سەنتەرێ کۆماتە یێ دەکۆمێنتکرنا دیرووکا شۆڕشێ د بەردەوامیا کار و چالاکیێن خوە دا ل ڕۆژا ١٦/٨/٢٠٢٢ ل ئۆفیسا خوە ل باژێڕێ دهۆکێ مێڤانداریا پێشمەرگە و تێکۆشەرێ دێرین شێروان سەلمان حەجی مەحمود بامەڕنی دکەت و هەڤدیتنەکا ڤیدیۆیی دگەل سازدکەت و دیرووکا خەبات و تێکۆشینا وی تۆمار دکەت و ژ ناڤچوونێ د پارێزیت.
شێروان سەلمان حەجی مەحمود یێ ناسیار ب شێروان بامەڕنی ل ساڵا ١٩٥٧ ل گوندێ بامەڕنێ هاتیە سەر دنیایێ. وی خواندنا یاسەرەتایی و ناڤنجی ل هەردوو باژێڕێن هەلەبچە و بەغدا بدوماهی ئیناینە. پشتی هینگێ ئاماده‌یی یا چاندنێ ل باژێڕێ زاخۆ بدوماهی ئینایە. پاشی دوو ساڵا ل ڕێڤەبەریا چاندنا سەرسنکێ وه‌ک کارمه‌ند کارکریە.
شێروان کوڕێ پێشمەرگە و تێکۆشەرێ دێرین سەلمانێ حەجی مەحمودێ بامه‌ڕنی یه، مام سەلمانێ بابێ شێروانی ل ساڵا ١٩٢٧ ل گوندێ بامەڕنێ هاتیە سەر دنیایێ. ئەو ل دەستپێکا سالێن چلا دبیتە ئەندامێ پارتیا هیوا و ل ساڵا 1946 دبیته ئه‌ندامێ پارتی دیمۆکراتی کوردستان و دگەل دەستپێکرنا شۆڕشا ئەیلۆلێ ژی هندەك پەزێ دخوە دفرۆشیت و تڤەنگەکێ پێ دکریت و ل گەلیێ هارینا دگەهیتە هێزێن بارزانیێ نەمر. مام سەلمان پشکداریێ د هەمی شەڕ و داستانێن دەستپێکا شۆڕشا ئەیلۆلێ دا دکەت، وەکی:شەڕی زاویتە، شەڕێ مێرگا درێژ، داستانا لۆمانا، ئاشێت گەلی گەرمکێ، گه‌لی زاخۆ و شه‌ڕێ چیایێ مه‌تینا، سه‌رێ ئاکرێ و گرتنا قشلا ڕایات و گه‌له‌کێن دی. پشتی ڤان شەڕا ئەو دگەل بارزانیێ نەمر دچیتە دەڤەرا بالەکایەتی. ماڵا مام سه‌لمانی بێ سه‌رپه‌رشت دمینیت و دایکا شێروانی ڕۆڵی بابێ ژی دبینیت، لێ پاشی مامێ شێروانی ئه‌حمه‌د کو مامۆستا بوو ل سلێمانیێ، ئه‌و ماڵا مام سه‌لمانی دبه‌ته سلێمانیێ و ل وێرێ سه‌رپه‌رشتیا وان دکه‌ت. مام سەلمان ل دەڤەرا بالەکایەتی و ل دەڤەرێن دی درێژیێ ب خەباتا خوە ددەت و پشکداریێ د گه‌له‌ک شەڕ و داستانێن پێشمەرگەی دا ل وێ دەڤەرێ دکەت و ڕۆلەکێ بەرچاڤ د گرتنا کەلها ڕایات دا دبینیت.
ل ساڵا ١٩٦٣ مام سه‌لمان پشکداریه‌کا کارا د داستانا چیایێ مەتینا دا دکەت و هەردوو هەڤالێن وی یێن قاره‌مان عەلیێ حەیدەری و جەمیلێ سۆر (جه‌میل تۆفیق) د ڤێ داستانێ دا شەهید دبن. جەمیلێ سۆر به‌رپرسێ قولا وان بوو و ئێك ژ هەڤالێن بارزانیێ نەمر بوو کو دگەل وی چوویە ئێکەتیا سۆڤیەت ل ساڵا 1947. پشتی شەهیدبوونا جەمیل تەوفیق، مام سەلمان ل شوینا وی دبیتە سەرقۆل.
پشتی دانوستاندنێ شۆڕشێ ل ساڵا 1964 د گەل ڕژێما عەبدولسەلام عارف دەستپێدکەن، مام سەلمان ژنوی دشێت سەرەدانا خێزان و زاڕۆکێن خوە ل سلێمانیێ بکەت و وان دگه‌ل خوه دبه‌ته‌ڤه بامەڕنێ.
مام سەلمان پشتی شەڕێ چیایێ مەتینا و پشتی جاش و له‌شکه‌رێ ئیراقێ بامه‌ڕنێ سۆتی، ئه‌و مالا خوە دبەتە گوندێ قومریێ ل دەڤەرا بەرواری باڵا، پاشی ژی دبەتە د شکەفتەکێ ڤە ل گەرمکێ ل گوندێ کێستە و هەتا ساڵا ١٩٧٠ ل گوندێ کێستە دمینن. پشتێ رێکەفتنا ١١ ئادارێ جارەکا دی ڤەدگەڕنەڤە بامەڕنێ. ل ساڵا ١٩٧٤ ئه‌و پشکداریێ د شەڕێن گەلیێ دهۆکێ و کێلیا شەدایێ دا دکەت و ژ ئەنجامێ بۆمبەبارا فڕۆکێن دوژمنی مام سەلمان و پسمامێ وی حەسەن محەمەد خالد برینداردبن. ل ساڵا ١٩٧٥مام سەلمان تووشی نەخوەشیا زەراڤی دبیت و ژ بۆ چارەسەریێ دچیتە ئیرانێ، هێشتا ئەو ل ئیرانێ شۆڕش راستی شکەستنێ تێت. مام سەلمان ل قەسر شرین خوە ڕادەستی ڕژێما ئیراقێ دکەت. ڕژێما ئیراقێ وی و خێزان و زاڕۆکێن وی بۆ زرێجیێ و پاشی بۆ باژێڕێ سەماوە ل باشوورێ ئیراقێ دویردئێخن.
ل ساڵا 1981 ڕژێما ئیراقێ مام سه‌لمانی ب مالباتڤه دگریت ژ به‌ر کو شێروان بوویه پێشمه‌رگه. مام سه‌لمانی ل زیندانا ئامێدیێ و خانما وی ده‌یکا شێروانی ژی ل زیندانا فه‌زیلیێ ل به‌غدا بۆ ده‌مێ ساڵه‌کێ زیندان دکه‌ن. پاشی ئه‌و ل ساڵا 1982 ب مال و زارۆک و کورێن خوه یێن مایی ڤه دچیته ناڤ شۆڕشێ و ل سنوورێ لژنا ناڤچا ئامێدیێ دبیته به‌رپرسێ ڕێکخراوا شه‌هید جه‌میل تۆفیق یا پێشمه‌رگه‌ی. پاشی ل ئه‌نفالێن ڕه‌ش ل ساڵا 1988 ئاواره‌ی که‌مپا ئامه‌دێ دبن ل باکوورێ کوردستانێ و ل ساڵا 1990 ژی په‌نایێ دبه‌نه به‌ر وه‌ڵاتێ سوێد و ل وێرێ دژین. مام سه‌لمان ل رۆژا 3/5/2017 ل سوێد وه‌غه‌را دوماهیێ دکه‌ت و ته‌رمێ وی ژی دئینن ل بامه‌ڕنێ دسپێرنه ئاخا کوردستانێ.
ل ده‌مێ کو حکومه‌تا ئیراقێ شێروانی دبه‌ته له‌شکه‌ریا نه‌چاری، ئه‌و ل ساڵا ١٩٧٧ دگەل سەردار ئامێدی دبیته ئه‌ندامێ ڕێکخستنا نهێنی یا پارتی دیمۆکراتی کوردستان.
ل ساڵا ١٩٧٨ حکومه‌تا ئیراقێ رێدده‌ته مام سەلمانی کو خێزان و زاڕۆکێن خوە جارەکا دی ڤەدگەڕینیتەڤە بامەڕنێ. شێروان ژی سەربازیا نەچاری بدوماهی تینیت و ل سەرسنکێ ل پشکا دارستانا تێتە دامەزراندن.
ل ساڵا ١٩٨٠ پشتی شەڕێ ئیران و ئێراقێ دەستپێدکەت، شێروان بامەڕنی کو وی دەمی بابێ کوڕ و کچەکێ یە، ئه‌و خانما خوه و زارۆکێن خوه دبه‌ته به‌غدا ل ده‌ف مرۆڤێن خوه، دا کو ژ چاڤێن ڕه‌شه‌کێن به‌عسیا دووربن و نه‌هێنه گرتن. پاشی ئه‌و دگەل تەوفیق حسێن شانه (برایێ شەهید خسرۆی) ل مه‌ها ئه‌یلولا ساڵا ١٩٨٠ پەیوەندیێ ب شۆڕشا گولانێ دکەن. مام سەلمانێ بابێ شێروانی دگەل وان دچیت و وان دبه‌ته ده‌ڤه‌را به‌رواری باڵا و وان دگەهینیتە مالا مەلا زەکیێ شێلازی. پشتی هینگێ ل کانیا بەستێ مەفرەزا شەهید سەعید سپینداری دبینن و پاشی ل بێشیلێ دگەهنه مەفرەزا شەهید مه‌لا ره‌مه‌زان قومری (بهەشتی). پشتی مه‌هه‌کێ ئه‌و دچنه کۆماتەی باره‌گایێ لقا ئێکا پارتی. شێروان ل کۆماتەی دبیتە بەرپرسێ نویهاتیا و ب پشتێ ئازۆقەی بۆ بارەگایێ لقێ ژ گوندێن باکوورێ کوردستانێ دکێشن. پاشی تێته ڤه‌گوهاستن بۆ مەفرەزا ئەحمەد چەلکی.
مه‌فره‌زا وان دچیته گه‌ڕه‌کێ ل ده‌ڤه‌را سپنه‌ی و مه‌تینا و شه‌ڤه‌کێ دچنه بامه‌ڕنێ. ل ڕه‌خێ بامه‌ڕنێ یێ رۆژئاڤا ئه‌و دکه‌ڤنه بۆسه‌یه‌کا دوژمنی و هەڤالێ وان (ئیحسان سالح عاشور) شەهید دبیت و ته‌رمێ وی ژی دکه‌ڤیته ده‌ستێ دوژمنی.
جاره‌کێ ژی ئه‌و بۆسیه‌کێ ل بنێ گوندێ ئەلکویشکا به‌رواری باڵا ل پێشیا سه‌ربازێن دوژمنی ددانن و دوو سەربازا دیلدکەن.
ل دمه‌کی کو خێزانا شێروانی بدزیڤه ژ بەغدا ڤەدگەڕیت و تێته دهۆکێ ماڵا برایێ وی، ڕه‌شه‌کێن ئه‌منا به‌عسیا تێنه وێ مالێ دا کو وێ بگرن، لێ ئه‌و ئێکسەر سەردکەڤیتە سەر بانێ خانی و دچیتە مالا جیرانان. ژنەك هاری وێ دکەت و عەبایەکێ ددەتێ، ئەو ژی تەکسیەکێ دگریت و دچیتە مالا حەجی سادقێ برایێ حەبیب بێشیلی، کو به‌ری هینگێ ژی ئه‌و هه‌ر بڕێکا سادقی چووبوو ده‌ڤه‌را به‌رواری بالا سه‌ره‌دانا زه‌لامێ خوه شێروانی. حەجی سادق ژی، کەمالێ برازایێ خوە ددەتە دگەل وێ و دڕێکا زاخۆ ڕا دگەهینیتە شێروانی ل گوندێ بێشیلێ. دەمێ خانما شێروانی ژ دهۆکێ ڕه‌ڤی وێ بتنێ ١٠ دینارێن ئیراقی هەبوون، مام سەلمانێ خەزیرێ وێ هندەك په‌زێن خوه دفرۆشیت و ٣٠٠ دیناران بۆ وێ و شێروانی دهنێریت. شێروان ب وان پارا هێستره‌کێ دکڕیت، حەجی سالحێ کانیمەزنی ژی گەلەك هاریکاریا وی دکەت. ئه‌و خانما خوه و زارۆکێن خوه ل هێسترێ سوار دکه‌ت و به‌ره‌ڤ کۆماته‌ی ڤه دکه‌ڤنه ڕێ. بڕێڤە ئەو نەچاردبن شەڤەکێ د شکەفتەکێ ڤە ل زەندۆرەی ل پشت زنارا کێسته بمینن. ئه‌و دوو ڕۆژا دچن هەتا دگه‌هنه کۆماته‌ی. ماڵا ره‌مه‌زانێ حه‌دادێ بامه‌ڕنی ژی هینگێ ل کۆماته‌ی بوو. شێروان ژی خانما خوه و زارۆکێن خوه دبەتە ناڤ مالا حه‌دادی. کچکا شێروانی یا ساڤایە و شیرێ زارۆکا ل کۆماته‌ی په‌یدا نابیت، ژ به‌ر هندێ ئه‌و نه‌چار دبیت کو گه‌له‌ک جارا ڕێکا دوو رۆژا بێت و ل جهێ بۆسێن دوژمنی و مه‌ترسیدار ده‌رباز ببیت و شیرێ قودیکا بپشتێ ژ گوندێ گرکا بۆ ببەتە کۆماتەی. کچکا وی نەساخ دبیت و تووشی نەخوەشیا (التهاب سحایا) دبیت، دختۆرەکێ پێشمه‌رگێ پارتیا کۆمونیست چارەسەریا وێ دکەت، لێ ئه‌و پێدڤی شرینقێن پەنسلینێ یه. شێروان وان شرینقا گه‌له‌ک بزه‌حمه‌ت و بڕێیا هنده‌ک مرۆڤان ل جولەمێرگێ بۆ پەیدا دکەت. ئێدی هەڤژینا شێروانی دبیتە هەڤڕێ و هەڤچەپەرا وی و هەلگرا خەم و بەرپرسیاریا زاڕۆکێن خوە و وی.
شێروان هه‌تا ساڵا 1981 دمینته لگه‌ل مه‌فره‌زا ئه‌حمه‌د چه‌لکی، لێ پشتی ل وێ ساڵێ ئه‌حمه‌د دچیته سوریێ و دگه‌هیته پارتی گه‌ل، شێروان ژی ده‌مه‌کی دروینیته مال و پاشی ل ساڵا ١٩٨٢ پەیوەندیێ ب پارتیا کۆمۆنیستا ئیراقی دکەت و تۆما تۆماسێ به‌رپرسێ که‌رتێ به‌هدینان یێ پارتیا کۆمۆنیست دبینیت و دبیته پێشمه‌رگێ وان. پشتی ئێکه‌تیا نیشتمانی ل سالا 1983 قڕکرنا پشت ئاشان ل دژی پێشمه‌رگێن پارتیا کۆمۆنیست و باره‌گایێ وانێ سه‌ره‌کی ئه‌نجامدای، شیروان ژی تێته ڤه‌گوهاستن بۆ ده‌ڤه‌را پشت ئاشان و قه‌ندیلی.
ل ساڵا ١٩٨٢ ده‌مێ مه‌فره‌زا وان یا مه‌فره‌زه‌یه‌کا پارتیا کۆمۆنیست ژ کۆماته‌ی به‌ره‌ڤ ده‌ڤه‌را به‌رواری باڵا و چیایێ مه‌تینا ڤه تێن و دڤێن ل جادا بێگۆڤا-کانیماسێ ده‌رباز دبن، هه‌ڤالێن وان دکەڤنە ناڤ تۆڕه‌کا مینا و هەژمارەکا پێشمەرگێن وان برینداردبن. پاشی ل سه‌ر جادێ ل نێزیک گوندێ تشیشێ ژی دبیتە شەر، لێ ئه‌و بێ زیان ژێ ده‌رباز دبن و دچنه گوندێ هه‌ترشێ.
ل ساڵا ١٩٨٢ شێروان مالا خوە دبەتە گوندێ بابیرێ ل مالا حەجی ئیبراهیمێ بابیری. پاشی ئه‌و بدزیڤه خانما خوه یا دووگیان لگه‌ل بابێ خوه ڤڕێدکه‌ته بامه‌ڕنێ. ل بامەڕنێ خودێ زاڕۆکەکێ دی ددەتێ. کوڕێ وان ژی ل وێرێ تووشی نەخوەشیا ڕویڤیکا کۆرە دبیت. ل هه‌مان ساڵ دایك و باب و مالباتا وی هەمی تێنه ناڤ شۆڕشێ. ل دەستپێکێ ل گوندێ بازێ ل دەڤەرا بەرواری باڵا ئاکنجی دبن، پاشی مالا خوە دبەنه گوندێ پاسێ. شیروان بامەڕنی درێژیێ ب خەباتا خوە ددەت و پشکداریێ دهەژمارەکا شەڕ و چالاکیێن پێشمەرگەی دا دکەت وەکی:لێدانا رەبیا شرتێ، کوورا بەرێ تەحتێ، فرۆکەخانا بامەڕنێ و گەلەك شەڕێن دی.
ل ساڵا 1984 د ده‌مه‌کی دا کو هێرشا له‌شکه‌ر و جاشێن دوژمنی یا دژوار بوو ل سه‌ر هه‌ردوو ده‌ڤه‌رێن دهۆک و زاخۆ، مام سه‌لمانێ بابێ شێروانی ژی لگه‌ل ڕێکخراوا خوه یا پێشمه‌رگه‌ی یێ دناڤ وی شه‌ڕی دا، شێروان ژی یێ ل مال ل گوندێ پاسێ و تڤەنگەکا پارتی دگەل وهندەك چاپەمەنیێن وان د مالا وی دا بوون، کو پارتی گه‌ل هینگێ یا قه‌ده‌غه‌کری بوو ل ده‌ف پارتی، لۆما شێروان هەست دکەت کو ئه‌و دێ ژ لایێ پارتی دیموکراتی کوردستان ڤە هێتە گرتن سه‌را وان تشتێن دمالا وی دا، شێروان د ڕێکا گوندێ دوکەرێ ڕا خوە دگەهینیتە بابێ خوە ل ناڤ شه‌ڕی و وی ئاگەهداردکەت کو دێ چیتە سوریێ گه‌هیته پارتی گه‌ل دا کو پارتی وی نه‌گریت، لێ بابێ وی ڕێ نادەتێ کو بچیت و وی دگەل خوە دبەتە لژنا ناوچا ئامێدیێ. سەید بورهان به‌رپرسێ لژنێ و عرفان هرۆری کارگێڕێ لژنێ شێروانی دگرن، لێ ئه‌و سۆزێ ددەنه مام سەلمانی کو ئه‌و شێروانی نەئێشینن. جەعفەر مایی و ئەحمەدێ عەبدوللایێ حەوایێ بەرپرسێن لژنا ڤەکۆلینا لژنا ئامێدیێ بوون. دیدەڤان ژی ل سەر شێروانی هەبوون کو کوردۆ زڤنگی پۆستێن پارتی گه‌ل بۆ وی دئینان. پاشی پشتی شێروان مه‌هه‌کێ د زیندانێ دا دمینیت، مام سه‌لمان ب ڕێکا سه‌ید سالح و نجم الدین یوسڤی وی بەرددەت.
ل دوماهیا ساڵێن هه‌شتینا پارتی گەل تێتە دناڤ بەرەیێ (جود) دا و بارەگایێن خوە ل ده‌ڤه‌را خواکوڕکی ڤەدکەت. ئێدی شێروان ژی دچیتە بارەگایێ مەکتەبا سیاسی یا پارتی گەل ل خواکوڕکی و ل وێرێ پێشمه‌رگاتیا خوه به‌رده‌وام دکه‌ت.
ل ٥/١١/١٩٨٧ کۆنفرانسێ ئێکێ پارتی گەل ل خواکوڕکی تێته گرێدان و ١٥٠ نوینەر پشکداریێ تێدا دکەن. پشتی هینگێ پارتی گەل بارەگایێن خوە ل کۆلەکا و بالیسانێ ژی ڤەدکەت. شێروان ژی بۆ کۆلەکا تێته ڤەگوهازتن و ل وێ دەڤەرێ سمینارا دده‌نه خه‌لکی. هەر ل ساڵا ١٩٨٧ پارتی گەل د گەل پارتی ڕێکدکەڤیت کو بارەگایێن خوە ل دەڤەرا بەهیدینان ژی ڤەکەن. ئێدی شێروان و دلێر ئەحمەد و هندەك هەڤالێن وان یێن دی ب سەرەدان تێنه دەڤەرێ و ل زێوا شکان دبنه مێڤانێن مەلبەندێ ئێکەتیێ، سادق عەمەر سندی و باییز بەڕاشی کو ل داستانا کانیماسێ هاتبوونه دیلکرن، ئه‌و وان ل وێرێ دبینن. پشتی هینگێ شێروان و هه‌ڤالێن خوه سەردانا لقا ئێکا پارتی دکەن و رەمزی شەعبان و عەبدولعەزیز تەیب ژی دبینن و لگه‌ل دروینن.
پشتی هینگێ هەژمارەکا پێشمەرگێن پارتی گەل دگەل سەلام بۆسەلی ژی تێنه دەڤەرا بەهدینان و ل زێوا شکان بارەگایێ خوە ب ڕەنگەکێ فەرمی ڤەدکەن.
شێروان بامەڕنی، موسا کێستەیی، عسمەت بامەڕنی، مەناف کانیمەزنی، سەعددین یوسف، حەجی و عەزیز و هەژمارەکا دی یا پێشمەرگا بارەگایێ لژنا پارتی گەل ل گه‌لیێ بازێ ئاڤادکەن، موسا کێستەیی دبیتە بەرپرسێ لژنێ و شێروان ژی دبیتە جێگرێ وی و بەهزاد سلێڤانه‌ی ژی دبیتە بەرپرسێ دارایی و عسمه‌ت بامه‌رنی ژی دبیتە بەرپرسێ لەشکەری. ب ڤی ئاوای ل دەڤەرێن دهۆك، زاخۆ و شیخان ژی بارەگایێن خوە ڤەدکەن و ئێدی وان چ ئاریشە دگەل پارتی نامینن. پشتی هینگێ دگەل هێزێن پارتی هەژمارەکا چالاکێن هەڤپشك ئەنجامددەن. ئەو بخوە ژی سەربەخۆ هەژمارەکا چالاکیا ل دژی بنکە و بارەگایێن ڕژێمێ ئەنجامددەن وەکی:-بۆسا ل بنێ فڕۆکەخانا بامەڕنێ، کو جاشەکی دکوژن و چوارێن دی ژی دیلدکەن،
پێنچ کلاشینکۆف و ئاڕبیجیەکێ ژی ڕادکەن.
– بۆسا سەرسنکێ، چەند سەربازان دکوژن و ٣ کلاشینکۆفا وەکو دەستکەفت ڕادکەن. -بۆسا هەڤپشکا دگەل پارتی سه‌ر ڕێکا کانیماسێ-بێگۆڤا ل بنێ ئەلکویشکێ، دوو ئیڤایێن لەشکەری دسۆژن و دوو سەربازان دیلدەکەن و هەژمارەکا چەك تەقەمەنیا ژی ڕادکەن. -سۆتنا ئیڤایەکێ ل گوندێ تشیشێ، ژ بلی ڤێ چالاکیێ شێروان بامەڕنی پشکداری د هەمی چالاکیێن دی دا دکەت.
بەری ئەنفالان بڕیار وەسا بوو کو هێزێن وان دگەل هێزێن پارتی بەرگریێ بکەن. موسا کێستەیی و عسمه‌ت بامه‌رنی ل هه‌وارا خێزانێن خوە دچن، شێروان بەرپرسیاریا بارەگای وەردگریت. لێ خەلك ژ ترسا بکارئینانا چەکێ کیمیاوی مال و حالێن خوە دهێلن و قەستا دەڤەرێن سنووری دکەن. پێشمەرگەی ژی مۆرالێ بەرگریێ نامینیت و هەر کەسەك ب مال و خێزان و زاڕۆکێن خوەڤە مژویل دبیت. هێڕشا ڕژێمێ بۆ سەر دەڤەرێن ڕزگارکری دەستپێدکەت. کانیمەزنێ تێته بۆمبەبارانکرن و گوندێ گویلکا تێته سۆتن. گەلیێ بازێ و بێشیلێ ب گرانی دهێنه بۆمبەبارانکرن. شێروان بامەڕنی و فەوزی بامەڕنی دگەل نێزیکی ٦٠ پێشمەگێن پارتی دچنه گوندێ بێلیزانێ دبینن کو ئاگرێ پێڤە. پێرەژنەكێ دبیین کو پیێ وێ یێ شکەستی و بتنێ یا ل گوندی مای. ئێدی ل جادا کانیماسێ-بێگۆڤا دەربازدبن و دچنه قومریێ. شێروان و فەوزی و ئەو هێزا پێشمەرگێن پارتی دچنه ئۆرە و ئاشیتێ و بڕێڤە دکەڤن بۆسا دوژمنی. ئەو نەچار دبن ڤەگەڕن و به‌ره‌ڤ رۆژئاڤا ڤه بچنه خەنۆکەی. پشتی هینگی دچنه گوندێ شیڤڕەزانێ یێ باکوورێ کوردستانێ و خێزانێن خوە ژی ل وێرێ دبینن. ڕژێما تورکیا وان ب کەمیۆنا دبەتە کەمپا دیاربەکر. شێروان و خێزانا خوە نێزیکی سالەکێ د کەمپێ دا دمینن. خوشکەکا وی ل ساڵا ١٩٨٣ دبیته په‌نابه‌ر وەڵاتێ سوێد. شێروان نەچار دبیت ب قەچاخی بچیتە یۆنان، پشتی هینگێ وەڵاتێ سوید مافێ پەنابەریێ ددەتێ و ل ساڵا ١٩٩٠ێ وی و خێزان و زاڕۆکێن وی دبەن سوێد.
ل ساڵا ١٩٩١ د. مەجید جەعفەر ل سەر زارێ سامی عەبدولرەحمان داخوازێ ژێ دکەت کو ڤەگەڕیته کوردستانێ، لێ شێروان ناڤەگەڕیت. پاشی ل ساڵا ١٩٩٤ سامی عەبدولرەحمان تێته سوێد، شێروان وی ل ستۆکهۆلم دبینیت. پشتی هینگێ سدقی هرۆری پەیوەندیێ پێ دکەت و ئێدی شێروان بامەڕنی ڤەدگەڕیتەڤە ناڤ ڕێزێن پارتی دیموکراتی کوردستان و ل باژێڕێ یێڤلێ پەیوەندیێ ب ڕێکخستنێن پارتی دکەت و هەتا نوکە ژی بەردەوامە. شێروان ل وەڵاتێ سوێد کارێ لێنانێ (تەباخیێ) ل قوتابخانەکێ دکەت و ل وێرێ دژیت.
کاک شێروان پشتی خەباتەکا درێژ و تژی ئەڤرازی و نشیڤی ل کوردستانێ ب پلا عەریفێ ئێکێ (عریف اول) هاتیە خانەنشینکرن.
بابێ وی سەلمانێ حەجی مەحمود ژی ب پلا نەقیب هاتیە خانەنشینکرن کو ل 2017 وه‌فاتکریه.
شێروان بامەڕنی ل دوماهیا ڤێ دیدارێ دبێژیت: ئه‌ز وەکو کوردەك شانازیێ ب خەباتا خوە دکەم، من دگەل چ ڕێکخراو و پارتیا کارکربیت، ژبۆ ئازادیا گەل و وەڵاتێ من بوویە و داخوازا من ئێکڕێزیا گەلێ کوردە.
سهنتهرێ کۆماته
یێ دێکومهنت کرنا دیرووکا شۆڕشێ
کار و ئهرکێ سهنتهرێ کۆماته دێکۆمێنت کرن و پاراستنا دیرووکا شوڕشێ یه ژ مرن و ژناڤچوونێ.
ڤی سهنتهری ب ستافهکێ بچووک و شیانێن ساده، لێ ب ڤیان و باوهریهکا مهزن، وه‌ک پێنگاڤا خوه یا کاری یا ئێکێ، دهست ب کۆمکرن، دێکۆمنێت کرن و تۆمارکرنا دیرووکا خه‌بات و شۆڕشا کوردستانێ کریه.
