ڕۆژا دوو شەمبێ 10.1.2022 ستافێ سەنتەرێ کۆماتە مێڤانێ کادرێ دێرین جەمال قەدشی بوو، ژبۆ تۆمارکرن و ئەرشیفکرنا ژیان و خەباتا ڤی خەباتکەری.
جەمال قەدشی ل ناڤەڕاستا ساڵێن شێستان ل موسل دبیتە ئەندامێ پارتی و ل ساڵا ١972 پەیوەندیێ ب شۆڕشێ دکەت و ل ھێزا شێخان دبیتە پێشمەرگە تا ساڵا ١٩٧٥.
ل ساڵا ١٩٧٦ دناڤ ئێکەمین تۆڕا ڕێکخستنێن نھێنی یێن پارتی دا دبیتە ئەندام و ل ھەمان ساڵ ژ لایێ ڕژێمێ ڤە دھێتە گرتن و پشتی ئەشگەنجەدانەکا مەزن، ب شەش ساڵان دھێت حوکمکرن.
ل ساڵا ١٩٧٩ ب ( لێبوورینێ) تێتە ئازادکرن و پشتی دوو بۆ سێ مەهان ل ھەمان ساڵ پەیوەندیێ ب شۆڕشا گولانێ دکەت و دبیتە کادر ل سنورێ لژنا ناوچا ئامێدیێ و پاشی دھێتە ڤەگوھازتن بۆ بارەگایێ لقێ١ و ل وێرێ دبیتە ئەندامێ لژنا ڤەکۆلینێ و پاشی دبیتە کارگێڕێ لژنا ناوچا گوڵانێ ھەتا ساڵا ١٩٨٨.
ل ئەنفالان گەلەک ئێش و دەردەسەریان دبینیت، ئەو و خێزانا خۆ ژێک ڤەدقەتیێن، خێزانا وی دکەڤیتە دەستێ ڕژێمێ، ئەو کوڕێ خوەیێ ١٤ سالی ژی د چۆل و چیان ڕا بێ خارن و ڤەخارن ئاسێ دبن، پشتی لێبوورینەکێ و بڕێکەکا گەلەک ب زەحمەت و برسی و دەربەدەری دھێت کەلھا نزارکێ و ل وێرێ ب دیتنا مال و زاڕۆکێن خوە شاد دبیت، لێ ڕژێم وان دبەتە بەحرکێ و ل وێرێ دمینن ھەتا سەرھەلدانێ.
پشتی سەرھەلدانێ ل ساڵا ١٩٩١ ڤەدگەڕیتە دەڤەرێ و دبیتە بەرپرسێ نڤێسینگەھا پارتی ل قەدشێ و پشتی دامەزراندنا حکۆمەتا ھەرێما کوردستانێ ل ئاسایشێ تێتە دامەزراندن’ لێ مخابن بەری چەند سالەکا ب مۆچەیەکێ (٣٠٠) ھزاری تێتە خانەنشینکرن و نوکە ژی ل کۆمەڵگەھا قەدشێ دژیت و ب ئێش و ئازارێن نەخۆشیا پەنجەشێرێ دوماھی ویستگەھێن ژیانا خوە دبوورینیت.
