتە کوردستانێ و مالا خوە دبەنە بامەڕنێ. خانیێ وان ژی ژلایێ ڕژێمێ ڤە هاتبوو خرابکرن، لۆما نەچاردبن، خانیەکی ب کرێ بگرن و تێدا دبژین.
پشتی هینگێ کاوە و سەید سەلمان دبنە کادر ل لژنا ناوچا ئامێدیێ و درێژیێ ب خەباتا خوە ددەن. کاك کاوە ل ١/١/١٩٩٣ دبیتە بەرپرسێ ڕێکخراوا گولان یا بارەگایێ لژنا ئامێدیێ و دهەمان دەمدا دبیتە کادرێ پشکا ڕێکخستنێ ل هەما لژنە. ل ١٢/٤/١٩٩٤ دبیتە ئەندامێ لژنا ئامێدیێ وبەرپرسێ بەشێ دیڤچوونێ ل پشکا ڕێکخستنێ.
کاك کاوە ل مەها ٩/١٩٩٥ بۆ لقا ئێك دهێتە ڤەگوهازتن و دبیتە ئەندامێ نڤێسینگەکا ڕێکخستنا بارەگایێ لقێ ل پشکا پێزانینان. پشتی هینگێ دبیتە بەرپرسێ پشکا ئامار و تۆمارێ. ل ١/٤/١٩٩٦ دبیتە کارگێرێ لژنا ناوچا سێملێ و بەرپرسێ پشکا دارایی.
کاك کاوەی، د ڤی ماوەیی دا پشکداری د هەمی شەڕێن بەرگریێ و به‌رسینگگرتنا هێرشێن تیروریستا بۆ سه‌ر کوردستانا ئازاد دا کریە. دەمێ ئەو ل لژنا ناوچا ئامێدیێ دبیتە بەرپرسێ ئیداریێ هێزێن ئامێدیێ ل محوەرێ سۆران هەتا حاجی ئومەران و پشتی هینگێ دبیتە بەرپرسێ ئیداریێ هێزێن ئامێدیێ ل میحوەرێ خەلیفان سپیلکی.
ل ساڵا ١٩٩٧ دبیتە بەرپرسێ هێزێن پێشمەرگەی ل لژنا ناوچا سێمێلێ ل میحوەرێ جانەگای ل پشتا چییایێ کۆرەك و ل وێرێ دگەل وێ هێزێ جێگیردبیت.و هەتا رانیا دچیت، پشتی هینگێ ل جانەگای ل پشتا چییایێ کوڕەك د گەل وێ هێزێ جێگیردبیت.
ل ساڵا ٢٠٠٣ دبیتە بەرپرسێ ئیدارا میحوەرێ تلکێفێ و پشکداریێ د شەڕێ ئازادیا ئیراقێ دا دکەت.
کاك کاوە ل ٢٨/٣/٢٠٠٦ دبیتە ئەندامێ لەقا ٢٠ یا شێخان، ل ٢٠٠٩ دبیتە بەرپرسێ نڤێسینگەها هەلبژارتنا ل هەمان لق و هەتا مەها ٦/٢٠١٢ ل سەر وی ئەڕکی بەردەوامدبیت. پاشی ل ساڵا ٢٠١٢ دهێتە خانەنشینکرن.
کاك کاوە دگەل لەقا ٢٠ ل میحوررێ ناوەران پشکداریێ د شەڕێ دژی تیرۆرستێن داعش دا دکەت.
سه‌نته‌رێ کۆماته
یێ دێکومهنت کرنا دیرووکا شۆڕشێ
کار و ئهرکێ سه‌نته‌رێ کۆماته دێکۆمێنت کرن و پاراستنا دیرووکا شوڕشێ یه ژ مرن و ژناڤچوونێ.
ڤی سهنتهری ب ستافهکێ بچووک و شیانێن ساده، لێ ب ڤیان و باوهریهکا مهزن، وهک پێنگاڤا خوه یا کاری یا ئێکێ، ده‌ست ب کۆمکرن، دێکۆمنێت کرن و تۆمارکرنا دیرووکا خهبات و شۆڕشا کوردستانێ کریه.
