هەڤالەکی بارزانی دبێژە:

” کۆمارا کوردستانێ کەت، مە خوە ڤەکێشا شنو، لێ ئەم ژ پشتا خوە ئێمن نە بووین، چونکی گەلەک عەشیرەت بوونە هەڤالێن دوژمنی و دەستدا چەکی ل دژی مە.
بارزانی ئەسعەد خۆشەڤی ڤرێکربوو دەڤەرا تەرگەڤەڕ و مەرگەڤەڕ، بۆ ئارامکرنا وان عەشیرەتا دا کو ل دژی مە نەرابن. پاشی بارزانی ئەز ژی ڤرێکرم و هندەک رێنما گۆتنە من کو بگەهینمە ئەسعەد خۆشەڤی. پشتی ئێک دوو رۆژا بارزانی بخوە ژی گەهەشتە مە.
مخابن هندەک عەشیرەتا گوهداریا پەیامێن ئاشتی و کوردایەتیێن بارزانی نەکر و شەڕ ل دژی مە دەستپێکر.
ئەم ل نێزیک گوندەکی بووین جاشا هێرشی مەکر. هەڤالێن مە ئەو شکاندن. ئێک ژ وان جاشا دڕەڤی و چاکیتەک ب سەر سەرێ خوە دا دابوو، حسو میرخان تڤەنگەک بەردایێ ئێخستە د جۆیەکێ دا.
بارزانی گۆتێ: تە بۆچی کوشت؟ حسۆیێ گۆتێ: مانە شەڕێ مە دکر؟ بارزانی گۆتێ: ئەرێ بەلێ نوکە دڕەڤی. ئەگەر هوین د مەترسیێ دا نەبن نابیت کوردا بکوژن.
حسو عاجز بوو تڤەنگا خوە هاڤێتە وێرێ.
دگەل هندێ مە دیت کو دوو سێ گوللە گەلەک خراب و ب ستێرە هاتنە بارزانی ژ ناڤ گوندی. بارزانی ب دووربینێ سەحکرێ کا ئەڤ تڤەنگە ژ کیڤە تێنێ، وی دیت کابرایەکە یا خۆ دایە بەر بەرەکی و ب ستێرە تڤەنگا بەرددەتە بارزانی. بارزانی ژی خوە لێ گرت هەتا پاکیتا ویا فیشەکا خلاس بووی، وی پیچەک خوە ژ بەر بەری بلندکر دا پاکیتەکا نوی ژ رەختێ خوە بینتە دەر و بکەتە بەر تڤەنگێ. لگەل کو وی پچەک خوە بلندکری بارزانی گوللەیەک بەردایێ و ئەو ئێخست. حسۆی گۆتێ: ئەزبەنی ما ئەو نە کورد بوو، تە بۆچی کوشت؟ بارزانی گوتێ: حسو من ئەو نەکوشتبا، ئەو دا من کوژیت. ئینا حسۆی گۆتێ: ئەزبەنی مانێ یێ من ژی بەردایێ دا مە کوژیت.”
ئەڤە کۆپلەیەک بوو ژ بیرەوەریێن مام عبدالباقي بامەرنی، ئەندامێ پارتیا هیوا و پێشمەرگێ هەردوو بزاڤێن 1943 و 1945 یێن بارزان و پێشمەرگێ کۆمارا کوردستان ل. مهابادێ و پێشمەرگێ شۆڕشا ئەیلولێ.
ئەڤ بیرەوەریە نوکە وەک ئێک ژ پرۆژەیێن سەنتەرێ کۆماتە Senterê Komate تێنە ئامادەکرن بۆ چاپ و بەلاڤکرنێ.
بیرەوەریا 44 سالیا وەغەرا سەرۆکێ نەمر بارزانی ئەم گەرمترین سلاڤا دهنێرین بۆ گیانێ پاکێ ڤی مرۆڤێ مەزنێ دیرووک بۆ کوردستانێ ئافراندی.