سەنتەرێ کۆماتە د بەردەوامیا دیدار و هەڤدیتنێن خوە یێن مەیدانی دا ل رێکەفتی 18/1/2025 سەرەدانا پێشمەرگێ دێرین و شەهیدێ زیندی سەلمان محەمەد ئەحمەد سێری ل کۆمالگەها دێرەلووکێ دکەت و ژ نێزیک ڤە هایداری رەوشا وی دبیت.
گەلەك مخابن کاك ئەحمەد سێری زێدەباری برینداربوونا وی و ژ دەستدانا پیەکی، ئەو راستی جەلتەیا مێشکی هاتیە و شیانێن ئاخفتنێ ژی نەماینە، لۆما ئەم نەشییاین چ دیداران دگەل وی ئەنجامبدین، ب سوپاسی ڤە مە ب رێیا هەڤال و هەڤچەپرێ وی دکتۆر سبحی رەشاڤەیی هندەك پێزانینان ل سەر دیرووکا خەباتا وی پەیداکرن.
سەلمان ئەحمەد محەمەد سێری، یێ ناسیار ب سەلمان سێری ل گۆرەی بەلگەنامەیێن وی، ل سالا 1964 ل گوندێ سێرێ یێ سەر ب دەڤەرا ئامێدیێ ڤە هاتیە سەر دنیایێ.
پشتی گوندێ سێرێ ل ساڵا 1978 مینا ب سەدان گوندێن دی یێن دەڤەرێ دکەڤیتە بەر هەوا ڕاکرن و سۆتن و وێرانکرنێ، سەلمان سێری دگەل هەردوو گوندیێن خوە سەعید و حەجی ملکەچی ژێردەستیا رژێما گۆربەگۆر نابن و نابنە دیلێن دوژمنی د کۆمەلگەهێن زۆرەمللی دا، لۆما ئەو هەرسێ د هەمان سال دا بڕیارێ ددەن کو پەیوەندیێ ب رێزێن شۆڕشا گولانێ بکەن.
سەلمان سێری و هەڤالێن خوە ل دەستپێکێ پەیوەندیێ ب مەلا ئەحمەد و ئیبراهیم رەشاڤەیی دکەن و دگەل وان دچنە گوندێ شێلازا یێ سەر ب دەڤەرا کانیماسێ ڤە. ئەو ل وێرێ ملازم عەلی و فوئاد میرانی دبینن. ژبەر کو ژیێ سەلمانی یێ بچووكبوو و هێشتا یێ گونجای نەبوو کو ببیتە پێشمەرگە، ملازم عەلی داخوازێ ژ وی دکەت کو ڤەگەریتەڤە ناڤ مال و کەس و کارێن خوە، لێ سەلمان سێری ڤەگەڕیانا مالێ رەتدکەت و ل سەر بریارا خوە رژددبیت و دبیتە پێشمەرگە.
سەلمان سیرێ ئێکەمین چالاکیا خوە د شۆڕشا گولانێ دا دگەل هەڤالێن خوە یێن پێشمەرگە ل ناڤەندا ناحیا کانیماسێ ئەنجامددەت. ئەو د ڤێ چالاکیێ دا پشکداریێ د دەستبسەرداگرتنا بڕەکا مەزانا دەرمانان دا دکەت.
سەلمان سێری دگەل مەفرەزەیێن پێشمەرگەی یێن گەڕۆك ل سەر بزاڤ و چالاکیێن خوە یێن پێشمەرگاتیێ بەردەوام دبیت. ئەو و هەژمرەکا ھەڤالێن خوە یێن پێشمەرگەی بۆ دەمەکی، وی چەکێ ژ سوریێ بۆ شۆڕشێ دهات وەردگرن و بۆ پێشمەرگەی و بارەگایێن شۆڕشێ دبەن. سەلمان سێری هەتا هەرێما دوو ل هەرک و بێداڤا دچیت و ل وێرێ بۆ دەمەکی دچیتە دگەل د. کەمال کەرکووکێ و دگەل وی دمینیت هەتا کۆنگرێ 9ێ یێ پارتی. سەلمان سێری دگەل د. کەمال کەرکووکێ دچیتە رۆژهەلاتێ کوردستانێ و پشکداریێ د گۆنگرێ 9 ێ یێ پارتی دا دکەت.
سەلمان سێری پشتی کۆنگرێ 9 ێ ڤەدگەریتەڤە کوردستانێ و ل سنوورێ لقێ ئێك درێژیێ ب خەباتا خوە ددەت. پشتی بارەگایێ رێکخراوا شەهید زبێر تەیب، کو بەرپرسێ وێ عەلی تێلی بوو ل شیڤ ئۆسمانا ڤەدبیت، سەلمان سێری پەیوەندیێ ب وێ رێکخراوێ دکەت.
سەلمان سێری دگەل رێکخروا شەهید زوبێر تەیب، ل گۆرەی رێنمایێن شۆرشێ، زێدەباری چالاکیێن سیاسی، هەیڤانە پشکداریێ د چالاکیەکا لەشکەری دا دکەت ل دەڤەرێن نێروە و رێکان و دەشتا زێی. ل گۆرەی ئاخفتنا هەڤال و هەڤچەپەرێن وی، سەلمان سێری ئێك ژ چەلەنگترین پێشمەرگێن ڤێ رێکخراوێ بوویە.
دووماهی چالاکیا سەلمان سێری پشکداری تێداکری، داستانا ب ناڤودەنگا وێرەلووکێ بوویە ل 11/1/1988. پشتی ڤێ چالاکیێ سەلمان سێری بۆ رێکخراوا خابوور یاپشتەڤانیێ ل بارەگایێ لقێ، کو بەرپرسێ وێ سەید نوری چەمسەیدی بوو، دهێتە ڤەگوهازتن و ب چەکێ دۆشکێ پشکداریێ د پاراستنا بارەگایێ لقێ ژ هێرشێن فرۆکەیێن دوژمنی دا دکەت.
سەلمان سێری د هەڤدیتنەکا تەلفزیۆنی دا بەحس، دکەت کا وی چەوا جارەکێ ب چەکێ دۆشکێ فرۆکەیەکا دوژمنی هنگافتیە و ئێخستیە خوارێ.
ل دەمێ ئەنفالان و ب فەرمانا لقا ئێك سەلمان سێری و هەڤالێن خوە یێن هێزا پشتەڤانیێ دووماهی هێزا پێشمەرگەی دبن کو ژ بارەگایێ لقی خوە ڤەدکێشن.
سەلمان سێری پشتی ئەنفالان، ئاوارەیی رۆژهەلاتێ کوردستانێ دبیت و ل ئۆردیگایێ خوێ ئاکنجی دبیت.
سەلمان سێری ل سالا 1989 ل سەر داخوازا سەرکردایەتیا پارتی دگەل کۆمەکا پێشمەرگەی د کاودانەکێ گەلەك سەخت و دژوار دا و پێخەمەت بەردەوامیدانێ ب شۆڕشی و پاراستنا پێگەھ و هەبوونا پێشمەرگەی دچیتە کوردستانێ.
سەلمان سێری بۆ دەمەکێ کێم دچیتە رۆژهەلاتێ کوردستانێ و جارەکا دی ل ساڵا 1990 دگەل د. کەمال کەرکووکێ و هێزەکا پێشمەرگەی و هەژمارەکا فەرماندەیێن لەشکەری ڤەدگەریجەڤە کوردستانێ و بەردەوامیێ ب خەباتا خوە ددەت هەتا دەستپێکرنا سەرهەلدانا بوهارا ساڵا 1991.
سەلمان سێری دگەل هەڤالێن خوە یێن پێشمەرگە، پشکداریێ د سەرهەلدانا پیرۆز دا دکەت ود شەڕێ فەیدیێ دا برینداردبیت.
پشتی هینگی ئەو دگەل هێزەکا 300 کەسی ل سەر فەرمانا بەرەیێ کوردستانی دچنە رۆژئاڤایێ کوردستانێ کو ژ وی ئالی هێرشێ بکەنە سەر بنکە و بارەگایێ رژێمێ یێن سەر سنووری.
ل ساڵا 1992 و پشتی رێکخستنا هێزێن پێشمەرگەی سەلمان سگێری دبیتە فەرماندێ فەوجێ و پشکداریێ د شەرێن چەسپاندنا یاسایی و شەڕێن سەپاندیێن پەکەکێ دا دکەت.
ل ساڵا 1997 ل چیایێ مینەك ل بن پیێن سەلمان سێری دپەقیت و دبیتە ئەگەرێ ژ دەستدانا پیەکێ وی.
پشتی سەلمان سێری پیەکێ خوە ژ دەستددەت، ئێدی نەشێت بەردەوامیێ ب ئەرکێ خوەیێ پێشمەرگاتیێ بدەت، لۆما ئەو ل کۆمەلگەها دێرەلووکێ ژبۆ دەبارا ژیانا مال و زارۆکێن خوە دکانەکێ ڤەدکەت و ئێدی کار و کەدا وی دبیتە چوونا بەر دکانێ.
وەکو هەڤال و هەڤچەپەرێن سەلمان سگێری ڤەدگێڕن، ئەو کەسەکێ رووخۆش، رح سڤك، ئاخفتن شرین بوویە، وی بەری هەر چالاکیەکا لەشکەری، یان د بەرتەنگاڤترین رەوش دا ب سوحبەت و پێکەنین و سەما و دیلانێن خوە مۆرالێ پێشمەرگەی بلنددکر و ئەو هەردەم رەوش و هەدارا هەڤالێن خوە بوویە.
گەلەك مخابن ل سالا 2024 سەلمان سێری پشتی خەباتەکا درێژ و گەلەك قوربانی و ئەڤرازی و نشیڤیان، تۆشی جەلتەیا مێشکی دبیت و رەخەکێ لەشێ وی و ئەزمانێ ژ کاردکەڤن و ئێدی وی شیانێن لڤین و ئاخفتنێ نامینن و ئەو ژ هینگێ وەرە دبیتە مێڤانێ تەختێ و بدەست دهێتە راکرن و دانان.
وەکو مالباتا وی دبێژن، پلا وی نەقیبە، لێ هێشتا نەهاتیە خانەنشێنکرن.
سەلمان سگێری نوکە ل کۆمەلگەها دێرەلووکێ د خانیەکێ سادە ڤە و دوور ژ هەمی بنەمایێن چاڤدێریێ و ساخلەمیێ و بێی کو کەسەك یان لایەنەکێ پەیوەندیدار ئاگەھ ژ رەوشا وی هەبیت ژیانەکا گەلەك سەخت ودژوار دەربازدکەت.
ئەم ب ناڤێ سەنتەرێ کۆماتە یێ دەکۆمێنتکرنا دیرووکا شۆڕشێ داخوازێ ژ حکۆمەتا هەرێما کوردستانێ و پارتی دیموکراتی کوردستان دکەین، کو ل تانا ڤی قەهرەمانێ هەمی ژیانا خوە دانایە سەر دۆزا مللەتێ خوە بچن ل وی ببنە خودان.
سهنتهرێ کۆماته
یێ دێکومهنت کرنا دیرووکا شۆڕشێ
کار و ئهرکێ سهنتهرێ کۆماته دێکۆمێنت کرن و پاراستنا دیرووکا شوڕشێ یه ژ مرن و ژناڤچوونێ.
ڤی سهنتهری ب ستافهکێ بچووک و شیانێن ساده، لێ ب ڤیان و باوهریهکا مهزن، وهک پێنگاڤا خوه یا کاری یا ئێکێ، دهست ب کۆمکرن، دێکۆمنێت کرن و تۆمارکرنا دیرووکا خهبات و شۆڕشا کوردستانێ کریه.
