حسنی (دارا) شێلازی پێشمه‌رگه‌یه‌کی یاخی

حسنی ئیسلام شێلازی یێ ناسیار ب (دارا)

حسنی (دارا) شێلازی پێشمه‌رگه‌یه‌کی یاخی

سەنتەرێ کۆماتە یێ دەکۆمێنتکرنا دیرووکا شۆڕشێ ل ٣١/٥/٢٠٢٢ ل باره‌گایێ خوە مێڤاداریا پێشمەرگێ دێرین حسنی ئیسلام شێلازی ( دارا) دکەت و دیدارەکا درێژ دگەل ساز دکەت و دیرووکا خەبات تێکۆشێنا وی درێیا دۆزا کوردستانێ دا تۆمار دکەت و دپارێزیت.حسنی ئیسلام شێلازی یێ ناسیار ب (دارا) ل ١/٧/١٩٥٦ ل گوندێ شێلازا دەڤەرا کانی ماسێ هاتیە سەر دنیایێ، ژ بەر کاودانێن شۆڕشێ دەلیڤا خواندنێ بۆ چێنوبوویە.ل ساڵا ١٩٧٧ دگەل کوڕمەتەکێ خوە ل سەرسنکێ ژ لایێ ڕەشەکێن ئەمنا ڕژێمێ ڤە تێنه‌ گرتن و گه‌له‌ک تێنه‌ ئه‌شکه‌نجه‌دان، ژبه‌ر هندێ ئه‌و ل گولانا ١٩٧٧ پەیوەندیێ ب شۆڕشێ دکەت و دبیته‌ پێشمه‌رگه‌.ل ساڵا ١٩٧٨ لگه‌ل مه‌فره‌زه‌یه‌کا پێشمه‌رگه‌ی ئه‌و خه‌سته‌خانا کانیماسێ دشه‌لینن و ده‌رمانێن وێ بۆ شۆڕشێ دبه‌ن.پاشی کاک دارا تێته‌ ڤه‌گوهاستن بۆ مەفرەزا شەهید حەمید حەفزوللا و ئێکەم گەڕا خوە یا پێشمەرگاتیێ دگەل شەهیدێ ناڤهاتی، و جه‌وهه‌ر نامق دگەل ٤٠-٥٠ پێشمەرگان بۆ دەڤەرا بەرواری بالا و بەر خابووری دەستپێدکەت.د وێ گەڕێ دا چالاکیەکێ ل مێرگا تەحینێ ل رۆژهه‌لاتێ گوندێ دهێ ئەنجامددەن و پاشی ڤەدگەرنه‌ گوندێ بێلیزانێ. پشتی هینگێ چالاکیەکا دی ل بامەڕنێ ئەنجامددەن و زیانێن مەزن دگەهیننه‌ ڕژێمێ، پاشی دچن دەڤەرا بەرێ گاره‌ی. ئه‌و ئه‌شکه‌نجا ل ئه‌منا سه‌رسنکێ ل وی هاتیه‌ کرن، هه‌ر ل بیرا وی بوو، لۆما وی ل دویف داخوازا خوە ڕێبەریا لێدانا ئەمنا سەرسنکێ بۆ وێ هێزا ب سه‌رپه‌رشتیا شه‌هید حه‌مید حه‌فزلا دکه‌ت و دارا دگەل شەهید حەمید حەفزوللا و ٧ پێشمەرگا ب ئاڕبی چیێ ل باره‌گایێ ئه‌منا سه‌رسنکێ دده‌ن و هه‌ڤالێن وان ژی ل لیوا له‌شکه‌ری و جهێن دیێن سیخوڕێن ڕژێمێ دده‌ن.دڤێ چاڵاکیێ دا گه‌له‌ک له‌شکه‌ر، ئه‌من و بەرپرسێ ئێکەتیا قوتابیێن ئێراقێ (اتحاد طلبة العراق) کو به‌عسیه‌کێ گرنگ بوو، تێنه‌ کوشتن ترسه‌کا مه‌زن دکه‌ڤیته‌ دلێ داگیرکه‌ران.پشتی ڤێ چالاکیێ هێزا وان ب سه‌رپه‌رشتیا جه‌هه‌ر نامق، ملازم عەلی، شەھید مەحمود ئێزدی، شەھید حەمید حەفزوللا و مراد کێستەیی دچیتە دەڤەرا زێباریا. وان دڤیا ل گوندێ بەرکچکێ ل دەڤەرا شێخان چالاکیەکێ ئەنجامبدەن دژی عه‌ره‌بێن کو ئیناینه‌ سه‌ر گوندێن کوردان، لێ مخابن حەمید حەفزولا بده‌ستێ وان عه‌ره‌با تێته‌ شەھید کرن و که‌سه‌ک لگه‌ل هێزا وان خوه‌ ڕاده‌ستی ڕژێمێ دکه‌ت ته‌رمێ شه‌هید حه‌میدی نیشا وان دده‌ت.پشتی شەھیدبوونا حەمید حەفزوللای، ئێدی دارا دگەل جه‌وهه‌ر نامق دمینیت و گەڕا خوە دبەنە دەڤەرا نھێلیا، پاشی دچنە بارەگایێ مستەفا نێروەیی ل چالمەندا، پاشی دچن بارەگایێ عەریف یاسین ل چەم توی، ژ وێرێ دچن بارەگایێ ھەرێما دوو ل ھەرک و بێداڤا، پشتی ھینگێ دچن بارەگایێ شەھید سامی عەبدولرەحمان ل گه‌لیێ گوستەی.کاک حسنی شێلازی (دارا) ل دوماھیا ساڵا ١٩٧٨ دچیتە دگەل مەفرەزا حەمید خواستی، و دگەل وێ مەفرەزێ دچیتە دەڤەرا سیدەکا و ل وێرێ تووشی نەخۆشیا مەلاریا دبیت.ل ساڵا 1979 ژ بۆ ئاماده‌کاریێن کۆنگرا نه‌هێ یا پارتی، ئه‌و دگەل جه‌وهه‌ر نامق و ھەژمارەکا پێشمەرگەی دچینە ڕۆژھەلاتێ کوردستانێ، ئه‌و ئێکسه‌ر دچنە سەر گۆڕا بارزانیێ نەمر ل گۆڕستنا شنۆ و پاشی جه‌وهه‌ر نامق ژ بۆ به‌هیا بارزانیێ نه‌مر و سەر خوەەشیا خوە بۆ جەنابێ سەرۆک مەسعود بارزانی و شەھید ئیدریس دچیتە کەرەج. دڤی ده‌می دا حسنی شێلازی (دارا) ژی دچیتە دگەل مەفرەزا مراد کێستەیی.ل ده‌مێ گرێدانا کۆنگره‌ی حسنی شێلازی ژی وەکو پێشمەرگەکێ دەستپێکا شۆرشا گولانێ پشکداریێ دکەت و ل ڕۆژا دوماھیا کۆنگرێ سەرۆک مەسعود بارزانی وی د ھنێریتە دویف سامی عەبدولرەحمان ڕا.حسنی شێلازی پشتی بدوماھی ھاتنا کۆنگرێ سێ جارا دگەل سامی عەبدولرەحمان دچیتە تەھران، ل وێرێ سامی سەرەدانا بالیوزخانا فەلستینێ، باره‌گایێن فیدائی خەلق و پارتیا تۆدە دکەت. حسنی ژ سامی عەبدولرەحمان دپیرسیت کا دێ چ کەن؟ ئەو ژی دبێژیتێ کو ئەو دێ سیاسەتا خوە ژ مالا بارزان جوداکەن.پشتی جه‌وهه‌ر نامق دچیتە وەڵاتێ سوید، حسنی شێلازی دگەل ھەژمارەکا ھەڤالێن خوە یێن پێشمەرگە ل شنو و نەغەدە دمینیت.ل وی ده‌می شه‌ڕێ ناڤبه‌را حزبا دیمۆکراتا کوردستانا ئیرانێ و ڕژێما ئیرانێ دەستپێدکەت، حسنی شێلازی و زھێر بامەڕنی لگه‌ل چه‌ند هه‌ڤاله‌کێن خوه‌ دچنه‌ دگه‌ل هێزێن حزبا دیموکراتا کوردستانا ئیرانێ (حدکا) و لگه‌ل وان شه‌ڕی ل دژی پاسدارێن ئیرانێ دکه‌ن. پاشی دچنه‌ مھابادێ ده‌ف د. قاسملۆی و ھەتا پایزێ ل وێرێ دمینن.پاشی سەرۆک مەسعود بارزانی ئەحمەد چەلکی دھنێریتە د دویف وان ڕا، زهێر و هه‌ڤالێن خوه‌ دزڤڕنه‌ڤه‌ ناڤ پارتی لێ حسنی (دارا) دمینیت.پشتی سامی عەبدولرەحمان دچیتە دەرڤە، حسنی پەیوەندیێ پێ دکەت، سامی دبێژیتێ: خوە بۆ خەباتەکا نوی بەرھەڤکەن و دبێژیتێ کو جه‌وهه‌ر نامق ژی دگەل مەیە. لێ پشتی حسنی پەیوەندیێ ب جه‌وهه‌ر نامق ل سوید دکەت جه‌وهه‌ر دبێژیتێ کو نه‌ڕاسته‌ و ئه‌و دگەل چ حزبا نینە.پشتی ڤان هه‌می ڕوودانان حسنی دچیته‌ ده‌ڤه‌را ناڤزەنگێ ل سه‌ر سنوورێ باشوور-رۆژهه‌لات و پەیوەندیێ ب پارتیا کۆمۆنیستا ئیراقێ دکەت. حسنی شێلازی قۆماغەکا نوی یا خەباتا خوە دگەل پارتیا ناڤبری دەستپیدکەت و بۆ دوو ساڵان ئەو دگەل ھندەک ھەڤالێن خوە ب ئەرکێ ئینانا چەکی ژ سوریێ تێنه‌ ڕاسپاردن. پشتی ھینگێ پشکداریێ دگەلەک چالاکیێن لەشەکەری ل دژی ڕژێمێ دا دکەت، وەکی شەڕێن بامەڕنێ، چاندنا تی ئێن تی ل پێشیا دوو ئیڤایێن لەشکەری، شەڕێ ئاشاوا، بەرسینگگرتنا ھێرشا ل سەر دەڤەرا شێخان، شەرێ گەلیێ ئاڤۆکێ و سپیندار و گەلەک شەڕێن دی.هه‌رچه‌نده‌ پارتیا کۆمۆنیست وه‌ک پارتیه‌کا ئینته‌رناشونال دهاته‌ دیتن، لێ حسنی دبێژیت مه‌ دناڤ ڤێ پارتیێ دا ھەست ب دەمارگیریا عەرەبی ھەمبەر کوردا دکر. دیسان ئه‌و دبێژیت کو پشکداریا ژنێ دناڤ پێشمه‌رگێ پارتیا کۆمۆنیست بتنێ ڕۆکەشی بوو و نەپتر.پشتی ئەنفالان ئه‌و دوو ساڵا ل کەمپا مێردینێ دمینیت. پاشی ل ساڵا ١٩٩٠ بڕێکا دەرھێنەر ئیبراھیم سەلمان زاویتەیی دگەھیتە ھۆڵەندا. پشتی ھێرشا داعش ل ساڵا ٢٠١٤ بۆ سەر کوردستانێ ھەڤژین و زاڕۆکێن خوە ل ھۆڵەندا دھێلیت و تێتە کوردستانی، ل دھۆکێ تڤەنگەکێ دکڕیت و پەیوەندیێ ب زێرەڤان نێروەیی دکەت و دچیتە دۆغاتا و پشکداریێ د شەڕێ بەڕەڤانیکرنا ئاخا کوردستانێ دا دکەت و پشکداریێ د ئازادکرنا تلسقوف و سەھلیجێ دا دکەت.ئه‌و نوکه‌ لگه‌ل مال و زارۆکێن خوه‌ ل هۆله‌ندا دژیت.