زێره‌ڤان پێشمه‌رگه‌یه‌ک و ب ده‌هان چیرۆکێن بالکێش

زێره‌ڤان پێشمه‌رگه‌یه‌ک و ب ده‌هان چیرۆکێن بالکێش

سەنتەرێ کۆماتە یێ دەکۆمێتنکرنا دیرووکا شۆڕشێ د بەردەوامیا کار و چالاکیێن خوەدا، ل ڕێکەفتی ٩/٨/٢٠٢٢ دیدارەکا ڤیدیۆیی ل ئۆفیسا خوە ل باژێڕێ دهۆکێ دگەل پێشمەرگە و تێکۆشەرێ دێرین زێرەڤان نێروەیی ساز دکەت و پەردێ ل سەر کاروانێ درێژێ خەبات و تێکۆشینا وی دهەلینیت و مینا بەلگەنامەیەکا دیرووکی یا گرنگ تۆمار دکەت و ژ ناڤچوونێ دپارێزیت.
زێرەڤان محەمەد ئوسمان، یێ بەرنیاس ب زێرەڤان نێروەیی ل ساڵا ١٩٥٧ ل گوندێ زێوا شکان یێ سەر ب دەڤەرداریا ئامێدیێ ڤە هاتیە سەر دنیایێ و هەر ل وێرێ هەتا پۆلا شەشێ سەرەتایی خواندیە.
ژ بەرکو هەلکەفتێ گۆندێ زێوا شکان هەلکەفتەکێ چییایی و ئاسێ یە، ڕژێمێن داگیرکه‌رێن ئێراقێ زوی ب زوی نەشییاینە دەسهەڵاتێ خوە ل سەر بسەپینین. لەوما ئەڤ گوندە هەر ل دەستپێکا شۆڕشا ئەیلۆلێ دبیتە مەلبەندەکێ گرنگێ بزاڤ و چالاکیێن پێشمەرگەی. ڤێ چەندێ ژی وەکر کو زێرەڤان نێروەیی د ناڤ ژینگەهەکا تژی هەست و سۆزێن کوردایەتیێ دا پەروەردەببیت و د کاملانا ژیێ خوە دا ڕێیا خەبات و تێکۆشینێ بگریت. لۆما ئه‌و ل ساڵا ١٩٧٤ دبیتە پێشمه‌رگه‌ و ئێك ژ وان (١٥٠) کەسێن ژ دەڤەرێ ل دویڤ گازیا مەمێ سینی دچنه‌ دەڤەرا بالەکایەتی بۆ ئه‌رکێ پێشمه‌رگاتیێ.
ئه‌و ل بەتەلیۆنا ٣ێ، کو فەرماندێ وێ محەمەد تاهر نێروەیی بوو، یا سەر ب هێزا ئامێدیێ ڤە کو فەرماندێ هێزی سەلیمێ ئەسعەد خۆشه‌ڤی بوو دبیتە پێشمەرگە. د سەر هندێ ڕا هەڤالێن زێرەڤانی ڕێ نادەنێ کو ئه‌و بچیتە بەرووکێن شەڕی. لۆما ئەو ل بارەگایێن پشتێ خزمەت وهاریکاریا پێشمەرگەی دکەت. مانا زێرەڤان نێروەیی ل بارەگایێن پشتێ گەلەك ڤەناکێشیت، بەلکو ئەو ژی ل بەرەیێ سەرتیزی پشکداریێ د بەرسینگگرتنا هێرشا دوژمنی دا دکەت. دوژمن بۆمبێن تیزابێ ل دژی هێزێن پێشمەرگەی بکارتینیت و هەژمارەکا پێشمەرگان برینداردبن، ژ وان ئەحمەد سێرێ کو دەستەکێ خوە ژ دەستددەت. پشتی هینگێ ژی زێرەڤان نێروەیی ب بەردەوامی ل به‌ره‌یێن شه‌ڕی دمێنیت. پشتی نێزیکی (٥) مه‌هان زێرەڤان ڤەگەڕیتە مال بۆ بێنڤه‌دانێ و شۆڕش ڕاستی شکەستنێ تێت.
زێرەڤان پشتی شکه‌ستنا شۆڕشێ چەکێ خوە ڕادەستی دوژمنی ناکەت و بۆ ڕۆژەکا پێدڤی دڤەشێریت. پشتی هەلبوونا چریسکا شۆڕشا گولانێ وھاتنا گرۆپێن پێشمەرگەی بۆ گوندێ زێواشکان و ھاتنا کادرێن شۆڕشێ وەکی فوئاد میران و عەبدوللا سالح، تاهر خەمۆ ، زێرەڤان نێروەیی ژی دگەل سەعید زێوەیی، محەمەد سالح و سادق زێوەیی، محەمەد سەلیم کورکۆیی و شەهید سالح بناڤی دبیته‌ ئه‌ندامێ رێکخستنێن نهێنی یێن پارتی و دەست ب چالاکیا دکەت.
زێرەڤان ڕۆژه‌کێ ب هێجەتا سەرەدانا مالا خالێ خوە ل گوندێ کانیسارکێ دچیە گەلیێ بەرپانێ، کەرۆ و بێزنۆرێ، پاشی دچیتە باکوورێ کوردستانێ. ئەو ل سەڕانیێ ملازم عەلی دبینت، فوئاد میرانی ملازم عەلی ئاگەهدار دکەت کو زێرەڤان ئێکانەیە و سێویه‌، لۆما ئه‌و داخوازێ ژ وی دکه‌ن کو ڤەگەڕیتەڤە مال، لێ زێرەڤان ب ئاخفتنا وان ناکەت و ل سەر بڕیارا خوه‌ یا پێشمەرگاتیێ ڕژد دبیت.
پاشی زێرەڤان پشتی هینگێ دچیتە پنیانش و پاشی دچیتە بێلاتێ و ل وێرێ ماجد بەگێ چەلی دبینیت و پاشی ل مه‌ها ئه‌یلولا 1977 دگەل ملازم عەلی و فوئاد میرانی و نیزیکی ٦٠ پێشمەرگا تێنە کوردستانێ، ژ بەرکو زێرەڤان شارەزایێ دەڤەرێ یە، ئەو ڕێبەریا وان دکەت و تێنە گوندێ کانیسارکێ. ڕۆژا پاشتر دچنه‌ سەرێ ڕەشەی ل ناڤبەرا نێروە و سەڕنی، ئه‌و ئێکەمین چالاکیا خوە یا لەشکەری ب هاریکاریا (محەمەد شمس الدین) کانیسارکی کو ڕێکخستیێ پارتی بوو، ل وێرێ ئەنجامددەن. ئه‌و د وێ چالاکیێ دا دوو ئەندازیاران دگەل سەربازەکی دگرن و فوئاد میرانی بسڤکی بریندار دبیت. فوئاد میرانی و چه‌ند پێشمه‌رگه‌یه‌ک وان هەردوو ئەندازیاران دبه‌نه‌ دەف ماجد بەگێ چه‌لی دا کو دویفدا وان ڕادەستی جەهوەر نامق بکەت. زێرەڤان وهەژمارەکا پێشمەرگا دگەل ملازم عەلی ل دەڤەرێ دمینین. زێرەڤان ڕێبەریا وان دکەت و تێنە سەر زێی و ب داڤەڕستێ ژ زێی دەرباز دبن و د چنە مالا محەمەد سەلیم زێوەیی. دوو هەیڤ دەربازدبن ژنوکا زێرەڤان ڤەدگەڕیتەڤە گوندێ خوە و دچیتە مال و ب دیتنا دایکا خوە شاد دبیت. دایکا وی دبێژیتێ: مادەم تو چووی و تە ئەو ڕێ هەلبژارت، دڤێت تویێ خوەڕاگربی.
پشتی هینگێ ئه‌و دەست ب گەڕەکێ دکەن بۆ دەڤەرا نهێلیا و ڕێکخستنێن پارتی ل گوندێن وێ دەڤەرێ ژی نویژەن دکەن.
دڤێ گه‌رێ دا ڕۆژه‌کێ قاسم ئاڤسارکی تێتە دەف وان ل گوندێ بناڤیا نهێلیا و ئه‌و ملازم عەلی ئاگەهدار دکەت کو زریپۆشەکا دوژمنی ل ناڤبەرا گوندێ ئاڤسارکێ و تروانشێ هاتن و چوونێ دکەت و قاسم دبێژیتێ ئه‌گه‌ر هوین بێن لێبده‌ن دێ هاریکاریا وه‌ که‌م. ملازم عەلی دگەل شه‌هید حەمدی بەگ، شه‌هید سەعید سپینداری، حەجی بێتکاری، تاهر بناڤی وهێزا پێشمەرگەی تێنە بالووکا و ڤەدیتنێ دکەن و بۆسەیه‌کێ ل شیڤشرینکێ ناڤبەرا گوندێ مه‌لخته‌ و ئاڤسارکێ دا ل پێشیا زریپۆشێ ددانن. زێرەڤان نێروەیی، وەحید جەمیل زێوەیی، وەحید حەسەن ئەرەدنی و نەجمدین کارەیی ژی بۆسه‌یه‌کا دی د ڕێکا هێزێن دوژمنی دا ل پشتا بالووکا ددانن. هێزێن پێشمەرگەی د ڤێ چالاکیێ دا زریپۆشا دوژمنی دسۆژن و هەژمارەکا سەربازان ژی دکوژن و ٤ کلاشینکۆفا ژی وه‌ک دەستکەفت ڕادکەن.
ژ به‌ر کو ئه‌ڤه‌ چالاکیا ئێکێ بوو ل وێ ده‌ڤه‌رێ، لۆما پشتی وێ مورالێ خەلکی و پێشمەرگەی بلند دبیت. پاشی هێزێن پێشمەرگەی دچنه‌ دەڤەرا سپنەی و ناڤ بەرواریا و ب بەردەوامی سمینارا ل گوندا ئه‌نجامدده‌ن.
هێزێن پێشمەرگەی ل ژێر فەرماندەییا ملازم عەلی بڕیارێ ددەن بارەگایەکی ل دۆلا ڕەزا ڤەکەن، لێ فرۆکێن دوژمنی تێنە سەر وان و نەچار دبن بارەگایێ خوە ببەن گوندێ سێریێ.
زیرەڤان دگەل زەعیم عەلی وهەڤالێن خوە ل گوندێ رەشاڤا ڕاستی شەڕەکێ گران تێن دگەل هێزێن دوژمنی و ئه‌و زیانەکا مەزن دگەهیننه‌ هێزێن دوژمنی، لێ مخابن دوو هەڤالێن وان یێن پێشمەرگە ب ناڤێ ئەمین بلێجانی و عەلی بێلاتی کو هه‌ردوو ژی کوردێن باکوور بوون شەهید دبن و لەشێن وان ژی دکەڤنه‌ دەستێن دوژمنی.
ڕۆژا ٨/٧/١٩٧٨ گوندێ زێوا شکان مینا سەدان گوندێن دەڤەرێ دکەڤیتە بەر هەوا ڕاکرن و وێرانکرنێ، مالا زێرەڤان نێروەی و گوندیێن وی ژی ل کۆمەلگەها قەدشێ تێنه‌ ئاکنجی کرن و ئێدی پەیوەندیێن وی و مالا وی تێنه‌ بڕێن.
پشتی هینگێ ملازم عه‌لی زێره‌ڤانی و مه‌حمود کانیسارکی ڕادسپێریت کو پۆستێ وان ببه‌نه‌ باکوورێ کوردستانێ و هنده‌ک پێدڤیێن پێشمه‌رگه‌ی ژی لگه‌ل خوه‌ بینن. ئه‌و ل دڕێیا ڤه‌گه‌ڕا خوه‌ دا ل کانیسارکا نێروه‌ له‌شکه‌ره‌کی دوژمنی دکوژن و تڤه‌نگا وی وه‌ک ده‌ستکه‌فتی ڕادکه‌ن و دئینن. هەڤالێن وی سەربازی ل هه‌وارا وی تێن، لێ ئەو ژی دکەڤنه‌ بۆسێ و تێنه‌ کوشتن.
پاشی زێرەڤان نێروەیی و هەژمارەکا پێشمەرگا ل گۆرەی فەرمانا جەهوەر نامق دچنه‌ گوندێن بێلاتێ و بیادرێ، ل وێرێ ماجد بەگێ چه‌لی دبینن. پاشی جەهوەر نامق و ئەبو عنتەر و سیامەند بەننا ژی تێنه‌ وێرێ و کۆمبوونەکا بەرفرە ئەنجامددەن و بڕیارێ ددەن کو بچنه‌ هەرك و بێداڤا. هەژمارا وان دبیتە ١٥٠ پێشمەرگە و دسەقایەکێ سڕ و سەرمادا د ڕێیا باکوورێ کوردستانێ ڕا دکەڤنە ڕێ. ئەو بڕێڤە ئازاد بەرواری ژی دبینن، جەهوەر نامق داخوازێ ژ وی دکەت کو دگەل وان ڤەگەڕیتەڤە هەرك و بێداڤا. ئه‌و دچنه‌ بارەگایێ عەریف یاسین ل چەم توی، پاشی ئەو و حەجی عومەر شەت یونسی ژی دگەل وان دچن.
بارەگایێ هەرێما دوو ل هەرك و بێداڤا بوو، عەبدولرەحمان پێداوی بەرپرسێ وێ هه‌رێمێ بوو. سامی عەبدولرەحمان ، ئازاد خەفاف، ملازم نیهاد وعەبدوللا سالح ژی ل وێرێ بوون. ئێزگێ دەنگێ کوردستانێ ژی ل ویرێ بوو، شەهید عەبدولعەزیز ئامێدی ڕێڤەبەریا ئێزگەی دکر. ل هەرك و بێداڤا سەرکردایەتیا کاتی جڤینەك کر دڤێ کۆمبوونێ وان باس ل هندێ کر کو ئه‌و بزاڤێ بکه‌ن دەستێ خوه‌ بگه‌هیننه‌ ده‌ڤه‌رێن پارێزگه‌ها هەولێرێ دا کو پەیوەندیا وان دگەل کاك ئیدریس و کاك مەسعود ب ساناهیتر لێبهێت، هه‌ر ژ بۆ ڤێ مه‌ره‌مێ ژی وان بڕیاردا کو بچن ل سێ کوچێ سنوورێن باکوور، باشوور و ڕۆژهەلات بارەگایێ خوە دانن.
زێرەڤان نێروەیی، مەحمود کانی سارکی، حەسەن ئەرەدنی، ئەبو شڤان ئامێدی، عەبدوللا سالح، ئازاد خەفاف و ملازم نیهاد دگەل سامی عەبدولرەحمان دچنه‌ ده‌ڤه‌را خواکوڕکی و ل دۆلا گوستەی ل دەڤەرا برادۆستیا بارەگایەکی ئاڤادکەن. محەمەد خالد بۆسەڵی، سادق عەمەر و حەمید حەفزوللا دگەل وان دچن و هەیامەکی ل وی بارەگای دمینن.
دڤی ده‌می دا نامەیه‌ك بۆ سامی عەبدولرەحمان تێت کو هێزەکا مەزن یا یەکێتی نیشتمانی کوردستان کو هەژمارا وان نێزیکی ١٠٠٠ چەکدارایە، یا هاتیە شەمزینان. پێشمەرگەی داخواز ژ سامی عەبدولرەحمان کر کو رێکەفتنەکێ دگەل وێ هێزێ بکەن، چونکی ل گۆره‌ی هێزا پارتی ئه‌و هێزه‌کا مه‌زنه‌. سامی ژی پێخوەش بوو ڕێکەفتنەك دناڤبەرا هەردوو هێزان دا بهێته‌ کرن. لێ د هه‌مان ده‌م ژی دا، سەرکردایەتیا کاتی داخواز ژ پێشمەرگەی کر کو خوە بۆ هەر ئەگەرەکێ ئامادە بکەن. د کۆمبوونه‌کێ دا سامی عەبدولرەحمان، عەبدوللا سالح و ئازاد خەفاف دبێژن: بێی هه‌ماهه‌نگی لگه‌ل مه‌، نابیت ئه‌م ڕێ بدەینه‌ وێ هێزێ بهێته‌ ڤێ ده‌ڤه‌رێ.
هێزه‌کا پێشمەرگەێن پارتی د دویف وێ هێزێ دا دچنه‌ ده‌ڤه‌را شەمزینان. لێ هه‌تا ئه‌و دگه‌هنه‌ وێ ده‌ڤه‌رێ هێزا یەکێتیێ دگه‌هیته‌ ده‌ڤه‌را گەڤەڕێ و پاشی دچنه‌ بازێ وهێزێن پارتی ژی ددویڤ واندا دگه‌هنه‌ وێرێ.
سامی عەبدولرەحمان دچیتە بارەگایێ عەریف یاسینی هێزا وان لگه‌ل خۆ دبه‌ت و دچیتە بارەگایێ مستەفا نێروەیی ل شیڤ ئوسمانکا و پاشی پێکڤە تێنە گوزەڕەشێ. پێشمەرگێن پارتی ل وێرێ کۆم دبن، لێ هەژمارا وان هەڤبەر هەژمارا هێزێن ئێکەتیێ گه‌له‌ک دکێم بوون. هاتنا ڤێ هێزا مەزنا ئێکه‌تیێ دبیتە ئەگەرێ ترسەکا مەزن بۆ سەرکردایەتیا کاتی یا پارتی. لۆما ژی ژبۆ گهۆڕینا بەڵانسا هێزێ وئێکلاکرنا ڤی شه‌ڕێ نه‌چاڤەڕێکری و سەپاندی ل سەر هێزێن پارتی، به‌رپرسێن پارتی داخوازا هاریکاریێ ژ سەرۆك هۆزێن کوردێن باکوور دکه‌ن، کو هه‌ما بێژه‌ ئه‌و هه‌می هه‌ڤال و پشته‌ڤانێن پارتی بوون، کو بارا پتر ژی ئه‌و ژ به‌ر ناڤێ مسته‌فا بارزانی دلسۆزێن پارتی بوون. هێزێن پارتی دچنه‌ دەشتا خانێ ل هنداڤ تۆڤێ و بازێ. شەر د ناڤبەرا هەردوو هێزا دا دەستپێدکەت. دڤی شه‌ڕێ مالوێرانی دا مەلا ئەمین بارزانی دگەل ٨ پێشمەرگێن پارتی ب دەستێ هێزێن ئێکەتیێ تێنه‌ کوشتن. عەلی عەسکەری دگەل هەژمارەکا مەزن یا پێشمەرگێن ئێکەتیێ تێنه‌ دیلکرن. سامی عەبدولرەحمان ژی تێته‌ تۆڤێ، پێشمەرگە عەلی عەسکەری و هەژمارەکا دیلا دبەنه‌ دەف وی. پاشی سه‌ید کاکه‌ و هه‌ژماره‌کا دی ژی تێنه‌ گرتن. ئازاد هەورامی، حسێن بابە شێخ و دکتۆر خالد دگەل هێزەکێ به‌رێ خوه‌ ددنه‌ رۆژاڤا و به‌ره‌ڤ فەراشینێ ڤه‌ دچن، لێ ئەو ژی ل وێرێ تێنه‌ دیلکرن. هێزەکا دی یا ئێکەتیێ به‌ره‌ڤ سنوورێ باشوور-باکوور ڤه‌ بۆ نێروا سیتۆ دچیت کو ٢٠٠ کەس بوون، ئه‌و ژی خوە ڕادەستی رژێما ئێراقێ دکەن. ڕژێم وان ب فڕۆکێن هەلیکوپتەر ڤەدگوهێزیتە بامەڕنێ. دیلێن ئێکەتیێ یێن که‌تینه‌ ده‌ستێ پارتی بۆ بارەگایێ عەریف یاسین تێنه‌ ڤەگوهازتن. زێرەڤان نێروەیی و عەلی ڕەشاڤەیی ژی دچن بارەگایێ عەریف یاسین. ڕۆژەکێ عەلی عەسکەری دکەڤیتە دڕێکا وان دا، عەلی ڕەشاڤەیی هندەك سوحبەتا دگەل دکەت، لێ زێرەڤان نێروەیی ل سه‌ر هندێ گۆتە عه‌لی ڕەشاڤەیی ئەڤە نە کاڕێ مەیە.
زێرەڤان نێرویی دەربارەی دادگەهکرنا عەلی عەسکەری و دکتۆر خالد و حسێن بابە شێخ دبێژیت: من چ پێزانین ل سەر دادگەها وان نینن، لێ ئەز پشتڕاستم کو بڕیارا سێدارەدانا وان نە بڕیارا سەرکردایەتیا پارتی بوویە. هاتنا ڤێ هێزێ بێی هەماهەنگی و ڕێکەفتنا پێشوەخت دگەل سەرکردایەتیا کاتی یا پارتی و بۆ ژناڤبرنا هێزا پارتی، دبیتە ئەگەر بۆ شەڕەکێ مالوێرانی و زیانەکا مەزن ب بزاڤا ڕزگاریخوازیا گەلێ کورد دگەهینیت.
پشتی ڤی شەڕی زێرەڤان نێروەیی ڤەدگەڕیته‌ ڤه‌ هەرێما ئێك و پەیوەندیێ ب ملازم عەلی دکەت. پشتی هینگێ دگەل مەفرەزا مەحمود کانیسارکی درێژیێ ب خەباتا خوە ددەت و لگه‌ل هه‌ڤالێن خوه‌ چەندین چالاکیا ئەنجامددەن وەکی:
-کۆمکرنا گەشتیارا ل سیلاڤێ و پێشکەشکرنا سمینارەکێ ل سەر شۆڕشێ بۆ وان و بەڵاڤکرنا بەڵاڤۆکێن شۆڕشێ ل سەر وان.
پشتی ڤێ چالاکیێ دگەل جەهوەر نامق و وەیسی بانی، مەسعود زاویتەیی، عادل مزویری و حەمید حەفزوللا گەڕەکێ بۆ دەڤەرا بەرێ گاره‌ی و شێخان دبەن. پاشی ئه‌و بڕیارێ ددەن کو بچنه‌ دەشتێ و سمینارا بدەن وان عەرەبێن کو ڕژێمێ ل سەر گوند و جهووارێن کوردا ئاکنجی کرین. لێ مخابن دڤێ گەڕێ دا پێشمەرگێ دلێر و قەهرەمان حەمید حەفزوللا ل گوندێ به‌رکچکێ بده‌ستێ عه‌ره‌بێن ته‌عریبێ شەهید دبیت و لەشێ وی یێ پیرۆز ژی ژ ئەنجامێ خیانەتا خوەفرۆشەکی بناڤێ (ح.ف) دکەڤیته‌ دەستێ دوژمنی.
زێرەڤان نێروەیی ل ساڵا ١٩٧٩ دگەل ئەندامێن سەرکردایەتیێ دچیته‌ ڕۆژهەلاتێ کوردستانێ و ھەتا ساڵا ١٩٨١ وەکو کادر دگەل پارتی دیموکراتی کوردستان دمینیت.
پشتی دامەزراندنا پارتی گەلی دیموکراتی کوردستان ل ساڵا ١٩٨١، ئێدی زێرەڤان نیروەیی سەرەڕای کو پێشمەرگێ پارتیە، سەنگەرێ خەباتا خوە ب نهێنی بۆ ناڤ ڕێزێن پارتی گەل د ڤەگوهێزیت و دبیتە ئەندامێ وان. ئەو و هەڤالێن خوە هەژمارەکا ڕێکخراوێن نهێنی ل دەڤەرێ دادمەزرینن. شەهید جەنگۆ و شەھید جەمال محمد شینۆ ڕدێنی ژی تێتە دەڤەرێ، زێرەڤان نێروەیی ل ساڵا ١٩٨٣ نامەیه‌کێ دگەل تاها ئامێدی بۆ لژنا پالە ل ڕۆژهەلاتێ کوردستانێ کو بەرپرسێ وێ رەمزی خانقینی بوو دهنێریت. ئەڤ نامە دکەڤیتە دەستێ پارتی. دئەنجام دا زێرەڤان ژ لایێ لقا ئێکا پارتی ڤەتێتە گرتن. پشتی ساڵ و نیڤا ئه‌و تێتە بەردان، تاهر هرۆری ب ناڤێ پارتی سەرەدانا وی دکەت و داخوازێ ژێ دکەت کو ڤەگەڕیتەڤە ناڤ ڕێزین پارتی، لێ ئەو ل سەر ڕێبازا خوە یا نووی بەردەوام دبیت.
ل ساڵا ١٩٨٦ داخوازێ ژ ڕەشید عارف دکەت کو ڕێ بدەنێ بچیتە ئیرانێ دا پشکداریێ دکۆنفرانسێ پارتی گەل دا بکەت، ئەو ژی داخوازا وی قەبۆل دکەت و پەیوەندیێن پارتی دیموکراتی کوردستان و پارتی گەل ئاسایی دبن. ل ساڵا ١٩٨٧ پارتی گەل بارەگایێن خوە ل دەڤەرا بەهدینان ب ڕەنگەکێ فەرمی ڤەدکەن. زێرەڤان نێروەیی وه‌ک کادرێ پارتی گه‌ل ئێکەمین سمینارا خوە ل گوندێ ئێكمالا بەرواریا پێشکەش دکەت.
پشتی هینگێ ئێکەم چالاکیا خوە یا لەشکەری دگەل پێشمەرگێن پارتی گەل ل ناڤبەرا شێخ مەما و بامەڕنێ ئەنجامددەن و چوار جاشا ب دیل دگرن وچوار کلاشینکۆفان ژی وەکو دەستکەفت ڕادکەن.
پشتی هینگێ ب شێوەکێ بەردەوام ل دەڤەرێن ئازاد سمیناران پێشکەش دکەت. ل سکرینێ چالاکیەکا لەشکەری ژی ب سەرپەرشتیا سەلام بۆسەڵی و ئەدیب چەلکی و هەڤالێن خوەیێن پێشمەرگە ئەنجامددەت و پێنج کلاشینکۆفان وەکو دەستکەفت ڕادکەن.
بەری ئەنفالان ئه‌و بارەگایێ خوە دبەنه‌ کانیسارکا نێروه‌، هێزەکا مەزنا پارتی ژی ل وێرێ بوو. زێرەڤان نێروەیی دچیته‌ دەڤەرا نھێلێ بۆ بەرسینگگرتنا ھێرشا دوژمنی، لێ مەحمود کانیسارکی، تاھر نوری، شەعبان ماھر و ھاشم سیتەیی ل چیازەرکی و چیا ڕەشکی دچن دەف و وی ئاگەهدار دکەن کو ڕۆژا پاشتر هێرشا مه‌زنا دوژمنی بۆ سەر دەڤەرێن ئازاد دێ دەستپێکەت. ئێدی هەموو هێزێن سیاسی ژ ترسا بکارئینانا چەکێ کیمیاوی بارەگایێن خوە ڤاڵا دکه‌ن. زێرەڤان نێروەی ژ پارتی گەل و محەمەد محسن ئامێدی ژ پارتی بڕیارێ ددەن کو بەرگریێ بکەن و چەپەرا به‌رنه‌ده‌ن، لێ وان شیانێن بەرگریا چەکێ کیمیاوی و هۆڤاتیا ڕژێما سەدام نەبوون، لەوما ئەو ژی نەچار دبن خوە ڤەکێشن.
هینگێ زێرەڤان نیروەیی کوڕکەکێ ئێك سالی یێ هەی، ل ڕەڤێ خودێ کچکەکێ ژی ددەتێ و ئەو چ ژ خێزان و زاڕۆکێن خوە نزانیت. پشتی ئەو ژی ژ دەڤەرێ خوە ڤەدکێشن، ژنوی ئەو خێزان و زاڕۆکێن خوە دبینیت و داخوازێ ژ وان دکەت کو بچنه‌ ئیرانێ. خێزانا وی بێ پارەیە، پارێن حزبێ دگەل وی هەنە، لێ ئەو چ پارێن حزبێ ل مالباتا خوه‌ نامه‌زێخیت، بەلکو ئاوارێ ھەڤالێ وی ١٠ دینارا ددەتە خێزانا وی و دگەل خەلکی وێ و هەردوو زارۆکێن خوە دهنێریتە ئیرانێ.
ئەو و هەژمارەکا پێشمەرگێن پارتی گەل دچنه‌ لژنا گولان یا پارتی ل دەف شەهید سمکۆ ئامێدی و پێکەڤە دچنه‌ چەم توی. هەمی پارتیێن بەرەیێ کوردستانێ ل وێرێ بارەگایێن خوە ددانن و بڕیارێ ددەن کو بمینن و خەباتێ بکەن، لێ هێزێن ئێکەتیا نیشتیمانی هەر زوی ژ وێرێ دچن و قەستا سەرکردایەتیا خوە ل ئیرانێ دکەن.
سەلام بۆسەلی ب ڤێ بڕیارێ رازی دبییت بمەرجێ چوونا ئیرانێ و وەرگرتنا رەئیا سامی عەبدولرەحمان و سەرکردایەتیا پارتی گەل. زێرەڤان و هندەك پێشمەرگێن پارتی و بزاڤا ئاشۆری پێکڤە دچنە مالا محەمدە شەریف ل دەشتا گەڤەڕێ بقەچاخی دچنه‌ ڕۆژهەلاتێ کوردستانێ.
پشتی زێرەڤان دگەهیته‌ ڕۆژهەلاتێ کوردستانێ دزانیت کو ڕژێما ئیرانێ مالا وی یا بریە ئوردیگایێ جەهرۆم ل باشوورێ ئیرانێ، ئەو ژی دویف واندا دچیت و وان دئینیتەڤە ڕۆژهەلاتێ کوردستانێ و ل ئورمیێ ئاکنجی دبن. پشتی هەیامەکی سامی عەبدولرەحمان بریارێ ددەت کو هندەك پێشمەرگا دگەل زێرەڤان نێروەیی بهنێریتە کوردستانێ و وی دکەته‌ بەرپرسێ وان، لێ زیرەڤان پێشنیار دکەت کو نیهاد وێ بەرپرسیاریێ وەرگریت. ئێدی ئەو دبن مەفرەزەکا ١١ کەسی و دڕێیا باکوورێ کوردستانێ ڕا دچنه‌ چەم توی. کو وی ده‌می فەتاح گولی و شەهید سمکۆ ئامێدی دگەل هەژمارەکا پێشمەرگێن پارتی ژی ل وێرێ بوون. هەماهەنگیەکا باش دناڤبەرا وان و پارتی و حزبا شوعی دا هەبوو.
ئێدی ئەو گرۆپێن پچیك یێن هەڤپشك چێدکەن، شەهید سمکۆ بەرپرسیاریا بەرەی وەردگریت، نیهاد ژ پارتی گەل و ئه‌حمه‌د بامه‌رنی (ئەبو شهاب) ژ حزبا شوعی ژی دبن ئەندام و پەیوەندیێ ب خەلکی دکەن.
ئه‌ڤ هێزه‌ دبیته‌ چەند گرۆپ، گرۆپەك ل ڕۆژا ئێکێ کو ژ شەهید سمکۆی و ناجی کوڕکۆیی ژ پارتی، نیهاد ڕەشاڤەیی ژ پارتی گەل و دیندار ژ حزبا شیوعی، دکتۆر شێرکۆ، عەزیز بەڕۆی ژ پارتی گەل، ئەبو شەھاب ژ حزبا شوعی و خۆرشید ژ پارتی دچنە دەڤەرا نھێلێ، پاشی خوە دکەنە دوو گرۆپ، گرۆپەکا ٤ کەسی دگەل سمکۆی دچنە د شکەفتەکێ ڤە. سمکۆ فەرمانێ ددەته‌ وان کو نابیت ژ شکەفتێ دەرکەڤن و ئەو بخوە دێ زێرەڤانیێ گریت. دەمەکی جاشه‌ک تێتە بەر دەرێ شکەفتێ، وی کەسی سمکۆ یێ نیاسی و دەستڕیژیێ ل سمکۆی دکەت و وی شەهید دکەت. هەڤالێن سمکۆی نزانن کو ئەو کەس یێ بتنێ یە. ئەو هزر دکەن کو دەورووبەرێن وان یێن هاتینه‌ گرتن. ئه‌و خوه‌ ڤه‌دکێشن و ته‌رمێ شه‌هید سمکۆی دمینیت.

گرۆپا دی کو ژ دکتۆر شێرکۆ، گوندی ژ پارتی گەل، خورشید سێری ژ پارتی و ئەب شەھاب ژ پارتیا کۆمۆنیست، دچنە دەشتا زێی بناڤێ بەرەیێ کوردستانی چالاکیا دکەن.
گرۆپه‌ک ژی هه‌ر شه‌ش کادرێن پارتی، شه‌هید ئه‌حمه‌د کادر، محه‌مه‌د حه‌مدی، سه‌عدلا ئاڤده‌ل، نه‌زمی و خالد، نزار محەمەد سلێمان خرابی بوون، مخابن ئەو شەش کادرێن پارتی بوون، ئەوێن ب خیناته‌ ب دەستێ پەکەکێ ل گوندێ شیڤڕه‌زانێ هاتنه‌ گرتن و شەهیدکرن.
زێرەڤان نیروەیی ژی سەرپەرشتیا گرۆپەکێ دی یێ پێشمەرگێن پارتی گەل دکەت. ئەو و گرۆپا خوە تێنە نێروا سیتۆی ل ناڤ دۆسکی ژووریا، وان های ژ شەهیدبوونا سمکۆ ئامێدی نینە.
ل ئادارا ساڵا ١٩٨٩ زێرەڤان نێروەیی دگەل گرۆپەکێ پێشمەرگەی کو ژ ٣٠ پێشمەرگێن بەرەیێ کوردستانی پێكدهات ب سەرپەرشتیا وی، عەرێف یاسین و حەجی عومار شەت یونسی ئێکەم چالاکیەکا هەڤپشك یا لەشکەری پشتی ئەنفالێن ڕەش ل دژی هێزێن دوژمنی ئەنجامددەن و ئه‌و ل سێ سەنگەرێن دوژمنی دده‌ن و ٣٥ سەربازێن دوژمنی دکوژن.
پشتی ڤێ چالاکیێ زێره‌ڤان و هه‌ڤالێن خوه‌ تێنه‌ گوندێ ژیانشیێ باکوورێ کوردستانێ، ئه‌و ل وێرێ دزانیت کو مەفرەزەیه‌کا بەرەیێ کوردستانی یا ٨ کەسی یا چوویە کوردستانێ ، ٧ کەس ژێ ڤەگەڕیاینە، ئەو ٧ کەس ژی ژ لایێ ڕژێما تورکیا ڤە ل کنیانش یێن هاتینە گرتن. گومان بۆ زێرەڤانی چێدبیت، ئەو نامەیه‌کێ بۆ نیهاد دهنێریت دا بزانیت کانێ مەسەلە چیە، لێ چ به‌رسڤ بۆ نازڤرن. زێرەڤان خوە دگەهینیته‌ بارەگایێ عەریف یاسین و داخوازێ ژێ دکەت کو ئەو هەوڵا بەردانا وان ٧ پێشمەرگا بدەت. ڕژێما ترکی داخواز ژ وان دکه‌ت به‌رامبه‌ر به‌ردانا ڤان ٧ پێشمه‌رگا ئه‌و چالاکیه‌کێ ل دژی پ ک ک ئه‌نجامبده‌ن، هه‌رچه‌نده‌ پ ک ک ٦ کادرێن پارتی ب خیانه‌ت شه‌هیدکرینه‌ ژی لێ ئه‌و ڤێ داخوازا ترکا ڕه‌تکه‌ن و پاشی ترک نه‌چار دبن کو ڤان ٧ پێشمه‌رگا ئازاد بکه‌ن.
ل دوماهیا ساڵا ١٩٨٩ کۆنگرێ پارتی گەل ل ڕۆژهەلاتێ کوردستانێ تێته‌ گرێدان. د کۆنگرێ دا ناکۆکی دکەڤیتە د ناڤبەرا دلێر و سەلام بۆسەلی ژ لایەکی و سامی عەبدولرەحمان ژ لایەکێ دی ڤە. سامی عەبدولرەحمان پێشنیار دکەت کو زێرەڤان نێروەیی بۆ سەرکردایەتیا پارتی گەل بهێته‌ بەربژێرکرن. هەردوو لا وێ پێشنیارێ پەسەند دکەن و زێرەڤان د پرۆسەیه‌کا دیموکراسی دا وەکو ئەندامێ سەرکردایەتیا پارتی گەل تێتە هەلبژارتن.
ل ده‌ستپێکا ساڵا ١٩٩٠ دکتۆر کەمال کەرکووکی دگەل هێزەکا مەزن یا پارتی تێتە کوردستانێ و کۆمبوونەکێ دگەل هێزێن بەرەیێ کوردستانی (گەل و شوعی) ئەنجامددەت و بڕیارێ ددەن کو بچنه‌ دەڤەرا نێروە، ئێدی دکتۆر کەمال د گەل هێزێن بەرەیێ کوردستانی تێنه‌ شیڤا ڕه‌زا. ژ به‌ر کو هێزا پێشمه‌رگه‌ی هه‌ماهه‌نگیێ لگه‌ل ڕژێما ترکی ناکه‌ت، لۆما رژێم بڕیارێ ددەت کو هەر کەسێ هاریکاریا پێشمەرگەی بکەت هەر وەکو هاریکاریا پەکەکێ کری و سزایێ وی دێ گه‌له‌کێ گران بیت و ئه‌و گوندێن سه‌رسنووری بڤێ بڕیارا خوه‌ ئاگه‌هدار دکه‌ت. دکتۆر کەمال بڕیارێ ددەت پەیوەندیێ ب ماجد بەگێ بکەت و بارەگایێن خوە هەمی هێزێن بەرەیێ کوردستانی تینە شیف ئۆسمانا. تورکا ل وێ دەڤەرێ مینێن چاندین، دلبرین هەوڵددەت وان مینا ڕاکەت، لێ مخابن مینەك ب وی ڤە دپەقیت و بگرانی بریندار دبیت و بیناهیا هەردوو چاڤێن خوە ژ دەست ددەت.
ژ بۆ پەیوەندیکرنێ ب ماجد بەگێ دکتۆر کەمال، زێرەڤان نێروەیی، تەحسین کەمەکی و شاکر زێوەیی دگەل هەژمارەکا دی ڕادسپێریت. ئەو ژی دچنه‌ گوندێن سنووری یێن جارمەندا و شلکۆ و ئەرژا، لێ مخابن مینەکا دی ل شلکۆ ب هەڤالێ وان (ئیدریس بێسکێ) ڤە دپەقیت وپێ وی دهاڤێژیت. ئەو نەچار دبن ڤەگەرنەڤە بارەگایێ خوە ل شیڤ ئۆسمانا، و دەرمان دکێمن، دکتۆر کەمال دبێژیتە وان دڤێت ل چارەکی بگەڕن. زێرەڤان و تەحسین مختارەکی ڤڕێدکه‌نه‌ قەرەقۆلا ترکا و داخوازێ ژ وان دکەن کو ڕێكی بدەنێ ئه‌و بریندارێن خوە ده‌رباز بکه‌ن و ببەنه‌ ئیرانێ، لێ ترکا داخوازیا وان قەبۆل نەکر و مختار دبێژیته‌ وان: ئه‌ڤه‌ دوژمنێن سه‌دامی نه‌، نه‌ دوژمنێن وه‌نه. لێ له‌شکه‌رێن ترکا دبێژنێ: ئه‌م ژ سه‌دامی پتر دوژمنێن واینه‌.
زێرەڤان و تەحسین ب قەچاخی دچنه‌ گوندێ شیکه‌ و ئەو بریندارێن خوە ب ڕییا نەجمدین شیکەیی دبەنه‌ مالا مەلا ئیبراهیمێ چێی، دا وان ببەنه‌ ئیرانێ، لێ تورك ڕێ ل وانا دگرن. بڕێڤە ل گەلیێ شیکە گڕك ئیدریس بێسکی دگریت و دبێژیت: من سارە. ئیدی ئەو هەر هند تەحەملا گرانیا برینێن خوە دکەت و گیانێ خوە د سەخترین بارودۆخ دا دڕێیا خەباتا پێشمەرگاتیێ دا گۆری کورد و کوردستانێ دکەت و شه‌هید دبیت. ئیدریس بێسکی گه‌نجه‌کی 18-20 ساڵی و لاوه‌کی ده‌لال و خوینشرین و قاره‌مان بوو.
له‌شکه‌رێن تركا نه‌ ڕێدده‌ن کو ته‌رمێ شەهیدی ژی ده‌رباز بکه‌ن و ببه‌نه‌ ئیرانێ و نه‌ ژی دهێلن کو ته‌رمێ وی ل ناڤ ئاخا باکوورێ کوردستانێ ڤەشێرن. دڤێ ڕەوشێ دا هەڤالێن وی ل سەر برنا جەنازێ وی بۆ ڕۆژهەلاتێ کوردستانێ ڕژد دبن و وی هەتا ساتێ دبەن. لێ له‌شکه‌رێن ترکا ڕێ ل وان دگرن. چ ڕێ ل پێشیا وان نامینن. ل دوماهیێ لەشێ پیرۆزێ شەهید ئیدریس بێسکی ل ساتێ ڕادەستی ئاخێ دکەن. دلبرینی ژی ڕاده‌ستی هنده‌ک کوردێن باکوور دکه‌ن ل ساتێ.
پاشی زێرەڤان و شاکر زێوەیی و هەژمارەکا پێشمەرگا خوە دگەهیننه‌ ڕۆژهەلاتێ کوردستانێ. زێرەڤان دچیتە ئۆرمیێ و ل وێرێ سامی عەبدولرەحمان دبینیت و ڕەوشا خوە و هەڤالێن خوە و پسمامێ خوە دلبرین بۆ وی دبێژیت. سامی عەبدولرەحمان جارەکا دی زێرەڤان و هەڤالێن وی د دویف دلبرینێ بریندار دا د هنێریتەڤە کوردستانێ.
پشتی زێرەڤان و محەمەد سەلیم کورکۆی دگەهینە باکوورێ کوردستانێ، ئه‌و دچنە مالا کامل ئۆرەماری ل گەڤەڕێ دا بڕێیا وی تشتەکی ژ چارەنڤیسێ دلبرینی بزانن و بهاریکاریا وی دچنه‌ دەف مستەفایێ کەرەم ئاغا، نەجدەت بۆلدان سەرۆکێ باژێرڤانیا گەڤەڕی و نازمێ عەبدوللا دەشتۆی سەرۆکێ جڤاتا گەڤەڕێ و سلاڤێن سەرۆك بارزانی و سامی عەبدولرەحمان (بێی وان) دگەهینته‌ ھەر سێیا و داخازێ ژ وان دکەن کو تشتەکی ژ چارەنڤیسێ دلبرینی بزانن.
ڕۆژا پاشتر مستەفایێ کەرەم ئاغای وان ئاگەهدار دکەت کو دلبرین یێ ژ گەڤەڕێ بریە وانێ و پشتی هینگێ یێ بریە ئەنقەرە و یێ ل بن چارەسەریێ و ئەو ب خوە ژی یێ دگەل وی ئاخفتی. زێرەڤان داخوازێ ژ مستەفایێ کەرەم ئاغای دکەت کو هارکاریا وان بکەت دا دلبرینی ژ ئەنقەرە بینن و ببەنه‌ ئیرانێ. مستەفا رادبیت کامل ئۆرەماری د دویڤ دلبرینی ڕا دهنێریت ئەنقەرە و وی ژ وێرێ تینیتە گەڤەڕێ و دڕێکا سێرۆ ڕا وی دەربازی ئیرانێ دکەت.
ل سەرهەلدانێ زێرەڤان نێروەیی بەرپرسیاریا لقا ئێك یا پارتی گەل وەردگریت و تێتە ئامێدیێ و پاشی تێتە دهۆکی. بەرەیێ کوردستانی بڕیارا ئازادکرنا فەییدێ ددەت. لێ ئه‌و ل گرێ میریێ تێنه‌ دوورپێچکرن و هەژمارەکا بریندارا ددەن، مراد ئەڤریکی ل تانا وان دچیت.
مام جەلال و سامی عەبدولرەحمان ژ سوریێ تێنه‌ کوردستانێ، کۆمبوونەکێ ل دهۆکێ ب پشکداریا سەید سالح ئەنجامددەن.
زێرەڤان نێروەیی ب فەرمانا بەرەیێ کوردستانێ ب ٥٠ پێشمەرگا سەرپەرشتیا بەرەیێ ئالۆکا دکەت، ئەو هەژمارەکا فەرماندە و پێشمەرگێن پارتی ژی لوێرێ دبینیت وەکی ئاشتی کۆچەر، مزەفەر دێرکی، سەگڤان ڕەشیدێ فەلەکێ، یونس دوتازایی و ئەبو نسیر ژ حزبا شوعی و ڕێنمایا ددەته‌ وان. د بیتە شەر و دوژمنی دشکێنن، لێ تۆپبارانا دوژمنی ب چڕی دەستپێدکەت و پاشی دەست بهێڕشێن زەمینی دکەت. هێزێن پێشمەرگەی چەندین هێرشێن دوژمنی ب ئاربیجی و دۆشکا دشکێنن. لێ ژ ئەنجامێ بەرەللایێ، خەلك دکەڤیتە د بەرەیێن شەڕی دا و هێزێن پێشمەرگەی خوە ڤەدکێشنه‌ زاویتە و ل وێرێ کۆم دبن. ل وێرێ بڕیاری ددەن کو گەلیێ بێسرێ بگرن. ل سەر ڕێکا بادێ مینەك ب حسێن فەتاح ڤە دپەقیت، حەسەن سەلیم و حەجی ئەحمەد سینی شەھید دبن و عەلی شەعبان ئەمێدی و شەریف ئامێدی بریندار دبن. ئێدی بڕیارا ڤەکێشانێ ددەن و دچنه‌ ئامێدیێ. هێزێن دوژمنی خوە د گەهیننه‌ سەرسنکی وشەڕەکێ مەزن د ناڤبەرا وان وهێزێن پێشمەرگەی دا ڕویددەت. د ئەنجامدا ١٢ پێشمەرگە شەهید دبن. کو دناڤھ واندا فەرماندێن دێرین حەمۆ کەمەکی تاھر زێوەیی و سلێمان بەندی، محسن عبدلڵە ئامێدی، برقی سالح وسەنعان دۆسکی ژۆری د ناڤ شەهیدا دا بوون. سەرۆك بارزانی برووسکەکێ بۆ محسن سالح ئامێدی دهنێریت و داخوازێ ژێ دکەت کو بەڕەڤانیێ بکەن. زیرەڤان نێروەیی ژی دگەهیتە ئامێدیێ و ڕۆژا پاشتر دچیتە رەواندوزێ. سەرکردایەتیا بەرەیێ کوردستانی ب ئامادەبوونا سەرۆك بارزانی ل وێرێ دجڤیت و بڕیارا بەرگریێکرنێ هاتە دان. بەرەیێ سەرێ هندرین ب بەر هێزێن پارتی گەل دکەڤیت.
پشتی هینگێ نەتەویێن ئێکگرتی بڕیارا ٦٨٨ ددەن، ئەو ژی ڤەدگەڕنه‌ دهۆکێ. ئیدارێن ڕژێمێ هێشتا ل کوردستانێ نە. پشتی هینگێ ڕژێم بڕیارا ڤەکێشانا ئیدارێن خوە ژ کوردستانێ ددەت. بەرەیێ کوردستانی سەرکردایەتیا دەڤەرێ دکەت. فازل میرانی دبیتە بەرپرسێ لژنا بلندا بەرەی ل پارێزگەها دهۆکێ. زێرەڤان نێروەی ژی هەر وەکو بەرپرسێ لقا ئێك یا پارتی گەل دمینیت. ، عارف ڕوشدی بەرپرسیاریا ئیدارێن میری وەردگریت، عومەر بۆتانی و ئەبو نەسیر و شمعون ژ بزاڤا دیمکراسیا ئاشۆری بەرپرسیاریا داریی وەردگرن. ژبەرکۆ زێرەڤان نێروەیی یێ نەرم بوو درەفتارا خوەدا هەڤالێن وی گلەییێ ل دەف سامی عەبدولرەحمان وسەرکردایەتیا پارتی گەل ل وی دکەن. عومەر بۆتانی وی پێشنیار دکەت کو ببیتە بەرپرسێ داراییێ لژنا بلندا بەرەیێ کوردستانی، لێ ئەو بەرپرسیاریا رێکخراوێن جەماوەری وەردگریت. سامی عەبدولرەحمان ژ بەر باقژیا وی نازناڤێ (مەسیحێ شۆڕشێ) ددانیته‌ سەر وی. سەرۆك بارزانی ژی د کۆمبوونا بەرەیێ کوردستانی دا پەسنا وی کربوون کو نموونا کادرێ پاقژە.
پشتی ئێکەم هەلبژارتنێن پەرلەمانێ کوردستانێ ل ساڵا ١٩٩٢، پارتی گەل و حسك و پاسۆك هەڤدوو د پارتیا (یەکگرتن ) دا دگرن. زێرەڤان د وێ پارتیێ ژی دا وەکو ئەندامێ سەرکردایەتیێ جهی دگریت. پشتی هینگێ پارتیا یەکگرتن د کۆنگرێ خوەدا بڕیارا ئێکگرتنێ دگەل پارتی دیموکراتی کوردستان ددەت. حەمەی حاجی مەحمود ژبۆ ڤێ ئێکگرتنێ گەلەك مەرجا ددانیت و دچیتە سلێمانیێ. ١٤ ڕۆژ دەربازدبن و ئه‌و ناگەهنه‌ چ ئەنجامان. زێرەڤان و عومەر بۆتانی د دویڤ حەمەی دا دچنه‌ سلێمانیێ. پشتی هینگێ پارتیا یەکگرتن و پارتی دیموکراتی کوردستان کۆنگرێ ئێکگرتنێ گرێددەن، دکتۆر ڕۆژ و جەهوەر نامق تێنه‌ دەف سامی عەبدولرەحمان و پێشنیار دکەن کو زێرەڤان نێروەیی خوە بۆ سەرکردایەتیێ بەربژێر بکەت. هەردوو پارتیێن ئێکگرتن و پارتی ل ژێر ناڤێ پارتی دیموکراتی کوردستانی- یەکگرتوو ئێك دگرن و زێرەڤان نیروەیی ژی وەکو ئەندامێ یەدەكێ کۆمیتەیا ناڤەندی تێته‌ هەلبژارتن، پشتی هینگێ ژی دبیتە ئەندامێ رەسەن.
قۆناغەکا نوییا خەباتا زێرەڤان نێروەیی دگەل پارتی دیموکراتی کوردستان دەستپێدەکەت و ل سالا ١٩٩٣دبیتە جێگری بەرپرسێ لقا ٩ یا پارتی ل ئاکرێ کو زەعیم بەرپرسیاریا وێ دکر.
ل ساڵا ١٩٩٥ دبیتە جێگرێ فەرماندێ لەشکەرێ کوردستانێ (فلك) و کو برووسک نوری شاویس بەرپرس بوو، نوکە چ پۆستێن حزبی و حکۆمی نینن، لێ وەکو ئەندامێ سەرکردایەتیا پارتی دیموکراتی کوردستان سەرەدەری دگەل تێتە کرن.