سەنتەرێ کۆماتە یێ دەکۆمێنتکرنا دیرووکا شۆڕشێ ل ڕۆژا ٢٠٢٢⁄٥⁄٢٧ ل بارەگایێ خوە مێڤانداریا پێشمەرکێ دێرین سلێمان تۆڤی دکەت و ھەڤپەیڤینەکا ڤیدیۆیی یا درێژ دگەل سازدکەت و دیرووکا خەبات و تێکۆشینا وی تۆماردکەت و ژناڤچوونێ دپارێزیت.
سلێمان ئیبراھیم حسێن یێ ناسیار ب سلێمان تۆڤی، ل ساڵا ١٩٥٧ ل گوندێ گرکا دەڤەرا بەراری باڵا هاتیە سەر دونیایێ، تا سیێ ناڤنجی ل باژێرێ زاخۆ خاندیە. ل ١٩٧٦⁄١٠⁄١٤ ژ سەربازیا نەچاری درەڤیت و خوە دگەهینیتە ناڤ ڕێزێن شۆڕشێ، لێ ل گوندێ ئارۆشێ ل ده‌ڤه‌را قه‌شووریان ژ لایێ جەندورمێن تورك ڤە دهێتە گرتن و ل زیندانا چەلێ دھێتە زیندانکرن. پاشی پشتی مه‌هه‌کێ شییا بھاریکاریا ماجد بەگێ چەلی ژ زیندانێ بڕەڤیت و پشتی گەلەك ئاستەنگ و نەخۆشیان دبینیت ئه‌و جارەکا دی خوە دگەھینیتە ناڤ ڕێزێن شۆڕشێ. ل دەستپێکێ دبیته پێشمه‌رگه لگەل مه‌فره‌زا شەھید حەجی قادۆی و پاشی تێته ڤه‌گوهاستن دگەل مەفرەزا مستەفا مزووری. ل مەھا ئێک ساڵا ١٩٧٧، ئێکەم گەڕا خوە یا پێشمەرگاتیێ دگەل مستەفا مزووری تینیتە دەڤەرە بەرواری بالا. ل گوندێ خرابەی ھێزێن ڕژێمێ دەوروبەرێن وان دگرن و شەر و پێکدادان دناڤ بەرا ھێزێن ڕژێمێ و پێشمەرگەی دا روی ددەت و دئەنجامدا پێشمەرگە سەعید ره‌شید قه‌دشی برینداردبیت. پشتی ڤی شەری مه‌فره‌زا وان دگەل مەفرەزا شەھید محۆ گەودا بۆسەکێ ل پێشیا ھێزێن ڕژێمێ ل سەر جادا بێگۆڤا-کانیماسێ ل نێزیکی گوندێ بریفکا ددانن و دربه‌کێ باش ل دوژمنی دده‌ن.
پشتی هینگێ دگەل مستەفا مزووری گەڕەکا دی دبەنە دەڤەرا بەرێ گاره‌ی. ل پایزا سالا ١٩٧٧ ژبۆ پەیداکرنا چەکی ب ڕێیا ڕێکخستنێن نھێنی گەڕەکێ بۆ دەڤەرا سندیان دبەت. ل ساڵا 1978 دھێتە ڤەگوھازتن بۆ مەفرەزا مەلا رەمەزان قومری ( بھەشتی) و دبیتە کادرێ مه‌فره‌زا ناڤبری.
ل ١٩٧٩⁄٥⁄٢٤ پشکداریێ د بەرسینگگرتنا ھێرشا ڕژێمێ بۆ سەر بارەگایێ هه‌رێما ئێک ل کۆماتەی دا دکەت. پشتی ھینگێ ل گوندێ سەرەڕۆ ڕاستی شەرەکێ دی لگەل ھێزێن ڕژێمێ تێن. پاشی دچیتە ڕۆژھەڵاتێ کوردستانێ وپشکداریێ د کۆنگرا ٩ یا پارتی دا دکەت.
سلێمان تۆڤی ل ساڵا ١٩٨٠ پشتی ڕێکخراوا تێن دامەزرەندن دبیتە کادرێ ڕێکخراوا شۆڕش یا لەشکەری ب سەرپەرشتیا مه‌لا ره‌مه‌زان قومری (بهەشتی) و ھەتا ساڵا ١٩٨٢ ل لژنا دەڤەرا ئامێدیێ دمینت، ھەتا وی دەمی پشکداریێ د لێدانا رەبیێن سەرێ ئامێدیێ، ڕەبیێن ھنداف گرکا و بریفکا دا دکەت.
ل مه‌ھا ٣ێ ساڵا ١٩٨٢ ئەو ڕێکخراو ب پێشمەرگە، کادر و بەرپرسڤە دهێتە ڤەگوهاستن بۆ لژنا دەڤەرا شێخان، ل وێ دەڤەرێ ژی پشکداریێ دگەلەک شەر و چالاکیێن لەشکەری دا دەکەت، مینا شەرێ دەکان، خەنس و شرتێ.
ل ساڵا 1984 شەھید بھەشتی دبیتە بەرپرسێ لژنا ناوچە شێخان، پشکداریێ د شەڕێ مەزنێ بەراشێ دا دکەت.
ل ١٩٨٥⁄١٢⁄٢٦ جارەکا دی ڕێکخراوا شۆڕش ب پێشمەرگە و کادر و بەرپرسڤە بۆ لژنا ناوچا زاخۆ تێته ڤەگوھازتن.
کاک سلێمان لگه‌ل ڕێکخراوا خوه ل پاییزا ساڵا ١٩٨٧ پشکداریێ د شەڕێ داستانا شەرانشێ دا دکەت، د وی شەری دا پێشمەرگەیه‌ک شەھید دبیت و هنده‌ک ژی بریندار دبن، لێ ھێزێن پێشمەرگەی پتر ژ ١٠٠ چەکێن سڤک وەکو دەستکەفتی ڕادکەن.
ل هه‌مان ساڵ دگەل ڕێکخراوا شۆڕش بۆ لژنا دھۆکێ تێتە ڤەگۆھازتن و ل میحوەرێ بۆتیا درێژیێ ب خەباتا خوە ددەت، پشتی ھینگێ دگەل ڕێکخراوا شۆڕش ل ھەمان ساڵ دهێتە ڤەگوهاستن ڤە بۆ لژنا دەڤەرا ئامێدیێ کو وی دەمی شەهید وەسفی سەلمان بێدوهی بەرپرسێ وێ ڕێکخراوێ بوو.
سلێمان تۆڤی دگەل ڤێ ڕێکخراوێ بەشداریێ د چەندین داستانان دکەت مینا داستانا کانی ماسێ و شەڕێن بەرگریێ یێن پشتی داستانا کانی ماسێ، کو د وی شه‌ڕی دا و ل رۆژا 18/9/1987 به‌رپرسێ ڕێکخراوا وان وه‌سفی سه‌لمان بێدهی ل ناڤبه‌را گوندێن گرکا و بریفکا دا، د شه‌ڕه‌کی گران دا شه‌هید دبیت..
کاک سلێمان ل ساڵا ١٩٨٨ دھێتە ڤەگوھازتن بۆ لژنا تەخمینێ و پاشی بۆ لژنا کڕیاریا ئازۆقەی بۆ شۆڕشێ.
پشتی ئەنفالێن ڕەشێن دەڤەرا بەهدینان، سلێمان خوە دگەهینتە کەمپا مێردینێ ل ترکیا و لوێرێ تا ساڵا ١٩٩٢دمینیت. پشتی سەرهەلدانێ ڤەدگەریتە کوردستانێ و جارەکا دی دەست ب کار و خەباتا خوە د ناڤ ڕێزێن پێشمەرگەیێ کوردستانێ دا دکەت و ل لیوا یا٤٢ یا پێشمەرگەی دبیته ئه‌فسه‌ر. پاشی دهێتە ڤەگوهاستن بۆ فەوجا تایبەت یا نەجمەدین کێستەیی ل دەڤەرا کانی ماسێ و هەتا ساڵا ١٩٩٦ ل وێرێ دمینیت. سلێمان تۆڤی جارەکا دی وەک کادر پارتی دەست بکارێ ڕیکخستنێ د ناڤ رێزێن پارتی دیموکراتی کوردستان دا ل بەشێ دیڤچوونێ ل لژنا دەڤەرا زاخۆ و پاشی ل بەشێ پەیوەندیان. پاشی تێته ڤه‌گوهاستن بۆ لژنا ناوچا خابوور وەکو بەرپرسێ بەشێ کۆمەڵایەتی ل لژنا ناوچا ناڤبری. ل ساڵا ٢٠٠١ دبیتە ئەندامێ لژنا ناوچا پەیمان و ل ساڵا ٢٠١٠ دهێتە ڤەگوهازتن بۆ لژنا ناوچا هیزل و پاشی دبیتە ئەندامێ لژنا ناوچا سەرهەلدان ل زاخۆ و ل ساڵا ٢٠١٣ دبیتە کارگێرێ لژنا ناوچا ٢٦ی گولانێ هەر ل زاخۆ.
ل ساڵا ٢٠٢٢ تێتە ڤەگوھازتن بۆ لژنا ناوچا گولان و دبیتە کارگێڕێ وێ لژنێ و ھەتا نوکە ئه‌و یێ بەردەوامە دکار و خزمه‌تێ دا.
کاک سلێمان تۆڤی هه‌ر ژ ساڵا 1976 و هه‌تا ئه‌ڤرۆکه، وه‌ک پێشمه‌رگه و کادره‌کی دلسۆز و پێگیر، بێ ڕاوه‌ستان و لادان یێ به‌رده‌وامه د خه‌باتێ دا ژ بۆ دۆزا کوردستانێ.
سه‌نته‌رێ کۆماته
یێ دێکومهنت کرنا دیرووکا شۆڕشێ
کار و ئهرکێ سه‌نته‌رێ کۆماته دێکۆمێنت کرن و پاراستنا دیرووکا شوڕشێ یه ژ مرن و ژناڤچوونێ.
ڤی سهنتهری ب ستافهکێ بچووک و شیانێن ساده، لێ ب ڤیان و باوهریهکا مهزن، وه‌ک پێنگاڤا خوه یا کاری یا ئێکێ، دهست ب کۆمکرن، دێکۆمنێت کرن و تۆمارکرنا دیرووکا خهبات و شۆڕشا کوردستانێ کریه.
