مســته‌فا مــــزوورى،چــــــریسكا بــــــــه‌رى شۆرشێ.

مســته‌فا مــــزوورى،چــــــریسكا بــــــــه‌رى شۆرشێ.

ل ده‌ست پێكێ ده‌ست خۆشیێ ل سه‌نته‌رێ كوماته‌ى دكه‌ین ب راستى باره‌كێ گران وكاره‌كێ مه‌زن لسه‌ر مللێن وانه‌، ئه‌ڤ گرۆپا بچویك شیایه‌ خزمه‌ته‌كا مه‌زن پێشكێشى مێژوویا گه‌لێ كورد بكه‌ت برێكا دیدار ودیكومێنتكرنا بیره‌وه‌ریێن شورهشگێرێن شور‌شا ئه‌یلول وگولانێ،هه‌ر چه‌نده‌ گه‌له‌ك ژێ وێ مێژوویێ هاتیه‌ وندا كرن، به‌لێ ئه‌ڤا ماى ژى لسه‌ر ده‌ستێن وان بهێت قورتال كرن نه‌ تشته‌كێ كێمه‌ و جهێ رێزلێنانێ یه‌.ل 17/11/2022 ئه‌م ل رِێ ورسمێن ئیمزا كرنا په‌رتوكا چریسكا به‌رى شۆرشێ یا كو ژلایێ پێِشمه‌رگه‌هێ قاره‌مان مسته‌فا مزوورى ڤه‌ هاتیه‌ نڤێسین ئاماده‌بوین، په‌رتوك بێروه‌ریێن نافبرینه‌ دشۆرشا گولانێدا وچه‌ند تیشكه‌كێن كێم ل به‌رداینه‌ سه‌ر خه‌باتا وكارێن خۆ پشتى سه‌رهلدانا سالا1991ێ.من مسته‌فا مزوورى پێشى چه‌ند ساله‌كا نیاسیه‌ ل مالا (سه‌ید خدر خه‌لكى)، وپتنێ ئێك دوو جاران بۆ ده‌مه‌كێ كێم ل جڤاتا وى شاد بومه‌، لێ بۆ جارا ئێكێ من دیتى من زانى مرۆڤه‌كێ پر سه‌رهاتى وخودان دیروكه‌كا پرى سه‌روه‌رى وقوربانى یه‌، پشتى هینگى ل ڤێره‌ و وێرا هه‌ هنده‌ك زانیاریێن كێم ژ كیس ده‌ڤێ هه‌ڤالێن وى دهاتنه‌ گوهێن من،به‌لێ تێنكا من نه دشكاند،ل ده‌مه‌كى من زانى كو مسته‌فا مزوورى یێ بیره‌وه‌ریێن خۆ دنڤیسیت ب راستى گه‌له‌ك دلشاد بوم ومامه‌ ل هیڤیێ وچاڤه‌رێ بوم كانێ دێ كه‌نگى روناهیێ بینیت.بیره‌وه‌رى ژلایێ سه‌نته‌رێ كوماته‌ى ڤه‌ هاته‌ چاپكرن وكه‌فته‌ به‌رده‌ستێن خوانده‌ڤانان.ئایا ئه‌ڤ په‌رتوكا بیره‌وه‌ریان یا ژ هه‌ژى هندێ بوو كو هنده‌ ل هیڤیێ و چاڤه‌رێ یا وێ بكه‌م؟.پرسیاره‌كه‌ وئه‌ز بخۆ دێ به‌رسڤێ ل سه‌ر ده‌م، ب شێوه‌كێ گشتى (به‌لێ) یا ژ هه‌ژى هندێ یه‌ كو دبیت ب سالان مابمه‌ ل هیڤیێ.پێشى بچمه‌ دناڤ بابه‌تێن په‌رتوكا بیره‌وه‌ریێن مسته‌فا مزووریدا، دبێژم دڤان سالێن دوماهیێدا چه‌ندین په‌رتوكێن بیره‌وه‌ریان هاتینه‌ نڤیسین ژلایێ وان قاره‌مانان بخۆڤه‌ وهاتینه‌ چاپكرن، وه‌كو بیره‌وه‌ریێن پێشمه‌رگێ قاره‌مان رزگار كێسته‌ى و نایف بیگداودى وعیسى بیكداودى وگه‌له‌كێن دیتر وباوه‌رم ژماره‌كا دیتر ژى یا قاره‌مانێن شوره‌شێ بیره‌وه‌ریێن خۆ نڤیسینه‌ ول هیڤیا چاپێ نه‌ وئه‌ڤه‌ ژى ب راستى مزگینیه‌كا دلخوش كه‌ره‌ چونكه‌ ب ڤێ رێكێ دێ هه‌ر چ نه‌بیت دیروكا شورشه‌كێ ژ وندا بونێ هێت قورتال كرن.په‌رتوكا بره‌وه‌ریێن مسته‌فا مزوورى، ژ273 لاپه‌ران پێكدهێت وب قه‌بارێ(نیف ئه‌یفور ) واته‌(‌14×21). ل دوماهیێ ژى ئه‌لبومه‌كا وێنان ب دوماهى هاتیه‌.مرۆڤ گه‌له‌ك جاران ده‌ست دده‌ت په‌رتوكه‌كێ بۆ خواندنێ لێ د چه‌ند لاپه‌رێن ئێكێدا دل وده‌ستێن مرۆڤى ساردبن وپه‌رتوكێ لادده‌ت ونه‌شێت بخوینیت تا دوماهیێ چونكه‌ نڤیسه‌ر یان ئه‌وێ نڤیسى ژده‌رهه‌ق ‌ده‌رنه‌چویه‌، به‌لێ نه‌كو ئه‌ز ریكلاما په‌رتوكا بیره‌وه‌ریێن مسته‌فا مزورى دكه‌م نه‌خێر، ل ده‌مێ چه‌ند لاپه‌رێن ئێكێ من خواندین ئه‌ز نه‌شیام ده‌ستان ژێ به‌رده‌م ل سه‌ره‌راى پركاریێ من ده‌ست ژێ به‌رنه‌دان هه‌تا من هه‌مى خواندى، براستى ب هویرى بابه‌ت نڤیسینه‌ ب دارێژتنه‌كا ساده‌ ومرۆڤ كێش، هه‌ر دیمه‌نه‌كێ وى به‌رچاڤ كرى خوانده‌ڤان خۆ تێدا دبینیت ووه‌سان هه‌ست پێ دكه‌ت دگه‌ل وانه‌ ل وان رۆژێن سه‌خت ودژوار، بزاڤا یا كرى هه‌مى تشته‌كى وه‌كو خۆ نیشان بده‌ت، ( پێشمه‌رگه‌ و خاله‌ت ونانێ وێ وبرا مه‌سیحى ورێكخستنێن نهێنى و زه‌حمه‌ت هاتن وچون وخۆ ڤه‌شارتن) وگه‌له‌ك كارێن دیتر دیمه‌نێن وان د ڤێ په‌رتوكێدا ب به‌ر چاڤێن مرۆڤى دكه‌ڤن، ل گه‌له‌ك جهان مرۆڤ دگه‌ل دكه‌ت گرى ول گه‌له‌ك جهان مرۆڤ دكه‌ت كه‌نى وه‌كو بابه‌تێ(قه‌سیركێ) وره‌ڤینا مسته‌فاى بێ گوره‌ وره‌ڤینا عه‌زیزێ خانكى وگه‌له‌كێن دیتر، هه‌ر وه‌سان مێرانى وقاره‌مانیا گه‌له‌ك شوره‌شگێران وه‌كو شه‌هید شه‌عبان غه‌فار و ئوسمانێ زاهر هرورى و وان ژنكێن قاره‌مان یێن كا وجه داناینه‌ به‌رخۆفرۆشان وگه‌له‌ك بابه‌تێن دیتر به‌حس كرینه‌.دیسان شه‌كر توڤ چا دزینا ژلایێ هنده‌ك پێشمه‌رگانڤه‌ كو دبیت ئه‌گه‌ر مسته‌فا نه‌بایه‌ كه‌سێ ئه‌و بابه‌ت نه‌دنڤیسى وه‌كو بیره‌وه‌رى.مسته‌فا مزوورى مافێ په‌رتوكێ یێ دایێ وبه‌لێ مافێ بیره‌وه‌ریێن خۆ نه‌دایێ چونكه‌ ئه‌ز باوه‌رم هێژ تشت ل ده‌ف مسته‌فا مزوورى مایه‌ نه‌ڤیسیى یه‌ چونكه‌ پتر كارێ وی رێكخستن وبه‌رپرسێ باده‌كا رێكخستنێ بویه‌ وه‌كو پێدڤى ل سه‌ر رێكخستنێ نه‌راوه‌ستایه‌ هه‌مى ب ساده‌ى به‌حس كریه‌، هه‌ر چاوا بیت دبیت وى هوسا پێ باشتر بیت، من نه‌ڤێت زێده‌تر لسه‌ر په‌رتوكێ باخڤم به‌لێ پشتى مه‌ په‌رتوك ب دوماهى ئیناى چه‌ند تێبینیه‌ك مه‌ هه‌بون وه‌كو:1- ئه‌وێن بیره‌وه‌ریێن خۆ نڤیسین ومسته‌فا مزورى ژى دگه‌ل دا خۆ ژ بابه‌تێ هاتنا جه‌نابێ (سه‌رۆك بارزانى) بۆسنورێ لقا ئێك ڤه‌دزى یه‌ وسه‌ر را بازدایه‌، هویركاتیێن هاتنا جه‌نابێ سه‌روكى به‌رچاڤ نه‌كرینه‌،یا ژمن ڤه‌ ئه‌ڤه‌ مێژوویه‌ و پتر ژ 35 سالان لسه‌ر را ده‌ربازبوینه‌ فه‌ره‌ بهێن به‌حس كرن چونكه‌ ئه‌و باشتر ژهه‌میان دزانن.2- مسته‌فا مزوورى به‌حسێ رێكخستنێن خۆ ل گوندان كرینه‌ كو ئه‌م هه‌مى دزانین ل وى ده‌مى گه‌له‌ك یا بترس بوو، فه‌ر بوو مسته‌فا مزیرى ناڤێن وان كه‌سێن رێكخستى یان به‌رپرسێن وان ل وان گوندان به‌رچاڤ كربانه‌ چونكه‌ مافێ وانه‌ هه‌ر چه‌نده‌ ناڤێ كێمه‌كا یێ ئینایى یێن دیتر دبێژیت مه‌ رێكخستیێن باوه‌ر پێكرى ل فلان گوندى هه‌بون بێى ناڤێن وان بینیت.3- ناڤێ هنده‌ك پێشمه‌رگێن ل سالا1975 – 1976 ب زیقى دپه‌رتوكێدا دهێت دیتن ویێن دیتر به‌حس لسه‌ر نه‌كریه‌ هه‌ر چه‌نده‌ دبیت ل ده‌ست پێكێ وه‌كو مه‌فه‌رزه‌كا بچویك وكێم ژ(10 – 16) كه‌سان زێده‌تر نه‌بن ل ده‌ڤه‌را بادینان و پاشى هێدى هێدى زێده‌بوینه‌، پێدڤى بوو هه‌ر چ نه‌بیت ناڤێن وان پێشمه‌رگان به‌رچاڤ كربانه‌ چونكه‌ مسته‌فا پێشى هه‌میان چوبو وه‌كو ناڤ ونیشانێن په‌رتوكێ چریسكا به‌رى شورشێ بوو.4- خوزى په‌رتوك ب فونتێ یونیكود نه‌هاتبایه‌ چاپكرن،چونكه‌ بۆ خواندنێ یێ نه‌خوشه‌.(6 – په‌یڤ بن به‌رچاڤێن من كه‌فتن بێگومان تشته‌كێ گه‌له‌ك كێمه‌.6- په‌رتوك یا بێ خشتێ ناڤه‌روكێ(فهرست) ته‌ فه‌ربوو هه‌بایه‌ چونكه‌ سه‌ر بابه‌تێن هه‌ین.

ل دوماهیێ ده‌ست خۆشیێ ل مسته‌فا مزوورى دكه‌ین ودیسان ل سه‌نته‌رێ كوماته‌ى كو ئه‌ركه‌كێ مه‌زن دانایه‌ سه‌رمللێن خۆ هیڤیخوازم بشێن به‌رده‌وامیێ بده‌نه‌ كاروانێ خۆ وتێدا سست وخاڤ نه‌بن.