عه‌لی سه‌دیق بێتكاری، پێشمه‌رگه زینـــدانــیــێ ســـیاســی و ســه‌رهاتیێن خـــه‌بات و قـــوربـــانــــیدانێ
سەنتەرێ کۆماتە یێ دەکۆمێنتکرنا دیرووکا شۆڕشێ د بەردەوامیا بزاڤ و چالاکیێن خوە دا ل رێکەفتی25/4/2023 هەڤدیتنەك لگەل پێشمەرگێ دێرین عه‌لی سه‌دیق حسێن بێتكاری ئەنجام دا و دیرووکا خەباتا وی مینا بەلگەنامەیەکا گرنگ تۆماردکەت و ژ ناڤچوونێ دپارێزیت.
عه‌لی سه‌دیق حسێن بێتكاری، ل ساڵا 1965 ل گوندێ بێتكارێ یێ ده‌ڤه‌را به‌رواری باڵا هاتیه سه‌ر دونیایێ. ژ به‌ر کو وی ده‌می خواندنگه‌هـ ل گوندێ وان نه‌بوویه، لۆما ئه‌و نه‌چوویه خواندنگه‌هێ.
عه‌لی به‌رده‌وام دکه‌ت و دبێژیت: ل ده‌مێ سنێله‌یی و گه‌نجاتیا خوه ئه‌م مژیلی کارێن گوندی بووین. وه‌کی چاندنێ و خودانکرنا که‌والی. ل ساڵا 1976 حکومه‌تا ئیراقێ ڕێزه گوندێن سه‌ر سنوورێ باشوور و باکوورێ کوردستانێ وێرانکرن و خه‌لکێ وان ژی ده‌ربه‌ده‌رکر. گوندێ بێتكارێ ژی ئێک بوو ژ وان گوندان. پشتی وێرانکرنا گوندێ مه، خه‌لکێ گوندی ل وان گوندێن ده‌ڤه‌رێ به‌ڵاڤ بوو و ئه‌م ژی چووینه گوندێ مه‌له‌خته و ل وێرێ ئاکنجی بووین. لێ ل ساڵا 1978 حکومه‌تا ئیراقێ هه‌ژماره‌کا دیا مه‌زنا گوندێن کوردستانێ وێرانکرن، کو گوندێ مه‌لخته ژی ئێک ژ وان گوندان بوو. بۆ جارا دووێ ئه‌م دیسان ده‌ربه‌ده‌ر بووین و ڤێ جارێ حکومه‌تا ئیراقێ ئه‌م ل كۆمه‌ڵگه‌ها بێگوڤا ئاکنجی کرین. پشتی ئه‌م برینه بێگۆڤا، خواندگه‌هێن نه‌هێلانا نه‌خوینده‌واریێ هاتنه ڤه‌كرن. من ژی ل وێ خواندگه‌هێ ده‌ست بخواندن و فێربوونێ کر، لێ دیسان ئه‌ز نه‌شیام ب شێوه‌یه‌كێ باش فێری خواندن و نڤێسینێ ببم.
د ژیێ 15 ساڵیێ دا دبیته پێشمه‌رگه
ل ساڵا 1979 و دژیه‌کی بچووک دا عه‌لی بڕیارێ دده‌ت کو بچیته چیا و ببیته پێشمه‌رگه. ئه‌و دچیته به‌ر نزارێ چیایێ مه‌تینا ل ده‌ڤه‌را به‌رواری باڵا و خوه دگه‌هینیته گوندێ شێلازا. لێ ئه‌و ل وێرێ دزانیت کو پێشمه‌رگه پڕانی یێن چووینه ڕۆژهه‌لاتێ کوردستانێ ژ بۆ گرێدانا كۆنگرا نه‌هێ یا پارتی دیمۆکراتی کوردستان. دیسان ژ به‌ر کو ژیێ وی گه‌له‌کێ بچووکه، ئه‌و ناهێته وه‌رگرتن و دیسان تێته ڤه‌گه‌ڕاندن. ئه‌و ژی دزڤڕیت و تێته‌ڤه مال ل بێگۆڤا. پاشی د هه‌مان ساڵ دا، هه‌ر دوو هه‌ڤالێن وی شه‌هید محه‌مه‌د نه‌زیف پیرۆ و حه‌ربی سعدالله ژئالیێ حكومه‌تا ئیراقێ ڤه تێنه گرتن و ئێشاندن. پاشی تێنه به‌ردان. ئێدی ڤێ جارێ ئه‌و هه‌رسێ پێکڤه بڕیارێ دده‌ن کو بچن و ببنه پێشمه‌رگه. جاره‌کا دی ئه‌و خوه دگه‌هیننه ڤه گوندێ شێلازا و په‌یوه‌ندیێ ب ستار مه‌لا زه‌کی شێلازی دکه‌ن، کو به‌رپرسێ ڕێکخراوه‌کا نهێنی یا پارتی بوو. پاشی دوو كه‌سێن دی ژی دگه‌هنه وان و چه‌ند ڕۆژه‌کا دمیننه ل گوندێن ئێكمالێ و هێسێ. پاشی ستار مه‌لا زه‌کی وان لگه‌ل مه‌فره‌زه‌یه‌کا پێشمه‌رگه‌ی دهنێریته باره‌گایێ لقا ئێک ل كۆماته‌ی.
پشتی کو ئه‌و دگه‌هنه باره‌گایێ لقێ، ئه‌و ل وێرێ دبنه 18 پێشمه‌رگێن نووهاتی. لق بڕیارێ دده‌ت کو وان بهنێریته سه‌رکردایه‌تیێ ل ڕۆژهه‌لاتێ کوردستانێ. دیسان لق میرخان غلبیشی وه‌ک رێبه‌ر دده‌ته لگه‌ل وان و ئێدی ئه‌و دده‌نه ڕێ، دناڤ ئاخا باکوورێ کوردستانێ ڕا و بقه‌چاغی، تا کو دگه‌هنه ڕۆژهه‌لاتێ کوردستانێ. ل وێرێ سه‌رکردایه‌تیێ ئه‌و پێشمه‌رگێن خوانده‌ڤان ڤڕێکرنه خوله‌کا کادریێ و عه‌لی و شه‌هید محه‌مه‌د نه‌زیف ژی هاتنه ڤه‌گوهاستن بۆ باره‌گایه‌کی پارتی ب سه‌رپه‌رشتیا ئازاد به‌رواری ل نێزیک قه‌سر شرین. ئه‌و ل وێرێ بوونه خودان چه‌ک ژی، لێ پشتی شه‌ڕێ ئیراق و ئیرانێ ده‌ستپێكری، ئه‌و ده‌ر بوو مه‌یدانا شه‌ڕێ هه‌ردوو ده‌وله‌تان، لۆما ئه‌و نه‌چار بوون وێرێ بهێلن و دیسان بێنه‌ڤه ئۆردیگایێ زێوه ل ده‌ڤه‌را مه‌رگه‌ڤه‌ڕا ئورمیێ. پاشی ژ وێرێ هاتنه‌ڤه ڤه‌گوهاستن بۆ لقا ئێك و ئه‌و زڤڕین هاتنه‌ڤه كۆماته‌ی. ل وێرێ ژی هاتنه ڤه‌گوهاستن بۆ ڕێکخراوا له‌شکه‌ری یا شه‌هید عبدالرحمن حمدی ل سنوورێ لژنا ناڤچا ئامێدیێ.
