بـــلا ســه‌رۆک مــه‌ســعــود بــارزانــی و ئه‌حمه‌د حه‌سه‌ن به‌کر ل بنێ گوهیژکا سه‌رێ که‌ڤۆتی ڕوونن و پێکبێن
– ژ سه‌رهاتیێن سه‌نته‌رێ کۆماته –
سه‌نته‌رێ کۆماته یێ دێکۆمه‌نتکرنا دیرووکا شوڕشێ ل ڕۆژا 13/3/2023 عبدالواحد تاهر خه‌مۆ زێوا شکان پێشمه‌رگێ ده‌ستپێکا شوڕشا گولانێ، ل ئوفیسا سه‌نته‌ری مێڤان کر و د هه‌ڤپه‌یڤینه‌کا درێژدا دیرووکا خه‌باتا وی تۆمار و ئه‌رشیفکر.
عبدالواحد د درێژیا هه‌ڤپه‌یڤینا خوه دا گۆت: زستانا ساڵا 1979 بوو. وێ ساڵێ سه‌قا گه‌له‌کێ سار بوو. به‌فر ژی گه‌له‌ک هاتبوو. پله‌یێن گه‌رمێ که‌فتبوونه دبن سفرێ دا. وی ده‌می مه باره‌گایه‌کی ده‌مکی هه‌بوو ل گه‌لیێ فه‌قیر، ل به‌ر زێی، ل ناڤ ئاخا باشوورێ کوردستانێ، ل باشوورێ باژێڕکێ چه‌لێ.
وی ده‌می بەرهەڤیێن كۆنگرا نه‌هێ یا پارتی دیمۆکراتی کوردستان دهاتنە كرن. نوونه‌رێن کۆنگره‌ی، کو پڕانیا وان کادر و به‌رپرسێن شوڕشێ بوون، خوه ئاماده دکرن کو به‌ره‌ڤ ڕۆژهه‌لاتێ کوردستانێ ڤه بکه‌ڤنه ڕێ ژ بۆ گرێدانا کۆنگرا پارتی.
هینگێ ژی ل ده‌ڤه‌را زێێ به‌رپرسێن مه ملازم عه‌لی (زه‌عیم عه‌لی) و فوئاد میرانی بوون. هه‌لبه‌ت به‌ری کادر و به‌رپرسێن مه و لگه‌ل هنده‌ک گرۆپێن پێشمه‌رگه‌ی ژی، به‌ره‌ڤ ڕۆژهه‌لاتێ کوردستانێ بکه‌ڤنه ڕێ، پیدڤی بوو وان کار و ڕێکخستنا ده‌ڤه‌رێ یا له‌شکه‌ری، سیاسی و ڕێکخستنی ڕێکئێخستبا و پاشی ژ وێ ده‌ڤه‌رێ دابانه ڕێ. هه‌ر ل گۆره‌ی ڤی به‌رنامه‌ی زەعیم عەلی ئەز ب ئەركەكی هنارتمە دەڤەرا نهێلێ.
مه‌ها دوویا ساڵا 1979 بوو، وی ده‌می گەلەك بەفر كەفتبوو و به‌رده‌وام ژی دباری. هینگێ شیانێن مه هند دباش نه‌بوون. پێلاڤێن مه پێلاڤێن کۆچه‌رۆیێن قێڕی بوون. جلکێن مه نه هند ستوور و گه‌رم بوون. چاکیتێ من گه‌له‌کێ سڤک و ته‌نک بوو.
من ژ گه‌لیێ فه‌قیر دا ڕێ و به‌فرێ ژی ده‌ستپێکر و له‌وه‌ندیێن خوه ل من هه‌ژاندن. من کر و به‌فر و باگه‌رێ کر. هنده‌ک جاران باگه‌ر وه‌سا یا ل ناڤ چاڤێن من دده‌ت. ئه‌ز نه‌شێم سه‌رێ خوه بلندکه‌م و ته‌ماشه‌ی ڕێیا خوه بکه‌م. بێهنا منا ته‌نگ دبیت.
ئێدی پشتی چه‌ند ده‌مژمێره‌کێن شه‌ڕه‌کی گران لگه‌ل باهۆز و باگه‌رێ و ڕێکێن چیا‌یێن ئاسێ یێن زێوه، زلیێ و سێری، هێدی هێدی له‌شکه‌رێ سه‌رمایێ و برسێ، ل سه‌ر من زاڵ بوو. گه‌له‌ک جارا من دڤیا ئێدی ئاڵایێ سپی بلندکه‌م و ڕاده‌ستی هه‌رسێ دوژمنێن کوژه‌ک؛ برسێ، سه‌رمایێ و وه‌ستیانێ ببم و پاڵا خوه بده‌مه به‌ر به‌ره‌کی یان ڕه‌ڤه‌زه‌کێ و پاڵده‌م. لێ ژ ئالیه‌کی ژی ڤه ئه‌گه‌رێن ڕاده‌ستنه‌بوونێ پتر و بهێزتر بوون. چونکی ئه‌گه‌ر ئه‌ز ڕوونشتم ئێدی دبیت برس سه‌رما وه‌نه‌که‌ت ئه‌ز ڕابمه‌ڤه و هۆسا ژی دێ ل جهێ خوه ژ سه‌رما ڕه‌ق بم. یا ژ وێ ژی گرنگتر بۆ مه پێشمه‌رگا ئه‌و بوو کو؛ ئه‌و ئه‌رکێ ب مه دهاته سپارتن، ئه‌گه‌ر مرن ژی تێدا بیت دڤێت بێ گیرۆبوون و بله‌ز بجی بینین. لۆما من پچه‌کا دی هێز دا خوه و ئه‌ز ل وان چیا و چه‌لیختێن بلند و دژوار سه‌رکه‌فتم و هێدی هێدی چووم.
به‌لێ یا وه ل من هاتی هنده‌ک جارا چاڤێن من دگرتینه و ئه‌زێ دچم. ده‌ما چاڤێن من دکه‌ڤنه سه‌رێک که‌رباره‌کا ئاگری و پێچه‌کا نانی و تراره‌کێ شیری و چادانکه‌کێ چایێ دناڤ په‌لا ڕا یێن تێنه پێش چاڤێن من.
ده‌مه‌کی ئه‌زێ دچم و دیسان چاڤێن منێن که‌فتینه‌ڤه سه‌رێک. من ل ده‌نگێ ڕه‌وینا سا چاڤێن خوه ڤه‌کرن. من دیت کو ئه‌زێ ل چیایێ گوندێ درگنی. ئێدی هیڤیه‌کێ دلێ من تژی کر. چونکی ڕه‌وینا سا نیشانا هه‌بوونا مرۆڤان و په‌زی یه. ئەز ژی ل دووڤ سه‌متا ده‌نگێ سه‌ی چووم، من ئاگره‌ک دیت. ب دیتنا ئاگری پتر دلێ من گه‌ش بوو و پێن من ڤه‌شتان. من ژی ڕاست قه‌ستا ئاگری کر. ده‌ما ئه‌ز نیزیک بوویم، من دیت کو ئه‌ڤه دنخەیێ درگنی یه، ئه‌و یێ ل بەر ئاگرەكی. وی ئاگرەكێ تێر پەلۆخەیێن گه‌ش یێ هلكری و سینگێ خوه یێ دایه ئاگری. دنخه خه‌لکێ گوندێ درگنی بوو. ئه‌و مرۆڤه‌کی دین (شێت) بوو، به‌لێ گه‌له‌کێ سوحبه‌ت خوه‌ش بوو.
ده‌ستپێکێ من وه‌کی دینا خوه د ئاگری وه‌رکر، ژ سه‌رما و قه‌ڕمینێ. پاشی ئه‌ز ڕوونشتم. وی هنده‌ک نان دا من. ئه‌زێ دخۆم به‌لێ هێشتا ژ سه‌رما، برسا و وه‌ستیانێ ئه‌زێ ڤه‌دله‌رزم. پشتی بیسته‌کێ پچه‌ک بێهنا من هات و هشێن من هاتنه سه‌رێ من.
هه‌لبه‌ت دنخه‌ی به‌رده‌وام ته‌ماشه‌ی من دکر و وی ددیت کانێ ئه‌ز د چ ڕه‌وش دامه. د چاڤێن وی دا من دخواند کانێ چه‌ند دلێ ویێ ب من دسۆژیت.
پاشی من دیت وی دارکه‌ک هه‌لگرت و ب وی دارکی خوه ب خوه‌لیا دۆرێن ئاگری مژیل کر و پاشی سه‌رێ خوه ڕاکر و ب وان چاڤێن تژی دلۆڤانی ته‌ماشه‌ی من کر و گۆته من: مامۆ ؟ من ژی گۆتێ: به‌لێ مامێ دنخه. پاشی گۆته من: ئێ مامۆ ما دێ هه‌تا که‌نگی دڤی حالی دابن. وه‌ڵا هۆسا چێنابیت. نە هوون دشێن حکومه‌تا ئیراقێ بشکێنن و نە ژی ئه‌و دشێن وه هه‌میا بکوژن. به‌س وە هه‌ردوو لایا رێكەكا دیا هه‌ی. من ژی گۆتێ: ئه‌و ڕێک چیه مامێ دنخه؟ وی به‌رسڤدا و گۆت: هوون دشێن بێژنە مەسعود بارزانی بلا ئه‌و و ئه‌حمه‌د حه‌سه‌ن به‌کر(1) هەردوو بهێنە بن گوهیژكا سەرێ كەڤۆتی(2) ل وێرێ لگه‌لێک ڕوونن و ڤێ ئارێشێ چاره‌سه‌ر بکه‌ن و پێكبێن.
من ژی د دلێ خوه دا گۆت: وه‌لا مامێ دنخه خه‌لک هه‌می ته دین حساب دکه‌ت، به‌لێ ئه‌ز بێژم ژ مه هه‌میا به‌س تۆی هشیاری. بڕاستی هزرا ته ژی سه‌د ژ سه‌دێ یا دروسته. به‌لێ پا کا کی په‌یاما ته بگه‌هینیت؟!
———————————————————-
(1) هینگێ ئه‌حمه‌د حه‌سه‌ن به‌کر سه‌رۆکێ ئیراقێ بوو. هێشتا سه‌دام نه‌ببوو سه‌رۆک.
(2) سه‌رێ که‌ڤۆتی چیایه‌که دکه‌ڤیته هنداڤی درگنی، داره‌کا گوهیژکێ یا بتنێ یا ل سه‌رێ وی چیای هه‌ی.
