مخابن ئەڤرۆکە 3/4/2023 خەباتکەرێ دێرینێ کوردستانێ و ئێکەمین کادرێ بێتەلا شۆڕشێ مستەفا حسێن باپیر ئامێدی (مدیر) وەغەرا دوماهیێ کر. وەغەرا مدیری خەمەکا مەزنە، لێ بشانازی ڤە مە وەک سەنتەرێ کۆماتە یێ دەکۆمێنتکرنا دیرووکا شۆڕشێ برێیا هەڤپەیڤینەکا ڤیدیویی یا درێژ، ئەم شیاین دیرووک و ژیانا ڤی خەباتکەرێ هێژا تۆماربکەین و ژ مرنێ رزگار بکەین، بەری ئەو وەغەرا دوماهیێ بکەت. ئەم ب ڤێ هەلکەفتێ سەرەخۆشیێ ل بنەمالا وەلاتپارێزێ هێژا مستەفا ئامێدی و هەموو هەڤال و هەڤچەپەرێن وی دکەین. گۆڕا وی ب گول و گولزار بیت جهێ وی بهەشت بیت
مستەفا حسێن محەمەد باپیر یێ ناسیار ب مستەفا باپیر ل ساڵا ١٩٣٩ ل باژێرێ ئامێدیێ هاتیە سەر دنیایێ و هەر ل ئامێدیێ خاندنا خوە یا سەرتەتایی ب دوماهی ئینایە، ساڵا ١٩٥٧خۆلا بێتەلێ یا تەکنیکی ل بەغدا بدوماهی ئینایە، ل سالا ١٩٥٨بۆ جارا ئێکێ وەك بێتەل ل بنگەهێ پۆلیسا ل سیریێ ل دەڤەرا ئامێدیێ هاتیە دامەزراندن. ل ساڵا ١٩٥٩ بوویە ئەندامی پارتی دیموکراتی کوردستان.
ل دەستپێکا شۆڕشا ئەیلۆلێ ل ١١/٩/١٩٦١ ب ئامیرەکێ بێتەلێ وەکو ئێکەم بێتەل پەیوەندیێ ب شۆڕشێ دکەت و بۆ ئێکەم جار د دیرووکا شۆڕشێ دا دەزگەهێ بێتەلێ د شکەفتەکێ ڤە ل گوندێ دێرێ ل دەڤەرا ئامێدیێ دئێخیتە کاری و چاڤدێریا (أنصات) تۆڕا پەیوەندیێن ڕژێمێ دکەت. پشتی هینگێ دچیتە بارزان و ب دیتنا بارزانیێ نەمر شاد دبیت.
دگەل هاتنا بارزانیێ نەمر بۆ دەڤەرا بەهدینان ل سالا 1961 پەیوەندیێ ب جەنابێ بارزانی دکەت و دگەل هێزێن بارزانیێ نەمر دمینیت و وەکو ئەرکێ بێتەلیێ پشکداریێ د هەردوو داستانێن لۆمانا و گەلیێ زاویتە دا دکەت.
پشتی بنگەهێ شۆڕشێ ل دەڤەرا بەرواری باڵا جهگیردبیت، مستەفا لاسلکی ل گوندێ بیگداودا دەزگەهێ بێتەلێ دئیخیتە کاری و گەلەك پێزانین گرنگ و هەستیار ژ تۆڕا پەیوەندیێن لەشکەرێ ڕژێمێ وەردگریت و د گەهینیتە بارزانیێ نەمر. بارزانیێ نەمر ب ڤی کاری گەلەك کەیف خوەش دبیت و دفەرمووت کو ئەڤە ئێکەم شۆڕشە ئەو مفای ژ دەزگەهێن بێتەلێ دبینیت و بێتەلێ ب (بڕبڕا پشتا شۆڕشێ) پێناسە دکەت.
پشتی هینگێ ل بارەگایێ لەشکەر ئێك ل بامەڕنێ درێژیێ ب خەباتا خوە ددەت.
ل دەمێ شکەستنا 1975 ئەو ل دەڤەرا باڵەکایەتی ل سەرکردایەتیا شۆڕشێ بوو. ئەو ل سەر فەرمانا بارزانیێ نەمر پەیوەندیێ د گەل هەمی ویستگەهێن بێتەلێ دکەت و هەڵویستێ هەمی دەڤەرێن کوردستانێ دگەهینیتە بارزانیێ نەمر و شەهید ئیدریس بارزانی.
ل وی دەمی مستەفا لاسلکی هەڵویستەکێ نیشتیمان پەروەرانە وەردگریت وخێزان و کەس و کارێن خوە ل دەڤەرا بەهدینان دهێلیت و مانا ل گەل جەنابێ بارزانیێ نەمر دهەلدبژێریت و دوماهیك ئامیرێ بێتەلێ ل بارەگایێ بارزانی ڤەدمرینیت و ئامیرێ بێتەلێ دگەل هەمی نهێنیێن شۆڕشێ هەلدگریت و ل ٢٦/٣/١٩٧٥ دگەل بارزانیێ نەمر بەرەف ڕۆژهەلاتێ کوردستانێ دچیت و ل نەغەدە دەزگەهێ بێتەلێ و نهێنیێن شۆڕشێ ڕادەستی بارزانیێ نەمر دکەت.
پشتی هینگێ خێزان و کەس و کارێن وی ژی ژ دەستێ ڕژێمێ قورتال دبن و خوە دگەهینە ڕۆژهەلاتێ کوردستانێ و پێکەڤە بۆ ناڤەڕاستا ئیرانێ تێن دوورئێخستن.
پشتی بوورینا ٤٠ ڕۆژان ل سەر کۆچا داویێ یا بارزانیێ نەمر ل سەر فەرمانا سەرۆك بارزانی و شەهید ئیدریس ڤەگەریتە ڕۆژهەلاتێ کوردستانێ و ل ساڵا ١٩٧٩ ل پیرانشەهر جارەکا دی تۆڕا بێتەلا شۆڕشێ دادمەزرینیتەڤە و ئامیر و شفرە و کۆدان ل سەر بارەگایێن شۆڕشێ دابەش دکەت.
مستەفا لاسلکی ژ بەر کو ئێکەم بێتەلێ شۆڕشا ئەیلۆلێ بوو ل ٢٣/١/١٩٨٠ ل سەر فەرمانا جەنابێ سەرۆکی و ب بڕیاڕا مەکتەبا سیاسی وەکو ڕێڤەبەرێ گشتی یێ بێتەلا شۆڕشێ تێتە دانان.
ل شۆڕشا گولانێ دوو خۆلێن بەرهەڤکرنا کادرێن بێتەلێ ڤەدکەت و ٤٠ کادران پێدگەهینیت و هەتا سالا ١٩٩٠ ل سەر ئەڕکێ خوە بەردەوام دبیت، ل ساڵا ١٩٩١ وەکو پێشمەرگە دگەل جەنابێ سەرۆك بارزانی تێتە کوردستانێ و پشکداریێ د شەڕێ ب ناڤ و دەنگێ کۆڕێ دا دکەت.
ل سالا ١٩٩٣ ل سەر فەرمانا سەرۆك بارزانی پلا عقیدێ پۆلیس وەردگریت، پشتی هینگێ ل سەر میلاکێ وەزارەتا پێشمەرگە دبیتە عەمید، ل ساڵا ١٩٩٦ ل یۆبیلا زێرینا پارتی ب میدالیا بارزانیێ نەمر تێتە خەلاتکرن و ل سالا ٢٠١٧ ب پلا لیوا تێتە خانەنشینکرن.
مستەفا ژبەر کو ئەو رێڤەبەرێ گشتی یێ بێتەلا شۆڕشێ بوویە، لەوما ئەو دناڤ شۆڕشێ دا و بتایبەتی ل دەف سەرکردایەتیێ وەک (مدیر) تێتە ناڤکرن و هەتا نوها ژی هەر ب وی ناڤی تێتە ناسکرن.
مستەفا لاسلکی پشتی کاروانەکێ دویر و درێژێ خەبات و تێکۆشینێ دیرووکەکا پڕی شانازی د ڕێیا دۆزا گەلێ خوەدا دەرباز کری ب خوە تۆمارکری، سەنتەرێ کۆماتە یێ دەکۆمێنتکرنا دیرووکا شۆڕشێ ب خزمەتا وی دگەهیت و هەڤپەیڤینەکا ڤیدیۆیی یا چەند سعەتی دگەل تۆمار دکەت و دیرووکا خەبات و تێکۆشینا وی مینا بەلگەنامەکا گرنگ تۆمار دکەت و ژ ناڤچوونێ دپارێژیت.
سه‌نته‌رێ کۆماته
یێ دێکومهنت کرنا دیرووکا شۆڕشێ
کار و ئهرکێ سه‌نته‌رێ کۆماته دێکۆمێنت کرن و پاراستنا دیرووکا شوڕشێ یه ژ مرن و ژناڤچوونێ.
ڤی سهنتهری ب ستافهکێ بچووک و شیانێن ساده، لێ ب ڤیان و باوهریهکا مهزن، وهک پێنگاڤا خوه یا کاری یا ئێکێ، دهست ب کۆمکرن، دێکۆمنێت کرن و تۆمارکرنا دیرووکا خهبات و شۆڕشا کوردستانێ کریه.
