سەنتەرێ کۆماتە یێ دەکۆمێنتکرنا دیرووکا شۆڕشێ د بەردەوامیا هەڤدیتنێن خوەدا دگەل پێشمەرگە و تێکۆشەرێن گەلێ کوردستانێ دا، ل ڕۆژا ٢٠٢٢/١٢/٢٩ ل گوندێ نزارکێ دبیتە مێڤانێ پێشمەرگێ دێرین و زیندانیێ سیاسی، ئیسماعیل عبدولرەحمان محەمەد سەعید گابێرکی و دیدارەکا ڤیدیۆیی دگەل وی سازدکەت و دیرووکا خەبات و قوربانیێن وی د ڕێیا کوردستانێ دا، مینا بەلگەنامەیەکا گرنگ تۆماردکەت و ژ ناڤچوونێ دپارێزیت.
ئیسماعیل عبدولرەحمان محەمەد سەعید گابێرکی، یێ ناسیار ب مەلا ئیسماعیل گابێرکی، ل سالا ١٩٥٧ ل گوندێ گابێرکێ یێ سەر ب دەڤەرا ئەترووشێ ڤە هاتیە سەر دنیایێ.
ئیسماعیل گابێرکی، دەلیڤا چوونا قوتابخانێ بۆ وی چێنەبوویە، لێ وی ب هاریکاریا عزەتێ پسمامێ خوە، خوە فێری خواندن و نڤێسینێ کریە و گوتارێن ڕۆژا ئەینییێ ل مزگەفتان خواندینە.
مەلا ئسماعیل گابێرکی، د ڤێ دیدارێ دا بەحسێ وان شەڕ و داستانێن دەستپێکی یێن شۆڕشا ئەیلۆلێ ل دەڤەرێ دکەت، نەخاسمە داستان ب ناڤ دەنگا لۆمانا کو د وێ داستانێ دا حەسەنێ مامێ وی برینداردبیت.
د شۆڕشا ئەیلۆلێ دا عەبدولرەحمانێ بابێ مەلا ئیسماعیلی، ژبەر چەلەنگی و مێرخاسیا وی دبیتە فەرماندێ سریەکا پێشمەرگەی ل بەتالیۆنا شەهید وەسی بانی، یا سەر ب هێزا شێخان ڤە. ل ساڵا ١٩٦٩ هێزێن دوژمنی هێرشێ دکەنە سەر گوندێن سپیندارێ و ستوکورکێ ل دەڤەرا بەرواری ژێریا. مەلا ئیسماعیل گابێرکی ژی د هەمان ساڵ دا پەیوەندیێ بشۆڕشێ دکەت و دگەل بابێ خوە دبیتە پێشمەرگە.
هێزێن دوژمنی گوندێ ستوکورکێ داگیردکەن و هندەك خانیێن گوندیان ژی دسۆژن. سریا بابێ وی ژی پشکداریێ د بەرسینگگرتنا هێڕشا هێزێن ڕژێمێ دا دەکەت. مەلا ئیسماعیل نانی بۆ پێشمەرگەی کۆمدکەت، دا ببەتە گوندێ ستوکورکێ. هێزێن دوژمنی ب ئارمانجا دەستبسەرداگرتنا گوندێ سپیندارێ، بشێوه‌یه‌کی ته‌کتیکی خوه ژ گوندێ ستوکورکێ ڤه‌دکێشن. خەلکێ سپیندارێ ل ژێر بۆمباران و هێرشا دوژمنی گوندێ خوە بەرددەن.
مەلا ئیسماعیل د ڤێ دیدارێ دا دبێژیت: ژنکا هەڤێری خوە ل سەر تەنویرێ هێلابوو و رەڤیبوون. جاش و له‌شکه‌رێ دوژمنی گوندێ سپیندارێ دگرن و دسۆژن.
پشتی ڕێکەفتنا ١١ ئادارێ دهێتە ڕاگەهاندن، مەلا ئیسماعیل دگەل کۆمێن خەلکێ دەڤەرێ پشکداریێ د ئاهەنگێ دا دکەت. ئەو دگەل خەلکی، ژ باعەدرێ هەتا شێخان ڕێپیڤانێ دکەن. شاندێ ڕژێمێ ژی پێشوازیا وان دکەت. پاشی بارەگایێن پارتی ب ئاوایەکێ فەرمی ل باژێڕان دهێنە ڤەکرن.
پشتی کو حکومه‌تا ئیراقێ په‌یمانا 11 ئادارا ساڵا 1970 بنپێ کری و جاره‌کادی ل بهارا ساڵا 1974 هێرش کریه‌ڤه سه‌ر کوردستانێ، ئەرکێ مەلا ئیسماعیل گابێرکی یێ پێشمه‌رگاتیێ دکەڤیتە شێخکا.
وی ده‌می پارتیا کۆمونیستا ئیراقی هەڤالبەندێن ڕژێما ئیراقێ بوو، کۆمونیست هەولددەن هێزێن پێشمه‌رگه‌ی ب شه‌ڕ ژ باعەدرێ بکەنەدەر. د ئه‌نجامدا شه‌ڕه‌کێ مه‌زن دناڤبه‌را پێشمه‌رگه‌ی و چه‌کدارێن پارتیا کۆمونیستا ئیراقێ دا ڕوودده‌ت ل باعه‌درێ، کو حکومه‌تا ئیراقێ ژی ب چه‌ک و مرۆڤا پشته‌ڤانیا کۆمونیستا دکر. د ئه‌نجامێ ڤی شه‌ڕی دا هێزێن پارتیا کۆمونیست دشکێن و پێشمه‌رگه باعده‌رێ دگریت. لێ مخابن دڤی شه‌ڕی دا پێشمه‌رگێن بژاره؛ تەیمور شێخکی، عیسێ بانی و عەزیز شه‌هی شەهید دبن. پاشی پشتی ده‌مه‌کی ل پیرۆزاڤا ل ده‌ڤه‌را باعه‌درێ پێشمه‌رگێ قاره‌مان عه‌لی عه‌بۆ هه‌سنه‌کی ژی، د شه‌ڕه‌کی دا ب ده‌ستێ چه‌کدارێن پارتیا کۆمونیست شه‌هید دبیت،
شەڕ دناڤ بەرا هێزێن پێشمەرگەی و ڕژێمێ دا دژواردبیت. جاش و له‌شکه‌رێ دوژمنی ڕێیا دەشتی یا ئینانا دەخل و دانی دگرن و ل ده‌ڤه‌رێن شۆڕشێ دبیتە گرانیه‌کا مه‌زن.
ده‌مێ شکه‌ستنا شۆرشێ ل ئادارا ساڵا 1975، مەلا ئیسماعیل گابێرکی تڤەنگا بڕنۆ یا باپیرێ خوە ڕادەستی ڕژێمێ دکەت و کلاشینکۆفەکێ دگەل ئاربیجیەکێ ژی دڤەشێریت. ئێدی مام عەبدورەحمانێ بابێ مەلا ئیسماعیلی و مرۆڤێن خوە دچن گوندێ خوە و ژیانا خوە یا ئاسایی بڕیڤەدبەن.
ژ بەر کو مەلا ئیسماعیل گابێرکی ژ دایکبوویێ ساڵا ١٩٥٧ یە، ژ به‌ر هندێ ئه‌و بۆ لەشکەریا نەچاری دهێتە ڤەخواستن. ئه‌و 3 ساڵان له‌شکه‌ریا نه‌چاری دکه‌ت.
بەری شەهید مەحمود ئیزدی ل ساڵا ١٩٧٦ بهێتە دەڤەرێ، حامد بالەتەیی و برازایێن وی (شەریف و سەعید) وەکو چەکدار ل دەڤەرێ مابوون، وان خوە ڕادەستی ڕژێمێ نەکربوو. ئەو ب خێزانێن خوە ڤە ل دەڤەرێ ب قەچاغی مابوون. وان ژیانا خوە د شکەفت و گەلی و نهالێن دەڤەرێ دا دەربازدکر. دەمێ شەهید مەحمود ئێزدی ژی دهێتە دەڤەرێ پەیوەندیێ ب وان دکەت.
هەر چەندە مەلا ئیسماعیل گابێرکی هێشتا یێ ل لەشەکەریا نەچاری بوو، لێ ئەو بێی کو جارەکێ ژی شەهید مەحمود ئێزدی ببینیت، ب ڕێیا مرۆڤێن خوە، دگەل شەهید مەحمود دبیته ئه‌ندامێ ڕێکخستنێن نهێنی یێن پارتی دیموکراتی کوردستان.
شەهید مەحمود ئێزدی بۆ جارا ئێکێ، شەهید ئەحمەد بامەڕنی د هنێریتە گوندێ گابێرکێ، عەبدولرەحمانێ بابێ مەلا ئیسماعیلی، خوارن و ڤەخوارنێ بۆ وان کۆمدکەت و دگەل شەهید ئەحمەد بامەڕنی بۆ وان دبەت. وێ جارێ ئەو کلاشینکۆف و ئاربیچیا کو وان ل ساڵا 1975 ڤەشارتبوو، ڕادەستی شەهید مەحمود ئێزدی دکەن.
هێزێن پێشمەرگەی ب هاریکاریا مام عەبدولرەحمانێ بابێ مەلا ئیسماعیلی، چالاکیەکێ ل زاویتە ئەنجامددەن. ئەو د ڤێ چالاکیێ دا بارەگایێ ڕێکخراوا ڕژێمێ دکەنە ئارمانجا چەکێن خوە.
شەهید مەحمەد ئێزدی مام عەبدولرەحانی دهنێریتە دختۆری ل دهۆکێ.
پشتی چالاکیێ هێزێن پێشمەرگەی ب هارکاریا مام عەبدولرەحمانی چالاکیا خوە ئەنجامددەن، شەهید مەحمود داخوازێ ژ مام عەبدولرەحمانی دکەت کو ئێکسەر بچیتە دختۆری ل دهۆکێ.
مەحمود ئێزدی دبێژیتە مام عەبدولرەحمانی: دێ چیە دەف دختۆرەکی، دێ ڕاچێتا وی بڕی و دێ چی دەرمانخانێ، دەرمانێن خوە وەرگری و دێ وێ ڕاچێتێ کەیە د بەریکا خوە دا و ئێدی ڤەگەرەڤە مالا خوە، و نابیت تو وێ ڕاچێتێ ژ بەریکا خوە بینیە دەر. مام عەبدولرەحمان ژی پلانا شەهید مەحمود ئێزدی جیبجی دکەت و ڤەدگەڕیتە مالا خوە ل گوندی.
پشتی ڤێ چالاکیێ، سیخوڕێن ڕژێمێ، پێزانینا ددەنه ئەمنا ڕژێمێ ل دهۆکێ، کو مام عەبدولرەحمانی هارکاریا پێشمەرگەی کریە. ئەمنا دهۆکێ مام عەبدولرەحمانی دگریت و هەتا کەرکووکێ وی دبەت. ل کەرکووکێ، جلکێن وی ژبەردکەن، کاغەزەك ژ بەریکا وی دکەڤیت خوارێ، ڤەکۆلەرێ ئەمنا ڕژێمێ، خوە دچەمینیت وێ کاغەزێ و دهەلگریت. تماشەدکەت کو ڕاچێتا دختۆریە، هەمان رۆژا ئەنجامدانا چالاکیا مەفرەزا شەهید مەحمەد ئێزدی یا ل سەر. ڤەکۆلەر دبێژیتە مام عەبدولرەحمانی: بەلگەیێ بێ گوننەهیا تە ژ بەریکا تە دەرکەت. ئێدی مام عەبدولرەحمان دهێتە ئازادکرن.
ل ساڵا ١٩٨٠ شه‌ڕێ ئیراق و ئیرانێ دەستپێدکەت. ڕژێم جارەکا دی ژ دایکبوویێن ساڵا ١٩٥٧ بۆ لەشکەریێ دڤەخوازیتەڤە کو مەلا ئیسماعیل گابێرکی ژی ئێك ژ وانە.
ده‌مێ خالد بانی ئه‌ندامێ ڕێکخستنێن نهێنیێن پارتی و د چالاکیه‌کێ دا، ل مۆسل هه‌ڤالێ وی محه‌مه‌د سالح گه‌لی ڕومانی شه‌هید دبیت و خالد ژی بریندار دبیت و ئه‌و خوه دگه‌هینیته گابێرکێ، مەلا ئیسماعیل گابێرکی و بابێ وی هاریکاریا وی دکەن و وی دگەهیننه هێزێن پێشمەرگەی.
پشتی هینگێ مەلا ئیسـاعل گابێرکی ژی پەیوەندیێ ب خالد بانی وان دکەت و دبیته پێشمه‌رگه و دگەهیتە ناڤ ڕێزێن شۆڕشی. پشتی چوونا مەلا ئیسماعیلی بۆ ناڤ رێزێن شۆڕشێ، ڕژێم جارەکا دی بابێ وی و مامێ وی حەسەنی و پسمامێ وی ئەحمەدی دگریت.
ئێدی ئەرکێ پێشمەرگاتیا مەلا ئیسماعیل گابێرکی دکەڤیتە دگەل ڕێکخراوا شەهید وەیسی بانی یا پێشمه‌رگه‌ی.
د پێشمه‌رگاتیا خوه دا ئه‌و پشکداری د گەلەك چالاکێن لەشکەری دا دکەت مینا :
-
چالاکیا سەرێ غەلبۆکێ ل پاییزا ساڵا ١٩٨٥.
