سادق ئورەیی گەلەک روودانێن بالکێشێن نە بهیستی ئاشکرا دکەت
سەنتەرێ کۆماتە یێ دەکۆمێتکرنا دیرووکا شۆڕشێ د بەردەوامیا ھەڤدیتنێن خوەدا دگەل قەھرەمان و شۆڕەشگێڕێن گەلێ مە، ڤێ جارێ دبیتە مێڤانێ پێشمەرگێ دێرین (سادق ئورەیی سادق ئامین یونس) ئۆرەیی و ھەڤدیتنەکا ڤیدیۆیی یا چەند دەمژمێری دگەل ئەنجامددەت و دیرووکا خەباتا وی مینا دەکۆمێنتەکا گرانبھا ئەڕشێف دکەت و دپارێزیت.
کاک سادق ئورەیی ل ساڵا ١٩٥٦ ل گوندێ ئۆرە ل دەڤەرا بەرواری بالا دھێتە سەر دنیایێ، وھەر ل وێرێ دەست ب قوتابخانێ دکەت.
ل ساڵا ١٩٧٦ ل گوندێ ئۆرە دکەڤیتە بەر ھەوا ڕاگوھازتن و وێرانکرنێ، مالا مام سادق ژی دگەل خەلکێ گوندێ ئۆرە ب زۆری دھنێرنە گوندێ تنێ، ل نێزیکی فڕۆکەخانا بامەڕنێ و دخانیێ (بومیدیەن) دا ئاکنجی دبیت؟!
کا دا بزانین چیرۆکا بومدەینی چیە. بومیدیەن سەردەمێ شۆڕشا ئایلولێ بەرپرسێ بەعسیێن چەپ یێن ڕکابەرێن ڕژێما عێراقێ بوو، ل ساڵا ١٩٧٤ دڕەڤیت و خۆ دگەھینیتە بارەگایێ ئەسعەد خۆشەفی ل بامەڕنێ، ئەسعەد ژی پێشمەرگەکی کو خەلکێ دەڤەرا گۆییانە دگەل کوڕێن وی ب پاراستنا وی ڕادسپێریت، لێ ڕژێم گەلەک ھەوڵ ددەت ب ھەر ئاوایەکی بومیدیەنی ژ ناڤ ببەت، لەوما پەیوەندیێ ب سیخورەکێ خوە ل دەڤەرێ دکەت و پارەکێ مەزن دگەل دبێژیت بەرامبەر کوشتن یان ڕەڤاندن و ڕادەستکرنا وی بۆ ڕژێمێ، سیخورێ ڕژێمێ کو کەسایەتیەکێ بەرنیاسێ دەڤەرێ یە ب ڕیا ھندەک کەسان ھەوڵ ددەت کوڕەکێ وی پێشمەرگەیێ ب پاراستنا وی بەڕپرس ڕازی بکەت، لێ کوڕێ وی یێ بچیک ڤێ چەندێ قەبۆل ناکەت و ل ڕۆژا ژڤانێ وان ژبۆ ئەنجامدانا وێ کریارێ، تەقە دناڤبەرا وان و پێشمەرگەی دا ڕویددەت، دئەنجامدا ھندەک زەلامێن ھەڤکارێ ڕژێمێ دڕەڤن و ھندەکێن دی ژی ژ لایێ پێشمەرگەی ڤە تێن گرتن و ھەتا شکەستنا شۆڕشێ ژی دزیندانێ دا دمینن.
پشتی شکەستنا شۆڕشێ بومدیەن خوە دگەھینیتە سوریێ و ل وێرێ ڕۆلێ ھەماھەنگیێ د ناڤبەرا ھێزێن ئوپۆزسیۆنێن عێراقی، یێن کورد و عەرەب دبینیت و ب ڕێکا حکومەتا سوریێ چەک و ھاریکاریان بۆ وان ھێزان دابین دکەت.
شکەستنا شۆڕشا ئەیلۆلێ کاریگەریەکا مەزن ل سادق ئۆرەیی دکەت و ھەر چەندە گەلەک یێ گەنج بوو لێ کەتوارێ شکەستن و ڕادەستکرنێ قەبۆل ناکەت، لەوما ل ١٩٧٧⁄٥⁄٢٤ ئەو دگەل عزەت سەعید پەیوەندیێ ب شۆڕشا گولانێ دکەن ، ل دەستپێکێ دچینە دەف سەعید ھەدێنەیی، ژی وان دھنێریتە بارەگایێ ئەحمەد شانەی ل بلێمبیرێ. ل ١٩٧٨⁄٥⁄٢٥ سادق ئورەیی و عزەت سەعید دچنە بێلمبیرێ، لێ ژ بەرکو خێزانا کاک عزەتی یا دگەل بوو، مام سادق نەچار دبیت بتنێ بچیت، ل وێرێ ئەحمەد شانەی و حەجی قادۆی کو بارەگایێ وی ل گۆڤکێ بوو. د ھەمان ڕۆژدا دھێتە ھنارتن بۆ مالا محمەد عەبدی ل گوندێ زاویتە، هەتا دگەهیتە وێرێ دزانیت کۆ پشتی ھاتنا وان ژ بێلمبیرێ ھێزەکا مەزن یا دوژمنی ب ڕێکا ٩ ھەلیکۆپتەران یا ل دەوروبەرێن بارەگایێ پێشمەرگەی لەشکەرێ دانای و ژ ھەمی ڕەخا ڤە ھێرشی پێشمەرگەی کریە و د ئەنجام دا ١٤ پێشمەرگە شەھید بووینە و لەشێن چاران ژ وان ژی دکەتینە دەستێن دوژمنی.
مام سادق ھەتا دەستپێکا سالا ١٩٧٨ ل گوندێن سەر سنۆریێن باکوور و باشوورێ کوردستانێ ب ئەڕکێ خوە یێ پێشمەرگاتیێ ڕادبیت، و پشتی ھێزا پێشمەرگەی دھێتە ڕێکخستن و مەفرەزێن بچویک دھێنە دامەزراندن، دگەل مەفرازا ئەحمەد ئۆرەیی پشکداریێ دچەندین شەڕ و داستانێن شۆڕشا گولانێ دا دکەت.
مام سادق دبێژێت مەفرەزێن دەستپێکی یێن شۆڕشا گولانێ پێک دھاتن
ژ مەفرەزێن، محۆ گەودا، محەمەد خالد بۆسەلی، ئەحمەد ئۆرەیی، مەحمود قەدشێ، عەلی دەشتانی و عەلی ئەبابەکر.
پاشی ئەو لگەل هندەک پێشمەرگا ل تانا شەهید عەلی عبیداللە تێن کو رژێما ئیراقێ دڤیا بگرن. سادق و هەڤالێن خۆ وی ب مال ڤە دبەنە ناڤ شۆڕشێ و دگەل وی درێژیێ ب خەباتا خوا یا پێشمەرگاتیێ ددەت و چەندین جاران دگەل شەھید عەلی عبیداللەی دھێتە دەڤەرا بەرواریا ژ بۆ خورتکرنا پەیوەندیان دگەل وان ڕێخستنێن دەستپێکی ئەوێن ژ لایێ شەھید عەلی ڤە ھاتینە دامەزراندن، پاشی دگەل کاک ئازاد بەرواری درێژیێ ب خەباتا خوە ددەت.
مام سادق وەکو پشکدار و شاھد حالەکێ شەڕێ ھەکاریێ دبێژێت:
پارتی و سەرکردایەتیا دەمکی ھیچ پڵانەکا شەڕکرنێ ل دژی ھێزێن ئێکەتیا نیشتمان نەبوو، سەرەڕای وێ لێکتێگەھشتنەک دناڤبەرا سەرکردایەتیا ھەردوو لایەیان دا هەبوو، لێ مخابن ھەر پشتی وێ لێکتێگەھشتنێ ھێزەکا پارتی ب سەرپەرشتیا عبداللە سالح ل گۆستەی ژ لایێ دکتۆر خالد ڤە دھێتە ژ چەککرن، ئێکەتیا نیشتمانی ژ بلی رەتکرنا خەباتا ھەڤبەش. ھاتنا ھێزەکا ٨٠٠ کەسی ژی بۆ ناڤ جەرگێ گوڕەپانا خەباتا مە، مەترسیەکا مەزن ل سەر ھەبوونا مە وەکو پارتی و شۆڕشا گەلێ کورد ھەبوو، پشتی نامەکا مام جەلال ژی دکەڤیتە دەستێ سەرکردایەتیا کاتی کو بۆ هەڤالێن خوە یێن (DDK) ل باکوورێ کوردستانێ ھنارتبوو و ب زەڵاڵی بەحسێ پڵانا ژ ناڤبرنا پارتی ل دەڤەرا سۆران تێدا کربوو و بۆ ھەمان مەبەست ئەو ھێز ژی ھنارتبوو دەڤەرا بەھدینان و ھەکاریێ دا ل وێرێ ژی پێشمەرگێ پارتی نەهێلن. ژ بۆ دیرووکێ ژی دبێژم کو ئێکەم تەقە ژی ھەر وان دەستپێکر و سەر ئەنجام شەڕەکێ خویناوی د ناڤبەرا ھەردوو ئالیان دا ڕویددەت و زیانێن مەزن ب بزاڤا ڕزگاریخوازیا گەلێ کورد دکەڤن.
مام سادق دبێژیت:
ژ بلی کوشتی و برینداران ھەژمارەکا مەزن یا ھێزێن ئێکەتیێ ھاتن ئێخسیرکرن، ژوان عەلی عەسکەری، دکتۆر خالد، حسێن بابە شێخ، سەید کاکە و قادر ئاغا پشدەری و حسێن. لێ ھەر زوی سەید کاکە، وقادر ئاغا و دھێنە ئازادکرن و چەکێ وان ژی جارەکا دی ددەنەڤێ ڤە.
مام سادق پشتی شەڕێ ھەکاریێ دگەل زەعیم عەلی درێژیێ بخەباتا خوە ددەت.
پشتی کۆنگرێ نەھێ دکتۆر جەرجیس حەسەن دبیتە بەڕپرسێ لقێ ئێک، مام سادق ل مەھا ١٠ سالا ١٩٨٠ دگەل دکتۆر جەڕجیس و سەید سالح و ھێزەکا مەزن یا کو پێک دھات ژ ھەر ئێک ژ شەھید شەعبان غەفار، خالد بانی، خالد شلی، سەید نایف، مستەڤا مزوری، ئەمین نسری، ئەحمەد ئۆرەیی، شەعبان عومەر و حەجی بناڤی، دەست ب گەڕەکێ بۆ دەڤەرا شێخان دکەن، ل سەر ڕێکا خوە ھێرشی سەنگەرێن دوژمنی ل تروانش و مەلختە دکەن و زیانێن مەزن دگەھیننێ، پاشی، ل کانیا بەستێ ل پشت گوندێ خرابەی فرۆکێن ڕژێمێ وێ ھێزێ بومبەباران دکەن و سەفەر ئۆرمانی شەھید دبێت و کەریم زاخۆیێ ژی بریندار دبیت. پاشی ئەڤ هێزا پێشمەرگەی چەکدارێن رژێمێ یێ بناڤێ (جیش الشعبی) ل هندەک گوندێن دەڤەرا شێخان ژ چەک دکەت. دیسان مام سادق لگەل ڤێ هێزێ پشکداریێ دشەڕێن بلمباسا، شکەفتێ، بێبۆزیێ، کەلا شخۆ، بابیرێ، گەلیێ بازێ و تنێ دا دکەت و پاشی ل لژنا ناوچا ئامێدیێ درێژیێ ب خەباتا خۆ ددەت ھەتا دڤەرا بەھدینان دکەڤیتە بەر ئەنفالان و پاشی ل کەمپا مێردینێ پتر ژ سێ ساڵان دبیتە پەنابەر.
پشتێ سەرھەلدانێ ڤەدگەریتە کوردستانێ و دبیتە جێگرێ ڕێکخراوێ دگەل حەجی بناڤی، پاشی ل ناوچا سێمێلێ دبێت ئامر بەتالیون، پاشی دبیتە ئامر سری ل فەوجا ١٤ ل زاخۆ و ئامێدیێ، و پشکداریێ د شەڕێن پاراستنا کوردستانێ دا دکەت ل هەمبەر هێرشێن PKK’ê. ژ ساڵا ١٩٩٧ وەرە ئامر فەوجێ پاراستنا بارەگایێ لقێ ئێکە و ھەتا نوکە ب پلا عەقید بەردەوامە ل سەر خەباتا خوە و ل سێمێلێ دژیت.
