شه‌ریف بۆسه‌لی ئێک ژ پێشمه‌رگێن ده‌ستپێکا هه‌ردوو شۆڕشێن ئه‌یلول و گولانێ
ل گۆره‌ی پرۆگرامێ سه‌نته‌رێ کۆماته یێ تۆمارکرن و ئه‌رشیفکرنا دیرووکا شۆڕشێ، ستافێ سه‌نته‌ری گه‌هه‌شته خزمه‌تا پێشمه‌رگێ دێرین و ئێک ژ پێشمه‌رگێن ده‌ستپێکێ یێن هه‌ردوو شۆرشێن ئه‌یلول و گولانێ مام شه‌ریف بۆسه‌لی و د دیداره‌کا درێژ دا دیرووک و سه‌رهاتیێن ویێن خه‌بات و پێشمه‌رگاتیێ تۆمارکرن دا کو ژناڤچوونێ بێنه پاراستن.
شەریف ئەحمەد رەشید بۆسەڵی ل ساڵا ١٩٤٢ ێ ل گوندێ ئەڤلھێ یێ سەرب دەڤەرداریا زاخۆ ھاتیە سەر دنیایێ و ل ساڵا ١٩٥٩ ل مۆسل ب ڕێکا عەلی ھالۆ و مەڵا تاھایێ بۆسەلی دناڤ ڕێزێن پارتی دیموکراتی کوردستان دا ھاتیە ڕێکخستن و گەلەک چالاکی دناڤ باژێڕی مۆسل دا ئەنجامداینە.
ل ساڵا ١٩٦١ دگەل جەمیل رەشیدێ خه‌لکێ رۆژاڤایێ کوردستانێ، یێ بەرنیاس ب (سەیدا) دبیتە پێشمەرگە وبەری ھەلبوونا چریسکا شۆڕشا ئەیلولێ پشکداریێ د چەندین چالاکیێن لەشکەری دا دکەت، وەکی داستانا ئازادکرنا باژێڕێ زاخۆ و دیلکرنا قائیمقام و حاکمی و ھەمی کاربدەستێن دی یێن میری ل وێرێ.
دگەل ھاتنا بارزانێێ نەمر بۆ ده‌ڤه‌را بەهدینان، پەیوەندیێ ب ھێزێن بارزانیێ نەمر دکەت و درێژیێ ب خەباتا خوە یا پێشمەرگایەتیێ ددەت و پشکداریێ د شەرێن مەخفەرێن شەرانش و باتیفادا و شەرێ گەرماڤۆکێ دا دکەت.
ل سەڵا ١٩٦٢ دگەل شەهید عیسێ سوار ل دەڤەرا زاخۆ ل بەتالیونا عەلی ھالۆی درێژیێ ب خەباتا خوە ددەت، وەکی پێشمەرگەکێ چەلەنگ و خۆڕاگر پشکداریەکا کارا د شەرێن بەڕەڤانیێ دا دکەت ل دەڤەرێ، نەخاسمە شەرێ گەلیێ زاخۆ ئەوێ زیانێن مەزن گەھاندینە دوژمنی.
پشتی پەیمانا ١١ ئادارا ١٩٧٠ تێته ڤه‌گوهاستن بۆ ھێزا ھەلگورد ل دەڤەرا بالەکایەتی و ل وێرێ دبیتە فه‌رماندێ سریێ. پاشی ل ساڵا ١٩٧٤ ڤەدگەڕیتەڤە هێزا زاخۆ.
پشتی شکەستنا ساڵا 1975 ئەو دگەل ١٤ بنەمالێن خزم و کەس و کارێن خوە ئاوارەی گوندێن سەر توخیبێن باکوور و باشوورێ کوردستانێ دبن و ل ژێر فشارا دوژمنان، ژیانەکا گەلەک ب زەحمەت دەرباز دکەن.
شەریف بۆسەڵی، ژ بۆ کو لگه‌ل هه‌ڤالێن خوه چریسکا شۆڕشێ گەش بکەتەڤە و خەون و خەیالێن دوژمنان بنگۆڕبکه‌ن، جارەکا دی ل ساڵا ١٩٧٦ چەکێ شەرەف وکەرامەتێ ھەلدگریت و دبیتە ئێک ژ فه‌رماندێن مەفرەزێن دستپێکی یێن شۆڕشا گولانێ و قەھرەمانانە بەرگریێ ژ ئاخا پیرۆزا کوردستانێ دکەت و لگەل هەڤالێن خوە چەندین کریارێن لەشکەری ل دژی دوژمنێ داگیرکەر ل دەڤەرێن جودا جودا یێن کوردستانێ ئەنجامددەت، وەکی شەرێ کۆچێن مەرینا و شەڕی برجینی یێ کو شەهید دەهام هروری تێدا شەهید بووی.
مام شەریف ل ساڵا ١٩٧٩ پشکداری د کونگرا نەھێ یا پارتی دا دکەت و پاشی ل ساڵا ١٩٨٠ ئه‌و مالێن خوه ژ باکوورێ کوردستانێ ڤه‌دگوهێزنه رۆژهه‌لاتێ کوردستانێ و ل بارەگایێ مەکتەبا سیاسی یا پارتی ل ڕاژان درێژیێ ب ئەرکێ خوەیێ پێشمەرگاتیێ ددەت و پشکداریێ د داستانا بناڤودەنگا خواکوڕکی دا دکەت و ڕۆڵەکێ مەزن ژی دگێڕیت.
ئه‌و ل ساڵا ١٩٩١ ڤەدگەریتە ڤە کوردستەنا باشوور و پشکداریێ دسەرھەلدانا پیرۆز دا دکەت.
پشتی ژییەکێ دویر ودرێژێ خەبات و پێشمەرگاتیێ و پشتی دیرووکەکا پڕشەنگدار بۆ خوە و مللەتێ خوە تۆمارکری و ئەرکێ خوە یێ نەتەوەی و نیشتمانی جیبجی کرین نوکە ژی ب پلا کۆڵۆنێل ( مقدم) ھاتیە خانەنیشینکرن و ل دهۆکێ دژیت.
