مالباته‌کا نانده‌هێن شۆڕش و پێشمه‌رگه‌ی، حه‌کیم بابیری و هه‌ردوو خانمێن وی ناجیا و عاتیا

حەکیم مستەفا رەجەب یێ ناسیار ب حەکیم بابیری

د چارچۆڤێ کار و چاڵاکیێن خوەدا، سەنتەرێ کۆماتە یێ دەکۆمێنتکرنا دیرووکا شۆڕشێ سەرەدانا ئێک ژ دلسۆزێن کوردایه‌تیێ و ناندەھێ ب ناڤ و دەنگێ شۆڕشێ حەکیم بابیری دکەت و ھەڤپەیڤینەکا ڤیدیۆیی دگەل ئەنجامددەت و دیرووکا خەبات و تێکۆشینا وی دناڤ بزاڤا ڕزگاریخوازیا گەلێ کوردستانێ دا تۆماردکەت و ژ ناڤچوونێ دپارێزیت. هه‌ر دیسان سه‌نته‌رێ مه‌ هه‌ڤپه‌یڤینه‌کا کورت لگه‌ل هه‌ردوو خانمێن وی ناجیا و عاتیایێ ژی ئه‌نجامدا، کو ب ساڵان خزمه‌تا پێشمه‌رگا و بریندارێن پێشمه‌رگه‌ی کریه‌.
حەکیم مستەفا رەجەب یێ ناسیار ب حەکیم بابیری ل ساڵا ١٩٤٦ ل گوندێ بابیرێ یێ سەر ب دەڤەرا بامه‌ڕنێ ڤە تێتە سەر دنیایێ، ل دەستپێکا شۆڕشا ئەیلۆلێ گوندێ بابیرێ دکەڤیتە بەر بۆمبەبارا فڕۆکێن ڕژێمێ و د ئەنجامدا ٧ کەس ژ خەلکێ گوندی شەھید دبن و دوو کەسێن دی ژی بریندار دبن، لەوما کاک حەکیم ب مالباتڤه‌، نەچار دبیت گوندێ خوە بھێلیت و ھەتا ڕێکەفتنا ١١ ئاداری ل باژێڕێ مۆسل ئاکنجی ببیت.
پشتی ڕێکەفتنا ١١ ئادارێ ڤەدگەڕیتەڤە گوندێ خوە، پشتی شکەستنا شۆڕشێ ل سەڵا ١٩٧٥ و ل ساڵا 1976 ئه‌و و هه‌ڤژینا خوه‌ عاتیا و برازایێ خوه‌ عبدالخالق ل سه‌رده‌ستێ مسته‌فا مزووری تێنه‌ ڕێکخستن، و ئه‌و دکەڤنە د خزمەتا شۆڕش و پێشمەرگەی دا، نەخاسمە وان پێشمەرگێن دەستپێکی یێن ڕۆڵێ سەرەکی د گەشکرنا چریسکا شۆرشێ دا دیتی، وه‌کی مسته‌فا مزووری، شه‌هید سالح بامه‌رنی، مه‌حمود ئێزدی، عادل مزووری و اسماعیل بامه‌رنی و زهێر بامه‌ڕنی. پشتی ئه‌و هاتینه‌ ڕێکخستن دناڤ ڕێزێن پارتی دیموکراتی کوردستان دا، ئه‌و گەلەک بزاڤ و چاڵاکیان ئه‌نجامدده‌ن، مینا گەھاندن و بەڵاڤکرنا بەڵاڤۆکێن شۆڕشێ د ناڤ جەرگێ دوژمنی دا، ڕێبەریکرنا کادرێن شۆڕشێ و کۆمکرنا پێزانیان ل سەر بزاڤ و لەشکەرکێشێن دوژمنی.
پشتی ل ساڵا 1980 ئه‌و ده‌ڤه‌ر تێته‌ ڕزگارکرن و گوندێ وان دبیته‌ ئێک ژ گوندێن رزگارکری، ئێدی مالا کاک حەکیم مینا بارەگایەکێ شۆڕشێ دبیتە جھێ حەواندن، بخودانکرن و سەخبێرکرنا پێشمەرگەی و بتایبه‌تی پێشمه‌رگێن بریندار.
ژبلی کو مالا کاک حەکێم بابیری بارەگایەکێ بێنڤەدانا پێشمەرگەی بوویە، دھەمان دەم دا ئه‌و وەکو نەخۆشخانەکێ ژی بوو ژبۆ چارەسەرکرنا بریندارێن شۆڕشێ ژی. گەلەک ژ وان برینداران ل ژێر سەخبێری و چارەسەرکرنێ دا، ژ بەر سەختیا برینێن وان ل مالا وی شەھید بووینە و ل گوندێ بابیرێ ھاتینە ڤەشارتن.
کاک حەکیم بابیری، دسەر ڤێ خزمەتێ ھەمیێ ڕا، ناندەھەکێ ب ناڤ و دەنگێ دەڤەرێ بوویە، وی و ھەردوو ھەڤژینێن خوە ب شەڤ و ڕۆژ خزمەتا پێشمەرگەی کریە، گەھشتیە وێ ڕاددێ کو ئێدی بێی مێڤان حەویا وان نایێت، ئەگەر ژ نشکەکێ ڤە شەڤەکێ چ مێڤان بۆ نەھاتبان، دا گەلەک تێکچیت و ل سەر بانێ خوە گازی کەت و بێژیت: ئەرێ ما کەس نینە شێڤێ دگەل مە بخۆت؟.
کاک حەکیم بابیری ل ساڵا 1987 ل لژنا دەڤەرا ئامێدیێ و دبیتە پێشمەرگە و پشکداڕیێ د گەلەک شەڕ و داستانێن شۆڕشا گولانێ دا دکەت و ل سەر خەباتا خوە یا شۆرشگێڕی و خزمەتکرنا پێشمەرگەی ھەتا ساڵا ١٩٨٨ بەردەوام دبیت.
د ئەنفالێن ڕەش دا ئاوارەی کوردستانا باکوور دبیت، لێ کوڕکەکێ وی یێ چلکدار لێ بەرزە دبیت بڕێڤە دھێلیت ھەتا ھەڤالەکێ وی بسەرهەل دبیت و جارەکا دی دگەھینیتێ ڤە. کاک حەکیم بابیری دگەل خێزان و کەس و کارێن خوە ل کەمپا ئامەدێ ھەتا سەرھەلدان ل ساڵا ١٩٩١ ئاکنجی دبن. پشتی سەرھەلدانێ ڤەدگەڕیتەڤە کوردستانێ و دبیتە ڤە پێشمەرگە و پشکداریێ د شەڕێن پاراستنا کوردستانێ دا دکەت.
ل ساڵا ٢٠١٤ هه‌ر ل ده‌ستپێکا هێرشا داعش بۆ سه‌ر کوردستانێ هه‌تا دوماهیێ، ئه‌و ل گەلەک میحوەرا پشکداریێ د شەڕێن ل دژی تیرۆرستان دا دکەت، وەکی مه‌حمودیێ، تلسقوف، سحێلا و وانکێ و گەلەک جھێن دی.
نوکە ژی ب پلا مقەدەم ھاتیە خانەنشینکرن.
ژ ھەژی گۆتنێ یە ئاماژێ ب ڕۆڵێ گرنگێ ھەردوو ھەڤژینێن کاک حەکیم ( ناجیا ئیبراھیم رەجەب) و عاتیا عەلی شەریف) بدین ژ بەر وێ خزمەتا پیرۆزا وان ھەردوو شێرە ژنا ب درێژاھیا شۆڕشا گولانێ پێشکەشی پێشمەرگە و وبریندارێن شۆڕشێ کری، ب ناڤێ سەنتەرێ کۆماتە سوپاسیێن بێ سنۆر ئاراستەی وان ھەردوو شێرە ژن و دایکێن پێشمەرگەی دکەین و خەبات و تێکۆشینا وان د ڕێیا دۆزا گەلێ کوردستانێ دا بلند د نرخینین.