عیسا ئه‌حمه‌د شه‌مۆ ئێک ژ وان پێشمه‌رگێن ئێکه‌مین گــولــلا ده‌ســتپێکا شــوڕشا گـــولانێ تــه‌قـــانــدی
-پشکا ئێکێ –
سەنتەرێ کۆماتە یێ دەکۆمێنتکرنا دیرووکا شۆرشێ د بەردەوامیا کار و چالاکیێن خوە دا، ل رێکەفتی 17/4/2023 دیدارەکا ڤیدیۆیی یا درێژ دگەل پێشمەرگێ دێرین عیسا ئەحمەد شەمۆ ئەنجامددەت و دیرووکا خەباتا وی مینا گەنجینەیەکا دەولەمەند و بەشەکێ گرنگ ژ دیرووکا شۆڕشێ تۆماردکەت و ژ ناڤچوونێ دپارێزیت.
عیسا ئەحمەد شەمۆ پسئاغا ل ساڵا 1950 ل گوندێ مارسیسێ یێ سەر ب دەڤەرا شه‌ڕانشێ ڤە هاتیە سەر دنیایێ. ئه‌و سێ ساڵا ل گۆندێ مارسیسێ دچیتە قوتابخانێ، لێ پشتی شۆڕشا ئەیلوولێ دەستپێدکەت، رژێما ئیراقێ مامۆستا ناهنێریته گوندی، زاڕۆکێن گوندی بێ مامۆستا دمینن، لۆما عیسا ژ خواندنێ دهێتە دابڕین. ڕژێم هەر ب هندێ ژی ناڕاوەستیت، بەلکو ب فرۆکەیێن جه‌نگی قوتابخانە و گوندێ مارسیسێ ژی بۆمبەباراندکەت، د ئەنجامدا ژنەك ب ناڤێ خەزال شەهیددبیت.
عیسا ژ زاڕۆکەکێ شیم و نه‌ته‌بتی بۆ پێشمەرگەکێ قەهرەمان
ل گۆره‌ی گۆتنا عیسای ئه‌و زاڕۆکەکێ گەلەك شیم بوو. مامۆستایێن وی ل قوتابخانێ وی دکەنە چاڤدێرێ پۆلێ. وەکو عیسا ڤەدگێریت، وی گەلەك زۆرداری ل قوتابیێن کرستیان دکر و دزی ژ رەز و باخچەیێن خەلکی دکرن. ڤی مرۆڤی نەدزانی ترس چیە.
هه‌لبه‌ت ماڵا بشار ئاغایێ سندی ژی ل گوندێ مارسیسێ بوو. ل ده‌ستپێکا شوڕشێ ڕه‌وشا گوندی یا نۆرمال بوو. لێ پشتی بشار ئاغا دچیتە ناڤ رژێمێ، گوند دبیته جهێ گۆمانا شۆڕشێ، نەخاسمە کەس ژ خەلکێ گوندی پشکداریێ د شۆڕشا ئەیلوولێ ژی دا ناکەت.
شەهید حەمید حەفزوللا پێشمەرگە بوو ل هێزا زاخۆ، ناڤبەرا وی و شەهید عیسێ سوار پیچەك تێكدچیت. شەهید حەمید حەفزوللا دچیتە دەف ئەسعەد خۆشەڤی کو ل وێرێ درێژیێ ب خەباتا خوە بدەت. ئەسعەد خۆشەڤی داخوازێ ژ وی دکەت، ئەگەر بشێت هندەك پێشمەرگا قەیدبکەت، دێ جهێ وی ل دەف خوە کەت.
بابێ عیسای نزانیت دێ چەوا خوە ژ وی خلاسکەت
شەهید حەمید حەفزوللا ل ساڵا 1967 دچیتە مالا بابێ عیسای ل گوندێ مارسیسێ و داخوازێ ژ وی دکەت، کو کورەکێ خوە بدەتە دگەل وی دا وەکو پێشمەرگە قەیدبکەت. بابێ عیسای باوەرناکەت کو دێ ب ڕێکەکێ ژ عیسای قورتالببیت، هەما بێ هێرڤە و وێڤە عیسای دگەل شەهید حەمیدی دبێژیت. ژبلی عیسای، عزەت، محێ، رەمەزان و ئیسماعیل ژی ژ خەلکێ گوندێ مارسیسێ پەیوەندیێ ب شەهید حەمیدی دکەن. ژبلی وان هەژمارەکا کەسێن دی ژی ل دەڤەرا سندیان خوە ددەنە دگەل شەهید حەمید حەفزوللای، کو ئێك ژ وان حەمید خواستی بوو، کو هەم خوارزا و هەم ژی زاڤایێ شەهید حەمید حەفزوللای بوو.
شەهید حەمید حەفزوللا دگەل وێ کۆما گەنجان دچیتە دەف ئەسعەد خۆشەڤی ل بارەگایێ لەشکەرێ ئیك ل گوندێ قومریێ. دکتۆر شڤان و مەلا حەمدی ژی ل دەف ئەسعەدی بوون. دەمێ ئەسعەد خۆشەڤی وان گەنجا دبینیت، چاڤێ وی دکەڤیتە سەر عیسای و دبێژیتە وی: جارێ تۆ هێشتا یێ بچووکی ژ بۆ پێشمەرگاتیێ. عیسا دبێژیتە وی، نەخێر ئەز نەیێ بچووکم. ئەسعەد لێڤەدگێریت و دبێژیتێ: بەلێ تۆ و هشیار بازنگیری هەردوو د بچووکن. عیسا دبێژیتە ئەسعەدی: ئەز نەیێ بچووکم، لێ ژبەرکو ئەزێ کۆسە مە، ئەز بچووك دیاردکەم.
مەلا حەمدی ب تڕانه‌ڤه دبێژیتە عیسای: تۆ ژبنێ خوەڤە یێ چەوایی؟ عیسا ناکەته نەمەردی، هەما ئێکسەر دەستهاڤێت مالدخوینا خوە و دا شەلوالێ خوە بینیتە خوارێ. ئینا ئەسعەد دبێژیتێ: نەنە، تۆ نەیێ بچووکی و دێ بکێر پێشمەرگاتیێ هێیی. پشتی ڤێ گەنگەشێ، عیسا و هشیار هەردوو وەکو پێشمەرگە دهێنە وەرگرتن.
هەر ئێك ژ وان گەنجان تڤەنگەکا ئنگلیزی، دەستەکێ خاکا (جلێن پێشمه‌رگاتیێ) و جەمەدانیەکا سۆر وەردگریت و دبنە فەسیلەکا رێكوپێك دگەل شەهید حەمید حەفزوللای و تێنه ڤه‌گوهاستن بۆ بەتالیونا تەیمەز سێلکی، ل دەڤەرا نهێلیا ل رۆژهەلاتی ئامێدیێ.
عیسا و هەڤالێن خوە 9 مه‌ها ل گەلیێ بن سەرگەلێ د ئەرکێ پێشمەرگاتیێ دا دمینن. وی دەمی جاشێن عەلیێ حەجی شەعبانی ل ئامێدیێ ل سەر دەڤەرێ دەستهەلاتداربوون.
د ڤی دەمی دا شەهید حەمید حەفزوللا و هەڤالێن خوە یێن پێشمەرگە چەند گەڕا ل وێ دەڤەرێ ئەنجامددەن.
عیسا ئەحمەد شەمۆ دەستەکێ خاکا، دەفتەرکەکا پەڕکێن جگارا، 3 بەرکێن چه‌قماقێ و پێلاڤەکێ وەردگریت و پشتی 9 مه‌ها بۆ جارا ئێکێ مۆلەتێ وەردگریت و تێته مال. پشتی مۆلەتا وی بدوماهی دهێت ئه‌و ڤەدگەڕیتەڤە سەر ئەرکێ خوەیێ پێشمەرگایەتیێ ل گەلیێ بن سەرگەلێ.
پله‌یا شه‌هید حه‌مید حه‌فزلا ژ فه‌رماندێ فه‌سیلێ دبیته فه‌رماندێ سریێ. شەهید جەعفەر و حەمید خواستی ژی دبنه جێگرێن وی. رەمەزان کەلەش ژی دبیته فه‌رماندێ فەسیلێ و عیسا ئەحمەد شەمۆ ژی دبیتە جێگرێ ڕه‌مه‌زانی. هەر چەندە ئەو دبنه سریه ژی، لێ هەژمارا وان ژ ٢٠ پێشمەرگان دەربازنەدبوو.
وی دەمی شیانێن شۆڕشێ گەلەك دبەرتەنگبوون، چەك و تەقەمەنی و خوارن گەلەك دکێمبوون، لێ پێشمەرگەی ب ئیرادە و باوەریەکا مکوم هەمبەر دوژمنی بەرخوەددا.
عیسا و هەڤالێن خوە هەتا رێکەفتنا 11 ئاداری ل بەتالیۆنا تەیمەزی ل دەڤەرا نهێلێ دمینن. لێ ئەو دڤی ماوەیی دا وەکو هێزەکا دەستوەشین پشکداریێ د چەندین شەڕان دا دکەن مینا: شه‌ڕێ باگێرا، شه‌ڕێ کوڕێ مزگەفتا ل سەرێ گارەی.
زێرەڤانێن سنووری (حرس حدود)
پشتی راگەهاندنا ڕێکەفتنا 11 ئادارا 1970، هێزێن شۆڕشێ دگەل رێڤەبەریێن حکومه‌تا ئیراقێ پێکڤە ل مێرستەکێ ل نێزیک ئامێدیێ ئاهەنگەکا مەزن رێکدئێخن. پشتی دامه‌زراندنا هێزێن سنووری عیسا ژی دبیتە زێرەڤانێ سنووری، لێ هەر دگەل شەهید حەمید حەفزوللای دمینیت.
بارەگایێ بەتالیۆنا تەیمەزی بۆ کوانێ دهێتە ڤەگوهازتن ل رۆژهه‌لاتێ ئامێدیێ. عیسا و هەژمارەکا پێشمەرگا ل بامەڕنێ بۆ دەمێ 2 مه‌ها پشکداریێ د خۆلەکا فێربوونا چه‌کێ ئاربیجی دا دکەن. شەهید حەمید حەفزوللا دبیتە مامۆستایێ وان یێ خۆلێ و مەشق و راهێنانێ ب وان دکەت. پشتی خۆلێ عیسا دبیتە هەلگرێ چەكێ ئاربیجیێ.
د ساڵێن ئاشتیێ دا، هێزا دەستوەشینا شەهید حەمید حەفزوللا بۆ دهۆکێ دهێتە ڤەگوهازتن. بەتالیۆنا ئەحمەد شانەی ژی بۆ دهۆکێ دهێتە ڤەگوهازتن، وان هەردوو هێزا هەماهەنگیەکا باش دگەلێک دا هەبوو. وی دەمی شەهید شەعبان غەفار دڤیا خوە فێری بکارئینانا چەکێ ئاربیجیێ بکەت، شەهید حەمید حەفزوللا ژی نیشا وی ددەت.
پشتی هینگێ هێزا دەستوەشینا شەهید حەمید حەفزوللای و بەتالیۆنا ئەحمەد شانەی ب فەرمانا بارزانیێ نەمر ژبۆ پشتەڤانیا زبەیرێ مەحمود ئاغای فه‌رماندێ هێزا ئاکرێ، بۆ دەمەکێ بۆ ئاکرێ دهێنە هنارتن. وی دەمی کێشەیەکا خێزانی دناڤبەرا زبەیرێ مەحمود ئاغای ژ لایەکی و لەتۆ زێباری و قالکۆ زێباری ژ لایەلێ دی ڤە هەبوو. زبەیرێ مەحمود ئاغای فەرماندێ هێزێ بوو ل ناڤ شۆڕشێ، لەتۆ و قالکۆ ژی سەرۆك جاش بوون د ناڤ دوژمنی دا. هەر چەندە هێشتا لژنا ناوچا پارتی د ناڤا ئاکرێ دا بوو، لێ رۆژهەلاتێ ئاکرێ ژ ئالیێ شۆش و شه‌رمنا ڤە ددەستێ جاشان دا بوو. هێزێن پێشمەرگەی ژ بۆ زالکرنا ئیرادەیا شۆڕشی ب شەڤ د ناڤا ئاکرێ دا هەژمارەکا چالاکیێن لەشکەری ئەنجامددەن. هێزا ئاکرێ داخوازێ ژ هێزین پێشمەرگەیێن دهۆك و زاخۆ دکەت کو هاریکاریا وان د پاقژکرنا هندەك گوندێن دەڤەرا زێبارێ دا بکەن. ئەو گوند دبن کونترۆلا جاشێن لەتۆی و قالکۆی دا بوون. حەمید خواستی د پاقژکرنا وان گوندان دا بده‌ستێ جاشا برینداردبیت. پشتی ڕامالینا جاشا ژ وان گوندا هێزا رەشید سندی ل وێ دەڤەرێ جهگیردبیت، بەتالیۆنا ئەحمەد شانەی و هێزا دەستوەشینا شەهید حەمید حەفزوللا و چەند هێزێن دی یێن زاخۆ، پشتی نێزیکی 9 مه‌ها، ژ ئاکرێ خوە ڤەدکێشنە ڤە بنگەهێن خوە یێن بەرێ ل دهۆکێ و زاخۆ.
عیسا پشکداریێ د چەندین چالاکیێن له‌شکەری دا دکەت
پشتی ل ساڵا 1974 حکومه‌تا ئیراقێ ل ڕێککه‌فتنا 11 ئادارێ لێڤه دبیت و هێرش دکه‌ته‌ڤه سه‌ر کوردستانێ و شەڕ دەستپێدکەت. ل وی ده‌می شه‌هید شه‌عبان غه‌فار ژی به‌رپرسێ هیزا ده‌ستوه‌شینا هێزا ئامێدیێ بوو. هه‌ردوو هێزێن دەستوەشین یێن شەهید حەمید حەفزوللا و شه‌هید شه‌عبان غه‌فار تێنه ڕاسپاردن کو وان عه‌ره‌بێن حکومه‌تا ئیراقێ ل ده‌ڤه‌را به‌دریکێ ل سه‌ر ڕێیا دهۆک-مۆسل ئیناینه سه‌ر گوندێن کوردان بترسینن، دا کو گوند و ئه‌ردێ کوردا بهێلن و بچن. هه‌ردوو شه‌هیدێن ناڤبری گه‌له‌ک دۆستێن هه‌ڤ بوون و هه‌ڤالینیا وان زێده‌یا گه‌رم بوو. عابد ئێتووتی دبیتە ریبەرێ وان. حه‌مید حه‌فزلا و شه‌عبان غه‌فار و دگەل عابد ئێتووتی پێکڤە بۆ چاڤنێڕیێ ب شەڤ دچنه بەدریکێ. پشتی ئەو ئەرکێ خوە بجیدئینن ڤەدگەڕنەڤه گەلیێ بەندەوا و پاشی دچنه گوندێن سینا و شێخدرێ، پشتی هینگێ ڤەدگەڕنه بارەگایێ خوە ل گەلیێ بێسرێ.
وی ده‌می هێزەکا دژی چەکێ ئەسمانی ل گەلیێ بێسرێ یا جهگیربوو و هه‌م باره‌گا دپاراست و هه‌م ژی بۆ لێدانا پێشڤه‌هاتنێن دوژمنی رۆله‌کێ باش هه‌بوو. کو ژ یاسین کێسته‌یی، ئۆسمان کێسته‌یی، سه‌لام بابیری، شه‌هید ستار مه‌لا سه‌دیق بناڤی و هنده‌ک پێشمه‌رگێن دی پێکدهات.
هێزا دەستوەشینا شەهید حەمید حەفزوللای ب لێدانا بارەگایێ ئیستخباراتا رژێمێ ل تاخێ گرێ باسێ ل دهۆکێ دهێتە راسپارتن. برایێ عەبدوللایێ مەلا جونەید دبیتە رێبەرێ وان، هینگێ ژ تاخێ بەرۆشکێ هەتا گەلیێ دهۆکێ یا چوول بوو. ئەو هێز د بەڕۆشکێ ڕا خوە دگەهینتە گەلیێ دهۆکێ و پاشی دچیته گرێ باسێ و پشتی ئەنجامدانا چالاکیا لێدانا بارەگایێ ئیستخباراتێ ڤەدگەڕنەڤە بارەگایێ خوە ل گەلیێ بێسرێ.
پشتی ڤێ چالاکیێ، هێزا دەستوەشینا شەهید حەمید حەفزوللا، لیوا دهۆکێ ژ ئالیێ شندوخا ڤه ب گوللەتۆپا و ئاربیجیان ئاگرباراندکەن. پشتی هینگێ ژی بەنزینخانەیا رژێمێ ل گەلیێ دهۆکێ دسۆژن. پشتی شەڕ دژواردبیت. بارەگایێ هێزا دەستوەشینا شەهید حەمید حەفزوللای بۆ گرێ قەسرۆکا ل گەلیێ دهۆکێ دهێتە ڤەگوهازتن. عیسا ئەحمەد شەمۆ د ڤان هەموو چالاکیان دا پشکدارە. هێزا وان ل گرێ قەسرۆکێ ژی چەندین چالاکیێن جۆری ئەنجامددەت وەکی لێدانا هەردوو ڕه‌بیێن کێلییا فیرعەونی ولێدان وگرتنا رەبیا کێلیا شەدایێ. ئەڤ هێزە سێ جارا پشکداریێ د لێدانا رەبیا کێلیا شەدایێ دا دکەت و جارا سیێ ڤێ ڕه‌بیێ دگرن. ژ هەژی ئاماژێ یە کو رەبیا کێلیا شەدایێ ئێك ژ ئاسێترین و مکومترین هەلکەفتێن جوگرافیێن دەڤەرێ و کوردستانێ یە.
نارنجۆکەکا دوژمنی ل سه‌ر پشتا وی دپه‌قیت
عیسا ئەحمەد د ڤێ دیدارێ دا دبێژیت: بڕیار وەسا بوو کو هێزا مە ڕەبیا کێلیا شەدایێ بگریت و پشتی هینگێ ڕادەستی هێزا دهۆکێ بکەت. پشتی مە سێ جارا ب هاریکاریا تۆپخانەیا شۆرشێ، کو وی دەمی سەید ساڵح فەرماندەیێ تۆپخانەیێ بوو، هەولێن گرتنا ڤێ ڕەبیێ داین، ئەم جارا سییێ شییاین ڕەبیێ بگرین. عیسا د بەردەوامیا ئاخفتنا خوە دا دبێژیت: هەر جارا مە هێرش بربا سەر ڤێ ڕەبیا ئاسێ، پێدڤیبوو ئەم د ڕێیەکا دەستکەڤر وئاسی ڕا سەرکەڤین، ئەم نەچاردبووین دارێن درێژ دگەل خوە ببەین دا دهندەك جهێن فڕاکە و پڕی مەترسی دا وان دارا وەکو پێسترکێ بکاربینین و ل تەحتێن چییای سەرکەڤین. ئەم نەچاردبووین ئێکوو دوو ب شویتکا هەلکێشین، هەتا خوە بگەهینینە دبن ڕەبیا دوژمنی ڕا، دوژمن ل هنداڤی سەرێ مە بوو. هەر جارا مە هێرش دبرە سەر ڕەبیێ، هێزێن دوژمنی ل هنداڤی سەرێ مە، ب نارنجۆکا هێرش دکرە سەر مە و ئەم ڕادوەستاندین. هه‌روه‌کی ئه‌م ل ئه‌ردی بین و ئه‌و ل سه‌ر بانێ خانی بن ل هنداڤی مه.
عیسا ئەحمەد د بەردەوامیا ئاخفتنا خوەدا دبێژیت: دەمێ مە جارا دووێ هێرش بریە سەر ڕه‌بیێ، ئەز، محەمەد حەسەن باجلۆری، مستەفا لیناڤایی و سەعدیێ ئۆسێ، حەمید حه‌فزالا، حه‌مید خواستی، محەمەد عەبدوللا و تاهر رەشاڤەیی ل بنێ وێ ڕزدا دبن ڕەبیێ دا، ئه‌م ژ بەر هێرشا نارنجۆکا ئاسێ بووین. جانتێ من ل پشتا من بوو، ده‌مه‌کی نارنجۆکه‌کا دوژمنی ب چانتێ من دکەڤیت و پاشی دپەقیت، سەچمەیه‌ك ب ڕانێ من دکەڤیت و ئه‌ز برینداردبم. وی دەمی حەیدەر گەرماڤی دهێتە دەف مە و دبێژیتە محەمەد حەسەن باجلۆری: بۆچی هوین هێرشێ ناکەن سەر ڕەبیێ؟ محه‌مەد حەسەن ژی دبێژیتێ: ئەگەر تۆ هندێ مێری، کەرەمکە تۆ بخوە هێرشێ بکە. دوژمن ل سەر هێزێن پێشمەرگەی سەردەستە، نارنجۆك وەکی تاڤیا بارانێ ب سەر سەرێ هێزێن پێشمەرگەی دا دبارن. حەیدەر گەرماڤی ژی هێرشێ دبه‌ته سه‌ر ڕەبیێ، لێ ئێكسەر دهێتە هنگافتن و بگرانی برینداردبیت و دکەڤیتە ئەردی. حەیدەر گازی وان دکەت و دبێژیتێ: ل تانا من وەرن ئەز برینداربووم. شەهید حەمید و عیسا ب برینداری ڤە، لگه‌ل پسمامەکێ حەیدەری ل هه‌وارا وی دچن. شەهید حەمید ل بەراهیا وان دچیت، لێ مینەك ل بن پیێن وی ژی دپەقیت و سەچمەیه‌ك ب پشتا چاڤێ وی دکەڤیت و ئەو ژی برینداردبیت. ب هەر حالێ هەی ئەو خوە دگەهیننە سەر کەلەخێ حەیدەر و وی ڕادکەن و قەستا رێیا ڤەکێشانێ دکەن. ئەو و هەڤالێن خوە یێن دی ژێك ڤەدقەتیێن و ڤەدگەڕنە نهالا پشتا گرێ قەسرۆکا.
پشتی هینگێ غەریب ئاکرەیی وان ب تۆمبێله‌کا پیکاپ دبه‌ته خەستەخانا شۆڕشی ل سواراتووکا. پشتی برینێن شەهید حەمید و عیسای دهێنە تیمارکرن، ئەو دچنە گوندێ سندوورێ، عەلیێ خەلیل و سەلیمێ ئەسعەد هەردوو ل وێرێ بوون. پشتی شەهید حەمید وان ل سەر ئەنجامێن چالاکیێ ئاگەهداردکەت، سەلیمێ ئەسعەد دبیژیت: رەبیا کێلیا شەداییێ ب هەر حالێ هەبیت دڤێت بهێتە ستاندن.
بۆ جارا سیێ پلان تێته دانان و پێشمه‌رگه ژ سرتا ڕۆژهه‌لاتی ڤه هێرشی کێلیا شەدایێ دکه‌ن.
سەید ساڵح و هه‌ڤالێن تۆپخانێ ژ پشتا باجلۆرێ ڕه‌بیێ ب دژواری تۆپباراندکەن و هێزێن هێرشبه‌رێن پێشمه‌رگه‌ی ڕه‌بیێ دده‌نه به‌ر گوللێن ئاربیجیا و پشتی هینگێ ژی ب چەکێ سڤك هێرشێ دکەنە سەر ڕه‌بیێ و ب ساناهی ڕه‌بیێ دگرن. دوو کەلەخێن دوژمنی د ڕەبیێ دا دمینن، سێ یێن دی ژی دکەڤنە دەورووبەرێن ڕەبیێ. هێزێن پێشمەرگەی هەژمارەکا چەکێ سڤك و تۆپەکا 60 ملم دگرن و ڕه‌بیێ ڕاده‌ستی هێزا دهۆکێ دکەن. لێ بەری ڤەگەڕن بارەگایێ خوە، خەبەر دگەهیتە وان کو دوژمنی جارەکا دی ڕەبیە یا گریتەڤە و پێشمەرگە یاسین بێزنوری ب برینداری یێ که‌فتیه دەستێ دوژمنی.
هێزا دەستوەشین، پشتی ڤان چالاکیان بارەگایێ خوە دبەنەڤە گەلیێ بێسرێ، بەتالیۆنا محەمەد عەلی بناڤی ژی دهێتە وێری. پشکەك ژ پێشمەرگێن بەتالیۆنا ئەحمەد شانەی ل چیایێ زاوا جهگیربووینە. هێرشا دوژمنی بۆ سەر چییایێ زاوا دەستپیدکەت. ٤ پێشمەرگێن بەرواریا ل وێرێ شەهیددبن. شەهید حەمید ئەفزوللا و هەڤالێن خوە ل تانا وان دچن، لێ هەتا دگەهنه وێرێ، شەڕ بدوماهی دهێت.
پشتی هینگێ سریا شەهید حەمید حەفزوللا دگەل بەتالیۆنا تەیمەز سێلکی، بۆ دەڤەرا دیانا دهێنە ڤەگوهازتن. شه‌ڕ دکەڤیتە خەلیفان و گەلیێ عەلی بەگێ. سریا شەهید حەمید ل هاودیان جهگیردبیت. رێکەفتنەك دهێتەکرن کو شه‌ڕ ل وێ دەڤەرێ نەهێتەکرن. هەر چەندە هێرشەکا مەزنا دوژمنی دهێتە سەر گردەکەوا، لێ ئەو نەشێن پشکداریێ د بەرسینگگرتنا هێرشا دوژمنی دا بکەن.
شکه‌ستن و چاما ڕه‌ش
عیسا ئەحمەد شەمۆ و هەڤالێن خوە هەتا شکەستنا شۆڕشێ ل ئادارا ساڵا 1975 ب ڤی ئاوایی ل هاودیان دمینن. پشتی شکەستنا شۆڕشێ ب شەش ڕۆژان، ژنوی ئەو دزانن کو شۆڕش شکەستیە. دوژمن وێ دەڤەرێ هەمیێ دگریت. وی دەمی شەهید حەمید حەفزوللا ل بێنڤەدانێ بوو. عیسا و هەڤالێن خوە چەکێ گران د هاڤێژن د هندەك دۆل و نهالان دا و ب دلەکێ شکەستی قەستا مال دکەن.
حەمید خواستی، تەیمەز، شەهید جەعفەر و هەڤالێن وان یێن دی دکەڤنه ڕێ و بەرەف دەڤەرا بەهدینان ڤە دچن. ئەو ل سەر ڕووشینی ئەسعەد خۆشەڤی دبینن. ئەو ل وێرێ دزانن کو عیسێ سوار یێ هاتیە شەهیدکرن. تەیمەز، حەمید خواستی و شەهید جەعفەر دگەل ئەسعەدی دمینن و بڕیارا چوونا ئیرانێ ددەن. لێ پشتی هینگێ حەمید خاستی و شەهید جەعفەر ژبۆ برنا خێزانێن خوە ڤەدگەرنەڤە دەڤەرا زاخۆ.
عیسا و هەڤالێن خوە ئه‌و ژی خوە دگەهیننه مال ل گەلیێ پسئاغا. پڕانیا خەلكی خوە ڕاده‌ستی دوژمنی دکەت، رۆژا پاشترعیسا ژی خوە ڕادەست دکەت.
سۆز و لێبوورینێن دوژمنی ژی هه‌می خه‌فک و داڤن
شەهید حەمید حەفزوللا خوە ل مالا بشار ئاغای دپارێزیت. پشتی چەند رۆژا مەرعیێ رێڤەبەرێ ناحیا شه‌ڕانش دهنیریتە دووف عیسای ڕا و وی ئاگەهداردکەت کو: ئەمنا دهۆکێ تۆ یێ خواستی و دڤێت ئه‌م ته ببه‌ینه وێرێ. ئەو عیسای ب ترۆمبێلەکا تایبەتا ناحیا شه‌ڕانشێ دبه‌نه ئەمنا دهۆکێ. ئەمنا دهۆکێ وی دبەنە سەر بانێ رێڤەبەرییا ئەمنێ و بەرێ عیسای ددەنه کێلیا شەدایێ و پسیارێ ژ وی دکەن کا؛ ئەو وی جهی نیاسیت یان نە؟ عیسا خوە خشیمدکەت و دبێژیتە وان کو؛ ئەو وی جهی ناسناکەت. دیار بوو کو ئەمنا دهۆکێ هەموو پێزانین ل سەر وی هەبوون و دبێژنە وی؛ بەلێ تۆ دنیاسی و تە پشکداریا د لێدان و گرتنا وێ ڕه‌بیێ دا کری و تویێ ل وێرێ بریندار ژی بووی.
داکو عیسا خوە ژ دەستێن ئەمنێ قورتالکەت، دبێژیتە رەشەکێن ئەمنێ: ڕاستە من وەکو خەربەند پشکداری د وی شه‌ڕی دا کریە، لێ من بتنێ ئاڤ بۆ پێشمەرگەی ب دەوارا بریە و ئەز بریندار ژی نەبوویمە.
رۆژا پاشتر محۆ خەزوا و محمەد مەجید کو دوو زه‌لامێن حکومه‌تا ئیراقێ بوون، دبنە کەفیلێن عیسای و وی به‌ردده‌ن.
عیسا ڤەدگەڕیته گوندێ مارسیسێ و ل وێرێ شەهید حەمید حەفزوللای دبینیت. ڕەوش گەلەك ئالۆزدبیت، کەسێ باوەریێ ب کەسێ نامینیت. پاشی شەهید حەمید حەفزوللا و حەمید خواستی مال و زاڕۆکێن خوه دبه‌ن و دچنە باکوورێ کوردستانێ، ب مەرەما چوونا رۆژهەلاتێ کوردستانێ. به‌لێ عیسا ژ چوونا وان ئاگه‌هدار نابیت.
عیسا دا خوە ژ چاڤێن رەشەکێن رژێمێ دوور بێخیت و بۆ خوە کەدەکێ ژی بکەت، ئه‌و دچیتە مالا مامێ خوە ل مۆسل. ئه‌و نە زمانێ عەرەبی دزانیت و نە ژی تشتەکی ژ کار و رێنجبەریێ دزانیت. ل وێ ژینگەها نوو ژی هەدارا وی ناهێت، لۆما ئەو پشتی چەند رۆژا ڤەدگەڕیتەڤە مالا خوە ل مارسیسێ.
دیسان به‌ره‌ڤ چیا
پشتی کو عیسا ژ مۆسل ڤه‌دگه‌ڕیته ڤه مال ئه‌و دبێژیتە بابێ خوە کو؛ ئەو دێ دەرکەڤیت و وی نه‌ڤێت ل بن ده‌سه‌ڵاتا داگیرکه‌ران بیت. بابێ وی دبێژیتێ؛ ئەم هەمی پێکڤە دێ دەرکەڤین.
ئێدی مال هه‌می پێکڤه بڕیارا یاخی بوونێ دده‌ن و ل مه‌ها 7/1975 بزن و گایێ خوە دفرۆشنە مرۆڤەکێ خوە و هندەك کەل و پەلێن پێدڤی دهاڤێنه سەر پشتا کەر و هێسترا خوە و گوندێ خوە دهێلن و مال هه‌می پێکڤه بەرەڤ زاویتە یا باکوورێ کوردستانێ دچن. وی ده‌می خانما عیسای یا دووگیان بوو، لۆما ئه‌و نه‌شیا وێ لگه‌ل خوه بینیت و ئه‌و هێلا ل ماڵا خه‌زوورێ خوه ل زاخۆ. مالباتا وان ژی 7 برا کو دوو ژ وان خێزاندار بوون و لگه‌ل ده‌یک و بابا، هه‌می پێکڤه ده‌رکه‌فتن.
ئەو رۆژا پاشتر دچنە گوندێ ڕۆبۆسکێ ل دەڤە را گۆییان. پشتی هینگێ دچنە گوندێ بێجهێ، هەدریشێ، ئاشێ مەلێسێ. ل وێرێ عەلی عەلی و سیڤۆ یێ گولێ و چەند مالێن بارزانیان ژی دگەهنه وان. ئەو هەمی پێکڤە دچنه گەڤەرێ و پاشی دچنه گوندێ ئەمبێ ل سه‌ر سنوورێ باکوور و ڕۆژهه‌لات. عیسا، ئیدریس، عەلی عەلی و عەلی سۆفی ب قەچاخی دچنە مالا ئەسعەد خۆشەڤی ل نەغەدە و ئەسعەدی ئەگەهداردکەن کو وان ژن و زاڕۆکێن خوە ل ئەمبێ هێلاینە و داخوازا هاریکاریێ ژ وی دکەن.
ل گۆرەی بڕیارا رژێما ئیرانێ هەرکەسێ پشتی وی دەمێ بێشوەختێ ژبۆ وەرگرتنا پەنابەران هاتیە دەستیشانکرن بکەڤیتە د ئاخا ئیرانێ دا، دێ هێتە گرتن و ڕاده‌ستی رژێما ئیراقێ هێتە کرن، لۆما ئەسعەد خۆشەڤی نەشێت بۆ وان چ بکەت.
عیسا و هەڤالێن خوە نەچاردبن کو مال و زاڕۆکێن خوە ب قەچاخی ببەنە نەغەدە. مالا عیسای ب شێوەیەکێ دەمکی و بۆ ده‌مێ 20 رۆژان ل مالا محەمەد عەلی بناڤی دمینن، هه‌تا ئه‌و بخوه نیوانیه‌کی په‌یدا دکه‌ن. پشتی هینگێ ئه‌و بخوە خانیەکێ ب قەچاخی بکرێ دگرن.
د ڤی ده‌می دا عیسا چاڤەرێی سەڕاستبوونا خانما خوەیه، دا کو پشتی هینگێ ئه‌و بچیت بینیتە رۆژهەلاتێ کوردستانێ. لێ دهه‌مان ده‌م ژی دا، دلێ وی یێ بترسە، نەکو هەتا ژنکا وی سەڕاست دبیت ژ ئالیێ رژێمێ ڤە بهێتە گرتن و دوورئیخستن بۆ باشوورێ ئیراقێ.
عیسا پشتی کو نێزیکی مه‌هەکێ ل نەغەدێ دمینیت، ئه‌و دگەل نیسانێ کانیبەڵاڤی ڤەدگەڕیتەڤە کوردستانێ. نیسانی ژی وەکی عیسای دڤێت مال و زاڕۆکێن خوە ببەتە رۆژهەلاتێ کوردستانێ. ئەو هەتا گوندێ مەلێسێ ل ده‌ڤه‌را قه‌شووریا پێکڤە دچن، پشتی هینگێ ڕێیا وان ژێك جودا دبیت. نیسان بەرەڤ دەڤەرا بەرواری باڵا دچیت و عیسا ژی دێ ل باکوورێ کوردستانێ بەردەوامیێ ده‌ته ڕێیا خوە هەتا دگەهیتە دەڤەرا زاخۆ.
خانما عیسای ل نه‌فیێ ل باشوورێ ئیراقێ زاڕۆک دبیت
عیسا بەردەوامیێ ب ڕێیا خوە ددەت و دگەهیتە گوندێ هەدریشێ و ژ وێرێ ب قەچاخی دچیتە مارسیسێ. عیسا هزردکەت کو ژنکا وی هێشتا یا ل مالا بابێ خوە. ئەو دچیتە مالا جەعفەرێ خزمێ خوە، جەعفەر وی ئاگەهداردکەت کو رژێمێ خانما وی و یێن گەلەك پێشمەرگێن دی ژی گرتینە و برینە باشوورێ ئیراقێ. پشتی به‌عسیا ژنکا عیسای گرتی و دوورئێخستیه باشوورێ ئیراقێ، وێ ل وێرێ کوڕه‌ک دبیت.
عیسا بێ ئومێد ڤەدگەریته‌ڤه گوندێ ڕۆبۆسکێ و چاڤەرێدکەت، ها ئەڤرۆ ها سوبەهی بەلکی خانما وی بهێتە ئازادکرن. د وان هەیامادا ئەحمەدێ که‌ڕه‌ڤانی مه‌زنێ عه‌شیرا ژیرکی دهێتە کوشتن بده‌ستێ له‌شکه‌رێ ترکا. رژێما تورکیا دەڤەرا گۆییان تژی ژاندورمە دکەت. خانما عیسای نێزیکی ساڵه‌کێ دمینیته گرتی ل باشوورێ ئیراقێ و پاشی ل ساڵا 1976 ب کەفالەت دهێتەبەردان.
گایێ خوه دده‌ته ب ناسنامه
عیسا ژی هه‌تا وی ده‌می هه‌ر ب قەچاخی ل رۆبۆسکی دمینیت. ژیانا عیسای ژ بەر نەبوونا چ بەلگەنامەیێن فەرمی یێن ترکی گەلەك ب زەحمەت دکەڤیت. عیسا نەچاردبیت گایێ خوە ب 1300 لیرەیێن ترکی بفرۆشیت، دا ناسنامه‌یه‌کا ترکی بۆ خوە ب وان پاران دەربێخیت. ئه‌و ب هاریکاریا کارمه‌نده‌کێ نفۆسا قلابانێ (ئولودەره)، کو کوردەکێ خه‌لکێ شه‌ڕنەخێ بوو، ب 1000 لیرەیێن ترکی ناسناما ترکی دەردئێخیت و ساڵا ژ دایك بوونا وی ژی دکەتە 1957، دا کو زوو ناڤێ وی بۆ لەشکەریا ترکی نەهێت.
د ڤی ده‌می دا عیسا چه‌ند جاره‌کا خوه دگه‌هینیته گوندێ مارسیسێ، بهاریکاریا هنده‌ک خه‌لکێن ده‌ڤه‌را گۆییان. وی ل سالا 1975 دوو نارنجۆک ل گوندی ڤه‌شارتبوون، ئه‌و وان ژی لگه‌ل خوه دئینیت.
پشتی خانما وی تێته ئازادکرن، ئه‌و تێته زاخۆ ل مالا بابێ خوه. عیسا بڕیارێ ددەت کو بچیتە سوریێ، بەلکێ ل وێرێ بساناهیتر بشێت مال و زاڕۆکێ خوە یێ هێشتا نەدیتی ببەتە وێرێ. ئەو ب وێ ئارمانجێ دچیتە مالا حەجی سوبحی ل جزیرێ، کو هینگێ حه‌جی سوبحی هه‌م شاره‌دارێ جزیرێ بوو و هه‌م ژی به‌رپرسێ پارتی دیمۆکراتی کوردستان- باکوور بوو. حەجی سوبحی دبێژیتە وی: ئه‌گه‌ر تۆ ب من بکه‌ی تۆ ناچیه سوریێ، چونکی ڕه‌وشا مه ل سوریێ نه‌باشه و ل وێرێ دڤێت تۆ ببیە زەلامێ مخابراتا سوریێ. عیسا دبێژیتێ: ئەگەر من ڤیابا ببم زەلامێ دوژمنی، دا بم زەلامێ رژێما ئیراقێ و من ئەڤ نەخوەشیە هەمی ل سەر خوە قەبوولنەدکرن.
هه‌رچه‌نده عیسای ناسناما ترکی یا هه‌ی و مه‌ترسیا گرتنێ ل سه‌ر وی نینه ل ترکی، لێ ئەو بێ پارەیە و چ جهێن ڤەحەواندنێ ژی نینن. ئه‌و دچیتە مالا تەتەرلەرا ل شه‌ڕنەخێ، لێ ئەو وی بخودان ناکەن. پاشی نەچاردبیت ڤەدگەڕیتەڤە قلابان (ئولودەره) و قەستا عەبدییێ دۆستێ خوە دکەت ل گوندێ مه‌هراڤێ. عەبدی رێزەك مەزن ل وی دگریت و ئه‌و ل وێرێ دمینیت.
چریسکا شوڕشێ
پشتی دوو، بۆ سێ مه‌هان هاشم ره‌مه‌زان (ابو عنتر) تێته وێ ده‌ڤه‌رێ و په‌یوه‌ندیێ ب عیسای دکه‌ت. عه‌بدی لگه‌ل عیسای دچیت و دچنه گوندێ نیرەهێ ل ده‌ڤه‌را گۆییان ل وێرێ ابو عنتر دبینن، کو وی ده‌می ناڤێ خوه کربوو مه‌لا محه‌مه‌د. عبدالله (ابو نوال) برایێ وی ژی لگه‌ل بوو.
ابو عنتر به‌حسێ ده‌ستپێکرنا شوڕشێ بۆ عیسای دکه‌ت و دبێژیتێ: ژ نوکه وێڤه تۆ دێ فەرمانا ژ من وەرگری و یێ ئاماده‌به هه‌ر ده‌مێ مه تۆ ئاگه‌هدارکری، دا بێی. ئەبو عنتەر 5 دیناران ژی ددەتە عیسای. عیسا و عەبدی ڤەدگەڕنه‌ڤه مال ل گوندێ مه‌هراڤێ. پشتی دەمەکێ پێزانین دگەهنه عیسای کو حەمید شه‌ریف سندی و برایێن خوە یێن هاتینه گوندێ نیره‌هێ. موسایێ برایێ حەمید شه‌ریفی دۆستێ عیساییە. عیسا دچیتە دەف وان. ئەو هەمی چەکدارن و ل ناڤ گۆییان جهێ رێزێ نە، عەبدوللا ساڵح ژی دگەهیتە وان.
دامەزراندنا مەفرەزێن سه‌ره‌تایی یێن شوڕشێ
ئه‌و ده‌مێ عیسا ل ده‌ف وێ گرۆپا پێشمه‌رگه‌ی، نامه‌یه‌ک بۆ وان ژ سه‌رکردایه‌تیێ تێت و داخوازێ ژ وان دکه‌ت کو ل گوندێن مەلیسێ و چەمانێ ئاماده ببن. عیسا ل وێ دەڤەرێ شەهرەزایە و دبیتە رێبەرێ وان. ئه‌و هه‌می پێکڤه دچنه چەمانێ.
حەمید شه‌ریف و عەبدوللا ساڵح ل وێرێ دچنە دەف جه‌وهه‌ر نامق و کەریم شنگالی. مەحمود گۆیی و موسایێ برایێ وی ژی ل وێرێ دگەهنه وان.
پشتی حەمید شریف و عەبدوللا ساڵح ژ دەف جه‌وهه‌ری و کەریمی دەردکەڤن، خاترا خوە ژ عیسای دخوازن و دێ برێکەڤن، عیسا دبێژیتە حەمیدی ما ئەز ژی دگەل هەوە نەهێم، حەمید دبێژیتە وی نەخێر تو دێ ل ڤێرە مینی.
مەحمود گۆیی و موسا ژی بێی عیسای دچنه دەف جه‌وهه‌ر و کەریمی. پشتی مەحمود و موسا ژ دەف وان دەردکەڤن، عیسا دکەڤیتە دگەل وان. عیسا ژ مەحمود دپرسیت، دا بزانیت ئەڤ کۆمبوونێن نهێنی چ نە و ژبۆ چ نە ؟. مەحمود گۆیی دبێژیتە عیسای: دێ مەفرەزێن پێشمەرگەی هێنە چێکرن و دێ بۆ کوردستانێ هێنە هنارتن و دێ دەست ب شۆڕشا چەکداری که‌ین ل دژی حکومه‌تا ئیراقێ. مەحمود گۆیی ژ عیسای دپرسیت کا: وی دڤێت بچیتە دگەل وان؟ عیسا ژی بێ دوودلێ ئامادەباشیا خوە ژ بۆ وی ئەرکی نیشاددەت.
عیسا ده‌ستپێکێ دچیتە قلابان و پشتی دوو ڕۆژا ڤەدگەڕیتە ڤه دەف مەحمود و موسای و دبێژیتە وان: ئەگەر هندەکێن دی یێن وەکی من (خەلکێ باشوور) ل ڤان دەڤەرا هەبن، دگەل خوە بینم؟، ئەو ژی دبێژنێ: بینە. عیسا ل قلابان سێ کەسا ب ناڤێن، محەمەد، حسێن و محەمەد پەیدا دکەت. عیسا وان هەرسێ کەسا دگەل خوە دبەتە مالا موسای ل رۆبۆسکێ و وان پێك ددەتە نیاسین.
رۆژا پاشتر درباز خەلیل بێجهی و چەند کەسێن دی ژی دهێنە وێرێ و ژمارا وان هه‌میا پێکڤه دبیتە 18 کەس، 17 ژ وان خەلکێ باکوورێ کوردستانێ نە و هەر 17 چەکدارن، بتنێ عیسا ژ باشوورە و یێ بێ چەکە.
مەحمود و موسا برانە و خەلکێ رۆبۆسکێ نە و ئەو هەردوو بەرپرسێن وانن. ئەو 17 کەسە خەلکێ رۆبۆسکێ، قلابان، بێجهێ، ئالۆشی و هۆدانێ نە و هەمی خەلکێ باکوورێ کوردستانێ نە.
ئێکەم مەفەزا پێشمەرگەی پشتی شکەستنا شۆڕشا ئەیلوولێ دکەڤیتە د کوردستانێ دا
ئەو 18 کەسە دبنە ئێکەم مەفرەزا پێشمەرگەی، کو بڕیارە ل دەڤەرا زاخۆ بکەڤنە د کوردستانێ دا. هەر 18 چەکدارن، 17 کەس ژ وان خەلکێ گوندێن سەر سنووری یێن باکوورێ کوردستانێ نە، عیسای ئەحمەد شەمۆ بتنێ کوردێ باشوورە و بێ چەکە. عیسا کلاشینکۆفا عەبدیێ هەڤالێ خوە دگەل خوە دبەت، هەردوو برا مەحمود گۆیی و موسا گۆیی سەرپەرشتیا وێ مەفرەزێ دکەن. ئەو پێشمەرگێن وێ مەفرەزێ ل مه‌ها 6/1976 برێدکەڤن ودەست ب ئێکەم گەڕا خوە ل دەڤەرا زاخۆ دکەن. ئەو ل پێشیێ دچنە مالا غازیێ سینەمێ ل گوندێ منینێ. پشتی هینگێ ژ بۆ چاڤنێریێ دچنە سیارا ستەورێ، ل رەخێ گوندێن کەشانێ و سۆریێ، بەلکی ل وێ دەڤەرێ چالاکیەکا لەشکەری ئەنجامبدەن، لێ کەس ژ وان شەهرەزایی وێ دەڤەرێ نەبوون، لۆما ئەو بەرەڤ گوندێن بانکێ و ئەڤلەهێ دچن و ل وێرێ حەسۆیێ پیربلی دبینن، و بڕیارێ ددەن کو بچنه گوندێ پیربلا. ئەو دچنه مالا محەمەد حەجی محمەد ل پشتا گوندی و وێ شەڤێ ل وێرێ دمینن.
مالا ل مالخوێی حه‌رام
ژ به‌ر کو عیسا بتنێ خه‌لکێ باشووره لگه‌ل وێ مه‌فره‌زێ، لۆما ئه‌و وەکو که‌سه‌کی ده‌ڤه‌را گۆییان خوە ب خەلکێ وان گۆندان ددەته نیاسین. هەتا هینگێ ژی ئەو نزانیت کانێ هەڤالێن وی چ لبەرە بکەن. هەڤالێن وی ژی زێدە باوەری ب وی ناهێت. تا وی ڕاده‌ی کو باوه‌ریا وان ناهێت زێره‌ڤانیێ ژی پێ بگرن. چونکی ئه‌و هه‌موو مرۆڤێن ئێکن و عیسا بتنێ بیانیه.
عیسا ژ موسا گۆیی دپرسیت، کا: پلانێن وان چ نە و وان چ لبەرە بکەن؟ موسا دبێژیتە وی: وان ل بەرە هندەك چالاکیێن لەشکەری ل دژی بنکە و بارەگایین حکومه‌تا ئیراقێ ل دەڤەرا زاخۆ ئەنجامبدەن. عیسا خەلکێ وێ دەڤەرێ یە و ژ وان شەهرەزاترە، لۆما ئه‌و پێزانینێن دروست ل سەر دەڤەرێ ددەته وان و جهێ بنکە و بارەگایێن سوپایێ ئیراقێ نیشا وان ددەت. دیسان ئه‌و پێشنیار دکەت کو بۆسەیەکێ ل ناڤبەرا شه‌ڕانشێ و گەلیێ پسئاغا ل پێشیا سوپایێ ئیراقێ دانن. چونکی ل هەردوو جها هێزێن رژێمێ لێ جهگیرکرینە و ئەو هێز هاتن و چوونێ دناڤبەرا وان هەردوو دەڤەران دا دکەن و ژ کیژان ئالی ڤە بهێن دێ کەڤنە د بۆسەیا وان دا. عیسا دبێژیتە وان: ئەگەر ل وێ دەڤەرێ نەشیان چ چالاکیان ئەنجامبدەین، پێشنیارا گەلیێ قەسرۆکێ دکەت. چونکە ل گۆرەی ئاخفتنا عیسای، هێزێن ئیراقێ ل ئاڤا گویزێ و شیشێ هەنە و هاتن و چوونا شه‌ڕانشێ دکەن و مەخفەرەیەكا پۆلیسان ژی ل دەشتە تەخێ هەیە. ل دوماهیێ رەئیا وان دکەفیتە سەر هندێ کو ل ملا سوارا گەورکێ ل ناڤبه‌را شه‌رانشێ و گه‌لیێ پساغا بۆسەیەکێ دانن.
چالاکیا ملا سوارا گەورك ئێکەمین چالاکیا لەشکەری د شۆڕشا گولانێ دا
مەحمود گۆیی ل وێ شەڤا ل مالا غازیێ سینەمێ مێڤان، ئەو ژبۆ کڕینا ئاربیجیەکێ بەرەڤ گوندێن سەر سنووری دچیت و دوو کەسا ژی دگەل خوە دبەت. مەفرەزا پێشمەرگەی ژی ب سەرپەرشتیا موسایێ برایێ وی بڕیارا ئەنجامدانا چالاکیەکا لەشکەری ل ملا سوارا گەورکێ ل دژی له‌شکه‌رێ رژێمی ددەن. عیسا ئه‌حمه‌د شه‌مۆ دبیته هه‌ڤپارێ شانازیا ئێکه‌مین چالاکیا شوڕشا گولانێ.
وەکی وان بڕیاردای ئەو ل ڕۆژا 8/6/1976 ( د رۆژناما خه‌بات ژماره 257 ل ڕۆژا 1/7/1976 لاپه‌ڕه 4 دا هاتیه کو چالاکی ل ڕۆژا 21/6/1976 هاتیه ئه‌نجامدان-سه‌نته‌رێ کۆماته) دچنه ملا سوارا گەورکێ، ل ناڤبه‌را شه‌رانشێ و گه‌لیێ پساغا، ل سەر رێکێ بۆسەیەکێ ددانن. عیسا و هەردوو محەمەد و حسێن ب پشت رێ کەتینە و دناڤا هەڤرستەکێ دا خوە ڤەشارتینە،. دەمژمێر نەهی سپێدێ، موسا ئیشارەتێ ددەته عیسای کو 6 سەربازێن ڕژێمێ یێن ب پیا بەرەف وان ڤه دهێن. دوو ژ وان سەربازان ل پێشیا هەڤالێن خوە نە، ئێکی ژ وان سمینۆفەك یا ڤێ و یێ دی ژی تڤەنگەکا بڕنۆیا سه‌لیب. هەر زوو عیسا و هەرسێ هەڤالێن خوە وان هەردووکا دده‌نه به‌ر شێلکێن گوللێن کلاشینکۆفان و هه‌ردووا دکوژن. پاشی ده‌ما ئه‌و دچن دا چه‌کێن وان ڕاکه‌ن، ئه‌و له‌شکه‌ره‌کێ دی ژی دبینن و وی ژی دکوژن. چه‌کێ وی سه‌ربازی کلاشینکۆفه‌کا ڕوسی سیخۆیی بوو، کو هینگێ ئه‌و باشترین چه‌ک بوو. ئێدی عیسا وێ کلاشینکۆفێ لگه‌ل تاخما وێ ڕادکه‌ت و دبیته خودان چه‌ک. دیسان هه‌رسێ له‌شکه‌رێن دی ژی تێنه کوشتن و پێشمه‌رگه چه‌کێ وان ژی ڕادکه‌ن. که‌واته هه‌ر شه‌ش له‌شکه‌ر تێنه کوشتن و 6 پارچه چه‌ک ژی وه‌ک ده‌ستکه‌فت تێن گرتن.
ئه‌ڤ چالاکیه وه‌ک چالاکیا ئێکێ ل شوڕشا گولانێ تێته هه‌ژمارتن.
پێشمەرگه پشتی وێ چالاکیێ بەرەف زۆزانێن گوندێ بازنگیرا ڤه دچن، پاشی دچنە مالا محەمەد میرزایێ سندی ل شیڤا مێزێ، هێشتا وی ده‌می محەمەد میرزای پەیوەندی ب شۆڕشێ نەکربو
