سەید سالحێ زاویتەیی شاهدێ هەردوو شۆرشا و زیندانیێن تاریێن داگیرکەران

سەید سالح زاویتەیی ل سەڵا ١٩٦٢ دبیتە ئەندامێ پارتی و د ھەمان ساڵ دا دبیتە بەرپرسی ڕێکخراوا زاویتە و ھەتا ساڵا ١٩٦٥ بەردەوام دبیت.

پشتی گوندێ زاویتە ژ لایێ ڕژێمێ ڤە تێت سۆتن و کاڤلکرن، دگەل بابێ خوە و عەلیێ برایێ خوە پەیوەندیێ ب شۆڕشا ئەیلۆلێ دکەت و ل ھێزا شێخان-ئاکرێ دبنە پێشمەرگە .

سەید سالح زاویتەی دبیتە جێگرێ سەعدی زاویتەیی، پاشی تێت ڤەگوھازتن بۆ ھێزا دھۆک، و پاشی دگەل سەلیمێ ئەسعەد ل ھێزا ئامێدیێ درێژیێ ب خەباتا خوە یا پێشمەرگاتیێ ددەت.

ل ساڵا ١٩٧٤ دبیتە جێگرێ ئامر فەسیل دگەل سەعدی زاویتەیی و پشکداریێ د شەڕ و داستانێن کێلیا شەدا، چییایێ زاوا و گەلیێ بێسرێ دا دکەت.

پشتی شکەستنا شۆڕشێ و ھەر ل ١٩٧٥⁄٦⁄٢ دگەل ھەڤالێ خوە وەیسی هەدێنەی بڕێکا حەیدەر ساعاتی لژنەیەکا ڕێکخستنا نھێنی ب ناڤێ (شەفەق) دادمەزرینن و دەست ب کارێ ڕێکخستنا نهێنێ دکەن و سەید سالح بەرپرسیاریا ڕێکخراوا زاویتە وەردگریت، پشتی ئاشکرا بوونا ڕێکخستنا وان ل ساڵا 1977 دگەل ١٦ ژ ھەڤالێن خوە تێت گرتن، ل ئەمنا دھۆکێ گەلەک ئەشکەنجێ دبینیت، پاشی دبەنە ھەیئا کەرکۆکێ.

٧٤ کەس تێن حوکم کرن، ھند ب ( سزایێ) سێدارەدانێ و ھند ژی ب یێ ھەتا ھەتایێ و سەید سالح زاویتەیی سەرەڕای کو چ ژی نەدایە دەست دوژمنی، لێ دیسان ب (٦) ساڵان تێت حوکم کرن و تێت ڤەگوھازتن بۆ زیندانا ئەبو غرێب.

ل ساڵا ١٩٧٩ ب بەر ( لێبوورینێ) دکەڤیت، لێ ژ بەرکو برایێ وی عەلی پێشمەرگەیە و بڕیارا گرتنا کەس و کارێن پێشمەرگەیان ژ لایێ ڕژێمێ ڤە ھاتبوو دان، ل ساڵا ١٩٨٠ دگەل مالباتا خوە دچیتە ناڤ ڕێزێن شۆڕشا گولانێ و پاشی قەستا ڕۆژھەلاتێ کوردستانێ دکەن.

ئەو ل باژێرێ ئەسفەهان هەلبەستڤان مستەفا ئەتروشی و هونەرمەند محەمەد شێخۆی دبینیت و بۆ وان بەحسا زیندانێ و سێدارەدانا هەڤالێن خوە مەحمود غلبیشی، شەعبان دێریشکی، ملازم عبدالقادر پێداوی، عابد عبدالله زاویتەیی و تارق جەمیل کزوی دکەت و مستەفا ژی هەلبەستەکێ ب هەر پێنج شەهیدا و کچا دهۆکێ نەجاتا کاکە دنڤێسیت و محەمەد شێخۆ ژی ئێکسەر دکەتە ستران و تۆمار دکەت.

ل ساڵا ١٩٨١ ڤەدگەڕنەڤە باشوورێ کوردستانێ و مالباتا وی ل گوندێ خورپنیێ ئاکنجی دبیت و ئەو ژی ل لژنا ئاکرێ دبیتە کادر، پاشی دبیتە ئەندامێ لژنا چارەسەرکرنا ئاریشەیان ل بارەگایێ لژنا شێخان.

ل ئەنفالان مالباتا وی دکەڤیتە دەستێ ڕژێمێ و دبەنە بەحرکێ، ئەو ژی دچیتەڤە ڕۆژھەلاتێ کوردستانێ..

سەید سالح زاویتەیی ل شۆڕشا گولانێ پشکداری دگەلەل شەڕ و داستانان دا کریە وەکی شەڕێ کانیکا، مرێبا، داستانا سەرێ بابلۆ، شەڕێ غەلبووکێ و داستانا دێرەلووکێ، د سەرھەلدانا پیرۆز ژی دا ڕۆلەکێ مەزن ھەبوویە و پشتی سەرھەلدانێ بوویە ئەندامێ دەزگەھێ ئەیلۆلێ ل دھۆکێ.

گەلەک مخابن پشتی خەباتەکا دویر و درێژ تۆشی نەخۆشیا جەڵتێ بوویە و نوکە خانەنشینە و شانازیێ ب خەباتا خوە دبەت.