شوکری نێروەیی

شوکری نێروەیی

ژ 1961 تا نوکە بێ ناڤبر پێشمەرگەیە. ئێک ژ گرنگترین دەکۆمەنتێن دیرووکێ ل دەف ویە

د بەردەوامیا تۆمارکرن و ئەرشیفکرنا دیرووکا قارەمانێن کوردستانێ دا سەنتەرێ کۆماتە رۆژا ئێکشەمبێ 13.2.2022 مێڤانێ کادر و پێشمەرگێ هەردوو شۆرشا کاک شوکری نێروەیی بوو. مە هەڤپەیڤینەکا نێزیکی 6 دەمژمێرا درێژ لگەل ڕێزداری ئەنجامدا ل سەر ژیان و کاروانێ درێژێ خەباتا ڤی خەباتکەری.

شوکری سالح تەمەر سالا 1945 ل گوندێ بێبو یێ سەر ب دەڤەرا نێروە هاتیە دنیایێ و هەر ل وێرێ خاندنا سەرەتایی تا پۆلا پێنجێ خاندیە، ساڵا 1956 مالا وان دچیتە مۆسل و ل وێرێ درێژیێ ب خاندنا خوە ددەت، ل ساڵا 1960 ل باژێرێ مۆسل ل سەر دەستێ شەهید سالح یوسڤی دبیتە ئەندامێ ڕێکخستنا پارتی و د هەمان ساڵ دا مالا وان ڤەدگەریتەڤە بێبو. کاک شوکری خاندنا خوە یا ناڤنجی ل ئامێدیێ ب دوماهی دئینیت.

ل 9 ئەیلولا ساڵا 1961 تەقە د ناڤبەرا شۆڕشگێڕێن کورد و هێزێن ڕژێمێ دا ل ئامێدیێ دەستپێدکەت، کاك شوکری ژی پەیوەندیێ ب هێزێن پێشمەرگێ کوردستانێ دکەت. دەمێ بارزانیێ نەمر دگەهەتە دەڤەرا بەهدینان کاک شوکری لگەل هێزەکێ بەردەوام لگەل بارزانی بوونە. پشتی دەڤەرا بەهدینان تێتە کۆنترۆڵ کرن ئەو لگەل هێزەکێ ل ساڵا 1962 دگەل بارزانیێ نەمر بەرەڤ دەڤەرا بالەکایەتی ڤە دچن، پاشی هەتا دەڤەرا خانەقینێ ژی هێزا وان دچیت.

کاک شوکری رەوشا دانوستاندنێن ناڤبەرا شۆڕشێ و حکومەتا ئیراقێ ب دەلیڤە دزانیت و خواندنا ئامادەیی دبەر ئەرکێ پێشمەرگاتیێ ڕا ل ساڵا 1964 ل قەلادزێ ب دوماهی دئینیت و ئەزمۆنێن وەزاری ژی ل سلێمانیێ دکەت.

ل ساڵا 1969 ل ئیدارا مەکتەبا سیاسی یا پارتی درێژیێ ب خەباتا خوە ددەت و ل سەر دەمێ دانوستاندنێن ڕژێما عێراقێ ب سەرۆکاتیا سەدامێ گۆڕبەگۆڕ لگەل بزاڤا ڕزگاریخوازیا گەلێ کورد ب ڕێبەریا بارزانیێ نەمر، کاک شوکری کۆنووسێن کۆمبوون و دانوستاندنێن هەر دوو شاندێن دانوستاندکار ب دەستێن خوە ب ئامیرێ چاپێ (طابعه) دنڤێسیت. هەروەسا ئەو ب ئەرکێ نڤێسینا پڕۆژێ پەیمانا 11 ئادارا سالا 1970 ژی رادبیت، ئەو ژی وی پرۆژەی هەمیێ ب ئامیرێ چاپێ دنڤێسیت و هەتا نوکە ژی کۆپیەکا وی پرۆژێ دەستنڤیسا وی یا چاپی ل دەف وی پاراستی مایە.

دەمێ شکەستنا شۆڕشا ئەیلولێ کاک شوکری وی ئامیرێ چاپێ یێ وی پەیمانا 11 ئادارا 1970 پێ نڤێسی و بارزانیێ نەمر و سەدامی ل سەر ئیمزاکری، وەک یادگاریەکا دیرووکی دهەلگریت و ڕادەستی کوردەکێ باکوورێ کوردستانێ ل گوندەکێ سنووری دکەت و ل دەف وی دمینیت هەتا سەرهەلدانا پیرۆز، پشتی سەرھەلدانێ ئەو کوردێ باکوور جارەکا دی وی دەزگەهی ڤەدگەڕینیتەڤە کوردستانا باشوور و رادەستی کاک شوکری دکەت و نوکە ژی ل مۆزەخانا بارزان پاراستیە.

کاك شوکری ل ساڵا 1972 د هێتە ڤەگوهازتن بۆ بارەگایێ بارزانی و پشتی شکەستنا شۆڕشێ د چیتە ئیرانێ و ل ساڵا 1976 دبیتە پەنابەر ل هۆڵەندا و ساڵا 1977 ل سەر داخازا سەرۆک بارزانی برێیا سوریێ ڤەدگەڕیتەڤە کوردستانێ و درێژیێ ب خەباتا خوە ددەت و ل ساڵا 1979 پشکداریێ د کۆنگرا نەهێ یا پارتی دا دکەت.

ل ساڵا 1979 تا 1983 د بیتە سکرتێرێ جەنابێ سەرۆک بارزانی.

ل ساڵا 1984–1985 دبیت کارگێڕێ لقێ 4 و بەرپرسێ بەشێ لەشکەری.

ل سالا 1986 دهێتە ڤەگوهازتن وەکو کارگێڕێ لقێ 1 سەرپەرشتیا داستانا ب ناڤودەنگا دێرەلۆکێ دکەت. پشتی ئەنفالێن ڕەش بۆ دەمەکێ کێم دچیتە ڕۆژهەلاتێ کوردستانێ و جارەکا دی ل ساڵا 1989 ڤەدگەڕیتەڤە کوردستانا باشوور د کاودانێن گەلەك سەخت و دژواردا درێژیێ ب خەباتا خوە ددەت. ل سەردەمێ سەرهەلدانا پیرۆز بەرپرسیاریا میحوەری ئامێدیێ وەردگریت و ل ساڵا 1992 دبیتە بەرپرسێ لژنا ناوچا ئامێدیێ و دهەمان سالدا دهێتە ڤەگوهازتن بۆ لقێ ئێك وەکو کارگێڕ لق و بەرپرسێ بەشێ لەشکەری، ل ساڵا 1993 تا ساڵا 1998 بەرپرسیاریا پەیوەندیێن لقێ ئێك وەردگریت.

ل ساڵا 2000 – 2005 دبیتە بەرپرسێ رێکخستنا پێشمەرگەی و ئەندامێ ف.ل.ك .

ل ساڵا 2005 دهێتە هەلبژارتن وەکو ئەندامێ پەرلەمانێ کوردستانێ و ل ساڵا 2009 دهێتە خانەنشین.

ژ هەژی گۆتنێ یە کو کاک شوکری شیایە د وان هەموو رەوشێن سەخت دا گەلەک دەکۆمەنتێن دیرووکیێن گرنگ ل دەف خوە بپارێزێت. نوکە ژی ئەو ل دهۆکێ دژیت.