ئه‌یوب عومه‌ر عیسا باتیفی کاروانـــه‌کێ درێژێ خــه‌باتــێ و شه‌هـــیـــدان
سەنتەرێ کۆماتە یێ دەکۆمێنتکرنا دیرووکا شۆڕشێ د بەردەوامیا هەڤدیتنێن خوە یێن مەیدانی دا ل رێکەفتی٢٧/٣/٢٠٢٣ دیدارەکێ دگەل پێشمەرگێ دێرین ئەیوب عومەر عیسا باتیفی ئەنجامددەت و دیرووکا خەبات و قوربانیدانا وی و مالباتا وی، مینا بەلگەنامەیەکا گرنگ تۆماردکەت و ژ ناڤچوونێ دپارێزیت.
ئەیوب عومه‌ر عیسا یێ ناڤدار ب ئەیوب باتیفی ل سالا ١٩٦٣ ل گوندێ دەحلی یێ سەر ب دەڤەرا باتیفا ڤا هاتیە سەر دنیایێ. ل ساڵا ١٩٧٠ ل ناحیا باتیفا دەست ب خواندنێ کریە و هەتا سالا ١٩٧٨ بەردەوام بوویە.
ل سەر دەمێ شۆڕشا ئەیلۆلێ برایێن ئەیوبی (رەمەزان، اسماعیل، مستەفا، محەمەد) دبنه پێشمەرگە ل هێزا حەمرین.
پشتی شکەستنا شۆڕشێ ل سالا ١٩٧٥ هەر چار برایێن وی یێن پێشمەرگە و برایێ وی ئەحمەد کو وی دەمی قوتابی بوو، خوه ڕاده‌ستی ئیراقێ ناکه‌ن و ئاوارەیی ئیرانێ دبن. ئەیوب و برایێ خوە جواجە بتنێ ل کوردستانێ دمینن. دەمێ هێزێن رژێمێ دکەڤن د باتیفا دا، دویڤچوونا برایێن ئەیوبی دکەن و د ئەنجامدا ل سالا ١٩٧٧ بابێ ئەیوبی دگرن و پشتی دەم سالەکێ دهێتە ئازادکرن.
ئەیوب باتیفی ژی ل سەر خواندانا خوە بەردەوامدبیت. ئەو و پسمامێ خوە مسلح حسێن وه‌ک دژایه‌تیه‌ک بۆ ڕژێما داگیرکه‌را ئیراقێ و بەرۆڤاژی بریارا رژێمێ، ئه‌و ب جل و بەرگێن کوردی دچنە قوتابخانێ. رژێم ژی ب بەردەوامی کێشە و ئالۆزیان بۆ ماڵا وان چێدکەت. ئه‌و د ناڤ گڤاشتنێن رژێمێ دا هەتا سالا ١٩٧٨ ل سەر خواندنا خوە بەردەوامدبیت. پشتی ئەو دزانیت کو دێ رژێم وی گریت، ئه‌و دچیتە گوندێ دەحلی و ل وێرێ خوە ژ بەر چاڤێن رژێمێ بەرزەدکەت.
ل ساڵا ١٩٧٨ رژێم جارەکا دی بابێ ئەیوبی دگریتەڤە و وی بۆ باشوورێ ئیراقێ دووردئێخیت. د سه‌ر هندێ ژی ڕا، ل سالا ١٩٧٩ رژێمێ گڤاشتنێن خوه ل سەر مالا وان و مرۆڤێن وان زێده دکه‌ت، دا کو وان نەچاردکەت بچن کەس و کارێن خوە یێن ئاواره‌ی ئیرانێ بووین، بینن ڕاده‌ستی حکومه‌تا ئیراقێ بکه‌ن. لێ ئه‌و خوه بۆ گه‌ف و گڤاشتنێن دوژمنی ناچه‌مینن.
پشتی بۆ ده‌مه‌کی کێم بابێ ئەیوبی هاتیه ئازادکرن، ئه‌و بۆ جارا سیێ دهێتەڤە گرتن و دەنگوباسێن وی ژ مالا وی دهێنە بڕین. خواجەیێ برایێ ئەیوبی هەتا ناحیا مەهناویێ یا سەر ب پارێزگەها دیوانێ ڤە، د دووف بابێ خوە دا دچیت. ئه‌و ل وێرێ بابێ خوە و مالا شه‌هید حەجی قادۆی دبینیت.
خەباتا نهێنی
ژ ئه‌گه‌رێ زۆراداری و زۆلما داگیرکه‌رێن ئیراقی، ئەیوب ل ساڵا ١٩٧٩ برێیا پسمامێ خوه شەهید سەدیق حەجی حسێن دهێتە رێکخستن د ناڤ رێکخستنێن نهێنی یێن پارتی دیموکراتی کوردستانێ دا. ئەیوب و شه‌هید سەدیق چەند جاره‌کا بەلاڤۆکا دگەل خوە دبەنە زاخۆ و دهۆکێ و ل سەر رێکخستیێن پارتی بەلاڤ دکەن.
گوندێ دەحلی ژی جهەکێ نه‌په‌نی و پاراستی بوو، لۆما پێشمەرگەی ب بەردەوامی هاتن و چوونا وێرێ دکر و ئێدی ڕۆژ بۆ ڕۆژێ تێکه‌لی و هاریکاری و ڕێبه‌ریا وان دگه‌ل پێشمه‌رگه‌ی زێده بوو. کاک ئەیوب عومه‌ر د ڤێ دیدارا خوە دا دبێژیت: ئێکەمین مه‌فره‌زا پێشمه‌رگێ شوڕشا گولانێ من دیتی، مه‌فره‌زه‌یه‌کا پێشمه‌رگێن باکوورێ کوردستانێ بوو، ب سه‌رپه‌رشتیا دربازێ خه‌لویێ بێجهی/گۆیی بوو، ل ساڵا 1976 من ئه‌و ل گوندێ دەحلی دیتین. هه‌ما بێژه ئه‌و مه‌فره‌زه هه‌موو خه‌لکێ باکوورێ کوردستانێ بوون. دربازێ خه‌لوی به‌رپرسێ مه‌فره‌زێ بوو. هه‌ڤالێن وی ژی یێن بیرا من لێ تێت: عەلی خانێ تێلویێ گۆیی و ئەحمەدێ پسمامێ وی بوون، لگه‌ل هەژمارەکا دی یا پێشمەرگە و کادران. جارا دووێ ژی ده‌ما هاتیڤه، وێ جارێ پێشمه‌رگه‌یه‌کی خه‌لکێ زاخۆ ژی لگه‌ل بوو ناڤێ وی مه‌تین بوو.
دیسان کاک ئه‌یوب دبێژیت: ده‌مه‌کی مه‌فره‌زا پێشمه‌رگا ل باشوورێ گوندێ به‌هنینه دکه‌ڤنه بۆسه‌یا دوژمنی و پێشمه‌رگه خه‌لیل بۆنجۆ/ بێجهی خه‌لکێ ده‌ڤه‌را گۆییان بریندار بوو. هه‌ڤالێن وی ئه‌و ئینا ده‌ف مه ل ده‌حلی. ئه‌ز ڕابووم چوومه باتیفا، بڕێکا هه‌ڤالێن مه یێن ڕێکخستنێ من ده‌رمان بۆ وی ئینان و ئه‌و هاته ده‌رمان کرن.
ڕێبه‌ری و چالاکیێن له‌شکه‌ری
ئەیوب و شه‌هید سەدیق ل ساڵا ١٩٨٠ رێبەریێ بۆ پێشمەرگەی دکەن ژبۆ لێدانا رەبیا دوژمنی ل گرداهۆلی ل نێزیك باژێڕکێ باتیفا.
ئەیوب ل دووف داخوازا شەهید سەدیق ژ بۆ چاڤنێڕیا بنگه‌هێ دوژمنی، رۆژا بەری ئەنجامدانا چالاکیێ، پێشمەرگەی د ناڤ پەزی ڕا دبەتە دەوروبەرێن رەبیێ. پێشمه‌رگه بڤی شێوه‌ی لگه‌ل ئه‌یوبی و دناڤ په‌زی ڕا خوه دگه‌هیننه نێزیکی بنگه‌هێ دوژمنی و چاڤنێڕیا وی دکه‌ن و دزڤڕن پلانا خوه ددان و پشتی هینگێ هێرشێ دکه‌نه سه‌ر. ئه‌ڤ چالاکیه ژ ئالیێ مەفرەزه‌کا پیشمه‌رگه‌ی ب سه‌رپه‌رشتیا عەلی قادۆی هاته ئه‌نجامدان.
داستانا زەمبیل فرۆشی
ل نەورۆزا ساڵا ١٩٨١سه‌دامێ دیکتاتۆرێ ئیراقێ تێته ئیبراهیم خه‌لیلا، ل نێزیکی زاخۆ. هه‌ڤالێن ڕێکخستنێ پێزانینان دگه‌هیننه پێشمه‌رگه‌ی کو؛ دبیت سه‌دام پشتی ئیبراهیم خه‌لیلا بێته باتیفا. ئه‌و هێزێن پیشمه‌رگه‌ی یێن وێ ده‌ڤه‌رێ، ب ڕێبه‌ری و هاریکاریا شه‌هید سه‌دیق حاجی حسێن، ل زه‌مبیلفرۆشی ل سه‌ر جادا زاخۆ-باتیفا بۆسه‌یه‌کا موکوم ددانن، کو ئه‌گه‌ر سه‌دام هات لێبده‌ن و بکوژن. ده‌مه‌کی کاروانه‌کێ تۆمبێلێن له‌شکه‌ری تێت و دکه‌ڤیته د بۆسه‌یێ دا، پێشمه‌رگه ژی گۆمان دکه‌ن کو سه‌دام لگه‌ل ڤی کاروانی بیت، لۆما ئه‌و ژ هه‌موو لایان ڤه هێرشه‌کا تووند دکه‌نه سه‌ر و شه‌ڕ هه‌تا ڕۆژئاڤا ڤه‌دکێشیت. هێزێن دوژمنی ژ باتیفا، فه‌وجا ده‌شتکا چیێ و زاخۆ و بهزاران له‌شکه‌ر ژ هه‌موو ئالیان ڤه هێرشی پیشمه‌رگه‌ی دکه‌ن و دڤێن پێشمه‌رگه‌ی دۆرپێچ که‌ن. لێ هێزێن پێشمه‌رگه‌ی شه‌ڕێ مان و نه‌مانێ دکه‌ن و ب سه‌دان ژ دوژمنی دکوژن. دڤی شه‌ڕی دا دوو پێشمه‌رگه و هه‌ڤوه‌ڵاتیه‌کێ خه‌لکێ باتیفا ب ناڤێ ئەحمەد مەلا یەحیا شه‌هید دبن. ڤی هه‌ڤوه‌ڵاتی بیستان ئاڤددا له‌شکه‌رێ ئیراقێ ئه‌و گولله‌بارانکر و شه‌هیدکر. ئەیوب و شه‌هید سەدیق و خواجە و هندەك مرۆڤێن وان یێن دی، کو هه‌موو سڤیل و بێ چه‌ک بوون، ئه‌و د رێیا بێغەبارێ ڕا خوە دگەهیننه باتیفا.
ب دەهان کەلەخێن دوژمنی ل قادا شەڕی دمینن. رژێمێ پشتی شەڕی ب چەند رۆژان، برێیا سه‌یان ل کەلەخێن سەربازێن خوە، د وان دۆل و نهالێن وێ دەڤەرێ دگه‌ڕیان و ب وێ ڕێکێ ته‌رمێن کوشتێن خوه کۆمدکرن.
ته‌رمێن هه‌رسێ شه‌هیدان دکەڤنه دەستێ دوژمنی، ئه‌و ژ بۆ بلندکرنا مۆرالێ له‌شکه‌رێ خوه یێ شکه‌ستی، ته‌رمێن هەر سێ شەهیدان ب تلیلی ڤە دئیننه باتیفا و هاڤێژنه سەر جادێ و داخوازێ ژ خەلکی دکەن کو وان ببەن ڤەشێرن.
پشتی ڤێ چالاکیێ رژێم پتر گڤاشتنێ ل سەر خەلکێ دەڤەرێ چێدکەت، نەخاسمە ئەوێن گومانا کوردپەروەریێ ل دەف هەی. شەهید سەدیق بۆ چەندین جارا دهێنەگرتن و ئەشکەنجەدان.
هه‌ر ل سالا ١٩٨١ بابێ ئەیوبی بۆ جارا سیێ دهێتە ئازادکرن. هه‌مان ساڵ ناڤێ ئەیوبئ ژی بۆ لەشکەریا نەچاری دهێت. بابێ وی دبێژیتێ: نابیت تۆ له‌شکه‌ریێ بۆ دوژمنێ خوه بکه‌ی. تڤه‌نگا خوه پاڤێژه ملێ خوه و هه‌ڕه بگه‌هه برایێن خوه و ببه پێشمه‌رگه. ئه‌م یێن فێری زیندانێ بووین، بلا جاره‌کا دی من بگرنه‌ڤه. تۆ خه‌ما وێ چه‌ندێ نه‌خۆ.
به‌ره‌ڤ چیا و پێشمه‌رگاتیێ
ئەیوب و شەهید سەدیق ل هاڤینا ساڵا ١٩٨١ پێکڤە پەیوەندیێ ب شۆڕشی دکەن. ئەو هەردوو ل دەستپێکێ دچنه باره‌گایێ لقا ئێک ل کۆماتەی و ل رێکخراوا شەهید زۆراب دبنە پێشمەرگە.
ل وێرێ شەهید سەدیق تێته ڤه‌گوهاستن بۆ لژنا ناوچا دهۆکێ. پشتی ساڵه‌کێ و ل ساڵا 1982 ئەیوب و تاهرێ پسمامێ خوە و موسا شلینی ژی تێنه ڤه‌گوهاستن بۆ رێکخراوا شەهید سەگڤان یا سه‌ر ب لژنا ناوچا زاخۆ ڤه.
ئێکەم چالاکیا لەشکەری
هه‌ر ل سالا ١٩٨٢بۆ جارا ئێکێ ئه‌یوب پشکداریێ د چالاکیەکا پێشمەرگەی دا دکەت. وی ده‌می ئه‌و بۆسه‌یه‌کێ بۆ هیزێن دوژمنی ددانن ل زه‌مبیلفرۆشی و هێرشێ دکه‌نه سه‌ر کاروانه‌کێ له‌شکه‌رێ دوژمنی. دیسان د هه‌مان ساڵ دا ئه‌و باره‌گایێ فه‌وجا له‌شکه‌رێ دوژمنی ل ده‌شتکا چیێ تۆپباران دکه‌ن و ب چه‌کێ سڤک و ناڤنجی هێرشێ دکه‌نه سه‌ر. هەر ل سالا ١٩٨٢ ئه‌و پشکداریی د هێرشا سه‌ر بنگه‌هێ (جیش الشعبي) یا دوژمنی دا دکه‌ت، ل ملا چەپەرا، ل پشتا گوندێ سیرکوتکی. د وێ چالاکیێ دا هێزێن پێشمەرگەی بنگه‌هێ دوژمنی بێ زیان دگرن. ٢١ کەسا دیلدکەن و ١٣ کلاشینکۆفان، تۆپەکا ٦٠ملم و دەزگایەکێ بێته‌لێ و هێسترەکێ وەکو دەستکەفت دگرن.
پاشی ل سالا ١٩٨٣ کاک ئەیوب باتیفی دگەل رێکخراوا شەهید سەگڤان بۆ لژنا ناوچا دهۆکێ دهێنە ڤەگوهازتن.
چالاکیێن ئەیوب باتیفی ل سنوورێ لژنا دهۆکێ
ئه‌و ل سنوورێ لژنا دهۆکێ ژی پشکداریێ د کۆمه‌کا چالاکیێن له‌شکه‌ری دا دکه‌ت وه‌کیگولانا ساڵا 1983 لێدانا رەبیا د ناڤبەرا زاویتە و مەمانێ دا.
دیسان هه‌ر ل هاڤینا وێ ساڵێ کاک ئه‌یوب پشکداریێ د چالاکیه‌کا دی ژی دا دکه‌ت. بڤی شێوێ خوارێ: رێکخراوێن شەهید ئەحمەد حاجی حسێن کو سادق گەلناسکی بەرپرسێ وێ بوو، رێکخراوا شەهید سەگڤان، ڕێکخراوا شه‌هیدێن ده‌کان یا سه‌ر ب لژنا شێخان ڤه، دگەل هێزەکا لژنا ناوچا دهۆکێ، ل ژێر سەرپەرشتیا عیسا زێوەیی. ده‌مژمێر 12 شه‌ڤێ هێرشی سه‌ر بنگه‌هێ دوژمنی یێ هنداڤی ماسیکێ دکه‌ن، ل ڕۆژئاڤایێ دهۆکێ. هێزێن پێشمەرگەی دەستێ خوە دداننه سەر بنگه‌هێ دوژمنی و هەژمارەکا چەکی و ٤ سەربازێن رژێمێ ژی دیلدکەن. لێ مخابن د وێ چالاکیێ دا دلۆڤان بێسکی، کو فەرماندێ مەفرەزێ بوو و پێشمەرگەیه‌کی قەهرەمان بوو شەهید دبیت.
ل ساڵا 1983 کاک ئه‌یوب تێته ڤه‌گوهاستن بۆ ڕێکخراوا ڕێنجبه‌ران هه‌ر ل لژنا دهۆکێ.
چالاکیا بەرێ بوهار
ئەیوب عومه‌ر باتیفی ل سالا ١٩٨٤ دگەل هەڤالێن خوە یێن لژنا دهۆکێ و بسه‌رپه‌رشتیا عیسا زێوه‌ی، سه‌دیق حه‌جی حسێن و شه‌هید فه‌ره‌ج ئه‌لندکی، ئه‌و بۆسه‌یه‌کێ بۆ هێزێن دوژمنی ددانن ل سه‌ر جادا دهۆک-زاویته، ل ناڤبەرا بەرێبهار و زاویتە. د وێ چالاکیێ دا کاروانه‌کێ له‌شکه‌رێ دوژمنی دکه‌ڤیته بۆسا پێشمه‌رگا و ژ هه‌ر چه‌ند ئالیان ڤه هێرشێ دکه‌نه سه‌ر و هه‌ژماره‌کا له‌شکه‌رێن دوژمنی دکوژن و دیل دکه‌ن. دیسان ١٨ کلاشینکۆفا و دەمانجەکێ ژی وه‌ک ده‌ستکه‌فت ڕادکەن. پاشی خوە بۆ چیایێ پشتا گوندێ بەرێبهار و بادێ ڤەدکێشن.
پشتی ڤێ چالاکیی دوژمن هێرشێ دکه‌ته سه‌ر گوندێ به‌رێبهار. هێزێن پێشمەرگەی جارەکا دی ل تانا گوندی و بەرگری مللیان دچن و هێزێن دوژمنی دشکێن. پاشی چوار فرۆکەیێن هەلیکۆپتەرێن رژێمێ ل هه‌وارا هێزێن خوه یێن شکه‌ستی تێن. مخابن دڤێ هێرشا هه‌لیکۆپته‌ران دا ئەحمەد کو پێشمەرگەکێ نوو بوو و تازه بۆ لژنا دهۆکێ هاتبوو ڤەگوهازتن. ئه‌حمه‌د و حەمید بەرۆشکی ل بەر تەحتەکی بوون و گوللەیێن ئاربیجییا خوە پالدابوونه بەرەکی. فیشەکەکا دۆشکا فرۆکەیا دوژمنی ب گوللەیەکێ ژ وان دکەڤیت و گوللە دپەقیت. ئەحمەد شەهید دبیت و حەمید و ٨ پێشمەرگێن دی ژی برینداردبن. شەر هەتا رۆژئاڤا بەردەوامدبیت و هێزێن پێشمەرگەی بەرگری مللیان قورتال دکەن و دگەل خوە دبەن. شەهید ئەحمەد ژی ل گوندێ بۆتیا دهێتە ڤەشارتن.
ئەیوب عومه‌رباتیفی پشتی ڤێ چالاکیێ دبیتە فەرماندێ مەفرەزێ و ل بارەگایێ لژنێ دمینیت و جارنا دگەل هێزا لژنا بەرەیێ جود کو عەلی تروانشی بەرپرسیاریا وێ دکر ل دەڤەرێ دەگەڕن و سمیناران پێشکەشی خەلکێ گوندێن ڕزگارکری دکەن.
دیسان ئه‌و د بەردەوامیا چالاکیێن خوە یێن لەشکەری دا، ل سالا ١٩٨٤ پشکداریێ د دانا بۆسەیه‌کێ دا دکەت، ل ناڤبەرا مانگێشکێ و حۆجاڤا. د وێ چالاکیێ دا هێزێن پێشمەرگەی هێرشێ دکه‌نه سه‌ر کاروانێ تۆمبێلین دوژمنی و ده‌ستێ خوه ددانه سه‌ر. چه‌ند له‌شکه‌ره‌کان دکوژن و چه‌نده‌کا ژی بریندار دکه‌ن و ٦ کلاشینکۆفان وەکو دەستکەفت ڕادکەن.
ل دوماهیا سالا ١٩٨٤ عەلی قادۆ دبیتە بەرپرسێ رێکخراوا رێنجبەران و شەهید سەدیق ژی دبیتە جێگرێ وی. ئەیوب عومه‌ر ژی لگه‌ل هەژمارەکا هەڤالێن وی یێن رێکخراوا شەهید سەگڤان، کو وی دەمی ئەو رێکخراو هاتبوو هەلوەشاندن، بۆ رێکخراوا رێنجبەران دهێنە ڤەگوهازتن.
چالاکیێن ئەیوب یێن لەشکەری دگەل رێکخراوا ڕێجبەران
ئەیوب و هەڤالێن خوە دگەل رێکخراوا رێنجبەران پشکداریێ د چەندین چالاکیێن لەشکەری دا دکەت وەکی:
-دانانا بۆسەیه‌کێ ل پێشیا هێزێن دوژمنی ل پشتا حۆجاڤا، د وێ چالاکیێ دا زیلەکا رژێمێ د هنگێڤن و هەژمارەکا سەربازان دکوژن وهەژمارەکا کلاشینکۆفان وەکو دەستکەفت رادکەن.
-ئەنجامدانا دوو چالاکیان دگەل شەهید سەدیق حەجی حسێن ل بنێ باتیفا، کو ئه‌و د وان چالاکیان دا چه‌ند له‌شکه‌رێن دوژمنی دکوژن و چه‌ند پارچه چه‌کا ژی وه‌ک ده‌ستکه‌فت دگرن.
-دانانا بۆسەیه‌کێ ل پێشیا زریپۆشەکێ ل گرسیسنێ ل رۆژئاڤایێ باتیفا ل ١٢ ئادارا ١٩٨٤.
-بەرسینگرتنا هێرشا مەزنا دوژمنی بۆ سەر هەردوو لژنێن دهۆکێ و زاخۆ ل هاڤینا ساڵا 1984.
-پشتی ڤێ هێرشێ، ئەیوب عومه‌ر و هەڤالێن خوە یێن رێکخروارا رێنجبەران دگەل سەید سالح پشکداریێ د تۆپبارانکرنا هێزێن دوژمنی دا دکه‌ن ل مانگێشکێ.
هەردەم لژنا زاخۆ پێشمەرگە ددانە لژنێن دهۆك و شێخان
ل دەستپێکا سالا ١٩٨٥ شەهید سەدیق حەجی حسێن دبیتە بەرپرسێ رێکخراوا شەهید حەمید حەفزوللا ل شوینا حەمید خواستی و بۆ لژنا ناوچا زاخۆ دهێتە ڤەگوهازتن. حەمید خواستی ژی دبیتە بەرپرسێ لەشکەریێ لژنا ناوچا ئامێدیێ. ئه‌یوب و هه‌ڤالێن خوه ژی لگه‌ل شه‌هید سه‌دیق حه‌جی حسێن، تێنه ڤه‌گوهاستن بۆ ڕێکخراوا شه‌هید حه‌مید حه‌فزلا ل لژنا زاخۆ.
ژبەر کێمیا هێزێن پێشمەرگەی ل لژنا ناوچا شێخان، ل گولانا ١٩٨٥ بریار هاته‌دان کو ڕێکخراوا شه‌هید حه‌مید حه‌فزلا ب سه‌رپه‌رشتیا شه‌هید سه‌دیق حه‌جی حسێن باتیفی، بچیت ئه‌رکێ خوه بۆ ده‌مه‌کی ل سنوورێ لژنا شێخان ببینیت.
پسمامێ ئەیوبی ل بەر کێلەکا وی شەهید دبیت
ده‌مێ ئه‌و دگه‌هنه ده‌ڤه‌را لژنا شیخان، ئێکسه‌ر ئه‌و بۆ ئێکەمین چالاکیا خوە ل لژنا ناوچا شێخان، دگەل رێکخراوا شەهیدێن دەکان، کو بەرپرسێ وێ شەهید ئەمین نسری بوو، ئاماده‌کاریێن خوه دکه‌ن و بنگه‌هێ جاشێن دوژمنی ل گرێ مغارا ل هنداڤی لاله‌شێ ده‌ستنیشان دکه‌ن.
پشتی چاڤنێڕیێ و پلاندانانێ پێشمه‌رگێ هه‌ردوو ڕێکخراوا ب سه‌رپه‌رشتیا به‌رپرسێن هه‌ردوو ڕێکخراوا شه‌هید ئه‌مین نسری و شه‌هید سه‌دیق حه‌جی حسێن باتیفی، هێرشی بنگه‌هێ دوژمنی دکه‌ن.
د ده‌مێ هێرشێدا، گاڤا شەهید سەدیق خوە ئاماده دکه‌ت کو گولله‌یه‌کا ئاربی جیێ ل بنگه‌هێ دوژمنی بده‌ت، گوللەیه‌كا دوژمنی ب وی دکەڤیت و شەهید دبیت. دیسان دەمێ شەهید ئەمین نسری خوە ژ بۆ لێدانا گولله‌یه‌کا نارنجۆک ئەندازێ ئامادەدکەت، گوللەیه‌ك ب وی ژی دکەڤیت و ئەو ژی برینداردبیت.
ئەیوب هەولددەت جەنازێ شەهید سەدیقێ پسمامێ خوە ژ جهێ شەری دووربێخیت. هێزێن پێشمەرگەی ژ بەر شەهید و برینداران خوە ڤەدکێشن. پشتی هینگێ ئەمین نسری ژی ژ بەر گرانیا برینا خوە شەهید دبیت. هێزێن پێشمەرگەی ته‌رمێن هه‌ردوو شەهیدان دبەنه ملبرکێ و ل وێرێ دشۆن. پاشی جەنازێ شەهید ئەمین نسری بۆ نسرا ڤه‌دگوهێزن و یێ شەهید سەدیقی ژی بۆ دەڤەرا باتیفا.
پشتی شەهیدبوونا سەدیق حەجی حسێنی، عەبدولکەریمێ فەرحۆی دبیتە بەرپرسێ رێکخراوا شەهید حەمید حەفزوللا، ئەیوب ژی هەر وەکو فەرماندێ مەفرەزێ دگەل وێ رێکخراوێ و ل لژنا ناوچا زاخۆ درێژیێ ب خەباتا خوە ددەت.
چالاکیێن سنوورێ لژنا ناوچا زاخۆ
ئەیوب عومه‌ر باتیفی ل لژنا ناوچا زاخۆ ژی دگەل هەڤالێن خوە یێن پێشمەرگە پشکداریێ د هەژمارەکا چالاکیێن لەشکەری دا دکەت وەکی:
-لێدان و گرتنا رەبیا هنداڤی شەرانشێ، ل دوماهیا سالا ١٩٨٥، کو چالاکیەکا هەڤپشك بوو دگەل رێکخراوا شه‌هید شه‌هباز سالح.
-دانانا بۆسەیەکێ ل بنێ ئاڤگەنیێ، ل سه‌ر ڕێکا زاخۆ-باتیفا، لگه‌ل لێدانا ٣ رەبیێن دوژمنی ب پشکداریا پشکا پتر ژ هێزێن لژنا ناوچا زاخۆ ل پاییزا سالا ١٩٨٥. ژ هەژی ئاماژێ یە کو هشیار زێباری و رۆژنامەڤانێ بریتانی گوین رۆبرت د ڤێ چالاکیێ دا پشکداربوون. گوین ڕۆبه‌رت ئه‌ڤ چالاکیه و هنده‌ک چالاکیێن دیێن پێشمه‌رگه‌ی یێن وێ ساڵێ تۆمارکرن و فلمه‌کی دێکۆمه‌نتاری ل سه‌ر شوڕشێ چێکر و ل بریتانیا به‌ڵاڤکر.
-ئەیوب باتیفی ل هه‌ر ل سالا 1986 پشکداریێ د چالاکیا سوارکا سپی دا دکەت، ل هنداڤی دێمکا. د وێ چالاکیێ دا هەژمارەکا پێشمەرگەی دکەڤنه ناڤ مینان و د ئەنجامدا ئه‌ڤ 5 پێشمەرگە شەهید دبن: جه‌بار شیلانی، حسن محمد شیلانی، علی محمود که‌شانی، خالد سندی و تاهر سندی. هه‌روه‌سا هەژمارەکا دی ژی برینداردبن، ژ وان ژی محمەد خالد بۆسەلی، عەلی قادۆ و محەمەد حەسەن شەرنەخی بگرانی برینداردبن و عەبدولکەریم فەرحۆ کەشانی و شه‌هید مه‌لا ڕه‌مه‌زان بهه‌شتی ژی ب سڤکی برینداردبن.
-دیسان ل ساڵا 1987 هێرشکرن و گرتنا باره‌گایێ سریا له‌شکه‌رێ دوژمنی ل نێزیک گوندێ زرێزە، کو د وێ چالاکیێ دا پیشمه‌رگه‌ی هەژمارەکا گەلەک مەزنا چەك و تەقەمەنیان وه‌ک ده‌ستکه‌فت گرتن. ئەڤ چالاکیە ل بوهارا ساڵا ١٩٨٧ ب هاریکاریا دوو کەسێن خەلکێ باتیفا هاتە ئەنجامدان. بەرگری مللیێ گوندێ ئاڤهێ هاریکاریا پێشمەرگەی د ڤەگوهاستنا چەك و تەقەمەنیا داکر.
هه‌ر ل ساڵا ١٩٨٧ ده‌مێ حکومه‌تا ئیراقێ بڕیارا وێرانکرنا گوندێن ئازادکری و نیڤ ئازادکریێن کوردستانێ دده‌ت، رێکخراوا شەهید حەمید حەفزوللا بنگه‌هه‌کێ ده‌مکی ل سەر سوارا ل باشوورێ ڕۆژهه‌لاتێ باتیفا ددانیت. دەمێ رژێم هێرشێ دکەتە سەر گوندێ کانیا تویا، پێشمەرگێن رێکخراوا شەهید حەمید حەفزوللا و هەژمارەکا دی یا هێزێن لژنا زاخۆ بەرسینگێ سریەکا دوژمنی دگرن و هێرشا وان دشکێنن و ئەفسەرەکی و ٤ سەربازا ژی دیلدکەن و هەژمارەکا چەك و تەقەمەنی ژی رادکەن. هه‌ر ل رۆژا دووێ یا وی شەڕی دوژمن ژ ئالیی باتیفا و بێگۆڤاڤە هێرشێ دکەتە سەر هێزێن پێشمەرگەی. ل زرێزە هێزێن پێشمەرگەی به‌رسینگێ هێزێن دوژمنی دگرن و زیانەکا مەزن دگەهیننێ. هه‌ژماره‌کا مه‌زن ژ له‌شکه‌ر و جاشێن هێرشبه‌رێن دوژمنی تێته کوشتن، کو دوو سه‌رۆک جاش ژی دناڤ کوشتیا دا بوون. ئێک خه‌لکی زاخۆ و یێ دی ژی خه‌لکێ ده‌ڤه‌را سێمێلێ بوو.
-پشتی شەڕێ زرێزە پێشمەرگێن رێکخراوێن شەهید حەمید حەفزوللا و شۆڕش، و لگه‌ل مه‌فره‌زه‌یه‌کێ بسه‌رپه‌رشتیا مغاویر شیلانی هێرشی سه‌ر بنگه‌هێ دوژمنی یێ گرداهۆلی دکه‌ن، ل نێزیکی باژێڕکێ باتیفا. پاشی هه‌مان هێزا پێشمه‌رگه‌ی، بۆسەیه‌کێ ل سه‌ر ڕێکا باتیفا-بێگۆڤا ل چه‌پێن بیرکێ ددانیت. چار تۆمبێلێن دوژمنی دکه‌ڤنه بۆسه‌یا پێشمه‌رگه‌ی و پێشمه‌رگه د ئێک ده‌م دا هێرشی سه‌ر کاروانێ دوژمنی و بنگه‌هێ دوژمنی یێ سوارا به‌نا دکه‌ت و دربه‌کێ مه‌زن ل دوژمنی دده‌ت.
د وێ هێرشێ دا پێشمه‌رگه هه‌ر زوو تۆمبێلا سه‌رۆک جاش فارس مستەفا سلێڤانەیی دسۆژن. هێزەکا مەزنا دوژمنی ژ باتیفا ڤە د هه‌وارا هێزا خوه یا شکه‌ستی دهێت. تۆپچیێ ده‌ستهه‌ل و زیره‌کێ شوڕشێ موسا هەرکوندی ب تۆپا ١٢٠ وێ هێزێ تۆپباراندکەت. فرۆکەیین هەلیکۆپتەرێن دوژمنی ژی پشکداریێ د شەری دا دکەن. شەر هەتا رۆژئاڤا بەردەوام دبیت.
ئەیوب عومه‌ر باتیفی هه‌ر ل سالا ١٩٨٧ و هەتا ئەنفالێن رەشێن سالا ١٩٨٨ پشکداریێ د هەژمارەکا مەزن یا شەر و داستانێن پیشمەرگەی دا دکەت وەکی:
-داستانا شەرانشێ یا ئێکێ و دووێ ل ساڵا 1987 و 1988
-داستانا فەوجا دێمکا 1987
-داستانا کانیماسێ 13/9/1987
-داستانا دێرەلووکێ 11/1/1988
پشتی داستانا دێرەلووکێ شەهید سمایل تەعبیر ل شوینا عەبدولکەریم فەرحۆی دبیتە بەرپرسێ رێکخراوێ و سالح حەجی حسێن ژی دبیتە کادرێ ڕێکخراوێ.
ل گولانا ١٩٨٨ ئەیوب و سالح حەجی حسێن و گوهدارێ پسمامێ وان دچنە گوندێ کانیا تویا. دەنگێ تۆپبارانەکا نێزیك دهێتە وان. پاشی ئه‌و دزانن کو هێزەکا دوژمنی یا بسه‌ر گوندێ شیڤێ دا گرتی و یێ گوندی دسۆژن. هه‌ر ئه‌و هێز یا بەرەف گوندێن کوڕکا و کانیا تویا ڤە دهێت و هێرشێ دکه‌ت. ئه‌و هه‌رسێ لگه‌ل هنده‌ک هه‌ڤالێن دی ئاربیجیه‌کێ دبه‌ن و به‌رسینگێ هیزا دوژمنی یا هێرشکه‌ر دگرن و دژه هێرشه‌کا دژوار دکه‌نه سه‌ر هێزا دوژمنی.
ده‌مه‌کی پێشمه‌رگه و هێزا دوژمنی بناڤێک دکه‌ڤن و شه‌ڕ ب چه‌کێ سپی ده‌ستپێدکه‌ت. ئه‌و ب وێ هیزا خوه یا کێم هێرشا مه‌زنا دوژمنی دشکێنن و دوژمن به‌ره‌ڤ باره‌گایێ لیوا له‌شکه‌ری یا بێگۆڤا دڕه‌ڤیت. ئه‌یوب و هه‌ڤالێن خوه، هەژمارەکا مه‌زنا سەربازێن دوژمنی دکوژن و هێرشا دوژمنی دشکێنن. هێزێن پێشمەرگەی ٨ کلاشینکۆفا، ئار بیجیەکێ و تۆپەکا دوژمنی ژی دگرن. هه‌روه‌سا ئه‌و سێ سەربازێن بریندار ژی دیلدکەن، لێ هه‌ر ل وێرێ وان ئازاد دکەن.
پشتی ڤێ چالاکیێ کاک ئەیوب دبیتە جێگرێ بەرپرسێ رێکخراوا گۆڤەند بسه‌رپه‌رشتیا شه‌هید سمایل تەعبیر. ئه‌و دگه‌ل رێکخراوا گۆڤەند پشکداریێ د دانانا بۆسەیه‌کێ دا دکەت، ل پێشیا فەرماندێ لیوایا بێگۆڤا یا له‌شکه‌ری عه‌مید ئەحمەد، ل ناڤبەرا گوندێ گرێ بیێ و بێگۆڤا. د وێ چالاکیێ ژی پێشمه‌رگه تۆمبێله‌کا دوژمنی ژناڤ دبه‌ن و هه‌ژماره‌کا له‌شکه‌ران ژی دکوژن و بریندار دکه‌ن و 4 کلاشینکۆفان ژی وه‌ک ده‌ستکه‌فت ڕادکەن.
رێکخراوا گۆڤەند ب چه‌کێ کیمیاوی تێته قڕکرن
بەری ئەنفالان پێشمەرگێن رێکخراوا گۆڤەند بارەگایێ خوە ل گوندێ تویکا ددانن، ل ده‌ڤه‌را زاخۆ. هێزێن دوژمنی ژی ل ده‌ستپێکا ئه‌نفالان هێرشێ دکه‌ن و دەڤەرێن ڕزگارکری دوورپێچ دکەن.
وی ده‌می هێزه‌کا پێشمەرگین رێکخراوا گۆڤەند دگەل سمایل تەعبیری ل بارەگایێ رێکخراوێ ل گوندێ تویکا دمینن د ئه‌رکێ خوه یێ پێشمه‌رگاتیێ دا. کاک ئەیوب ژی مه‌فره‌زه‌یه‌کێ دگه‌ل خوه دبه‌ت و دگەل سلۆ خدر به‌رپرسێ لژنا زاخۆ و سالح حەجی حسێن کادرێ ڕێکخراوێ، ئه‌و بۆ ئه‌رکه‌کی دی به‌ره‌ڤ ده‌ڤه‌را پشت جادا زاخۆ-بێگۆڤاڤه دچن.
فرۆکەیێن جه‌نگیێن دوژمنی ل ڕۆژا ٢٥/٨/١٩٨٨ سپێدێ ڕادبن و تێنه سه‌ر ده‌ڤه‌را به‌هدینان و گه‌له‌ک گوند و جهێن وان ده‌ڤه‌ران ب چەکێ کیمیاوی بومبەباران دکەن. ئەیوب و هه‌ڤالێن خوه، ل هنداڤی گوندێ بۆسەلێ دبینن دەما کو دویکێلا چەکێ کیمیاوی ژ گوندێ برجینی بلند دبیت، کو جهه‌کێ بلند و به‌رچاڤ بوو. لێ ئەو نزانیت کو د هه‌مان ده‌م دا بارەگایێ رێکخراوا وان ژی، ل گوندێ تویکا یێ هاتیە کیمیابارانکرن. هه‌تا پشتی هینگێ ئەو دزانن کو بارەگایێ رێکخراوا گۆڤەند ژی یێ هاتیە کیمیابارانکرن و ١٣ پێشمەرگە دگەل مختارێ گوندی یێن هاتینه شەهیدکرن. هێزێن لژنا زاخۆ ل هه‌وارا شه‌هیدان دچن و ته‌رمێن وان ب تراکتوره‌کێ دبەنە گوندێ پیرەکا. ل وێرێ وان د دوو چالان دا ڤەدشێرن.
ئێڤاری ئەیوب دگەل دوو پێشمەرگا ب بن جادێ دکەڤیت و دچنه گوندێ غولدیان. ل وێرێ ئه‌و و هه‌ڤالێن ویێن ماینه ساخ هه‌ڤدوو دبینن.
ئه‌و ل گوندێ پاسێ دگه‌هنه مال و زاڕۆکێن خوه و دکه‌ڤنه ڕێ به‌ره‌ڤ ده‌ڤه‌را به‌رواری بالا. لێ ل وێرێ دکەڤنه بەر تۆپبارانا دوژمنی. رێیێن ده‌ربازبوونێ ژی هەمی دهێنەگرتن.
نه ته‌نێ هه‌ڤالێن ویێن پێشمه‌رگه، لێ مالباتا وی ژی ل ئه‌نفالان تێنه قڕکرن
ل رۆژئاڤا ئەیوب، ئازاد شەفیق، هشیار سالح و هەژمارەکا پێشمەرگا، ئه‌و ژن و زارۆک و هەژمارەکا زەلاما دهێلنه ل به‌ر ڕووبارێ نهنهکی و قەستا گوندێ گرکا دکەن، بۆ سه‌ر جادا بێگۆڤا-کانیماسێ، دا کو ڕێکێ کۆنترۆل بکه‌ن بۆ ده‌ربازبوونا ژن و زارۆکان. لێ مخابن ل بن تۆپباران دژوارا دوژمنی، ئەو زەلام و ژن و زارۆك د ڕیێا کانیبەلاڤێ ڕا پاشڤه ڤەدگەرنەڤە دەڤەرێ. رژێم ژی ب بەردەوامی کانیبەلاڤێ و وەلاتێ شخۆیێ تۆپباران دکەت.
مخابن ئەو کاروانێ ژن و زارۆكان، د ڕێیا ڤه‌گه‌ڕێ دا، ل گەلیێ دهێ دکەڤنه دەستێ هێزێن دوژمنی. ژ وان زاڕۆکان 15 که‌سێن دبن 18 ساڵیێ دا، ژ مالبات و مرۆڤێن کاک ئه‌یوبی، بده‌ستێ دوژمنی تێنه ئه‌نفالکرن و شه‌هیدکرن، کو هه‌تا نوکه ژی گۆڕێن وان نه ددیارن.
بڤی شێوه‌ی کاک ئه‌یوب و هه‌ڤالێن خوه، ژ مال و زاڕۆکێن خوه ڤه‌دقه‌تن و دچن ب شه‌ڤ دبن قەسیسەکێ ڕا ل جادێ دەربازدبن و خوە دگەهینن گوندێ قومریێ. ئه‌و ل وێرێ هێزه‌کا پێشمه‌رگێن لژنا ئامێدیێ بسه‌رپه‌رشتیا سەید نایف دبینن. پشتی هینگێ پێکڤه خوە دگەهیننه سەر سنووری. پشتی کو ده‌وله‌تا ترکی سنوورێ خوە ل به‌ر په‌نابه‌ران ڤەدکەت، ئه‌و دچنه گوندێ ئارۆشێ یێ باکوورێ کوردستانێ. پاشی وان دبه‌نه سلۆپیا. ئەیوب و مرۆڤێن خوە چ ژ کەس و کارێن خوە نزانن.
پاشی ل سه‌ر داخوازا وان حکومه‌تا ترکی وان دبه‌ته سه‌ر سنوورێ باکوور و ڕۆژهه‌لات و ئه‌و دچنه ڕۆژهه‌لاتێ کوردستانێ و ل نەغەدێ ل ناڤ مالێن کەس و کارێن خوە دمینن.
سه‌رهلدان و ڤه‌گه‌ڕا کوردستانێ
پشتی سەرهەلدانێ ئەیوب ڤەدگەریتەڤە کوردستانێ، دگەل حەبیب کەلەش دچیتە شێلادزێ. پشتی هینگێ ل بارەگایی لقێ ل دهۆکێ دمینیت. پاشی بۆ لەشکەرێ زاخۆ دهێتە ڤەگوهاستن.
ل وێرێ دبیتە بەرپرسێ حەرەکاتا ل بەتالیۆنا شابانیێ، کو عەبدولخالق بابیری فه‌رماندێ هیزا وان بوو. ئەیوب هەتا سالا ١٩٩٥ ل وێرێ دمینیت.
پشتی کو چه‌کدارێن پەکەکێ ل ساڵا 1995 هێرشێ دکەنە سەر کوردستانا ئازاد و حکومه‌تا کوردستانێ، ئەیوب و کەس و کارێن خوە ژی ل دژی هێرشێن تروریستێن په‌که‌کێ، به‌ڕه‌ڤانیێ ژ کوردستانێ دکه‌ن.
پشتی به‌عسیێن داگیرکه‌ر پ.ک.ک ڕێبازا وان به‌رده‌وام دکه‌ت
پشتی هێرسا پ.ک.ک یا ساڵا 1995 بۆ سه‌ر کوردستانێ، کو گه‌له‌ک پێشمه‌رگه و خه‌لکێ سڤیلێ کوردستانێ شه‌هیدکرن. ئێدی کاک ئه‌یوب و لگه‌ل مرۆڤ و هه‌ڤالێن خوه ژی، وه‌ک پێشمه‌رگێن کوردستانێ، ده‌ست ب به‌ڕه‌ڤانیکرن و پاراستنا کوردستانێ و خه‌لکێ وێ دکه‌ن ل هه‌مبه‌ری هێرشێن تروریستان. د ڤی ده‌می دا، د هێرشه‌کا پ.ک.ک دا بۆ سه‌ر پێشمه‌رگه‌ی، محەمەدێ برایێ ئەیوبی و حەسەنێ پسمامێ وی ل نێزیکی گوندێ شێلازا، ل ده‌ڤه‌را به‌رواری باڵا، هه‌ردوو پێکڤه بده‌ستێ پ.ک.ک تێنه شه‌هید کرن.
کاک ئەیوب د به‌رده‌وامیا کار و خه‌باتا خوه یا پێشمه‌رگاتیێ دا، ل ساڵا ١٩٩٨ دبیتە جێگرێ بەرپرسێ کەرتەکێ له‌شکه‌ری ل گوندێ دێمکا، کو عبدالکریم فەرحۆ فه‌رماندێ وان بوو و سەر ب لژنا ناوچا زاخۆ ڤە بوو.
کاک ئەیوبی ل ساڵا ٢٠٠٣ ل زوممار و کەسکێ پشکداری د شەرێ ئازادیا عێراقێ ژی دا کریه.
پشتی دامەزراندنا فەرماندا دهۆكێ یا له‌شکه‌ری، ئه‌و دبیتە فه‌رماندێ بەتالیونێ ل سوپایێ چار ل هێزا ٢ سەر ب فەرماندەییا دهۆکێ ڤە. ل دەستپێکێ ئه‌و بارەگایی بەتالیۆنا خوە ل گوندێ بالقۆسێ ل ده‌شتا دووبانێ ددانن. پشتی هینگێ بارەگایی خوە دبەنە زوممار.
زنجیرا هێرش و کوشتن و تاوانان، ژ به‌عسیا، پ.ک.ک، قاعیده، داعشێ و حه‌شدا وه‌حشی به‌رده‌وامه ل سه‌ر کوردستانێ
ل ڤێ ده‌ڤه‌رێ گه‌له‌ک جاران باره‌گایێ وان دکه‌ڤیته به‌ر هێرش و کارێن تروریستی یێن قاعیده. کاک ئەیوب لگه‌ل هه‌ڤالێن خوه یێن پێشمه‌رگه، ل ڤێ دەڤەرێ پشکداریێ د شەرێن دژی تیرۆریستێن قاعدە دا دکه‌ت. دیسان چەندین جاران باره‌گایێ وان دکەڤیتە بەر هێرشێن ترۆمبێلێن مینڕێژکری.
پاشی ل هاڤینا ساڵا ٢٠١٤ هێرشێن تروریستێن داعش ده‌ستپێدکه‌ن بۆ سه‌ر کوردستانێ. کاک ئه‌یوب و هه‌ڤالێن خوه ل میحوەرێ رەبیعە، ل ڕۆژئاڤایێ دیجله‌ی، پشکداریێ د شەرێن دەستپێکی یێن ل دژی تیرۆریستێن داعش دا دکەت. پشتی کەتنا شەنگالێ، ئه‌و ژ لایێ پەکەکێ و تیرۆرستێن داعش ڤە دهێنە دوورپێچکرن. لێ پشتی شکاندنا دۆرپێچێ ئه‌و بارەگایی خوە دبەنە گوزگیرانێ.
پشتی هێزێن زێرەڤانیێ ل سەهلیج گەلەك شەهیدان ددەن، ئەیوب و بەتالیۆنا خوە د ڕێیا بەنداڤا مۆسل ڕا ل تانا هێزێن زێرەڤانیێ دچن.
کاروانێ شه‌هید و قوربانیدانێ یێ به‌رده‌وامه
ئەیوب و رێبەرێ کوڕێ خوە و هەڤالێن خوە پشکداریی د ئازادکرنا گوندێ سەهلج دا دکەن. ل ٢٢/٨/٢٠١٤ تۆپەکا تیرۆریستێن داعش ب بەر پیێن وی دکەڤیت و بگرانی ژ سینگێ خوە برینداردبیت. چار په‌راسیێن وی و سیها وی ژی دهێنە په‌ڕتاندن. ده‌ستپێکێ وی دئیننه دهۆکێ. لێ چاره‌سه‌ریا وی ل دهۆکێ نابیت. لۆما پشتی هینگێ وی ژ بۆ چارەسەریێ دبه‌نه باتمانێ ل باکوورێ کوردستانێ.
ئەو نێزیکی ٤٠ رۆژان د خەستەخانێ دا دمینیت. رێڤەبەرێ خەستەخانا باتمانێ کو کوردەکێ باکوور بوو کەس و کارێن ئەیوبی پشتڕاست دکەت ودبێژیتە وان: ئەگەر چارەسەریا ئەیوبی ل دەف من نەبیت، ئەز دێ وی ل سەر حسابا خوە هنێرمه ئەنقەرە یان ستەنبۆلێ. پشتی هینگێ چەند نشتەرگەری بۆ وی دهێنە کرن و هناڤێن وی ژ خوینێ دهێنە پاقژکرن و برینا وی جارا ئێکێ بێ پەنج ددروین و ئێدی برینا وی خوە ددەتە ئێك.
مستەفایێ برایێ ئەیوبی ژی، پشتی برینداربوونا ئەیوبی ب ٨ رۆژان، ئه‌و ژی دهێرشه‌کا خوه‌کوژیا داعش دا، ل زوممار شەهید دبیت. لێ ئه‌یوبی های ژ شه‌هیدبوونا برایێ خوه نینه. پشتی کو ئه‌و پچه‌ک بسه‌ر خوه‌ڤه تێت و ڤەدگەریتە کوردستانێ، ب ٤٠ رۆژان ژنوی دزانیت کو مستەفایی برایێ وی یێ شەهید بووی.
کاک ئەیوب نێزیکی ٦ مه‌هان به‌رده‌وام هاتن و چوونا باتمانێ دکەت، بۆ تەمامکرنا چارەسەریا خوە. مه‌هه‌کێ ژی چارەسەریا سروشتی دبینیت. ئەیوب د ڤی ماوەی دا چەندین جاران سەرەدانا هەڤالێن خوە یێن پێشمەرگە ل بەرەیێن شەڕی دکەت. پشتی کو چارەسەریا وی تەمام دبیت، ئه‌و ڤەدگەریتەڤە بەرەیێن شەڕی لگه‌ل هه‌ڤالێن خوه.
ئەیوب عومه‌ر ل سالا ٢٠١٧ پشتی خەباتەکا درێژ و ٢٠ شەهیدان، ب پلا عەمیدێ پەکەفتی ٥٠٪ دهێتە خانەنشینکرن.
ناڤێن شەهیدێن بنەمالا ئەیوب عومه‌ر عیسا باتیفی:
١-عبدالرحمن عومه‌ر عیسا، برا ل سالا ١٩٦٩ ل بالەکایەتی بده‌ستێ له‌شکه‌رێ ئیراقێ هاتیه شه‌هیدکرن.
٢-مصلح حسێن عیسا، پسمام، بدەستێ ئیستخباراتێ حکومه‌تا ئیراقێ ل سالا ١٩٨٢هاتیە شەهیدکرن.
٣-صدیق حسێن عیسا، پسمام، سالا ١٩٨٥ ل شێخان ب ده‌ستێ هیزێن ئیراقێ هاتیه شه‌هیدکرن.
٤-تاهر عەلی عیسا، پسمام، سالا ١٩٨٦ بده‌ستێ حکومه‌تا ئیراقێ هاتیە سێدارەدان
٥-سەعید عەبدال عیسا، پسمام سالا ١٩٨٥ هاتیە سێدارەدان بده‌ستێ ڕژێما ئیراقێ.
٦-توفیق حەجی شەریف، پسمام، سالا ١٩٨٦ هاتیە سێدارەدان بده‌ستێ ڕژێما ئیراقێ.
٧-فریق حسێن عیسا، پسمام، سالا ١٩٨٨ ل ئەنفالان هاتیه شه‌هیدکرن.
٨-کامیران سالح حسێن عیسا، کوڕێ پسمامی، ل سالا ١٩٨٨ ل ئەنفالان هاتیه شه‌هیدکرن.
٩-دژوار سالح حسێن عیسا، کوڕێ پسمامی، ل سالا ١٩٨٨ ل ئەنفالان هاتیه شه‌هیدکرن.
١٠-عیسا عەلی عیسا، پسمام، ل سالا ١٩٨٨ ل ئەنفالان هاتیه شه‌هیدکرن.
١١-عیسا محمد شەریف، پسمام، ل سالا ١٩٨٨ ل ئەنفالان هاتیه شه‌هیدکرن.
١٢-حسنی سالح شەریف، پسمام، ل سالا ١٩٨٨ ل ئەنفالان هاتیه شه‌هیدکرن.
١٣-حەسەن عەبدوللا شەریف، پسمام، ل سالا ١٩٨٨ ل ئەنفالان هاتیه شه‌هیدکرن.
١٤-نایف عەبدوللا شەریف، پسمام، ل سالا ١٩٨٨ ل ئەنفالان هاتیه شه‌هیدکرن.
١٥-محمد عومه‌ر عیسا، برا، بدەستێن پەکەکێ ل سالا ١٩٩٥ هاتیە شەهیدکرن.
١٦-حەسەن عه‌لی عیسا، پسمام، بدەستێن پەکەکێ ل سالا ١٩٩٥ هاتیە شەهیدکرن.
١٧-مستەفا عومه‌ر عیسا، برا، ل شەڕێ داعش سالا ٢٠١٤ شەهیدبوویە.
١٨-ئۆسمان محمد ئەحمەد، خوارزا، ل سالا ١٩٨٨ ل ئەنفالان هاتیه شه‌هیدکرن.
١٩-سەدیق فەریق تاها، پسمام، ل سالا ١٩٨٨ ل ئەنفالان هاتیه شه‌هیدکرن.
٢٠- ادریس یەحیا موسا، بنام، ل سالا ١٩٨٨ ل ئەنفالان هاتیه شه‌هیدکرن.
کەسەکێ سەر ب ئیستخباراتێ ڤە ل دانگا بێرسفێ ل ترۆمبێلا مسلحێ حەجی حسێنی ددەت، مسلح شەهیددبیت و برایێ وی ئیسلام و سەفەری محمەد تاهایێ پسمامێ وی ژی برینداردبن. رژێمێ هەولدا وێ تاونێ پەردەپۆشکەت و وەکو قەزاوقەدەر بدەتە نیشادان، لێ پیلانەکا رژێمێ بوو، ژبۆ ژ ناڤبرنا مسلح و ئیسلامێ برایی وی و سەفەری.
ئیسلامێ حەجی حسێن ژی ب بەردەوامی دبن چاڤدێریا رژێمێ دا بوو و چەندین جارا دهێتە گرتن.
سەعید ێ پسمامێ ئەیوبی ب تاوانا شەلاندنا خەسەتەخانا باتیفا و برنا دەرمانا بۆ پێشمەرگەی دهێتەگرتن و هەتا نوکە چارەنڤیسێ وی نەدیارە.
پشتی گرتنا سەعیدی ژ لایێ رژێمێ ڤە، ئیسلامێ حەجی حسێن ژی پەیوەندیێ ب شۆڕشی دکەت.
