دوو ژێده‌ر و یه‌ک ڕوودان

دوو ژێده‌ر و یه‌ک ڕوودان
که‌س نابێژیت ده‌وێ منێ ترشه‌

په‌رتووکا (چریسکا به‌ری شۆڕشێ) کو بیره‌وه‌ریێن کادر و پێشمه‌رگێ دێرین مسته‌فا مزووری نه‌ و ژ ئالیێ سه‌نته‌رێ کۆماته ‌ڤه‌ هاتیه‌ چاپکرن، د لاپه‌ڕێ 75 یێ ڤێ په‌رتووکێ دا هاتیه‌ کو: ل ساڵا 1976 مه‌فره‌زه‌یه‌کا پارتی دیمۆکراتی کوردستان (سه‌رکردایه‌تیا کاتی) ب سه‌رپه‌رشتیا سه‌ید حه‌سه‌ن زاخۆیی و مه‌فره‌زه‌یه‌کا ئێکه‌تیا نیشتمانی کوردستان ب سه‌رپه‌رشتیا ئیبراهیم عه‌زۆ، شه‌ڤه‌کێ ل سه‌ر رووبارێ خابووری، ل سه‌ر (داڤه‌ڕستا کوڕکا ) ل ناڤبه‌را گوندێن کوڕکا و گه‌ره‌گوهێ تووشی هه‌ڤ دبن. مسته‌فا ب کورتی به‌حسێ ڤێ ڕووبڕووبوونێ دکه‌ت. هه‌روه‌سا د لاپه‌ڕه‌ 73 یێ په‌رتووکا ( کاروانی 38 شۆڕشگێڕه‌که‌) دا کو ژ ئالیێ بڵند شاڵی ڤه‌ هاتیه‌ نڤێسین و ژ ئالیێ ئێکه‌تیا نیشتمانی کوردستان ڤه‌ هاتیه‌ چاپکرن، به‌حسێ هه‌مان ڕوودانێ تێته‌کرن.
ئه‌ز دخوازم ل ڤێرێ ده‌قێ هه‌ردوو په‌رتووکا ل سه‌ر ڤێ ڕوودانێ بێ ده‌ستکاری بێخمه‌ به‌رده‌ستێ وه‌ یێن هێژا
په‌رتووکا چریسکا به‌ری شۆڕشێ
لاپه‌ڕێ 75 تێدا هاتیه‌:
ئه‌م و ئێکه‌تی ل نیڤا شه‌ڤێ بسه‌رێک هه‌لدبین
شەڤەکێ ئەم بڕێکا داڤەرستێ ژ لایێ گوندێ کوڕکا ل دەڤەرا گولیا ژ خابووری دەربازبووین بۆ گوندێ گەرگوهێ. پێشمەرگەیه‌ك ب مه‌له‌ڤانیا دەرباز ببوو لایێ دی و وی وەریس دکێشا و هه‌ڤال ئێک ئێکه‌ ب وه‌ریسی ده‌رباز دکرن. شه‌ڤا ژ نیڤێ بووری، شه‌ڤه‌کا بێده‌نگ و ئارامه‌، تنێ ده‌نگێ مشێنا ئاڤا خابووری تێته‌ گوهێن مه‌. هه‌یڤا هەلاتی و ڕۆناهیا خوه‌ یا دایە ئالیێ خابووری یێ بەرامبەر مه‌. ده‌مه‌کی بوو دۆرا ئیسماعیل بامه‌رنی کو ده‌رباز ببیت، بۆچی ئیسماعیل ژ داڤه‌ڕستێ ناکه‌ڤیت و دکه‌ڤیته‌ دئاڤێ دا، لێ باش بوو ب هه‌ر حاله‌کی هه‌بیت ئه‌و ژ ئاڤێ دەرکەت و ل جهەکێ دویر و نە پێش چاڤ جلکێن خوه‌ زوها دکرن. د وێ گاڤێ دا مه‌ هند دیت کو ڕێزا کاروانەکێ مرۆڤان یێن به‌ره‌ڤ داڤەڕستێ ڤه‌ تێن. مە گۆتە سەید حەسەن: ئه‌رێ ما چ کەسێن دی هەنە بهێنە دگەل مە؟ وی گۆت: من های ژێ نینه‌ کو چ که‌سێن دی بێنه‌ لگه‌ل مه‌. د وی دەمی دا ئه‌و ڕێزا زه‌لامان گەهشتنه‌ سەر داڤەڕستێ. ژ لایێ دی مە لێکرە گازی. وان گۆته‌ مه‌: ئەم پێشمه‌رگێن یەکێتی نیشتمانی کوردستانین و هوین کینە؟ مە ژی گۆتێ: ئەم پێشمەرگێن پارتی دیموکراتی کوردستانین. پاشی مە گۆتێ: بلا هندەك ژ وە دەربازی لایێ مە ببن دا دگەلێك باخڤین. وان ژی سێ که‌س ڤرێکرن ده‌رباز بوون و هاتنه‌ ده‌ف مه‌. ئه‌و گه‌هه‌شتن و ئه‌ز و سەید حەسەن و بەدەل مارونسی دگەل وان ڕوینشتین. پشتی مه‌ پسیار ژێکری: کانێ ئه‌ڤه‌ هوین کینه‌ و چ دکه‌ن ل ڤارا و کی به‌رپرسێ وه‌یه‌؟ وان به‌رسڤدا: ئه‌م یەکێتی نیشتمانی نە و به‌رپرسێ مه‌ ئیبراهیم عه‌زۆیه‌. پاشی وان گۆت: ئه‌مێن هاتینه‌ ڤێ ده‌ڤه‌رێ کارێن ڕێکخستنێ بکه‌ین و ئه‌مێ ل ڤێ ده‌ڤه‌رێ و نابیت چ کەس و گرۆپێن دی، نە دوور نە نێزیك ل ڤان ده‌ڤه‌ران هه‌بن. مە ژی گۆتێ: مادەم وەسایە و هوین بڤێ هزرکرنێ هاتینه‌، پا ئه‌ڤه‌ ساڵه‌که‌ ئه‌مێ کارێ ڕێکخستن و بزاڤێن دی ل ڤێ ده‌ڤه‌رێ دکه‌ین. دیسان شۆڕش ژی مه‌ یا ده‌ستپێکری و چه‌ندین چالاکیێن له‌شکه‌ری ژی مه‌ یێن ئه‌نجامداین ل ڤێ ده‌ڤه‌رێ. لێ د سه‌ر ڤێ هه‌میێ ژی ڕا و بۆ به‌رژه‌وه‌ندیا گشتیا خه‌لکێ کوردستانێ، ئه‌گه‌ر وه‌ بڤێت ئه‌م دشێین هه‌ماهه‌نگیێ بکه‌ین و پێکڤه‌ کار و خه‌باتێ بکه‌ین یان مه‌ های ژ هه‌ڤدوو هه‌بیت. لێ وان گۆته‌ مه‌: نه‌ ئه‌م هه‌ماهه‌نگیێ دگه‌ل وه‌ دکه‌ین و نه‌ ژی قه‌بوول دکه‌ین کو هوین ل ڤان ده‌ڤه‌ران بمینن. پشتی ڤی هه‌لویستێ وانێ شه‌ڕانی، مه‌ ژی گۆتێ: ماده‌م هزرکرن و هه‌لویستێ وه‌ ئه‌ڤه‌یه،‌ نابیت هوین دەرباز ببن و دڤێت هوین بزڤرنه‌ڤه‌ وی جهێ هوین ژێ هاتین. د وان گاڤان ڕا هەڤالەکێ وان دەستێ خوه‌ برە نارنجووکه‌کێ دا ب مە ڤە بپەقینیت، چاڤێ بەدەل مارونسی لێ بوو، به‌ده‌لی ئێکسه‌ر نارنجۆک ژ دەستا ئینا دەر و مە کرنە دەر و ئەو ژی ده‌ربازبوونه‌ ده‌ڤ هه‌ڤالێن خوه‌ و جارەکا دی بۆ لایێ چیایێ کوڕکا و کانیا تۆیا و بلێجانێ چوون.
ئێدی مە چ ژ وان نەزانی، هەر وێ شەڤێ سەید حەسەنی نامەیه‌ك بۆ سەرکردایەتیا مه‌ نڤێسی و گۆتە من: تۆ ڕابه‌ ڤێ نامێ ببە و زویکا به‌رسڤێ بۆ مە بینە. من ژی ل ئێڤاریا 2/6/1976 پشتی تاری که‌تیه‌ ئه‌ردی پۆستێ خوه‌ هەلگرت و به‌رێ خوه‌ دا سنووری، د ڕێکا شکەفتەڕەشێ ڕا بۆ کۆماتەی، سپێدێ ئه‌ز گەهشتم و من پۆسته‌ دا دەستێ کاك سەلیم (جه‌وهه‌ر نامق). وی ژی پۆسته‌ ڤەکر و خواند و گۆت: هەڕە مادەم هه‌لویستێ وان ئه‌وه‌ کو دگەل وە کار ناکەن و دێ ڕێکێ ل وە گرن و بزاڤا کوشتنا وه‌ ژی کریه‌، ل هەر جهێ وە دیتن ژ ده‌ڤه‌رێ ده‌ربێخن، دا نه‌بنه‌ مه‌ترسی ل سه‌ر وه‌.
——————————————————————–
په‌رتووکا کاروانی 38 شۆڕشگێڕه‌که‌
نڤیسینا بڵند شاڵی
لاپه‌ڕه‌ 73 تێدا هاتیه‌:
مه‌فره‌زه‌که‌ی یه‌کێتی نیشتمانی کوردستان، به‌ سه‌رپه‌رشتی ئیبراهیم عه‌زۆ گه‌یشته‌ سه‌ر ڕووباری خابور که‌ لقێکی ڕوباری دیجله‌یه‌، دوای پشوویه‌کی کورت له‌ ده‌م ڕوباره‌که‌، به‌ڕۆخیدا درێژه‌یان به‌ڕێکردن دا، تا گه‌یشتنه‌ (داڤه‌ڕستا کوڕکا)، که‌ شوێنی په‌ڕینه‌وه‌ی لێبوو له‌ ڕێگه‌ی گوریسه‌وه‌، که‌ ئیبراهیم عه‌زۆ فه‌رماندیدا بپه‌ڕنه‌وه‌، هێزێکی بچوکی قیاده‌ی موه‌قه‌ته‌ (پارتی دیمۆکراتی کوردستان) گه‌یشته‌ ئه‌وبه‌ری ڕوباره‌که‌ که‌ سنووڕوی جیاکه‌ره‌وه‌ی خێلی گولی و دۆسکی یه‌، چه‌کداره‌کانی قیاده‌ موه‌قه‌ته‌ هۆشداریان دایه‌ مه‌فره‌زه‌که‌ و داوایان لێکردن نه‌په‌ڕنه‌وه‌، عه‌زۆ داوایان لێکردن ڕێگه‌یان پێبده‌ن بپه‌ڕنه‌وه‌، به‌ڵام به‌توندی ڕه‌تیانکرده‌وه‌، مه‌فره‌زه‌که‌ بڵاوبوونه‌وه‌و لووله‌ی تڤه‌نگه‌کانیان ئاراسته‌ی هێزه‌که‌ کرد، به‌ڵام عه‌زۆ فه‌رمانی پێکردن ته‌قه‌ نه‌که‌ن و له‌ لێپسراوی هێزه‌که‌ی پرسی: بۆ ڕێگه‌ ناده‌ن بپه‌ڕینه‌وه‌؟ لێپسراوی هێزه‌که‌ وتی: ده‌زانین ئێوه‌ سه‌ر به‌ مام جه‌لالن، وه‌رن هێزه‌کانمان بکه‌ینه‌ یه‌ک. عه‌زۆ وه‌ڵامی دایه‌وه‌: ئه‌وه‌ کاری من و تۆ نیه‌، کاری سه‌رکردایه‌تی هه‌ردوو حزبه‌، ئه‌وان بڕیاردده‌ن نه‌ک تۆ. لێپسراوی هێزه‌که‌ وتی: که‌واته‌ با گفتوگۆ بکه‌ین و دوای ئه‌وه‌ بڕیار ده‌ده‌ین ئایا ڕێگه‌تان پێده‌ده‌ین بپه‌ڕنه‌وه‌ یان نا. داواشی له‌ عه‌زۆ کرد نوێنه‌رێک بنێرێت بۆ لایان بۆ وتووێژ، عه‌زۆ به‌ پێشنیاره‌که‌ ڕازی بوو، پێشمه‌رگه‌یه‌کی نارد، به‌ڵام پێش په‌ڕینه‌وه‌ی پێشمه‌رگه‌که‌، به‌ لێپسراوی هێزه‌که‌ی وت: ئه‌گه‌ر په‌نجه‌ بۆ تاڵێکی قژی نوێنه‌ره‌که‌مان ببه‌ن قڕتان ده‌که‌ین. داواشی له‌ مه‌فره‌زه‌که‌ کرد ئاماده‌بن بۆشه‌ڕ و تڤه‌نگه‌کانیان ئاراسته‌ی هێزه‌که‌ بکه‌ن، پێشمه‌رگه‌که‌ له‌ روباره‌که‌ په‌ڕیه‌وه‌و نامه‌ زاره‌کیه‌که‌ی عه‌زۆی به‌ لێپسراوی هێزه‌که‌ گه‌یاند که‌ بریتی بوو له: ” تێکه‌ڵکردنی هێز له‌ ده‌سه‌ڵاتماندا نیه‌، به‌ڵام ده‌توانین هه‌ماهه‌نگی و هاوکاری یه‌کتربین. هه‌روه‌ها ئه‌گه‌ر پێویست بکات ده‌توانین هێرشی هاوبه‌ش بکه‌ینه‌ سه‌ر هێزه‌کانی عێراق”. هێزه‌که‌ پێشنیاره‌که‌ی عه‌زۆیان ڕه‌تکرده‌وه‌ و ئه‌وه‌شیان ڕه‌تکرده‌وه‌ ڕێگه‌ی په‌ڕینه‌وه‌یان پێبده‌ن، پێشمه‌رگه‌که‌ گه‌ڕایه‌وه‌ و وه‌ڵامه‌که‌ی به‌ عه‌زۆ دا.
ئه‌ندامانی مه‌فره‌زه‌که‌ داواین له‌ عه‌زۆ کرد فه‌رمانی هێرشیان پێبداو به‌ زه‌بری هێز بپه‌ڕنه‌وه‌، به‌ڵام عه‌زۆ به‌ مه‌فره‌زه‌که‌ی وت: مه‌به‌ستمان نیه‌، له‌گه‌ڵ هیچ هێزێکی کوردیدا پێکدابێین ته‌نها له‌ دۆخی به‌رگری له‌خۆکردندا نه‌بێت.
بۆیه‌ فه‌رمانیدا بکشێنه‌وه‌و له‌ شوێنێکی دیکه‌وه‌ له‌ روباره‌که‌ بپه‌ڕنه‌وه‌، به‌ره‌و گوندی غولدیانی سه‌ر روباره‌که‌ چوون.
تێبینی:
ڕێنڤیس کانێ د هه‌ردوو په‌رتووکا دا چه‌وا هاتیه‌ نڤێسین من ژی وه‌سا یا ئینایه‌ خوارێ و هیچ ده‌ستکاری تێدا نه‌کریه‌. لۆما ئه‌ز نه‌برپرسم ژ شاشیێن ڕێنڤیسێ.