سەنتەرێ کۆماتە د ناڤ ڕووپەلێن رۆژنامەیا خەبات دا

سەنتەرێ کۆماتە د ناڤ ڕووپەلێن رۆژنامەیا خەبات دا

پشتی سەنتەرێ کۆماتە یێ دەکۆمێنتکرنا دیرووکا شۆڕشێ ل ٢٨/١١/٢٠٢١ ب پشتەڤانیا رێزدار نێچـــیرڤان بـــارزانـــی هاتیە دامەزراندن، هەر زوو سەرنجا میدیایا کوردی ب ئالیێ خوە ڤە ڕاکێشایە، چەندین جاران رێپۆتاژێن گرنگ ل سەر بزاڤ و چالاکیێن سەنتەرێ کۆماتە د دەزگەهێن خوە یێن میدیایی دا بەلاڤکرینە.
ڤێ جارێ رۆژنامەیا خەبات، کو ئۆرگانێ فەرمی یێ پارتی دیموکراتی کوردستانە، ب ڕێیا ئەنجامدانا هەڤپەیڤینەکێ دگەل دامەزرێنەر و بەرپرسێ سەنتەرێ کۆماتە رزگار کێستەی، ب بەرفرەهی ل سەر بزاڤ و چالاکیێن سەنتەرێ کۆماتە د دەمێ بووری دا رادوەستیت و بالا خوێندەڤانێن خوە ژبۆ گرنگیا کارێ سەنتەرێ کۆماتە رادکێشیت.
د ڤێ هەڤپەیڤینێ دا بەرپرسێ سەنتەرێ کۆماتە رزگار کێستەیی، ب بەرفرەهی بەحسێ قۆناغێن دەستپێکی یێن دامەزراندنا سەنتەرێ کۆماتە و ئارمانجێن ل پشت دامەزراندنا ڤی سەنتەری دکەت و دبێژیت:
مە ل سالا ٢٠١٠ هزر د دامەزراندنا ڤی سەنتەری دا کربوو و پرۆژەیەك کو ژ ١٥ خالان پێك دهات ئامادەکربوو، لێ لگۆرەی شیانێن ئەڤرۆ ل بەردەست ئەم شیاینە ب ستافەکێ بچووك بتنێ سێ خالان ژ وان بجیهبینین، ئەگەر پشتەڤانی هەبیت دێ شێین وان دوزدە خالێن مایی ژی ب جیهبینین.
کێستەیی د بەردەوامیا هەڤدیتنا خوە دا دبێژیت، کو ستافێ سەنتەرێ کۆماتە ب تنێ ژ ٦ کەسان پێكدهێت و ئارمانجا وان ئەوە دیرووکا شۆڕشێن کوردستانێ یا زارەکی ژ ناڤچوونێ رزگارکەن و ب ڕێیا دیدارێن ڤیدیۆیی و نڤێسینێ تۆمار و ئەرشیڤ کەن و ژ ناڤچوونێ بپارێزن.
کێستەیی ل دوور هەژمارا وان هەڤدیتنێن سەنتەرێ کۆماتە هەتا نها ئەنجامداین دیاردکەت، کو وان هەتا نها (٢٣٦) دیدار دگەل پێشمەرگێن دێرین، زیندانیێن سیاسی، مامۆستا، نۆژدار، بەرگری مللی و ناندەهێن شۆڕشی ئەنجامداینە، کو سەرجەمێ وان دیداران دبنە (١٢٠٣) دەمژمێرێن ڤیدیۆی. د ڤان دیداران دا قۆناغێن ژیانا وان و چیرۆك و سەرهاتی و پشکداریا وان د شۆرشان دا وەکو دیدەڤانێن زیندی تۆمارکرینە و پاراستینە.
بەرپرسێ سەنتەرێ کۆماتە د بەردەوامیا هەڤدیتنا خوە دا دبێژیت:
ئەرشیفا مە کۆمکری، گەنجینەیەکا مەزنا بزاڤا رزگاریخوازیا کوردی یە، زێدەباری وێ چەندێ، مە هاریکاریا هەژمارەکا پێشمەرگە و کادرێن شۆڕشێ کریە د نڤێسین و دارشتن و چاپکرنا بیرەوەری ورۆژانێن خەباتا وان دا، کو هندەکا ژ وان ل سەر کاغەزێ نڤێسیبوون، یان ل سەر کاسێتان تۆمارکربوون، وەك پەرتوکا (جریسکا بەری شۆڕشێ) یا پێشمەرگە کادرێ دێرین مستەفا مزووری و بیرەوەریێن عبدالباقی بامەرنی (ژ مهابادی هەتا حەمرین )، (سێ گۆشا مرنێ) یا پێشمەرگە نایف بیگداودی و نوکە ژی پەرتوکا بیرەوەیێن پێشمەرگە و کادرێ دێرین فوئاد میرانی ل بەر دەستێ مەیە، ئەم کار ل سەر دکەین.
ژ لایەکێ دی ڤە کێستەیی بەحسێ هەڤکاری و هەماهەنگیا سەنتەرێ کۆماتە دگەل تۆرا میدیایی یا رووداو دکەت، کو ژ ئەنجامێ وێ هەڤکاریێ تۆرا میدیایا رووداو هەتا نها شیایە هەشت فلمێن دەکۆمێنتاری ل سەر چیرۆك و خەبات و بەرخودانا هەژمارەکا قەهرەمانێن دەڤەرا بەهدینان چێبکەت و هەژمارەکا دی یا خەباتکارێن دەڤەرا بەهدینان بۆ جارا ئێکێ ب ڕێیا سەنتەرێ کۆماتە ل بەرنامێ پەنجەمۆر مێڤانبکەت.
کێستەیی د ڤێ دیدارێ دا ئاماژی ب هەڤکاریا سەنتەرێ کۆماتە دگەل ناڤەندێن ئەکادیمی، مینا زانکۆ یا زاخۆ و زانکۆ یا نەورۆز دکەت، کو برێیا قوتابیێن وان شییاینە (١٣٥) ژ وان هەڤدیتنان ڤەگوهێزنە سەر کاغەزێ، هەروەسا بەحسێ هاریکاریکرنا قوتابیێن زانکۆیان دکەت و دبێژیت کو سەنتەرێ کۆماتە ژبۆ قوتابیێن ماستەرێ و دکتۆرایێ بووینە ژێدەرەکێ باوەرپێکری و هەژمارەکا وان مفا ژ ئەرشیفا مە دیتیە.
کێستەی رۆلێ ئەکتیڤێ پلاتفۆرمێن سۆشیال میدیا یا سەنتەرێ کۆماتە ژی د بەلاڤکرنا چالاکیێن سەنتەرێ کۆماتە ددەتە دیارکرن و ئاماژێ ب وێ رەنگڤەدانا ئەرێنی ددەت یا ژ لایێ خەلکێ کوردستانێ، ب گشتی و کەس و کارێن وان تێکۆشەرێن هەڤدیتن دگەل هاتینە ئەنجامدان ل سەر خەباتا سەنتەرێ کۆماتە .
رزگار کێستەیی بەرپرسێ سەنتەرێ کۆماتە ل دووماهیا هەدیتنا خوە دا رادگەهینیت کو ئەو وەکو سەنتەرێ کۆماتە دئامادەنە ئەڕشیفا خوە بێخنە بەردەستێ نڤێسەر، هونەرمەند، میدیاکار، دەرهێنەر و سیناریستان کو مفای ژێ وەرگرن.