بنیامین گەرەگوهی

سەنتەرێ کۆماتە یێ دەکۆمێنتکرنا دیرووکا شۆڕشێ د بەردەوامیا کار و چالاکێن خوەدا ل ڕۆژا پێنجشەمبی ڕێکەفتی ١٣/١/٢٠٢٢ ل باژێڕێ دهۆکێ دبیتە مێڤانێ پێشمەرگێ دێرن بنیامین گەرەگوهی و هەڤدیتنەکا ڤیدیۆیی دگەل وی سازدکەت و دیرووکا خەبات و تێکۆشینا وی تۆماردکەت و ژ ناڤچوونێ دپارێزیت.
عەبدولقەهار محەمەد ئۆسمان یێ ناڤدار ب بنیامێن گەرەگوهی ل ساڵا ١٩٣٦ ل گوندێ گەرەگوهێ ل وەڵاتێ شخۆی هاتیە سەر دنیایێ. ژ بەر نەبوونا قوتابخانا ل وێ دەڤەرا ئەو لێ ژییای، دەلیڤا خواندنێ بۆ وی چێنەبوویە. بنیامین گەرەگوهی ل ساڵا ١٩٥٥ دچیتە لەشکەریا نەچاری ل باژێرێ مۆسل و مەشق و ڕاهێنان سەربازی دکەت. ژ بەرکو وی حەزا فێربوونا خواندن و نڤێسینێ هەبوو، ئەو د بەر لەشکەریا نەچاری ڕا دچیتە قوتابخانا ئێڤاریا و هەتا پۆلا چواری سەرەتایی دخوینیت. هەروەسا هەڤالێ وی مەلا حسێن هرۆری ژی خواندن و نڤێسین و قورئانا پیرۆز نیشا وی ددەت و ب ڤی ئاوایی فێری خواندن و نڤێسینێ دبیت. پشتی لەشکەریا وی یا نەچاری بدوماهی دهێت، ئەو وەکو خوەبەش بەردەوامیێ ب مانا خوە د ناڤ لەشکەرێ ڕژێما ئیراقێ ددەت و بۆ دەڤەرا شەنگالێ تێتە ڤەگوهازتن. پشتی کودەتایا عەبدولکەریم قاسم ل ساڵا ١٩٥٨ و ڕاگەهاندنا سیستەمێ کۆماری ل ئیراقێ، جارەکا دی بۆ مۆسل تێتە ڤەگوهازتن و د هەمان ساڵ دا بڕێیا (عەمەر بابیری) و (مەلا مەحمود دێرشەوی) د ناڤ ڕێزێن پارتی دیموکراتی کوردستان دا تێتە ڕێکخستن و مالا خوە ژی دبەتە مۆسل و بزاڤ و چالاکیێن پارتایەتی ئەنجام ددەت و مالا وی وەکی بارەگایەکێ پارتی لێدهێت. ئەو ل ساڵا ١٩٥٨ دبیتە (نائب عریف). ل دەستپێکا شۆڕشا ئەیلۆلێ ل ساڵا ١٩٦١ فەوجا ئەو لێ ب فەرماندەیا سەعید عەبۆ بۆ سەرسنکێ تێتە ڤەگوهازتن. پەیوەندیێن بنیامێن گەرەگوهی ب بەردەوامی دگەل پارتی دمینن و پێزانینێن گرنگ ل سەر بزاڤ و پلانێن ڕژێما ئیراقێ ددەتە شۆڕشێ.هندەك هەڤالێن وی یێن رێکخستیێن پارتی دهێنە گرتن، گومان دکەڤین سەر وی ژی. حەز و ڤیانا بنیامین گەرەگوهی بۆ شۆڕش و پێشمەرگاتیێ گەلەك دمەزن بوون، لۆما ئەو ل مەها ١٠/١٩٦١ پەیوەندیێ ب شۆڕشێ دکەت. ل دەستپێکێ ل گوندێن کوڕکا و گەرەگوهێ خەباتا ڕێکخستنێ دکەت. ل نیسانا ساڵا ١٩٦٢ ل بارەگایێ هەڤالێ خوە عەمەر بابیری دبیتە پێشمەرگە. پشتی هینگێ پەیوەندیێ ب فەرماندێ لەشکەرێ ئێك رەحمەتیێ ئەسعەدێ خۆشەڤی دکەت.
ژ بەرکو بنیامێن گەرەگوهی د ناڤ سوپایێ ئێراقێ دا مەشق ڕاهێنان ل سەر گەلەك جۆرێن چەکێ سڤك و ناڤنجی کربوو و شەهرەزایاکا باش ل سەر بکارینانا چەکێ تۆپێ هەبوو. ئەو ل ساڵا ١٩٦٤ پەیوەندیێ ب فەرماندێ هێزا دهۆك رەحمەتیێ عەلیێ خەلیل ل شاوریکێ دکەت دبیتە تۆپچیێ شۆڕشێ. بنیامێن گەرەگوهی پشکداریێ دگەلەك شەڕ و داستانێن سۆڕشا ئەیلۆلێ دا دکەت میننا:
شەڕێ گەلیێ قەنتارا، هەڤالێ وی عەمەر یونس بابیری تێدا شەهید دبیت، شەرێ دێرکا هەیدویێ، مەحەمەد سالح بلێجانی تێدا شەهید دبیت، داستانا چییاێ مەتینا ئەوا ٤٤ ڕۆژان ڤەکێشای و هەژمارەکا پێشمەرگێن قەهرەمان تێدا شەهیدبووی وەکی عەریف محەمەد بێدوهی، عەبدولباقی مزویری و شەڕێ چییایێ سپی ل بێزهێ. بنیامین گەرەهوهی ل بارەگایێ هێزا دهۆك ل شاوریکی بەرپرسیاریا کارگێڕی و ئازۆقەی یا بارەگای ژی وەردگریت ( ئازۆقەی، پەڕکێن جگارا، بەرکێن چەقماقێ و تویتنێ و کەل پەلێن دی یێن پێتڤی) ل سەر پێشمەرگا پاڕڤەدکەت. بنیامێن گەرەگوهی ل سەر خەباتا خوە یا پێشمەرگاتیێ هەتا ساڵا ١٩٧٠ ل بارەگایێ هێزا دهۆکێ بەردەوام دبیت و د ناڤ شۆڕشێ دا خوە فێری خواندن و نڤێسینا زمانێ کوردی ژی دکەت. پشتی ڕێکەفتنا ١١ ئاداری و ل گۆرەی بەندێن ڕێکەفتنێ ژ بۆ تمامکرنا لەشکەریا نەچاری جارەکا دی ڤەدگەڕیتەڤە ناڤ سوپایێ ڕژێما ئیراقێ. پشتی تێکچوونا دان و ستاندنێن شۆڕشێ و ڕژێما ئیراقێ و دەستپێکرنا شەڕی ل ساڵا ١٩٧٤، ئەو جارەکا دی پەیوەندیێ ب شۆڕشێ دکەتەڤە و دبیتە بەرپرسێ كارگێڕی بارەگایێ هێزا دهۆك ل زاویتە، بەرپرسیاریا وی هەمی کاروبارێن ئازۆقەی و تەموین و ئاش و تەجهیزاتان ب خوەڤە دگرت. پشتی هینگێ ل بارەگایێ هێزا دهۆك ل گوندێ شاوریکێ بەردەوامیێ ب خەباتا خوە ددەت و دبەر کارێ خوە یێ ئیداری ڕا ئاشەکی ژی بۆ شۆڕشێ ئاڤادکەت. پشتی پیلانگێڕیا جەزائیر ل ساڵا ١٩٧٥ و ڕاوەستانا شۆڕشێ ب ئاوایەکێ دەمکی، ئەو هەوڵ ددەتە بچیتە ئیرانێ لێ ژ بەر ئەگەرێن خێزانی دەرفەت بۆ وی چێنابیت و نەچاردبیت خوە ڕادەستی ڕژێمێ بکەت. ڕژێم ژی وی ڕاپێچی لەشکەرێ خوە دکەتەڤە و دگەل دەهان هزار کوردان وی بۆ باژێڕێ دیوانیی دبەن. ژ بەر پاشخانا شۆڕشگێڕیا بنیامێن گەرەگوهی، ڕژێم وی وەکو کەسەکێ مەترسیدار ل سەر ئاسایشا خوە وی ب پلا جێگرێ ئەفسەری خانەنشین دکەت. بنیامین گەرەگوهی پشتی تێتە خانەنشینکرن، ل گوندێ خوە ل گەورەگوهێ درێژیێ ب ژیانا خوە یا ئاسیی ددەت. دگەل دەستپێکرنا شۆڕشا گولانێ و هاتنا پێشمەرگە و کادرێن دەستپێکی یێن شۆڕشێ بۆ دەڤەرێ، پەیوەندیێ ب مستەفا مزویری و ئیسماعیل بامەڕنی دکەت و دبیتە هاریکارێ شۆڕشێ و دبیتە بەرپرسێ ڕێکخرا دێرسم سەر ب لژنا ناوچا ئامێدیێ و وەك کادرەکێ چەلەنك ئەو ب مال و کەس و کار ڤە خزمەتا پارتی و شۆڕشێ دکەن. پشتی زێدەبوونا پێشمەرگەی و بەرفرەهبوونا دەڤەرێن ئازاد، بنیامێن گەرەگوهی دبیتە بەرگری مللی و پشکداریێ دگەلەك بزاڤ و چالاکیان دا دکەت و مالا وی ژی وەکی بارەگایەکێ شۆڕشێ دبیتە جهێ حەواندن و ب خودانکرنا پێشمەرگەی. بنیامێن گەرەگوهی ل سەر بزاڤ و چالاکیێن خوە هەتا ساڵا ١٩٨٨بەردەوام دبیت. پشتی ئەنفالێن ساڵا ١٩٨٨ ئەو دگەل مرۆڤ و کەس و کارێن خوە قەستا کودستانا باکوور دکەن. ل دەستپێکێ ل کەمپا سلۆپی دمینن و پشتی هینگێ ڕژێما تورکیا وان ل کەمپا مێردینێ ئاکنجی دکەت. بنیامێن گەرەگوهی و بهزاران کوردێن دی هەتا ساڵا ١٩٩٢ ژیانەکا گەلەك سەخت و دژوار د کەمپەکا سیمەکری و دوورپێچکری دا دبوورینن. دسەر وان هەمی گڤاشتن و نەخوەشیێن د کەمپێدا هاتینە پێشیا وی، لێ ئەو د ناڤ کەمپێ ژی دا ڕۆلەکێ مەزن دگێڕیت و دبیتە مختارێ گوندێ گەرەگوهێ و ئەندامێ لژنا ڕیهسپیان. پشتی سەرهەلدانێ ئەو دگەل هەژمارەکا دی یا پێشمەرگا ب ڕێیا پارتی دیموکراتی کوردستان-باکوور تێنە سلۆپی و پاشی خوە دگەهین زاخۆ، پشتی هینگێ دچنە باگێرا. بنیامێن گەرەگوهی بەرپرسیاریا خالا پشکنینا بێسرێ وەردگریت، پشتی هینگێ دبیتە بەرپرسێ زێرەڤانێن بابەکر زێباری و پشکداریێ د هەمی بزاڤ و چالاکیێن چەسپاندنا یاسای و پاراستنا دەستکەفتێن گەلێ کورد دا دکەت.
گەلەك مخابن پشتی خەباتەکا دویر و درێژ بنیامێن گەرەگوهی ل ساڵا ٢٠٠٧ ب پلا ملازم اول تێتە خانەنشینکرن و هاتیە ژبیرکرن و چ تشتێ ژ هەژی خەباتا وی بۆ وی نەهاتیەکرن.
نوکە ژی ئەو د ژیێ ٨٧ سالی دا و ب گیانەکێ تژی ئێش ژان، ژیانەکا سەخت دژوار ل باژێڕێ دهۆکێ دەربازدکەت.