سەرەکی
200 که‌س و بهزاران گه‌وهه‌رێن دیرووکی
200 که‌س و بهزاران گه‌وهه‌رێن دیرووکی
به‌ری دوو ساڵان، سه‌نته‌رێ کۆماته یێ دێکۆمێنتکرنا دیرووکا شۆڕشێ، ب پشته‌ڤانیا جه‌نابێ کاک نێچیرڤان بارزانی، جێگرێ سه‌رۆکێ پارتی دیمۆکراتی کوردستان و هاریکاریا کاک ئاکۆ محه‌مه‌د ڕێڤه‌به‌رێ تۆڕا میدیایی یا ڕووداو، پێنگاڤا خوه یا ئێکێ هاڤێت، ژ بۆ تۆمارکرن و ئه‌رشیفکرنا دیرووکا شۆرشێن کوردستانێ.
سه‌نته‌رێ کۆماته ب ستافه‌کێ گه‌له‌کێ بچووک و شیانێن سنووردار، لێ ب ئیراده و ڤیانه‌کا گه‌له‌کا مه‌زن و گیانێ پێشمه‌رگاتیێ، ده‌ست بڤی کارێ پیرۆزکر و به‌رده‌وام بوو.
ئه‌ڤرۆکه رۆژا سێ شه‌مبی 19/12/2023 هه‌ژمارا وان خه‌باتکه‌رێن کو هه‌تا نوکه سه‌نته‌رێ مه هه‌ڤپه‌یڤین لگه‌ل کرین و دیرووکا وان و چیرۆکێن خه‌باتا وان تۆمار و ئه‌رشیفکرین، گه‌هه‌شته 200 خه‌باتکه‌ران. هه‌ڤپه‌یڤینێن ڤان خه‌باتکه‌ران هه‌موو پێکڤه دبنه پتری 830 ده‌مژمێران.
ئه‌ڤ 200 خه‌باتکه‌ره پڕانیا وان پێشمه‌رگه بوونه، کو پڕانی پێشمه‌رگێن هه‌ردوو شۆڕشێن ئه‌یلول و گولانێ بوونه. گه‌له‌ک ژی هه‌م پێشمه‌رگه و هه‌م ژی زیندانیێن سیاسی بوونه. لێ دیسان پێشمه‌رگێن شۆرشێن 1943-1945 یێن بارزان و کۆمارا کوردستان ل مهاباد و پێڤاژوورا روسی لگه‌ل بارزانیێ نه‌مر، ژی دناڤ دا هه‌نه.
چه‌نده‌ک ئه‌ندامێن پارتیا هیوا ژی تێدا هه‌نه. دیسان هه‌ژماره‌کا ژنێن خه‌باتکه‌ر، کو هند ژێ زیندانیێن سیاسی بوونه هند ژی ژنێن نانده‌هـ و خه‌باتکه‌رێن ناڤ شۆڕشێ نه.
دناڤ ڤان 830 ده‌مژمێرێن هه‌ڤپه‌یڤینان دا، ب هزاران چیرۆکێن گه‌له‌ک بالکێش تێدا هه‌نه، کو مرۆڤ دشێت باشترین فلم، دراما، رۆمان و په‌رتووکێن دیرووکی ل سه‌ر چێکه‌ت.
هه‌روه‌سا د ڤان دوو ساڵان دا سه‌نته‌رێ کۆماته شیایه ب وێ ئه‌رشیڤا ل به‌رده‌ستی، هاریکاریا ب ده‌هان خویندکارێن دکتۆرا، ماسته‌ر و به‌کالوریوسێ بکه‌ت، د وارێ دیرووکێ دا.
دیسان هه‌تا نوکه سه‌نته‌ری خوه ل بیره‌وه‌ریێن گه‌له‌ک پێشمه‌رگه و خه‌باتکه‌ران ژی کریه خودان و شیایه دوو په‌رتووکێن بیره‌وه‌ریێن وان، ژ مرنێ ڕزگاربکه‌ت و چاپ بکه‌ت و یا سیێ ژی نوکه تێته ئاماده‌کرن ژ بۆ چاپێ.
د پێنگاڤه‌کا دی دا، سه‌نته‌رێ کۆماته ب هه‌ماهه‌نگی لگه‌ل سه‌نته‌رێ زاخۆ یێ ڤه‌کۆلینا ل زانکۆیا زاخۆ، شیایه نێزیکی 136 ژ ڤان 200 هه‌ڤپه‌یڤینا، بڕێکا خویندکارێن هه‌ردوو پشکێن دیرووکێ و زمانێ کوردی، ل زانکۆیا زاخۆ، وان هه‌ڤپه‌یڤینا بینیته سه‌ر کاغه‌زێ، ژ بۆ کار ل سه‌ر کرنێ، دا کو د پاشه‌رۆژێ دا وه‌ک په‌رتووک بێنه چاپکرن.
دیسان سه‌نته‌رێ کۆماته به‌رده‌وام چیرۆکێن ڤان خه‌باتکه‌ران د مالپه‌رێ خوه دا، فیسبووک، ئینستاگرام، تلگرام، تیکتۆک و یوتوبێ ژی دا به‌ڵاڤ دکه‌ت.
ل دوماهیێ دخوازم دووباره سوپاسیا جه‌نابێ کاک نێچیرڤان بارزانی بکه‌م، ژ بۆ پشته‌ڤانیا ویا به‌رده‌وام بۆ کارێ سه‌نته‌رێ کۆماته. دیسان سوپاسیه‌کا گه‌رم بۆ کاک ئاکۆ محه‌مه‌د، چونکی بڕاستی ئه‌گه‌ر ئه‌و نه‌با باوه‌رناکه‌م ڤی پرۆژه‌ی رۆناهی دیتبا. هه‌روه‌سا سوپاسیه‌کا ژ دل و جان پێشکێشی هه‌ڤالێن خوه یێن سه‌نته‌رێ کۆماته دکه‌م، کو ب شه‌ڤ و رۆژ وه‌ک پێشمه‌رگێن خۆبه‌خش کار و خزمه‌ته‌کا مه‌زن دکه‌ن، تا کو ئه‌م شیایێن ڤێ پێنگاڤا مه‌زن پاڤێژین. دیسان دڤێت ژبیرنه‌که‌م ژی کو، سوپاسیه‌کا تایبه‌ت پێشکێشی وان هه‌موو هه‌ڤال و براده‌ر و خۆشتڤیان بکه‌م، یێن کو به‌رده‌وام مه هاندده‌ن و ب په‌یڤ و هه‌ڵسه‌نگاندنێن خوه پتر هێزێ دده‌نه مه ژ بۆ خزمه‌ته‌کا مه‌زنتر.
