سەنتەرێ کۆماتە بوو مێڤانێ پێشمەرگێ دێرین شەریف بۆسەڵی

سەنتەرێ کۆماتە یێ دەکۆمێنتکرنا دیرووکا شۆڕشێ ل ڕۆژا سێ شەمبی ڕێکەفتی ٢٠٢٢⁄١⁄١٨ سەرەدانا پێشمەرگێ دیرینێ ھەردوو شۆڕشێن ئەیلول و گولانێ شەریف ئەحمەد رەشید بۆسەلی کر و ھەڤدیتنەک ل سەر دیرووکا دویر و درێژا خەباتا وی لگەل ئەنجامدا.

شەریف ئەحمەد

رەشید بۆسەڵی ل ساڵا ١٩٤٢ ێ ل گوندێ ئەڤلھێ یێ سەرب دەڤەرداریا زاخۆ ڤە ژ دایکبوویە و ل ساڵا ١٩٥٩ ل مویسل ب ڕێکا عەلی ھالۆ و مەڵا تاھایێ بۆسەلی ھاتیە ڕێکخستن دناڤ ڕێزێن پارتی دیموکراتی کوردستان دا و گەلەک چاڵاکی دناڤ باژێڕی مویسل دا ئەنجام داینە.

ل ساڵا ١٩٦١ دگەل جەمیل رەشید یێ بەرنیاس ب (سەیدا) دبیتە پێشمەرگە وبەری ھەلبوونا چریسکا شۆڕشا ئەیلولێ بەشداری د چەندین چالاکیێن لەشکەری دا دکەت، وەکی داستانا ئازادکرنا باژێڕێ زاخۆ و ئێخسیرکرنا قائیمقام و حاکمی و ھەمی کاربدەستێن دی یێن میری ل وێرێ.

دگەل ھاتنا بارزانێێ نەمر بۆ بەهدینان، پەیوەندیێ ب ھێزێن بارزانیێ نەمر دکەت و درێژیێ ب خەباتا خوە یا پێشمەرگایەتیێ ددەت و پشکداریێ د شەرێن مەخفەرێن شەرانش و باتیفادا دکەت، ھەروەسا پشکداریێ د شەرێ گەرماڤۆکێ دا دکەت.

ل سەڵا ١٩٦٢ دگەل شەهید عیسێ سوار ل دەڤەرا زاخۆ ل بەتالیونا عەلی ھالۆی درێژیێ ب خەباتا خوە ددەت، وەکی پێشمەرگەکێ چەلەنگ و خۆڕاگر بەشداریەکا کارا د شەڕێن بەڕەڤانیێ دا ل دەڤەرێ دکەت، نەخاسمە شەرێ گەلیێ زاخۆ ئەوێ زیانێن مەزن گەھاندینە دوژمنی.

پشتی پەیمانا ١١ ئادارا ١٩٧٠ پەیوەندیێ ب ڕەشید سندی دکەت و دبیتە ئامر سریە ل ھێزا ھەلگورد ل دەڤەرا بالەکایەتی.

ل ساڵا ١٩٧٤ ڤەدگەڕێتەڤە دەف شەهید عیسێ سوار ل زاخۆ و وەکو پێشمەرگەکێ دلسۆز و وەفادارێ کورد و کوردستانێ ئەرکێن خوە یێن نیشتیمانی و نەتەویی جی بجی دئینیت.

پشتی شکەستنا ساڵا 1975 ئەو دگەل ١٤ بنەمالێن خزم و کەس و کارێن خوە ئاوارەی گوندێن سەر توخیبێن باکوور و باشوورێ کوردستانێ دبن و ل ژێر فشارا دوژمنان، ژیانەکا گەلەک ب زەحمەت دەرباز دکەن.

شەریف بۆسەڵی، ژ بۆ چریسکا شۆڕشێ گەش بکەتەڤە و خەون و خەیالێن دوژمنان بن گۆڕببن، جارەکا دی ل ساڵا ١٩٧٦ چەکێ شەرەف وکەرامەتێ ھەلدگریت و دبیتە ئێک ژ ئامر مەفرەزبن دستپێکی یێن شۆڕشا گولانێ و قەھرەمانانە بەرگریێ ل ئاخا پیرۆزا کوردستانێ دکەت و لگەل هەڤالێن خوە چەندین کریارێن لەشکەری ل دژی دوژمنێ داگیرکەر ل دەڤەرێن جودا جودا یێن کوردستانێ ئەنجام ددەت، وەکی شەرێ کۆچێن مەرینا و شەڕی برجینی یێ کو شەهید دەهان هروری تێدا شەهید بووی.

مام شەریف وەکو پێشمەرگە و فەرماندەکێ دەستپێکا شۆڕشا گولانێ ل ساڵا ١٩٧٩ پشکداری د کونگرا نەھێ یا پارتی دا دکەت

ل ساڵا ١٩٨٠ ئاوارەی ڕۆژھەلاتێ کوردستانێ دبیت و ل باژێڕکێ نەغەدە ئاکنجی دبیت، لێ ل بارەگایێ مەکتەبا سیاسی یا پارتی ل ڕاژان درێژیێ ب ئەرکێ خوەیێ پێشمەرگاتیێ ددەت و پشکداریێ د داستانا ب ناڤ و دەنگا خواکوڕکی دا دکەت و ڕۆڵەکێ مەزن ژی دگێڕیت.

ل ساڵا ١٩٩١ ڤەدگەریتە ڤە کوردستەنا باشوور و پشکداریێ دسەرھەلدانا پیرۆز دا دکەت.

پشتی ژییەکێ دویر ودرێژێ خەبات و پێشمەرگاتیێ و پشتی دیرووکەکا پڕشەنگدار بۆ خوە و مللەتێ خوە تۆمارکری و ئەرکێ خوە یێ نەتەوەی و نیشتمانی جی بجی کرین نوکە ژی ب پلا کۆڵۆنێل ( مقدم) ھاتیە خانەنیشینکرن.

ئەم ژی وەکۆ سەنتەرێ کۆماتە یێ دەکۆمێنتکرنا دیرووکا شۆڕشێ د ڤێ ھەڤدیتنێ دا شییاین ئاشنای ڤێ دیرووکا خەباتا وی ببین و ھەمیێ تۆمار بکەین و ژ مرن و ژناڤچوونێ بپارێزین.