ئەحمەد کوڕکی، ئەو پێشمەرگێ ھەشت جاران بریندار بووی و ل ڕۆژا شەھیانا خوە چوویه بەره‌یێ شەری.
ئەحمەد کوڕکی، ئەو پێشمەرگێ ھەشت جاران بریندار بووی و ل ڕۆژا شەھیانا خوە چوویه بەره‌یێ شەری.
د بەردەوامیا تۆمارکرن و ئەرشیفکرنا دیرووکا شۆڕشێ دا، ستافێ سەنتەرێ کۆماتە ل ٢٠٢٢⁄٥⁄١٩ ل باژێرێ زاخۆ دبیتە مێڤانێ پێشمەرگێ دێرین ئەحمەد کوڕکی و دیدارەکا درێژا ڤیدیۆیی دگەل ئەنجامددەت و دیرووکا خەباتا ویا پێشمەرگاتیێ تۆمار دکەت و ژ ناڤچوونێ دپارێزیت.
محەمەد خدر ئەحمەد یێ ناڤدار ب ئەحمەد کوڕکی ل ساڵا ١٩٦١ ل گۆندێ کوڕکا یێ سەرب دەڤەرداریا باتیفا ھاتیە سەر دنیایێ، ژ بەرکو دەلیڤا چوونا قوتابخانێ بۆ چێنەبوویە، ل بەردەستێ زانایێن ئاینی قورئانا پیرۆز دخوینیت و پاشی ل ناڤ شۆڕشێ فێری خاندن و نڤێسینا زمانێ کوردی ب پیتێن لاتینی دبیت.
ئەحمەد کوڕکی دژیێ گەنجاتیێ دا ل ١٩٧٦⁄٥⁄٢٤ دگەل فازل قومری و حەجی عەلی ڕویسی ل کۆماتەی ل نھالا بەناڤیکێ پەیوەندیێ ب ڕێزێن شۆڕشا گولانێ دکەت و ئه‌و ئێکەم گەڕا خوە یا پێشمەرگاتیێ دگەل مەحمود کانیسارکی بۆ دەڤەرا بەرواری بالا و نھێلیا دەستپێدکەت، ٣ بۆ ٤ مه‌ها ئه‌و گه‌ڕا وان ڤه‌دکێشیت.
ل ١٩٧٦⁄٦⁄٢ گروپەکا پێشمەرگەی کو پێک دھات ژ مستەفا مزووری، شەھید مەحمود ئێزدی، شه‌هید عەبدوللا سالح، سەید حەسەن، حەسەن کێستەیی و مستەفا کێستەیی و ھەژمارەکا دی یا پێشمەرگان تێنه گوندێ کوڕکا، ڕژێم ب ھێزەکا مەزن دەورووبەرێن گوندی دوورپێچ دکەت و شەر و پێکدادان د ناڤبەرا ھێزێن ڕژێمێ و پێشمەرگەی دا ڕووددەت، د ئەنجامدا ٢٤ سەربازێن ڕژێمێ تێنە کوشتن و ١١ کەلەخێن خوە ژی ل ناڤ کۆلانێن گوندی ل پاش خوە دھێلن، ڕژێم ھەمبەر ڤێ شکەستنێ ب بومبەبارانا فڕۆکان تۆلێ ژ گوندیێن بێ چەک ڤەدکەت و دوو گودندیان شەھید دکەت و ١١ دی ژی بریندار دکەت، خەلک نەچار دبیت گوندێ خوە چۆل بکەن.
ئەحمەد کوڕکی ل ساڵا ١٩٧٨ دچیتە دگەل مەفرەزا شەھید محۆ گەودا و گەڕا خوە یا ئێکێ دگەل وی ل مه‌ها ١٩٧٨⁄٨ بۆ دەڤەرا بەرواری بالا و پاشی بۆ دەشتا دووبانێ دەستپێدکەت، ل کوچێن مەرینا ترۆمبێلەکا لەشکەری و سێ تانکەران دسۆژن، ل ڤەگەڕێ ئه‌و ل گوندێ برجینێ دکەڤنه بۆسا لەشکەرێ ڕژێمێ و د ئەنجامدا پێشمەرگێ قەھرەمان ( ده‌هام عومەر ھرۆری) شەھید دبیت.
ل ھاڤینا هه‌مان ساڵێ ھێزەکا مەزنا ڕژێمێ ل دەشتا چەقەلا ل دەڤەرا بەرواریا مژولی دانانا سەربازگەهه‌کێ لەشکەری دبن، کاک ئەحمەد کوڕکی دگەل مەفرەزا محۆ گەودا کو ھەژمارا وان بتنێ (١٦) پێشمەرگە بوون ، ھێرشێ دکەنه سەر وێ ھێزێ و ٦٥ سەربازان ژێ دکوژن و ھەژمارەکا پتر ژی لێ بریندار دکەن، بێی کو ھێزێن ڕژێمێ بشێن ب گوللەیه‌کێ بتنێ ژی بەڕەڤانیێ ژ خوە بکەن.
کاک ئه‌حمه‌د ل زڤستانا ھەمان سال دگەل غازی زێباری و ئەبۆ عنتەری دەست بگەڕەکا دی بۆ دەڤەرا گولیا و بەرواریا دکەن و چالاکیەکێ ل دژی فەوجا دۆڵا ئەرمشتێ ل لێفێ ئەنجامددەن.
ل بھارا ساڵا ١٩٧٩ پشکداریێ د ئاڤاکرنا بارەگایێ هه‌رێما ئێک ل کۆماتەی دا دکەت، پاشی ئه‌و ل گوندێ ڕویسێ بارەگایەکێ ده‌مکی دی ئاڤادکەن.
ل مه‌ها ١٩٧٩⁄٦ دگەل جەوھەر نامق دچیته سنوورێ هه‌رێما دوو ل ھەرک و بێداڤا، نێزیکی مه‌ھەکێ ل وێرێ دمینن، پاشی دچن بارەگایێ شەھید سامی عەبولرەحمان ل گوستەی، ژ بۆ پشکداریکرنێ د کۆنگرا ٩ ێ یا پارتی دا بکەن، پێکڤە دچنه ڕۆژھەلاتێ کوردستانێ. ل گوندێ نوێ شەھید ئیدریس بارزانی و سەرۆک مەسعود بارزانی دبینیت، پاشی دگەل ھەڤالێن خوە دچنه سەر گۆڕا بارزانیێ نەمر. پاشی دگەل زەعیم عەلی، ژبۆ ئەنجامدانا ئەرکەکی دچیتە قەندیلی و ل وێرێ برینداردبیت.
دەمێ کۆنگرە دەستپێدکەت کاک ئەحمەد دبیتە ئێک ژ زێرەڤانێن ئاسایشا کۆنگرێ. پشتی کۆنگرێ ڤەدگەریتەڤە کوردستانێ و بەری ھاتنا وی برایەکێ وی ژی پەیوەندیێ ب ڕێزێن شۆڕشێ دکەت، کاک ئەحمەد کوڕکی ژی ل لژنا ناوچا دھۆک دبێتە فەرماندێ مەفرەزەکا پێشمەرگەی کو ڕاستەوخۆ گرێدای بەرپرسێ لژنێ کاک فوئاد میرانی یە.
ل ساڵا ١٩٨٠ دگەل شەھید شەعبان غەفار چالاکیەکا لەشکەری ل گوندێ تروانش ئەنجامددەت و ل کانی ڕەشێ ڕاستی ھێڕشا ھێزێن ئەسمانی یێن ڕژێمێ تێن، د وێ ھێرشێ دا سەفەر عبدالعزیز ئۆرمانی شەھید دبیت و کەریم زاخۆیی ژی بریندار دبیت.
ل ساڵا ١٩٨١ دگەل ھێزێن پارتیا کۆمۆنیستا عێراقی بانزینخانا ڕژێمێ ل مانگێشکێ دسۆژن و لناڤبەرا دێراگژنیکێ و گرێ پتێ دگەل شەھید وەسفی سەلمان بێدوھی تومبلا بەرپرسێ ئەمنێ دگەل ترومبێلەکا لەشکەری دسۆژن. پاشی بۆسەکێ ل سەرجادا بێرسفێ ل پێشیا ھێزێن ڕژێمێ ددانن و ھەروەسا ل نێزیک مەزارێ زەمبیل فرۆشی دربەکێ مەزن داوەشینیتە ھێزێن دوژمنی.
ل هه‌مان ساڵێ کاک ئه‌حمه‌د تێته ڤه‌گوهاستن بۆ ڕێکخراوا شەھید حەمید حەفزوللە.
ل ١٩٨١⁄١٢⁄٣٠ رەبیەکێ ل زرێزە دگرن و ١٣ سەربازێن ڕژێمێ دکوژن و ١١ کلاشنیکۆفان، BKC یەک و تۆپەکا ٦٠ ملم و گەلەک تەقەمەنیان وه‌ک دەستکەفتی ڕادکەن.
ل دوماهیا مه‌ها ١٩٨٢⁄٢ کاک ئه‌حمه‌د دگەل هێزه‌کا پێشمه‌رگه‌ی کوشەھید ئیشۆی ژی لگه‌ل وان بوو، ل ده‌ڤه‌را زاخۆ ل نێزیک گوندێ ته‌مه‌راڤا، ل بنێ گه‌لیێ هاروینا بوون، هێزه‌کا مه‌زنا له‌شکه‌رێ ڕژێمێ هێڕشێ دئینیته سه‌ر وان و 7 ھەلیکوپتەرێن ڕژێمێ له‌شکه‌ری ل دەردورا وان بەرددەنە خوارێ و شەڕەکێ مەزن دناڤبەرە وان و ھێزێن دوژمنی دا رووددەت. پشتی ھەژمارەکا مەزن ژ سەربازێن ڕژێمێ دکوژن، ھەڤالەکێ وان ب ناڤێ ئیسلام پساغا شەھید دبیت و ٨ پێشمه‌رگێن دی ژی بریندار دبن.
پشتی ده‌مه‌کی ڕێکخراوا شه‌نگال سه‌ر ب لژنا زاخۆ ڤه تێته دامه‌زراندن و سه‌عدۆ کوڕکی دبیته به‌رپرسێ وێ و کاک ئه‌حمه‌د ژی تێته ڤه‌گوهاستن بۆ وێ ڕێکخراوێ.
ل رۆژا ⁄٩⁄١٥ ⁄١٩٨٣ کاک ئه‌حمه‌د داوه‌تا خوه دکه‌ت ل گوندێ کوڕکا و شاهیا هه‌ڤژینیا ویه. وێ رۆژێ دوو فرۆکه‌ڤانێن ترکی که‌فتبوونه ده‌ستێ پێشمه‌رگه‌ی، پشتی کو فرۆکێن وان ژ ئالیێ ئیراقێ ڤه هاتینه ئێخستن. ھێزێن ڕژێمێ ژبۆ ڕزگارکرنا وان فرۆکه‌ڤانان ھێرشێن ئەسمانی و بەژایی دکەنە سەر گوندێ کوڕکا و کانیا تویا، کاک ئەحمەد، بەری بویک بگەھیت، شەھیان و مێڤانێن خوە دھێلیت و بەرەف بەرۆکێن شەری دچیت، ھەر چەندە ھەڤالێن وی یێن پێشمەرگە، وی بخورتی دھنێرنه مال، لێ دیسا دچیتەڤە بەرۆکێن شەری. ڕۆژا پاشتر فەرماندەکێ پێشمەرگەی تێتە مالا وی، کاک ئەحمەد ھزر دکەت کو ئەو یێ ھاتیه سەرسوبەھیا وی، لێ ئەو فەرمانده نزانیت کو کاک ئەحمەد زاڤایێ ڕۆژەکێ یە، لەوما داخوازێ ژێ دکەت کو پێکڤە چالاکیەکا لەشکەری ئەنجامبدەن. ئەو ژی بێ دوودلی دگەل وێ دچیت ژ بۆ ئاماده‌کاریێن چالاکیا دەستنیشانکری و مینێن دۆرێن ره‌بیێ دھەلگرن و ڤەدگەرنه‌ڤه مالێ. ئه‌و دبینن کو مال یا تژیە ژ مێڤانا، ئەو فەرماندێ پێشمەرگەی ژێ دپرسیت کا بۆچی ھندە مێڤان ل مالا وی نە؟ ژ نوی کاک ئەحمەد دبێژیتی کو وی دوھی شەھیانا خوە یا کری و ئەو مێڤانێن شەھیانا وی نە. پشتی وی فەرماندێ پێشمەرگەی ئەڤ ھەلویستە ژ کاک ئەحمەد دیتی، خوە ب کوژمێ ٢٥ دیناران سزا ددەت و وەک سەرسوبەھی پێشکەشی کاک ئەحمەدی دکەت.
ل ساڵا ١٩٨٤ پشکداریەکا کارا د بەرسینگگرتنا ھێرشا مه‌زناھێزێن جاش و له‌شکه‌رێ ڕژێمێ بۆ سەر ھەردوو لژنێن زاخۆ و دھۆکێ دا دکەت و لگه‌ل هه‌ڤالێن خوه لەشێ سێ شەھیدێن پێشمەرگە ژ دەستێ دوژمنی ڕزگار دکەت، کو دهه‌مان شه‌ڕ دا پسمامێ وی سبحی کوڕکی کو کارگێڕێ لژنا زاخۆ بوو، ئه‌و ژی شەھید دبیت.
کاک ئه‌حمه‌د لگه‌ل هه‌ڤالێن خوه سێ جاران ل سەر جادا بالۆلەی و ل ڕۆژئاڤایێ گوندێ کێستە بوسێ ددانن و زیانێن مەزن دگەھیننە ھێزێن دوژمنی.
ل نەورۆزا ساڵا ١٩٨٦ کاک ئه‌حمه‌د لگه‌ل هه‌ڤالێن خوه بارەگایێ سریا ئاشێت ئاڤگەنیێ دگرن و ئه‌و د وی شه‌ڕی دا بریندار دبیت. ل ساڵا ١٩٨٧ ئه‌و هێرشی بنگه‌هێن جاشا یێن ملا رەدێ دکه‌ن، ل رۆژاڤایێ گوندێ کێسته. مخابن سەلاحێ برایێ وی د وی شه‌ڕی دا شەھید دبیت و ئەو ژی بگرانی ژ سەرێ خوە، دگەل ١١ پێشمەرگێن دی بریندار دبن. پاشی ژ بۆ چارەسەریێ دچیتە ڕۆژھەلاتێ کودستانێ و ٦ مه‌ها ل وێرێ دمینیت.
ل ١٩٨٨⁄٨⁄٨، کاک ئه‌حمه‌د دبیته به‌رپرسێ ڕێکخراوا شەنگال ل سنوورێ لژنا زاخۆ. مخابن ل ئەنفالان ڕێکخراوا وان ل گوندێ تویکا ل ده‌ڤه‌را زاخۆ دکه‌ڤیته به‌ر ھێرشا چه‌کێ کیمیاویێ ڕژێما به‌عس و ١٣ پێشمه‌رگێن وان شەھید دبن. دناڤ شه‌هیدان دا برایێ وی زبێر و برازایێ وی ئازاد ژی هه‌بوون. ھەر چەندە ئەو شەھید ھاتبوونه ڤەشارتن، لێ ڕژێما ئیراقێ گۆڕێن وان هه‌لکۆلان و لەشێن وان بۆ جھەکێ نەدیار برن.
کاک ئەحمەد و خێزان و کەس و کارێن خوە ل ئه‌نفالان ئاوارەی باکوورێ کوردستانێ دبن و تا سەرھەلدانێ ل کەمپا ئامه‌دێ دمینن.
پشتی سه‌رهلدانێ کاک ئه‌حمه‌د و هه‌ڤالێن خوه ل رۆژا ١٩٩١⁄٤⁄١٩ ڤەدگەرنه ڤه کوردستانێ ل سه‌ر ئه‌رکێ خوه یێ پێشمه‌رگاتیێ و دبیتە ئەندامێ میحوەرێ باتیفا. ل ساڵا ١٩٩٢ دگەل ھێزا عبدالکریم فەرحۆ دبێتە بەڕپرسێ حەرەکاتا. ل رۆژا 4/10/ 1992 ل ده‌مێ پ ک ک هێرش کریه کوردستانا باشوور، ئه‌و ل سەرێ شابانیێ بگرانی بریندار دبیت. دیسان ل ساڵا ١٩٩٥ جارەکا دی ل بێخال بریندار دبیته‌ڤه.
ھەروەسا ل ساڵا 1999 ل هێرشا دووێ یا پ ک ک بۆ سه‌ر باشوورێ کوردستانێ، دیسان ل شەش داری ل هنداڤی گوندێ پیربلا ل ده‌ڤه‌را باتیفێ ب ده‌ستێ پ ک ک تێته‌ڤه بریندارکرن و تا کو نوها ژی ئه‌و گولله هێشتا د له‌شێ وی دایه.
کاک ئه‌حمه‌د پشکداریه‌کا چالاک د به‌رسینگگرتنا هێرشا داعش دا دکه‌ت بۆ سه‌ر کوردستانێ و د ڤی شه‌ڕی ژی دا ل رۆژا 17/12/2014 ل کاڕێزێ ل ده‌ڤه‌را که‌سکێ بریندار دبیت.
کاک ئەحمەد کوڕکی د کاروانێ دویر و درێژێ خەباتا خوەدا ٨ جاران بریندار بوویە، دوو برایێن وی دگەل برازایەکێ وی ژی شەھید بووینە، چار برایێن وی یێن دی ژی بریندار بووینە.
کاک ئەحمەد کوڕکی ل سالا ٢٠٠٩ ب پلا عەمید ھاتیە خانەنشینکرن و نۆکە ژی ل باژێرێ زاخۆ دژیت.
