ئه‌نوه‌ر ئێکماله‌ی شـــه‌هـــیدێ زیندیێ بێخودان و په‌ریشان
سەنتەرێ کۆماتە یێ دەکۆمێنتکرنا دیرووکا شۆڕشێ، د بەردەوامیا بزاڤ و چالاکیێن خوە دا، ل رێکەفتی 8/3/2025 سەرەدانا پێشمەرگێ دێرین و شەهیدێ زیندی ئەنوەر عبدالقادر محمد ئێکمالەیی دکەت و هەڤدیتنەکا ڤیدیۆیی دگەل وی ئەنجامددەت و دیرووکا خەباتا وی مینا بەلگەنامەیەکا دیرووکی تۆماردکەت و ژ ناڤچوونێ دپارێزیت.
ئەنوەر عبدالقادر محمد ئێکمالەیی یێ ناسیار ب ئەنوەر ئێکمالەیی ل ساڵا 1957 ل گوندێ ئێکامالێ یێ سەر ب دەڤەرا کانیماسێ ڤە هاتیە سەر دنیایێ. ئەو ل ساڵا 1963 ل گوندێ هێسێ دەست ب قوتابخانێ دکەت و هەتا پۆلا شەشێ سەرەتایی دخوینیت.
ئەنوەر وه‌کی هه‌ر گه‌نجه‌کێ خه‌لکێ گوندان مژیلی کارێ چاندن و خودانکرنا ته‌رش و که‌والی بوویه. دگەل دەستپێکرنا شۆڕشا گولانێ و هاتنا کادرێن شۆڕشێ بۆ گوندێ ئێکمالێ ل ساڵا 1976، ئەنوەر دبیتە ئیك ژ وان کەسێن ل دەستپێکێ دەست ب کارێ خەباتا رێکخستنا نهێنی دکەن.
پاشی ل هه‌مان ساڵێ ناڤێ وی بۆ لەشکەریا نەچاری دهێت. ئەو چەند مه‌هەکا دچیتە لەشکەریا نەچاری و پشتی هینگێ ڤەدگەریتە ڤە گوندێ خوە.
دەستپێکا کاروانێ خەباتێ
پشتی کو ئه‌ندامێن ڕێکخستنێن نهێنی زێده دبن، ئێدی ڕێکخراو ژی زێده دبن. دڤی ده‌می دا رەمەزان عبدالقادرێ برایێ ئەنوەری سەرپەرشتیا دوو رێکخراوێن نهێنی یێن پارتی ل دەڤەرا بەرواری باڵا و ده‌ڤه‌را سپنەی دکەت. ئەنوەر ژی برێکا رەمەزانێ برایێ خوە، د بیته ئێک ژ ئه‌ندامێن رێکخراوا مەتین ل دەڤەرا بەرواری باڵا و دەست ب بزاڤ و چالاکیان ل دژی رژێما ئیراقێ دکەت. گرنگترین بزاڤ و چالاکیێن ئەنوەر دکەت، رێبەری و پاراستنا مەفرەزەیێن پێشمەرگەی بوو، دابینکرنا خوارن و دەرمانا و گەهاندنا پێزانینان و پرۆپاگندە و بەڵاڤکرنا بەڵاڤۆکێن شۆڕشێ بوو.
ژ خەباتا نهێنی بۆ خەباتا چەکداری
ئەشق و ئەڤینا ئەنوەری بۆ کوردستانێ و شوڕشێ گەلەکا زێدە بوو، هەرچەندە ئەو ژ مالباتەکا کوردپەروەر و ناندەهـ و دەست فرەهـ بوو، لێ کەلا دلێ وی ب خەباتا رێکخستنا نهێنی ناشکێت، لۆما ئەو ل ساڵا 1979 بریارێ ددەت کو ببیتە پێشمەرگە و دەست ب خەباتا چەکداری بکەت.
ئەنوەر لگەل عەبدولخالق گوهەرزی دچیتە کۆماتەی و پشتی ئەو وەکو پێشمەرگە دهێتە وەرگرتن، دچیتە دگەل مەفرەزەیا شه‌هید حەمدی بەگێ شێلازی. دەڤەرا بەرواری باڵا، وەڵاتێ شخۆیێ، دەڤەرا بەرێ گاره‌ی و سپنەی دبنە سنوورێ بزاڤ و چالاکیێن مەفەرەزەیا وان.
ئێکەمین چالاکیا لەشکەری
ل ساڵا 1980 دکتۆر جەرگیس به‌رپرسێ لقا ئێک و هەژمارەکا فەرماندەیێن لەشکەری و دگەل هێزەکا مەزنا پێشمەرگەی، دەست ب گەڕەکێ بۆ دەڤەرا بەرواری باڵا، بەرێ گارەی و دەڤەرا شێخان دکەن. مەفرەزەیا حەمدی بەگێ ژی ل دەڤەرا بەرواری باڵا پەیوەندیێ ب وێ هێزێ دکەت و دگەل وان دەربازی دەڤەرا بەرێ گارەی و شێخان دبن. ئەو هێز هەژمارەکا چالاکیان ل دەڤەرێن چه‌مانکێ و ئه‌ترووشێ ئەنجامددەن. وه‌کی لێدانا باره‌گایێ فه‌وجا له‌شکه‌رێ دوژمنی ل شکه‌فتێ و گرتنا بنگه‌هه‌کی دوژمنی، کو پشتی هینگێ دوژمنی ئه‌و ده‌ڤه‌ر به‌ردا و ده‌ڤه‌ر ئازاد بوو، ژ چه‌ککرنا چه‌کدارێن حکومه‌تا ئیراقێ ل نسرا و ڕه‌به‌تکێ و گرتنا باره‌گایێ له‌شکه‌رێ دوژمنی یێ بێبۆزیێ. ئه‌نوه‌ر ژی دگه‌ل هه‌ڤالێن خوه پشکداریێ دڤان هه‌موو چالاکیان دا دکه‌ت. د چالاکیا شکه‌فتێ دا هه‌ڤالێ وان شکری حه‌جی شێلازی شه‌هید دبیت و حه‌مدی به‌گ ژی بریندار دبیت.
پشتی ڤەگەڕیانا وێ هێزێ بۆ دەڤەرا بەرواری بالا، هێزێن دوژمنی بنکە و بارەگایێن خوە ل وەڵاتێ شخۆێ چوولدکەن. شەهید شەعبان غەفار لگەل هێزەکا پێشمەرگەی، کو ئەنوەر ئێکمالەیی ژی ئێك ژ وان بوو، ژ بۆ ڕاکرنا مینان ل دەردۆرا وان بنکە و بارەگایان، دچنە گوندێ کانی بەڵاڤێ.
د وی دەمی دا مەفرەزەیا شه‌هید تاهر زێوەیی یا ل گوندێ کەلا شخۆ، سەلمانێ سۆسێ، کو خەلکێ گوندێ تویلەرێیە و شۆفێرێ تەکسیێ یە ، ئەو ژ گەلیێ دهێ دچیتە کانی بەڵاڤێ، ئەو برێڤە 5 تۆمبێلێن زیلێن له‌شکه‌رێ دوژمنی دبینیت، کو یێ بەرەف کانی بەلاڤێ ڤە دچن. ئه‌و هەر زوی خەبەری دگەهینیته هێزێن پێشمەرگەی ل کانی بەڵاڤێ. ده‌مێ هێزا دوژمنی دگه‌هیته نێزیکی گوندێ کەلا شخۆ دبیتە شەڕ و پێکدانان د ناڤبەرا وان و هێزێن پێشمەرگەی دا.
شەهید شەعبان غەفار هەر زووی هەژمارەکا پێشمەرگا دهنێریت پێشیا وێ هێزێ و ئەو ب خوە ژی دگەل هندەك پیشمەرگێن دی د پشتا جادێ ڕا دچیت و خوه دگه‌هینیته هنداڤی هێزا دوژمنی. جهێ هێزێن دوژمنی یێ بلند و سترایژییە و ل سەر هێزێن پیشمەرگەی د زاڵن، لێ ب گەهشتنا شەهید شەعبان غەفاری و هه‌ڤالێن وی، بەلەنسا هێزێ دهێتە گهۆڕین. ئێدی شه‌ڕه‌کی دژوار ده‌ستپێدکه‌ت و پڕانیا هێزا دوژمنی ژناڤ دچیت، ته‌نێ چه‌ند سه‌ربازه‌ک خوه دگه‌هیننه کوخکه‌کی و به‌ڕه‌ڤانیێ دکه‌ن.
ژ ئالیێ بێگۆڤا بۆ بابیرێ ژی هێزێن دوژمنی دەست ب هێرشێ دکەن، لێ هێزەکا پێشمەرگەی ل ژێر سەرپەرشتیا سەید نایف بۆسەیەکا مکوم ل پێشیا هێزا دوژمنی ددانن و وێ هێزێ دشکێنن و هێزا دوژمنی به‌ره‌ڤ پاشڤه دڕه‌ڤیت.
هێزێن پێشمەرگەی د وێ چالاکیێ دا دربەکێ کوژەك ل هێزێن دوژمنی ددەن و چەک و تەقەمەنیەکێ مەزن ژی وەکو دەستکەفت ڕادکەن، لێ مخابن هه‌ردوو پێشمەرگە موسا ئه‌لکیشکی و ڕه‌مه‌زان بامه‌ڕنی شەهیددبن و هەژمارەك ژی برینداردبن. هه‌لبه‌ت ئه‌نوه‌ر دگه‌ل هه‌ڤالێن خوه پشکداریێ دڤێ چالاکیێ دا دکه‌ت.
ل ساڵا 1981 پشتی بۆ ده‌مه‌کی عبدالسلام به‌رواری دبیته سه‌رپه‌رشتێ لقا ئێک، ئه‌و هێزێن پێشمه‌رگه‌ی ڕێکدئێخیت و وان دکه‌ته ڕێکخراو. هێزا کو ئه‌نوه‌ر لگه‌ل ئه‌و ژی دبیته ڕێکخراوا شه‌هید ئه‌نوه‌ر مایی و شه‌هید شه‌عبان غه‌فار دبیته به‌رپرسێ وێ. هه‌ر ل ساڵا 1981 ده‌مێ هێرشا جاش و له‌شکه‌رێن دوژمنی بۆ سه‌ر ده‌ڤه‌را به‌رواری باڵا و چیایێ مه‌تینا ده‌ستپێکری، ئه‌نوه‌ر دگه‌ل هه‌ڤالێن خوه ب سه‌رپه‌رشتیا شه‌هید شه‌عبان غه‌فار، ل ئاسته‌نگا گوندێ شێلازا هێرشێ دکه‌نه سه‌ر جاشێن ئیستخباراتێ و ژماره‌یه‌کێ ژێ دکوژن و چه‌نده‌کا ژی بریندار دکه‌ن، کو جاشا ته‌رمێن کوشتیێن خوه ل مه‌یدانێ هێلابوون و ڕه‌ڤی بوون. دیسان ل ڕۆژا 1/8/1981 ئه‌نوه‌ر پشکداریێ دگرتنا بنگه‌هێ دوژمنی یێ کانیا تا دا دکه‌ت، ل نێزیکی کانیماسێ، کو د وێ چالاکیێ دا شه‌عبان عومه‌ر هدێنه‌ی شه‌هید دبیت.
هه‌ر ل ساڵا 1981 ئەنوەر دگەل رێکخراوا شەهید ئەنوەر مایی، ب سه‌رپه‌رشتیا شه‌هید شه‌عبان غه‌فار، پشکداریێ د لێدانا رەبیەکا دوژمنی دا دکەت ل سەرێ چیایێ گابنێرکی، کو دکەتە بەرامبەری گوندێ باتیفا سەیدا. د هێرشێ دا شه‌هید شه‌عبان دکه‌ڤیته سه‌ر مینان و مین پێڤه دپه‌قن و ئه‌و ب گرانی بریندار دبیت. پێشمەرگە دگەل پەقینا مینێ بزاڤێ دکه‌ن کو خوه بگه‌هیننه جهێ شەهید شەعبان غەفاری، دا کو وی ڕزگار بکه‌ن، لێ ئه‌و ژ بەر هەبوونا مینان، رێ نادەته پێشمەگەی کو بچنە دەف وی، هەتا ئەو بخوە هێدی هێدی ڕادبیت و خوە ژ ناڤ توڕێن مینان دەربازدکەت. ئه‌نوه‌ر و هه‌ڤالێن خوه یێن دی شه‌هید شه‌عبانی ڕادکه‌ن و گه‌هیننه گوندێ موسکا و پاشی ده‌رگه‌لێ و پاشی ل سه‌ر داربه‌ستێ وی دبه‌نه چیایێ مه‌تینا، ل جهه‌کی نه‌په‌نی ڤه‌دشێرن ژ به‌ر هێرش و فرۆکه‌یێن دوژمنی.
پاشی حه‌مدی به‌گ ئه‌نوه‌ری ڤڕێدکه‌ته ده‌ف مه‌فره‌زه‌یه‌کا پارتیا کۆمونیستا ئیراقی، دا کو نووژدارێ وان بهێت برینێن شه‌هید شه‌عبانی ده‌رمان که‌ت.
ئەنوەر ئێکمالەیی دگەل مەفرەزەیا شەهید شەعبان غەفار پشکداریێ د لێدانا رێڤەبەریا ئەمنا رژێمێ ل سەنتەرێ باژێرکێ ئامێدیێ دا دکەت. ل گۆره‌ی گۆتنا ئه‌نوه‌ری؛ ده‌مێ نووژدار دبینیت کو گه‌له‌ک سه‌چمه‌یێن ب مه‌ترسی د له‌شێ شه‌هید شه‌عبان دانه و ڕه‌وشا وی گه‌له‌کا خرابه، نووژدا دبێژیت: ئه‌گه‌ر ئه‌و د 2ده‌مێ 24 سعه‌تان دا شه‌هید نه‌بوو، پاشی ئه‌ز دێ ساچما ئینمه‌ده‌ر.
ئه‌نوه‌ر به‌رده‌وام دکه‌ت و دبێژیت: د گەل دەربازبوونا دەمی، شەهید شەعبان غەفار، گاڤ بۆ گاڤێ ل کێمیێ دا. بەری 24 دەمژمێر دەربازببن، هەمی هێز و ڤەژەنێن خوە ژ دەستدده‌ت و ئێدی زمانێ وی ژی ناگه‌ڕیت. لێ پشتی دەربازبوونا 24 دەمژمێران، شەهید شەعبان هشیاربووڤە و ئاخفت و دختۆری ژی ئەو سەچمە ژ برینێن لەشێ وی ئینانه‌دەر.
برینداربوونا بازیێ بەهدینان کاریگەریەکا مەزن ل سەر مۆرالێ پێشمەرگەی و خەلکی هەمیێ دکەت، لۆما خەلکی ل ناڤ شۆڕشی و ژ دەرڤە، ژ هەمی ئالیاڤە دەرمانان کۆمدکەن و دهنێرن.
پشتی کو ڕه‌وشا شه‌هید شه‌عبانی باشتر لێ تێت، ئەنوەر و هەڤالێ خوە عەبدوللا بێدوهی ئه‌و شەهید شەعبانی ل مالا حەجی عەبدوللایێ بێشیلێ دهێلن و لگه‌ل هه‌ڤالێن ڕێکخراوا خوه، دەست ب گەڕەکێ دکەن بۆ دەڤەرا بەرێ گارەی.
ل شه‌ڤا 18-9/11/ 1982 ئه‌نوه‌ر دگه‌ل هه‌ڤالێن خوه و بسه‌رپه‌رشتیا شه‌هید شه‌عبان غه‌فار خوه دگه‌هیننه ناڤ باژێڕێ ئامیدیێ و دربێن کوژه‌ک ل هێزێن دوژمنی دده‌ن و چه‌ند به‌رپرسه‌کێن له‌شکه‌ری و ئه‌منی یێن دوژمنی ژی دکوژن. ژ وان ژی ئه‌فسه‌رێ ئیستخباراتا دوژمنی ل ئامێدیێ رائید عدنان. ژ هه‌ژی گۆتنێ یه کو ڤێ چالاکیێ ترس و له‌رزه‌کا مه‌زن ئیخسته دلێ دوژمنی. پاشی ل ڕۆژا 16/12/1982 ئه‌نوه‌ر لگه‌ل ڕێکخراوا خوه و بسه‌رپه‌رشتیا شه‌هید شه‌عبان غه‌فاری، پشکداریێ دگرتنا بنگه‌هێ دوژمنی یێ سه‌رێ حه‌مێ دا دکه‌ت.
شه‌هیدبوونا بازیێ به‌هدینان
ئه‌نوه‌ر دهه‌ڤپه‌یڤینا خوه دا دبێژیت: ل بهارا ساڵا 1983 ئه‌م ڕێکخراوا شه‌هید ئه‌نوه‌ر مایی ب سه‌رپه‌رشتیا شه‌هید شه‌عبان غه‌فار، مه گه‌ڕه‌ک بره سنوورێ لژنا ئاکرێ، کو وی ده‌می شیمال زێباری به‌رپرسێ وێ بوو و هشیار زێباری و بابه‌کر زێباری ژی سه‌رپه‌رشتی لێدکر. ل وێرێ وان و لگه‌ل شه‌هید شه‌عبانی پلانه‌کا له‌شکه‌ری دانا بۆ هێرشکرنا سه‌ر شه‌رمنێ، بۆ سه‌ر باره‌گا و بنگه‌هێن فه‌وجا ژماره (1) یا جاشا. مخابن د وێ هێرشێ دا بازیێ به‌هدینان شه‌عبان غه‌فار شه‌هید بوو و هه‌ردوو هه‌ڤال ئه‌حمه‌د باوه‌رکی و که‌ریم دێریشکی ژی بریندار بوون. شه‌هیدبوونا شه‌عبان غه‌فاری نه ته‌نێ ئه‌م پێشمه‌رگێن ڕێکخراوا وی، لێ هه‌موو خه‌لکێ کوردستانێ غه‌مبار و دلشکه‌ستی کر.
ژ به‌ر کو هه‌ژمارا پێشمه‌رگێن ڕێکخراوا شه‌هید ئه‌نوه‌ر مایی ل سه‌رده‌مێ شه‌هید شه‌عبانی گه‌له‌ک زێده ببوو، لۆما پشتی شه‌هیدبوونا وی، ڕێکخراوه‌کا دی ژی ژ وی پێشمه‌رگه‌ی هاته دامه‌زراندن بناڤێ ڕێکخراوا شه‌هید شه‌عبان غه‌فار، ئه‌ز ژی چوومه دگه‌ل وێ ڕێکخراوێ.
پشتی هینگێ ژی ئەنوەر ئێکمالەیی دگەل هەڤالێن خوە یێن پێشمەرگە درێژیێ ب چالاکیێن خوە یێن لەشکەری ددەت وەکی:
* ل ڕۆژا 8/18/ 1983چالاکیا لێدانا باره‌گایێ فه‌وجا ڕاڤینا و رەبیەکێ ل سەرێ چیایێ گابنێرکی ل هنداڤی گوندێ ئاسهێ. د وێ چالاکیێ دا کو ئەحمەد چەلکی ژی تێدا پشکداربوو. سەید نایف ژی ل وێ چالاکیێ برینداردبیت. د وی شه‌ڕی دا سێ هه‌ڤال شه‌هید دبن کو ئه‌و ژی ئه‌ڤه بوون: محمد سادق عبداللطیف چه‌لکی، جعفر عبدالرزاق و خالد سلمان.
* ل پایزا ساڵا 1983 و پایزا 1984 دووجارا پشکداریێ د لێدانا ڕه‌بیێن دوژمنی یێن هنداڤی قه‌دشێ دا دکه‌ت، کو جارا ئێکێ هه‌ردوو بنگه‌هێن دوژمنی هاتنه گرتن، لێ جارا دووێ تنێ هاتنه لێدان و د چالاکیا دووێ دا عه‌لی ئه‌بابه‌کر ئیسفکی به‌رپرسێ ڕێکخراوا شه‌هید ئه‌نوه‌ر مایی شه‌هید بوو.
*جاره‌کێ ژی ئه‌و لگه‌ل هه‌ڤالێن خوه بۆسه‌یه‌کێ ل به‌ر دوژمنی ددانن ل به‌رێ که‌ڕ، ل سه‌ر ڕێیا قه‌دشێ-ئامێدیێ و تۆمبێله‌کا له‌شکه‌ری دکه‌ڤیته بۆسه‌یا وان و ئه‌و وێ دئێخنه بن ئاگرێ چه‌کێن خوه و چه‌ند له‌شکه‌ره‌کا دکوژن و هنده‌کا ژ وان ژی بریندار دکه‌ن.
شه‌ڕێ مێرگا هه‌له‌فیێ ژیانێ ل ئه‌نوه‌ری دکه‌ته دۆزه‌خ
پشتی بۆ ده‌مێ چه‌ند مه‌هه‌کا ڕێکخراوا شه‌هید شه‌عبان غه‌فاری گه‌ڕه‌کا درێژ لگه‌ل به‌رپرسێ لقا ئێک ئه‌نجامدده‌ت ل سنوورێ هه‌رپێنج لژنێن ناڤچێن لقا ئێک، ڕێکخراوا ناڤبری لگه‌ل ڕێکخراوا شه‌هید شه‌عبان عومه‌ر، هێزه‌کا لژنا شێخان، مه‌فره‌زه‌یه‌کا لژنا دهۆک و ئێکا باره‌گایێ لقا ئێک، ل ئێڤاریا ڕۆژا 10/4/ 1984 هێرشی بنگه‌هێن دوژمنی یێن مێرگا هه‌له‌فیێ دکه‌ن، ل هنداڤی ئاشه‌وا و سه‌رسنکێ.
بەری ئەنجامدانا هەر چالاکیەکێ هێزێن پێشمەرگەی دەست ب گۆڤەند و سترانا دکر. بەری ڤێ چالاکیێ ژی ب هەمان شێوە پێشمەرگە دەستێ ئێكودوو دگرن و گۆڤه‌ندێ دشارینن. سالح ئاسهی دەستێ ئەنوەر ئێکمالەیی دگریت و د بەر دیلانێ ڕا دبێژیت: هێ هێ کا ڤێ جارێ دێ بەلگێ کێ ژ مه ژ دارێ وەریێت! پاشی ئه‌و هێکەکا کەلاندی دکەتە د ناڤ نانەکی ڕا و دەست دهاڤێتێ دا بخۆت، هەڤالێن وی تڕانا ب پێ دکەن و بەرددەنە دووف وی. سالح دبێژیتە وان: بەلا خوە ژ من ڤەکەن، ما کی دبێژیت ئه‌ڤه پاریێ منێ دوماهیێ نابیت ئەز بخۆم!!
تاری گه‌ورکا ئێڤاری هێرش بۆ سه‌ر سێ بنگه‌هێن دوژمنی ده‌ستپێدکه‌ت. ئه‌نوه‌ر یێ لگه‌ل وێ هێزا کو هێرشی سه‌ر بنگه‌هێ نیڤه‌کێ دکه‌ت، کو بنگه‌هه‌کێ مه‌زن و ئاسێ بوو. د ده‌مێ هێرشێ دا دوو مینێن ڤالمارا یێن مه‌زن ب پێشمه‌رگا ڤه دپه‌قن و سالح سه‌لیم ئاسهی، ئه‌حمه‌د بێدهی، فه‌ریق ئۆسمان تیله‌ری و محه‌مه‌د تاهر سه‌لیم تروانشی شه‌هید دبن و 9 پێشمه‌رگه ژی بریندار دبن، کو ئێک ژ وان ئه‌نوه‌ر بوو و برینا وی ژی گه‌له‌کا گران بوو. ڕها سه‌ره‌کیا پێ وی، یا کو دبێژنێ ڕها سپی تێته قه‌تاندن و ڕه‌وشا وی گه‌له‌ک تێکدچیت.
ده‌مێ هه‌ڤال ئه‌نوه‌ری ڕادکه‌ن دا کو وی ژ مه‌یدانا شه‌ڕی دووربێخن، ئه‌و دبینن کو تڤه‌نگه‌کا کلاشینکۆف یا ب ساجۆرێن وی ڤه. ژ نوو ئه‌و دزانن کو ده‌ما مین په‌قین و هه‌ڤالێ ویێ شه‌هید هاڤێتی تڤه‌نگا وی ژی یا هاڤێتی و یا مایه ب ساجۆرێن ئه‌نوه‌ری ڤه.
تاری دکه‌ڤیته ئه‌ردی و باران ژی یا دباریت. ئه‌ڤ کۆما شه‌هید و برینداران هه‌موو یێن هه‌ردوو ڕێکخراوێن لژنا ئامێدی بوون و ئه‌و ل وان دۆل و نهالێن چیایێ گاره‌ی ژی د نه‌شاره‌زا بوون، کو شه‌هید و بریندارێن خوه بگه‌هیننه گوندێ سپیندارا به‌رواری ژێری
هێزێن پێشمەرگەی هەمی ل تانا شەهید و برینداران دچن و ئەو داربەستا ژ بڕنۆیان چێدکەن و شەهید و بریندارێن خوە پێ ڤەدگوهێزنه شکه‌فته‌کێ ل نیڤا چیایێ گاره‌ی. شەڤ ڕەشەیە و بارانەکا گەلەك زۆر دباری. هێزێن پیشمەرگەی جەنازەیێن سێ شەهیدا و 9 برینداران، ل شکه‌فتێ ڕادکەن و دبەنە گوندێ سپیندارێ ل دەڤەرا بەرواری ژێریا. جەنازەیێن 3 شەهیدا ل وێرێ ڤەدشێرن. هێزه‌کا پێشمه‌رگه‌ی دچیت و هه‌تا به‌رێ سپیدێ ل دۆرێن ڕه‌بیا دوژمنی ل ته‌رمێ شه‌هید سالح ئاسهی دگه‌ڕیت، لێ ئه‌و نابینن. نێزیکی مه‌هه‌کێ پشتی هینگێ هێزه‌کا جیش الشعبی یێن کورد تێنه وێ ڕه‌بیێ و پاشی ته‌رمێ شه‌هید سالحی 200 مترا ژ ڕه‌بیێ دوور دبینن کو ل ده‌مێ په‌قینێ مینێ یێ بلندکری و هاڤێتیه د کۆرا به‌ره‌کی مه‌زن دا. وان ژی بڕێکه‌کێ گوندی ئاگه‌هدارکرن و خه‌لکێ سپیندارێ چوون ئه‌و ژی ئینا ل ده‌ف هه‌رسێ هه‌ڤالێن ویێن دی ل سپیندارێ ڤه‌شارت.
به‌ره‌ڤ ڕۆژهه‌لات
هه‌رچه‌نده بۆ ده‌مه‌کی نووژدارێ شوڕشێ بریندار ل ده‌ڤه‌را چه‌مانکێ و باره‌گایێ لژنا شێخان ل سێده‌را ده‌رمان کرن، لێ ژ به‌ر کو برینێن ئەنوەری گه‌له‌ک دگران بوون، ڕه‌وشا وی باش نه‌بوو. لۆما ل مه‌ها 1984/6 وی بۆ چارەسەریێ دبه‌نه رۆژهەلاتێ کوردستانێ.
ئەنوەر پشتی 6 مه‌ها ژ چاره‌سه‌ریێ ژ ڕۆژهه‌لاتێ کوردستانێ ڤەدگەڕیتەڤە گوندێ ئێکمالێ ل مال، لێ برینێن وی باش ساخنەبووینە و ئێدی ئەو نەشێت درێژیێ ب خەباتا پێشمەرگاتیێ بدەت. چونکی چاره‌سه‌ریا پێ وی نه‌بوو و ئه‌و بوو په‌ککه‌فتی. پشتی ئێش و ژانێن برینا ئه‌نوه‌ری هه‌وداینه‌ڤه
ئه‌و ل ساڵا 1986 جارەکا دی ژ بۆ چارەسەریا برینێن خوە دچیتەڤە رۆژهەلاتێ کوردستانێ. ڤێ جارێ نیشتەرگەری بۆ پیێ وی دهێتە کرن و 40 رۆژا پیێ وی د جبسێ ڕا دمینیت و پشتی هینگێ ڤەدگەریتەڤە کوردستانێ. دگەل زڤڕینا ئەنوەری بۆ کوردستانێ قۆناغا هەشتێ و یا دووماهیێ یا ئەنفالێن ڕەش دەستپێدکەت.
فرۆکەیێن دوژمنی گوندێ کانیا سویر کو دکەڤیتە ڕه‌خێ گوندێ ئێکمالێ کیمیاباران دکەت. سالح عەبدوللا بیگداودی و هەڤژینا وی و شەعبانێ کوڕی وی شەهیددبن. وی دەمی ژ بلی چەند کەسەکان کەس ل گوندێ ئێکمالێ نەمایە. پشتی ڤەشارتنا وان هەر سێ شەهیدان ل گۆڕستانا گوندێ ئێکمالێ، ئێدی کەس ل گوندی نامینن. ئەنوەر و کەس و کارێن خوە ژی بەرەف دەڤەرێن سنووری دچن و پشتی کو حکومه‌تا تورکیا وان وەردگریت، ئێدی وان دبه‌ته که‌مپا ماردینێ. د هه‌مان بۆمبارانا کیمیاوی دا گوندیێ وان محه‌مه‌د ئه‌بابه‌کر ئێکماله‌ی ژی ب گرانی بریندار دبیت و ل خه‌سته‌خانا ئامه‌دێ ئه‌و ژی شه‌هید دبیت.
خه‌لاتێ هه‌ڤژینیێ خوینه
ئەنوەر ئێکمالەیی پشتی خەباتەکا درێژ و برینداری و دەربەدەریێ، ل ساڵا 1989 ل که‌مپا ماردینێ بڕیارێ ددەت کو خێزانێ پێکبینیت، دلێ وی دکەڤیتە سەر کچەکا خەلکێ گوندێ ئۆرە. پشتی کو کچک دزانیت ئه‌نوه‌ر پێشمه‌رگێ برینداره، ئه‌و ڕازی دبیت و دبێژیت: ئه‌ڤه شانازیه‌کا مه‌زنه بۆ من کو وی خوینا خوه بۆ کوردستانێ ڕێتیه. ئەنوەر شەهیانەکا سادە ل کەمپا مێردینێ دکەت و دژیێ 32 سالیێ دا خێزانێ پێك دئینیت. نوکە ئه‌و خودانێن کۆمەکا زارۆکانه.
ئەنوەر و هەڤژینا خوە هه‌ر ل ساڵا 1989 بڕیارێدده‌ن کو بچنه ڕۆژهه‌لاتێ کوردستانێ و ئه‌و هەتا ساڵا 1991 ل وێرێ دمینن و پشتی سەرهەلدانێ ڤه‌دگه‌ڕنه کوردستانێ. ئەو ل دەستپێکێ دچنە کانیماسێ و پشتی هینگێ دگەل مرۆڤێن خوه و برایێن خوە ل کۆمەلگەها باوەردێ ل دەشتا دووبانێ ئاکنجی دبن.
ئەنوەر ل سه‌ر عه‌شق و ئه‌ڤینا سه‌رده‌مێ پێشمه‌رگاتیێ جارەکا دی دبیتەڤە پێشمەرگە، لێ ئەو ژ بەر برینداریا خوە نەشێت ئەرکێ گرانێ پێشمەرگاتیێ برێڤە ببەت، لۆما ئه‌و دهێتە خانەنشینکرن، لێ ل سەر 75 دینارێن ئیراقی (سۆیسری)! پاشی ل گومرکا براهیم خەلیل وه‌ک کارمەند تێته دامه‌زراندن. پشتی هینگێ بۆ ڕێڤەبەریا خانەنشینا دهۆکێ دهێتە ڤەگوهازتن.
نوکە ئەنوەر عبدولقادر محمد ئێکمالەیی وەکو شەهیدێ زیندی ب رێژەیا 80٪ په‌ککه‌فتی و ب پلا موئەهل سەر ب فەرماندەیا سپیلکی ڤەیە و هەتا نوکە نەهاتیە خانەنشینکرن.
ئێش ئازار تلوڤه‌نه و بدوماهی ناهێن
ئەنوەر ئێکمالەیی پشتی خەباتەکا دڕێژ و برینداریێ د رێیا دۆزا گەلێ خوەدا، راستی چەندین نەخۆشیا هاتیە. گولچیسکەکا وی هاتیە ڕاکرن و یا دی ژی گەلەکا لاوازە، ژ ئەگەرێ برینداربوونێ پیەکێ وی ژ کارکەتیە و هەردوو پیێن وی ب بەردەوامی دوەرمتینە، ب رەنگەکی کو ئەو نەشێت هاتن و چوونێ بکەت.
ئەنوەری هەتا نوکە دوو جارا نیشتەرگەری بۆ حەوزێ خوە کریە. پێنج جارا ژی نیشتەرگەری بۆ پیێ خوە کریە. دیسان نووژداران گۆتیه کو؛ دڤێت ئەو بزووترین دەم ژی زراڤێ خوە ڕاکەت. هه‌تا نوکه ژی دوو جارا جەلتێ لێ دایە.
ئاخخخخ وه‌ڵات تۆ چه‌ندێ شرین بووی، ئاخخخخ ژیان تۆ چه‌ندا ب ئازاری!
ئەنوەر دگەل خێزان و 8 زارۆکان کو زارۆکەکێ وی ژی پەککەفتی یە، ب دەستکورتی، د خانیەکێ گەلەك سادە و بێ سه‌روبه‌ردا دژیت، ل تاخێ خەستێ ل دهۆکێ. لێ مخابن ئه‌و خانی ژی بۆ نامینیت، ژ به‌ر کو جاده دێ که‌ڤیتێ و بریارا هەڕفاندنا وی یا هاتیەدان. ئەو نزانیت کا دێ کەنگی مالا وی ژ وی خانیکی دەرێخن. ل گۆره‌ی گۆتنا ئه‌نوه‌ری؛ مخابن هه‌تا نوکه چ سوحبه‌تا قه‌ره‌بووکرنێ ژی نینه. هه‌روه‌سا ئه‌و دبێژیت: هه‌تا نوکه نه چ لایه‌نێن حزبی و نه ژی حکومی خوه ل مه نه‌کریه خودان، د سه‌ر هندێ ڕا کو ئه‌م ب مالباتڤه پێشمه‌رگه، شوڕشگێڕ و قوربانیده‌رین.
ئەم ب ناڤێ سەنتەرێ کۆماتە یێ دەکۆمێنتکرنا دیرووکا شۆرشێ داخوازێ ژ حکۆمەتا هەرێما کوردستانێ، پارتی دیموکراتی کوردستان و دەزگەهێ خێرخوازیێ بارزانی دکەین، کو خوە ل ئێش و ئازارێن ڤی خەباتکەری بکەنە خودان و دەستێ هاریکاریا مادی و مەعنەوی بۆ درێژکەن و نه‌هێلن زێده‌تر خه‌باتکه‌ر و قاره‌مانێن ڕۆژێن سه‌خت و گرانێن خه‌بات و شوڕشێ ڕه‌زیل و په‌ریشان ببن.
