ستافێ سەنتەرێ کۆماتە ل مێڤانداریا تێکۆشەرێ دێڕین جەمیل سپینداری

دوهی رۆژا دوو شەمبێ 10.1.2022 ستافێ سەنتەرێ کۆماتە ژ بۆ تۆمارکرن و ئەرشیفکرنا ژیان و خەباتا پێشمەرگێ دێرین، شەهیدێ زیندی جەمیل سپینداری ل قەدشێ مێڤانێ ڤی خەباتکەری بوو.

پێشمەرگێ دێرین جەمیل سپینداری د شەڕگەھا بھارا ژیێ خوەدا پەیوەندیێ ب شۆڕشا مەزنا ئەیلولێ دکەت، ھەر ژ سالا ١٩٦١ و ھەتا ساڵا ١٩٧٥ دبیتە پێشمەرگە و ب زکەکێ تێر و دەھێن برسی ل ھەمی چیا و دۆل و نەوالێن کوردستانێ مل ب ملێ برایێن خوە یێن پێشمەرگە ژ بۆ ئازادیا وەڵاتێ خوە مافێن گەلێ تێدکۆشیت و دڤێ ڕیێ دا دوو جاران ئاخا کوردستانێ ب خوینا برینێن خوە ئاڤ ددەت.

ل ساڵا ١٩٧٦ گوندێ وی ژ لایێ ڕژێمێ ڤە دھێتە وێرانکرن و ل گوندێ زێوکا ئاکنجی دبیت، پاشی گوندێ زێوکا ژی ل ساڵا ١٩٧٨ دکەڤیتە بەر ھەوا وێرانکرنێ، نەچار دبیت ل گوندێ کانێ بمینیت، لێ کەلا شۆڕش و ژیانا پێشمەرگاتیێ جارەکا دی ل سەری ددەت، لەوما ب ئێک جاری ژ باشوورێ کوردستانێ باردکەت، زاڕۆک و دایبابێن خوە ل باکوورێ کوردستانێ ئاکنجی دکەت و ئەو ژی ل ساڵا ١٩٧٨ دبیتەڤە پێشمەرگە و بەردەوام دبیت تا دبیتە جێگرێ بەڕپرسێ ڕێکخرەوا شەھید عبدولرەحمان حەمدی و پشکداریێ د گەلەک شەراندا دکەت، مینا شەڕێ سەرێ ئامێدیێ ل ساڵا ١٩٨٤ شەڕێ سگێرێ ل ساڵا ١٩٨٥ وھەردوو داستانێن مەزنێن کانیماسێ و دێرەلوکێ.

ل ئەنفالێن ڕەش دوو زارۆکێن خوە ل دھۆکێ دھێلیت و ئەو، دایک، باب و زاڕۆکێن خوە ژی ئاوارەی ترکیا دبن و ل چادرگەھا موشێ ئاکنجی دبیت.

پشتی سەرھەلدانێ جارەکا دی دبێتەڤە پێشمەرگە و ل کۆمەڵگەھا قەدشێ ئاکنجی دبیت.

ل ساڵا ١٩٩٥ دەمێ PKK ھێرشی کوردستانێ دکەت، مام جەمیل ل قەدشێ بەرەڤانیێ ژ مال و ئاخا خوە دکەت، لێ مخابن ئەو بدژواری بریندار دبیت و چاڤەکێ خوە ژدەستددەت، مخابن بەری چەند ھەیڤەکا بیناھیا چاڤێ دی ژی ژ دەست دایە.

ئەڤ قەھرەمانێ ھەمی ژیێ خۆ گۆری کورد و کوردستانێ کری، ئەڤرۆ د کوژیکەکێ خانیێ خۆ ڤە ل کۆمەلگەھا قەدشێ و دکاودانەکێ سەخت و دژواردا دوماھی ڕۆژێن ژیانا خوە دەرباز دکەت بێی کو سیناهیەکێ ببینیت و چاڤێن خوە ب دیتنا کوردستانا کو وی ژیێ خوە گۆری کری، شاد بکەت.