سەنتەرێ کۆماتە یێ دەکۆمێنتکرنا دیرووکا شۆڕشێ د بەردەوامیا کار و چالاکیێن خوە دا ل ڕۆژا ٢٠/٢/٢٠٢٣ ل باژێرێ زاخۆ دبیتە مێڤانێ پێشمەرگێ دێرینێ هەردوو شۆڕشێن ئەیلۆل و گولانێ و شەهیدێ زیندی عەلی یوسف نەعمۆ و دیدارەکا ڤیدیۆیی دگەل وی سازدکەت و دیرووکا خەبات و تێکۆشینا وی مینا بەلگەنامەیەکا گرنگ تۆماردکەت و ژ ناڤچوونێ دپارێزیت.
عەلی یوسف نەعمۆ ل ساڵا ١٩٤٧ ل گوندێ ڕکاڤا ل ڕۆژئاڤایێ کوردستانێ هاتیە سەر دنیایێ.
ئەو ل ٩/٣/١٩٦٧ پەیوەندیێ ب ڕێزێن شۆڕشا ئەیلۆلێ دکەت و ل هێزا زاخۆ دبیتە پێشمەرگە. عەلی یوسف نەعمو ب فەرمانا فەرماندێ هێزا زاخۆ شەهید عیسێ سوار دچیتە ئیرانێ و پشکداریێ د خۆلەکا ئەندازیاریا مینا دا دکەت. ل ساڵا ١٩٧٠ ئەو ل دەستەیا پشتەڤانیێ (فەسیلا ئیسنادێ) دبیتە جێگرێ محەمەد خالد بۆسەلی و د هەمان ساڵ دا دچیتە چۆمان و ل وێرێ ژی جارەکا دی ل ژێر سەرپەرشتیا (یوسف شیوعی) پشکداریێ د خۆلەکا دی یا ئەندازیاریا مینان دا دکەت. پشتی هینگێ ئەو دهێتە ڤەگوهاستن بۆ بارەگایێ لەشکەرێ ئێک ل بامەڕنێ، ل وێرێ ژی ل ژێر سەرپەرشتیا ئەحمەد جخسی درێژیێ ب خۆلەکا دی یا ئەندازیاریا مینێن دژی تانکان ددەت. بڤی ڕەنگی پێشمەرگە و خەباتکەرێ دێرین عەلی یوسف نەعمۆ شەهرەزایەکا باش د ڤی بیاڤی دا بدەستڤە دئینیت و ڕۆلەکێ مەزن د شەڕ و داستانێن پێشمەرگەی دا دبینیت، نەخاسمە ل لناڤبەرا ساڵێن ١٩٧٤-١٩٧٥، وەکی شەڕێن زۆزك و هندرین، قەلادزێ، ڕەواندوزێ و شەڕێن چیایێ سپی. شەهیدێ زیندی عەلی یوسف نەعمۆ زێدەباری پشکداریا وی یا کارا د بەرسینگگرتنا هێڕشێن دوژمنی دا، ئەو چەندین خولێن ئەندازیارا مینان ژی بۆ پێشمەرگەی ل ناڤ شۆڕشێ دا ڤە دکەت و گەلەک پێشمەرگا فێری کارێ مین و تەقەمەنیان دکەت.
پێشمەرگە و تێکۆشەرێ دێرین عەلی یوسف نەعمۆ پشتی شکەستنا شۆڕشا ئەیلۆل ب ئاوایەکێ دەمکی ڤەدگەڕیتە ڕۆژئاڤایێ کوردستانێ، لێ ئەو دگەل گەشبوونا ئێکەم چریسکا شۆڕشا گولانێ جارەکا دی پەیوەندیێ ب شۆڕشێ دکەت و دگەل هەڤالێن خوە محەمەد خالد بۆسەڵی، ئەحمەد ڕەمۆ، و شەهید عومەرێ لەعلێ درێژیێ ب خەباتا خوە ددەت.
عەلی یوسف نەعمۆ زێدەباری پشکداریا وی د گەلەك شەڕ و داستانێن شۆڕشا گولانێ دا، ئەو ب حوکمێ شەهرەزایا خوە ل گەل ئەحمەد ڕەمۆ و شەهید عەمەری لەعلێ ب بەردەوامی هاریکاریێن لۆجستی ژ سوریێ د گەهینیتە شۆڕشێ. عەلی یوسف نەعمۆ هەتا سالا ١٩٨٢ ل سەر خەباتا خوە یا پێشمەرگاتیێ بەردەوام دبیت. ل ساڵا ١٩٨٢ ڤەدگەڕیتە ڕۆژئاڤایێ کوردستانێ، لێ ژ لایێ ڕژێما سویێ ڤە دهێتە گرتن و ٥ سالان دهێتە زیندانکرن. شەهید ئیدریس بارزانی هایداری گرتنا وی دبیت و ناڤبەینکاریێ بۆ ئازادکرنا وی دکەت. پشتی ئەو ل ساڵا ١٩٨٦ ئازاد دبیت جارەکا دی پەیوەندیێ ب شۆڕشا گولانێ دکەت، د ئەنجامدا ڕژێما سوریێ حوکمێ سێدارەدانێ د دانیتە سەر وی. جارەکا دی ب نابەینکاریا کاك ئیدریس بارزانی ڕژێما سوریێ بڕیارا لێبوورینا وی دەردکەت. عەلی یوسف نەعمۆ ل سەر خەباتا خوە یا پێشمەرگاتیێ هەتا ساڵا ١٩٨٨ بەردەوامدبیت. ئەو پشتی ئەنفالێن ساڵا ١٩٨٨ ڤەدگەڕیتەڤە ڕۆژئاڤایێ کوردستانێ و ل ژێر ترس و لەرزا ڕژێما سوریێ ژیانەکا گەلەك سەخت دژوار دەربازدکەت.
عەلی یوسف نەعمۆ دگەل سەرهەلدانا پیرۆزا ساڵا ١٩٩١ دگەل ١٤ کەسا ژ کەس و کارێن خوە دهێتەڤە باشوورێ کوردستانێ. ئەو دبیتە بەرپرسێ نێزیکی ٣٠٠ پێشمەرگا ل ڕیکخراوا ئاگری. پشتی هینگێ ل ساڵا ١٩٩٥ دبیتە بەرپرسێ لەشکەری ل لژنا دەڤەرا زاخۆ.
ل دەمێ هێرشا دووێ یا پ ک ک بۆ سەر کوردستانا ئازاد، عەلی یوسف نەعمۆ ل ١٠/٣/١٩٩٥ ل دەڤەرا بەرواری بالا ژ لایێ چەکدارێن وان ڤە دهێتە گرتن و پشتی ٤ مەهێن لێدان و ترس و برسێ دهێتە ئازادکرن.
ل ١٠/٩/١٩٩٧ ئەو دبیتە فەرماندێ سریێ ب پلا نەقیب و پشکداریێ د شەڕێن بەرەڤانیێ ژ کوردستانا ئازاد دکەت. د ئێک ژ ڤان شەران دا عەلی یوسف نەعمۆ ژ ستوونا پشتا خوە، سەرێ خوە و چەندین ئەندامێن دن یێن لەشێ خوە ب گرانی و دژواری برینداردبیت و پشتی هینگێ ئەو ل زاخۆ ژیانەکا گەلەك سەخت و دژوار دەربازدکەت.
ژ هەژی ئاماژێ یە کو برایێ وی سەلاح و زاڤایێ وی ئیبراهیم زێڕۆ ل ساڵا ١٩٧٢ ژ لایێ ڕژێما ئێراقێ ڤە هاتینە ل سێدارەدان.
ل ٢٦/١٠/٢٠١٧ برازایێ وی مەهدی سلێمان نەعمۆ ل شەڕێ
حەشدا شەعبی شەهیدبوویە.
هەرسێ کوڕێن وی ژی هەیسەم، نێچیرڤان و عەبدولرەحمان پێشمەرگەنە لگەل لەشکەرێ ڕۆژ. ئەو ڕەوشا مە وەکو سەنتەرێ کۆماتە پێشمەرگە و شەهیدێ زیندی عەلی یوسف نەعمۆ تێدا دیتی، جهێ داخ و کەسەرەکا مەزنە. نە هەر ئەو بریندارە و ژ هێز و شەنگەھ و ژ ئاخفتن کەتیە، بەلکو ئەو بوویە بارگرانیەکا گەلەك مەزنە بۆ مالا خوە ژی.
هەمی هیڤی ئومێدن مە و مالباتا وی ئەو بوون کو ڕەوشا وی نە ب ڤی ڕەنگی با و پتر چاڤدێری و سەخبێریا وی هاتبا کرن.
بخەم و کۆڤانەکا مەزن پشتی مە ئەڤ دیدارە د گەل پێشمەرگە و شەهیدێ زیندی عەلی یوسف نەعمۆ ئەنجام دای، وی ل ٢.٢٣⁄٤⁄٣٠ ب بگیانەکێ تژی ئێش و ژان و دلەکێ دامایی و خەمگین خاتر ژ ڤێ ژیانێ خواست وەغەرا دوماهیێ کر.
هیڤیا مە ژ دەزگا و بەرپرسێن پارتی و حکومەتا کوردستانێ ئەوە کو بەری ئەڤ قارەمانێن فیداکار ژ ناڤ مە بارک بکەن گرنگی و پوویتە پێ بهێتەدان ڕێز لێ بێتە گرتن، بەرامبەر خەبات و قوربانیدانا وان.
ئەم ب ناڤێ سەنتەرێ کۆماتە یێ دەکۆمێتکرنا شۆڕشێ، بەهیداریێ ل مالبات و کەس و کارێن وی دکەین و خوە ب هەڤپشکێن خەما وان دزانین. خودایێ دلۆڤان گیانێ وی ب بهەشتا خوە شادبکەت.
سهنتهرێ کۆماته
یێ دێکومهنت کرنا دیرووکا شۆڕشێ
کار و ئهرکێ سهنتهرێ کۆماته دێکۆمێنت کرن و پاراستنا دیرووکا شوڕشێ یه ژ مرن و ژناڤچوونێ.
ڤی سهنتهری ب ستافهکێ بچووک و شیانێن ساده، لێ ب ڤیان و باوهریهکا مهزن، وهک پێنگاڤا خوه یا کاری یا ئێکێ، دهست ب کۆمکرن، دێکۆمنێت کرن و تۆمارکرنا دیرووکا خهبات و شۆڕشا کوردستانێ کریه.
