ل نیڤا باژێرێ مۆسل محەمەد سالح گه‌لیێ ڕومانی شەهید دبیت و خالد بانی ژی بریندار دبیت
– ژ چیرۆکێن سه‌نته‌رێ کۆماتە –
د هەڤپەیڤینا خوە یا لگەل سەنتەرێ کۆماتە دا، پێشمەرگێ دێرین خالد بانی ڤەدگێریت و دبێژیت: پشتی شکه‌ستنا شۆڕشا ئه‌یلولێ و ل ده‌ستپێکا شۆڕشا گولانێ، ئه‌م بووینه ئه‌ندامێن ڕێکخستنێن نهێنیێن پارتی، لگه‌ل شه‌هید مه‌حمود ئیزدی. هینگێ مه چه‌ک ژی هه‌بوو. ئه‌ز، حسێن بانی، حه‌جی سالح، محه‌مه‌د عه‌لی و شه‌هید نایف سه‌عدی زاویته‌ی، گه‌له‌ک جارا ب شه‌ڤ مه چه‌کێ خوه دئیناده‌رێ و ئه‌م دچووین مه هێرشی سه‌ر بنگه‌هێن دوژمنی دکر. ل ساڵا 1978 ئەم ل گوندێ کافیا دەڤەرا زێبارێ چووینە دەف سەلیم سۆرانی ( جەوهەر نامق). دیتنا کاک سەلیمی ئەو بوو کو شوونا شەڕێ مە بکەڤیتە سەر گوند و باژێرێن کوردستانێ و ب وێ هێجەتێ دوژمن کوردستانێ وێران بکەت، پێدڤیە ئەم شەڕی بێخینە دناڤ مالا دوژمنی دا، ب تایبەت ژی باژێرێن مۆسل و بەغدا.
ل گۆرەی ڤی بەرنامەی وی ئەم راسپارتین کو ل باژێرێن به‌غدا و مۆسل هندەک کریارێن لەشکەری ل دژی دەزگایێن ئەمن و ئیستخباراتا رژێما بەعس ئەنجامبدەین.
هەر ل نێزیک گوندێ کافیا پێشمەرگێ پسپۆرێ تەقەمەنیان محەمەد سەعید سوری، کو خەلکێ رۆژئاڤایێ کوردستانێ بوو و لگەل سەلیمی بوو، وی د چەند سعەتەکا دا خولەکا تەقەمەنیان بۆ مە ڤەکر و ئەم فێرکرین کانێ دێ چەوا ڤان جۆرێن تەقەمەنیان ل دژی دوژمنی بکارئینین.
مە ژی تەقەمەنیێن خوە ڕاکرن و ئەم هاتین. ب هەر شێوێ هەی، من و هەڤالێ خوە محەمەد سالح گەلی ڕۆمانی، مە ئەو برنه به‌غدا و ل به‌ر بنگه‌هه‌کێ ئیستخباراتا دوژمنی دانان و په‌قاندن. هینگێ وێ په‌قینێ ده‌نگه‌کێ مه‌زن ڤه‌دا و ترسه‌کا مه‌زن ژی ئێخسته دلێ دوژمنی.
پشتی ڤێ چالاکیێ و ل ساڵا 1979 شه‌هید مه‌حمود ئیزدی سێ بۆمبێن دی، بڕێکا محه‌مه‌د ڕه‌شید سپینداری دگه‌هینیته ده‌ستێ مه. مه ژی بڕیاردا کو چالاکیا ڤێ جارێ ل باژێڕێ مۆسل، ل دژی ده‌زگایێن زۆڵمێن یێن دوژمنی ئه‌نجامبده‌ین.
مه ئێک ژ وان بۆمبا بر و ئەم چووین، مه بخوە جهێن شەڤێ ژی ل ئوتێلەکا جادا حەلەب ل مۆسل گرت و مە بەرێ خوە دا جهێ ئەنجامدانا چالاکیێ، کو بنگەهەکێ ئەمنا مۆسل بوو، جهێ ئەشکەنجەدان و کوشتنا خەلکی.
مە بۆمبا خوە بۆ دەمەکی دەستنیشانکری عەیارکر کو د وێ خولەکێ دا بتەقیت و گەلەک ب شارەزایی بۆمبا خوە مە ل جهەکی دانا کو کەس چ گۆمانان ژێ نەکەت. پاشی مه خوه ژێ دوور کر و گوهێ مە ما لێ هەتا دپەقیت.
دەم گەهەشتە وێ خولەکێ و چ دەنگ ژ بۆمبا مە نەهات. ئەم هەر ماینە گوهڤەچنی، هەر چ دەنگێ پەقینێ نەهات. نێزیکی سعەتەکێ دەرباز بوو هەر نە پەقی. ئێدی مە زانی کو ئارێشەیەکا هەی. مە ب شارەزایی خوە نێزیکی وی جهی کر و بۆمبا خوە ڕاکر و ئەم هاتینە ئوتێلێ.
ل ئوتێلێ محەمەد سالحی گۆت: دڤێت ئەز تەماشە بکەمێ کانێ ئەڤە چ ئارێشەیە، بۆچی نە پەقی! من گۆتێ: بهێلە دێ بەینەڤە و ئێکا دی ئینین. دەمەکی ئەزێ د دەرگەهێ ئودێ دا بووم و دا چمە سەر ئاڤێ. بۆمب ژی د دەستێ محەممەد سالحی دا بوو، ئەو تێدخەبتی. من هند دیت گوڕیەکا کەسکا ئاگری ژ ناڤ دەستێن وی بلند بوو و ئێدی من خۆ نەدیت. هێزا بۆمبێ ئەز هاڤێتمە دەرڤە. ئەز ڕابووم و من قەستا محەمەد سالحی کر. من دیت کو ئەو یێ پەڕتاندی. ئێدی من قەستا دەری کر و خوە ژ ئوتێلێ دوورکر.
ئەز پچەکێ دوورکەفتم لێ دلێ من هەرێ د دووڤ هەڤالێ من ڕا. هەرچەندە ئەز دزانم ژی کو ئەو یێ شەهید بووی.
ئێدی ژ هەموو رەخا پولیس، ئەمن، ئیستخبارات و هێزێن دوژمنی ل ئوتێلێ کۆمبوون.
من ژی دڤیا خوە نێزیک بکه‌م و دوماهی پێزانین ل سه‌ر هه‌ڤالێ خوه وه‌رگرم. چونکی من نه‌دڤیا هه‌ما هۆسا وی بهێلم و بهێم. من پچه‌کێ خوه نێزیکی قه‌ره‌بالغێ کر. من دیت پولیسه‌کی کورد ملێ من گرت و ئه‌ز پاڵدام و گۆته من: هه‌ڕه نه‌مینه ل ڤان ده‌را. دگه‌ل هندێ ژی من دیت کو ئه‌و یێ ب دیتنه‌کا سه‌یر ته‌ماشه‌ی دێمێ من دکه‌ت. ئه‌ز ژی هه‌ر زوو ژ وێرێ دوورکه‌فتم. ده‌مه‌کی من هه‌ست کر ڕانه‌کێ من هه‌تا سه‌ری یێ ڕویسه. ته‌ماشه دکه‌م کو بۆمبێ ئه‌و ده‌لنگێ شه‌لێ من ب ئێکجاری یێ هاڤێتی. من ژی ئێدی ب هشیاری و ب هه‌ر شێوه‌یه‌کی هه‌بیت، من خوه گه‌هانده ماڵا که‌ریم شلی، هه‌ڤالێ مه یێ ڕێکخستنێ. ل وێرێ ل به‌ر خودیکێ دبینم کو، ڕه‌خه‌کی سمبێلێن من ب ئێکجاری یێن هاتینه سۆتن و ئه‌زێ مایمه بڕه‌خه‌کێ سمبێلێ. نه بێژه پولیسێ کورد ل ده‌رێ ئوتێلێ ئه‌و ڕه‌وشا من دیتبوو، به‌لێ من بخوه های ژێ نه‌بوو.
ل وێ مالێ من کتا دی ژی یا سمبێلا خوه تراشی و شه‌لواله‌ک کره پێ خوه و کاک که‌ریم شلی بڕێکێن تایبه‌تێن ڕێکخستنێ، ئه‌ز گه‌هاندمه دهۆکێ. ل دهۆکێ هه‌ڤالێن مه یێن ڕێکخستنێ نووژداره‌ک بۆ من ئینا، کو ئه‌و ژی هه‌ر ئه‌ندامێ ڕێکخستنێن مه بوو. چه‌ند رۆژه‌کا وی برینێن من یێن سۆتنێ ده‌رمان کرن، تا کو ئه‌ز با‌ش بوویم. پاشی ژ وێرێ ژی بهاریکاریا هه‌ڤالێن ڕێکخستنێ، من خوه گه‌هانده گوندێ مه بانیێ و پاشی من خوه گه‌هانده پێشمه‌رگه‌ی و بوومه پێشمه‌رگه لگه‌ل شه‌هید مه‌حمود ئێزدی.
