محەمەد قاسم بامەرنی ئەو پێشمەرگێ چەند جارا ب شێوەیێن سەیر ژ مرنێ رزگار بووی

محەمەد قاسم بامەرنی 

ڕێکەفتی ٢٧/١٠/٢٠٢٢ سەنتەرێ کۆماتە یێ دەکۆمێتکرنا دیرووکا شۆڕشێ ل تاخێ سەرهەلدان/بەرۆشکێ ل باژێڕێ دهۆکێ دبیتە مێڤانێ پێشمەرگە و خەباتکەرێ دێرین محەمەد قاسم فەتاح بامەڕنی و دیدارەکا ڤیدیۆیی دگەل ساز دکەت و دیرووکا خەبات و تێکۆشینا وی تۆمار دکەت و ژ ناڤچوونێ دپارێزیت.
محەمەد قاسم فەتاح بامەڕنی ل سالا 1957 ل ناحیا بامەڕنێ هاتیە سەر دنیایێ، ئەو کوڕێ ئێکانەیێ دەیبابێن خۆ بوو. وی خواندنا خوە یا سەرەتایی هەتا پۆلا شەشێ ل بامەڕنێ خواندیە.
ل ساڵا ١٩٨٠ پەیوەندیێ ب شۆڕشا گولانێ دکەت و ل پێشیێ دگەل شەهید سەعید سپینداری و پاشی دگەل زهێر بامەڕنی دبیتە پێسمەرگە. بۆ دەمێ دوو ساڵا رژێما بەعس دەیکا وی و بابێ وی زیندان دکەن دا کو ئەو بێت خوە رادەستی ڕژێمێ بکەت، لێ ئەو رۆژ بۆ رۆژێ ل سەر خەباتا پێشمەرگاتیێ رژدتر دبیت.
ل نەورۆزا ساڵا ١٩٨١ پشکداریێ د لێدانا بنکە و بارەگایێن ڕژێمێ ل ناحیا مانگێشکێ و فرۆکەخانا بامەڕنێ دا دکەت. د هەمان ساڵ دا پشکداریێ د ددانا چەند بۆسەیەکا دا دکەت ل سەر ڕێیا هێزێن ڕژێمێ ل بانەسۆرا، سواراتووکا و مانگێشکێ و خەستەخانا کۆماری ل ناڤ دهۆکێ. هەروەسا پشکداریێ د لێدانا فەوجا سکرینێ دا دکەت.
ل ٢/٩/١٩٨١ پشکداریێ د شەڕێ مەزنێ چەم باهیڤێ دا دکەت ل نێزیک گوندێ پاسێ. د وی شەڕی دا ڕژێم هەم ب هێزێن پیادە هێرشی وان دکەت و هەم ژی هێزێن خوە ب فڕۆکان بەرددەتە عەردی و وان دۆرپێچ دکەت و ئەو هێزێن دوژمنی بناڤێک دکەڤن شەڕەکی مەزن رووددەت. محەمەد قاسم لگەل 5 هەڤالێن خوە یێن پێشمەرگە بریندار دبن و چوار پێشمەرگێن دی لگەل دوو کەسێن سڤیل شەهید دبن. زیانێن دوژمنی یێن ڤی شەڕی پتر ژ 40 کوشتیا بوون.
محەمەد قاسم بامەڕنی ل سالا 1982 پشکداریێ د لێدانا بارەگایێ رێکخراوا بەعسیا دا دکەت ل بامەڕنێ. دڤی شەڕی دا بەرپرسێ رێکخراوێ تێتە کوشتن و پشتی هینگێ بارەگایێ بەعسیا ئێدی ل بامەرنا سەری نامینیت. پاشی ئەو پشکداریێ د چەکرنا (جیش الشعبی) یێن بامەڕنێ دا دکەت.
هەر ل سالا ١٩٨٢ محەمەد لگەل زهێر مستەفا بامەرنی و قاسم بامەرنی ل گوندێ گولێ ژ لایێ هێزێن ڕژێمێ ڤە تێنە دوورپێچکرن و شەڕەکێ نە بەرامبەر د ناڤ بەرا وان و هێزێن داگیرکەرێن ڕژێمێ دا ڕووددەت. پشتی بەرگریەکا کێم وێنە هەردوو هەڤالێن وی شەهید دبن و ئەو ژی تەرمێ هەڤالێ خوە قاسم بامەرنی بشێوەیەکی سەیر رزگار دکەت و د گەهینیتە گوندێ بابیرێ.
ل ساڵا ١٩٨٣ کاک محەممەد پشکداریێ د لێدانا رەبیێن چیادێرکێ بامەرنێ و رەبیا گرێ تنێ دا دکەت.
محەمەد قاسم بامەڕنی بەروەوامیێ ب بزاڤ چالاکێێن خوە یێن لەشکەری ددەت و ل ساڵا ١٩٨٤ ڕۆلەکێ کارا د بەرسینگگرتنا هێرشیا دوژمنی بۆ سەر لژنا ناوچا دهۆکێ دا دبینیت.
ل ساڵا 1985 رژێما بەعس پشتی دوو سالێن زیندان کرنێ دەیبابێن وی دەرتێخیتە دەڤەرێن رزگار کری و ئەو تێن دگەهنە محەمەدی.
دیسان جارەکادی ل ساڵا ١٩٨٦ پشکداریێ د بەرسینگگرتنا هێرشا رژێمێ بۆ سەر بارەگایێ لژنا ناوچا دهۆک دا دکەت. کاک محەممەد هەر ل سالأ 1986 پشکداریێ د بۆسەیا دەشتا چەقەلا دا دکەت ل سەر رێیا بێگۆڤا-کانیماسێ کو دەنگەکێ زۆر ڤەدا و زیانێن مەزن ل دوژمنی دان.
ئەو ل ساڵا ١٩٨٧ پشکداریێ د بەرسینگگرتنا هێرشێن دەژمنی بۆ سەر گوند و دەڤەرێن ئازاد دا دکەت، ل بەرەیێ سپنەی. هەر وەسا پشکداریێ د هەردوو داستانێن ڕاکرنا فەوجا سۆتکێ و هەردوو فەوجێن بامەڕنێ و تێكشکاندنا هێڕشا هێزا مەلکۆی بۆ سەر گوندێ ئەرەدنا دا دکەت ل ڕۆژا 5/9/1987. پاشی ژی پشکداریەکا کارا د هەردوو داستانێن کانیماسێ و دێرەلوکێ دا دکەت.
محەمەد قاسم د بەردەوامیا چالاکیێن خوە یێن لەشکەری ل دژی هێزێن ڕژێمێ پشکداریێ د لێدانا بۆڕیا ڤەگوهازتنا نەفتا ڕژێمێ بۆ وەڵاتێ تورکیا، بووسا سەر جادا زاخۆ-سێمێلێ دا دکەت.
ل ئەنفالێن ساڵا ١٩٨٨ ئەو لگەل دەیبابێن خوە ئاوارەی وەڵاتێ تورکیا دبیت و هەتا سالا ١٩٩١ ل کەمپا دیاربەکر دمینیت.
پشتی سەرهەلدانێ دزڤریتەڤە کوردستانێ و جارەکا دی دبیتەڤە پێشمەرگە دبیتە فەرماندێ بەتالیۆنێ و پشکداریێ د بەرسینگگرتنا هێرشێن پ ک ک دا دکەت بۆ سەر کوردستانا ئازاد. پشتی هینگێ بۆ گومرکا براهیم خەلیل تێتە ڤەگوهاستن.
ل سالا ٢٠٠٢ بۆ هێزا ژینگەهێ تێتە ڤەگوهازتن و پلا وی دبیتە رائید.
کاک محەمەد پشکداریەکا کارا د شەرێن دژی تیرۆرستێن داعش دا دکەت ل بەرەیێ رۆژئاڤایێ دیجلەی و د شەڤەکا تاری دا کو بۆمبارانا داعشا ل سەر وان دژوار دبیت ئەو ل تانا پێشمەرگێ زێرەڤانێ رەبیێ دچیت، لێ مخابن ئەو د بانێ رەبیەکێ دا دفڕیت و سێ گەهێن پشتا وی دشکێن و دبیتە دەستئێش و دکەڤیتە سەر جها. مخابن پشتی هینگێ جەلتەیەک ژی لێ ددەت و ئێکجار رەوشا وی خراب دکەت، لۆما ئەڤرۆکە ئەو بوویە نەخۆش و پەککەفتی و کەفتیە سەر جها.