ئەو پێشمەرگێ ڕژێما تورکیا ب برینداری گرتی و ڕادەستی ڕژێما ئیراقێ کری

سەنتەرێ کۆماتە یێ دەکۆمێنتکرنا دیرووکا شۆڕشێ د بەردەوامییا کارێ خوەدا ل ڕێکەفتی٨/٦/٢٠٢٢ ل بارەگایێ خوە مێڤاداریا پێشمەرگێ دێرین خالد چەلکی دکەت و دیدارەکا ڤیدیۆیی یا درێژ دگەل ساز دکەت و دیرووکا خەبات و تێکۆشینا وی تۆمار و ئەڕشیف دکەت.خالد عبدالوەهاب چەلکی یێ ناسیار ب خالد محەمەد سۆفی چەلکی ل ساڵا ١٩٥٧ ل گوندێ چەلکێ دەڤەرا کانیماسێ هاتیە سەر دنیایێ، وخواندنا خوە هەتا پێنجێ سەرتایێ خواندیە، ل ساڵا ١٩٧٤ دگەل محەمەد عەلی بناڤی ل هێزا بێتواتە بوویە پێشمەرگە.ل ساڵا ١٩٧٥ ناڤێ وی بۆ لەشکەریا نەچاری تێت و دبەنە لەشکەرگەهێ غەزلانی ل مۆسل.ل ساڵا ١٩٧٦ ژ لەشکەریا نەچاری دڕەڤیت و قەستا دەڤەرێ دکەت و ل هەیڤا ١٩٧٦⁄٧ دبیتە پێشمەرگە دگەل مستەفا مزووری.پشتی ٧ مەهان لگەل مەفرەزێ دمینیت، پاشی تێتە بیرمانی، پشتی هینگێ ب هەفتیەکێ گەڕەکا دی بۆ دەڤەرا بەرواری بالا ودەڤەرا گولیا دەستپێدکەت، پشتی بەرپرسێ مەفرەزێ ئیسماعیل بامەڕنی نەساخ دبیت لگەل وی ڤەدگەڕیتەڤە بارەگایێ لقێ ل سویلێ ، جەهوەر نامق چەکەکی ددەتێ، ئەو ژی دگەل هەڤالێن خوە ڕیبەریا سەرکردایەتیا شۆڕشی و نێزیکی ٥٠ پێشمەرگان دکەن و وان دبەنە رێونا و نەرمکێ، پاشی دچن سیداڤا، کوڕکا، بلێجانێ و وەرمێلێ.پشتی هینگێ تێن هنداڤ ئەرەدنا و سەرسنکێ و چالاکیەکێ ل دژی ئەمنا سەرسنکێ ئەنجامددەن و زیانێن مەزن یێن گیانی و ماددی دگەهینن ڕژێمێ و بەرپرسێ ئێکەتیا قوتابیێن ئیراقێ ژی کو بەعسیەکێ مەزن بوو دکوژن.پشتی هینگێ دگەل جەهوەر نامق و هێزەکا پێشمەرگەی بەرف دەڤەرا بەرێ گارێ دچن، پشتی ڤێ گەڕێ دگەل جەهوەر و مستەفا مزووری ڤەدگەریتەڤە بێرمانێ. پشتی هینگێ بارەگایەکی ل کۆماتەی (شکەفتا ئەجنا) ئاڤا دکەن و دگەل جەهوەر نامق دمینیت.خالد چەلکی ب درێژیا خەباتا خوە پشکداریێ د گەلەك داستان و شەڕان دا دکەت مینا:لێدانا رەبیا بادوولکێ ل هنداڤی گوندێ تشیشێ، چاندنا گولاکا ئاربیجیێ ل بن کوچکێ بالاڤا سەربازێن ڕژێمێ، بووسا ل ناڤبەرا سەرتەنگێ و دهۆکێ کو تێدا زیانێن مەزن دگەهینن هێزێن ڕژێمێ، لێ ئەحمەد چەلکی د ڤی شەری دا بریندار دبیت.ل ڤەگەڕا خوە بۆ بیرمانێ، ل بنێ ئەلنکی دکەڤن بووسا جاشێن شێخ سەلام، مەحمود یوسف کەرپتی و یوسف ئەحمەد غلبیشی شەهید دبن، پشتی سیخوڕەکێ ڕژێمێ وان دبینیت، خەبەری دگەهینیت ڕژێمێ، د ئەنجامدا ل فڕۆکێن ڕژێمێ د ڕێکا وان دا ل ناڤبەرا میسکا و غولدیا هێزێ بەرددەن خوارێ، لێ بێ زیان دەربازدبن.خالد چەلکی دگەل محۆ گەودا و مستەفا مزووری پشکداریێ د شەڕێ دوستەکا ل دەڤەرا زێبارێ ژی دکەت، د وی شەڕێ دا حەسەن سەبری کێستەیی شەهید دبیت.ل ساڵا ١٩٧٧ پشکداریێ د شەرێ هرۆرێ دا دکەت، هەروەسا ل سالا ١٩٧٨ پشکداریێ د شەرێ بێلمبیرێ دا دکەت، ل ساڵا ١٩٧٩ پشکداریێ د بەرسینگگرتنا هێرشا دوژمنی بۆ سەر بارەگایێ شۆڕشێ ل کۆماتەی دکەت.ل ساڵا ١٩٧٩ لگەل مەفرەزا ئەحمەد چەلکی و محۆ گەودا هەروەسا غازی زێباری دچنت ڕرۆژهەلاتێ کوردستانێ، داکو پشکداریێ د کۆنگرێ نەهێ یێ پارتی دا بکەن.مهەکێ لگەل جەهوەر نامق ل کەوبەری دمینیت، دوبەرەکی پەیدادبیت، لێ خالد چەلکی پشکداریێ د کۆنگرێ دا دکەت و ل مها ١٢/١٩٧٩ ڤەدگەریتەڤە کوردستانێ و لگەل مەفرەزا ئەحمەد چەلکی ل سەر خەباتا خوە یا پێشمەرگاتیێ بەردەوامدبیت.ل بهارا ساڵا ١٩٨١ لگەل شەریف بێقۆلکی هەوڵ ددەن هندەك مینان ل دەوروبەرێن رەبیەکا کەڤن ڕاکەن، دا بکەسێ ڤە نەپەقن، لێ مینەك ددەستێ وان دا دپەقیت و شەریف بێقۆلکی شەهید دبیت، خالد چەلکی ژی ب گرانی ل هەردوو ڕان و لاما خۆ برینداردبیت.خالد چەلکی و عزەت ئاسهی دگەل ئەحمەد بابیری ژبۆ وەرگرتنا چارەسەریێ، هەوڵددەن ب کەملیکێن سەختە د تورکیا ڕا بچن ڕۆژهەلاتێ کوردستانێ، لێ تێن گرتن، ل دەستپێکێ دبەن گەڤەڕی، پاشی دبەن جولەمێرگێ، ژوێرێ ژی دبەن ئەنقەرە، داکو ڕادەستی ڕژێما ئیراقێ نەهێن کرن، دبێژن کو ئەو ئیرانی نە، لێ ئەفسەرێن ئیرانی تینە دەف و ل سەر وان دبن شاهد کو ئەو پێشمەرگێن بارازانی نە، لۆما ڕاستی گەلەك لێدان و ئشکەنجێ تێن، پشتی شەش مها، فرچێ دکەن کلیل و دەرگەهێ زیندانێ پێ ڤەدکەن و ژ زیندانێ دڕەڤن، لێ جارەکا دی تێنەڤەگرتن و وان د دڕیکا نسێنین و سلۆپی ڕا تینن سنوورێ براهیم خەلیل و وان ڕادەستی ڕژێما ئیراقێ دکەن، دوو ئەفسەرێن ئیراقی وان وەردگرن، ئێك ژ وان کوردبوو، ئەوێ کورد گەلەك شەقان ل وان ددەت و وان تینە فرقا زاخۆ، ٦ رۆژان ل فرقێ دمینن و وان گەلەك ئشکەنجە ددەن، پاشی بۆ ئەمنا دهۆکێ دبەن، ل وێرێ ژی ب چاڤێن گرتی ڤە گەلەك ئیشکەنجە ددەن، دوو کەس ل سەرێ وان ددەن، تژی دەڤ و دفنێن وان خوین دکەن، ڤەکۆلینێ دگەل دکەن و جارەکا دی هەر لێددەن، هەتا بێهۆش دبن.ئەمنا ڕژێمێ ڕادەستکرنا کەس و کارێن وان، ئەوێن ل ناڤ شۆڕشێ دکەتە مەرج کو ژ سێدارەدانێ قوڕتالببن، ئەو ژی نەچاردبن خۆ ڕادەستی ڕژێمێ بکەن.خالد چەلکی و عزەت ئاسهی پشتی ٧ هەیڤان تێتە ئازادکرن، لێ ناڤێ خالد بۆ لەشکەریا نەچاری تێت و شەڕێ ئیراق و ئیرانی ژی یێ گەرمە، وی دبەنە بەرەیێ دێزفۆل، ژوێرێ ڤەدگەریێت و جارەکا دی دچیتەڤە ناڤ ڕێزێن شۆڕشێ، ل دەستپێکێ دچیتە بارەگایێ لقێ ل کۆماتەی، ل ساڵا ١٩٨٢ ژبۆ چارەسەریێ دچیتە ڕۆژهەلاتێ کوردستانێ.پشتی ڤەدگەتێیت ل ڕێکخراوا شەهید رۆراب درێژیێ ب خەباتا خوە ددەت.پشتی ئەحمەد چەلکی دبیتە بەرپرسێ ڕێکخراوا شەهید سەعید سپینداری، جارەکا دی ڤەدگەڕیتەڤە دگەل وی و هەتا ساڵا ١٩٨٨ دگەل وێ ڕێکخراوێ دمینیت.ل ساڵا ١٩٨٨ دچیتە شیڤڕەزانی ل باکوورێ کوردستانێ، ل وێرێ دزانیت کو شەش کادرێن پارتی ژ لایێ پەکەکێ ڤە یێن هاتین گرتن، گەلەك تۆڕە دبیت، لێ هۆشداری بۆ وی ژی تێت کو دێ وی ژی گرن، ناچار دبیت ژ وێرێ بچیتە گەڤەڕی، پاشی تێتە راژان، ل وێرێ ژی دچیتە سلێڤانا ل دەف داود بناڤی دمینیت، چیرۆکا گرتنا وان هەر شەش کادران ژ لایێ چەکدارێن پەکەکێ ڤە بۆ داود ڤەدگێڕیت، پشتی هینگێ کاك سیداد بارزانی تێتە دەف وپسیارا وان شەش کادران ژێ دکەت.پشتی دوو هەیڤان ڤەدگەڕیتەڤە باکوورێ کوردستانێ، ل ئەلمینی دمینیت، پشتی هینگێ برێیا محەمەد پیرۆ چەلکی دزانیت کو چەکدارێن پەکەکێ ئەو شەش کادر یێن ڕادەستی ڕژێما ئیراقێ کرین، لێ ڕژێما ئیراقێ جارەکا دی ئەو یێن ڕادەستی وان کرینەڤە و داخواز یا ژێ کری کو ئەو ب خوە وان بکوژن، بڤی ڕەنگی چەکدارێن پەکەکێ ل گۆرەی ڕیکەفتنا خوە و ڕژێما ئیراقێ ئەو هەر شەش کادرێن پارتی شەهیدکرن.خالد چەلکی پشتی سەرهەلدانێ جارەکا دی دگەل ئەحمەد چەلکی دبیتەڤە پێشمەرگە و هەتا سالا ١٩٩٧ دگەل وی دمینیت، پاشی دبیتە کادر ل لژنا ناوچا پەیمان ل کانیماسێ. ل ساڵا ٢٠٠٣ پشکداریێ د شەرێ ئازادیا ئیراقێ دا دکەت.خالد چەلکی پشتی خەباتەکا درێژ، برینداری، زیندانێن هەردوو رژێمێن تورکیا و ئیراقێ، پشتی سەرەدەریەکا هۆڤانە و ئیشکەنجەدانێ، ب پلا کادر یێ هاتیە خانەنشینکرن و هەتا نوکە ژی وەکو کادر ل لژنا ناوچا پەیمان یێ بەردەوامە ل سەر خەباتا خوە