مه‌حمود هروری و کاروانێ درێژێ خه‌بات و پێشمه‌رگاتیێ
سەنتەرێ کۆماتە یێ دەکۆمێنتکرنا دیرووکا شۆڕشێ د بەردەوامیا کار و چالاکیێن خوە دا ل ٢٠٢٢⁄٨⁄٢٢ دبیتە مێڤانێ پێشمەرگە و خەباتکەرێ دێرین و ھەلگرێ میدالیا بارزانیێ نەمر مەحمود ھرۆری و دیدارەکا ڤیدیۆیی یا درێژ دگەل ساز دکەت و دیرووکا خەبات و تێکۆشینا وی مینا دکۆمێنتەکا گرنک تۆماردکەت و ژ ناڤچوونێ دپارێزیت.
مەحمود ئەبابەکر حەسەن یێ ناسیار ب مەحمود ھرۆری ل ساڵا ١٩٤٠ ل گوندێ ھرۆرێ یێ سەر ب دەڤەرا کانیماسێ ڤە ھاتیە سەر دنیایێ. دەمێ ئەو ل ساڵا ١٩٦١ لەشکەریا نەچاری بدوماھی دئینیت و ڤەدگەریتە گوندێ خوە، شۆڕشا ئەیلۆلێ دەستپێدکەت. بارزانیێ نەمر دگەل ھێزێن خوە تێتە گوندی ھرۆرێ.
شەھید عیسێ سوار دبیتە مێڤانێ مالا وی و ٢٥ ڕۆژا ل مالا وی دمینیت. مەحمود ھرۆری وه‌ک له‌شکه‌ره‌کێ به‌رێ یێ سوپایێ ئیراقێ، پێزانینێن گرنگ ل سەر چەک و تەقەمەنی و پلانێن هێزێن له‌شکه‌ریێن ئیراقێ ددەتە شەھید عیسێ سوار.
پاشی گوندێ ھرۆرێ دکەڤیتە بەر بومبەبارانا فرۆکێن دوژمنی و ل سەرێ ئامێدیێ ژی دبیتە شەڕ. بارزانی و ھێزێن خوەیێن چەکدار ل دستپێکێ ل کانیماسێ و پاشی ھەتا بھارێ ل گوندێ ئەدنێ دمینن.
کاک مەحمود ل ساڵا ١٩٦٢ ل گوندێ ڕەبەتکێ پەیوەندیێ ب ھێزێن بارزانیێ نەمر دکەت و دگەل شه‌هید سلێمان میرخانێ برایێ حسۆ میرخان دبیتە پێشمەرگە. هه‌ر وی ده‌می ل مرێبا شه‌ڕه‌کی مه‌زن دناڤبه‌را پێشمه‌رگه‌ی و جاش و له‌شکه‌رێن رژێمێ دا ڕوودده‌ه‌ت، کاک مه‌حمود ژی د وی شه‌ڕی دا پشکدار دبیت. ھێزێن شۆڕشێ د وی شەڕی دا ھەژمارەکا شەھید و برینداران ددەن. پاشی سلێمان میرخان ژی ل شه‌ڕێ باعەدرێ شەھید دبیت و ئێدی حسۆیێ یێ برایێ وی ل شوینا وی بەرپرسیاریێ وەردگریت.
کاک مه‌حمود لگه‌ل هه‌ڤالێن خوه پشکداریێ د شه‌ڕێ بریفکا شێخا دا دکه‌ت. ژ بەر گرانیا شەڕی ھێزێن ڕژێمێ تێنه دووپێچکرن، ڕژێم نەچاردبیت ب پەڕەشۆتا خوارنێ بۆ ھێزێن خوە بەردەته خوارێ، لێ ئەو خوارن ژی دکەڤیتە ئالیێ پێشمەرگەی و هێزێن پێشمه‌رگه‌ی مفای ژێ وه‌ردگرن.
ژ بۆ ڕزگارکرنا ئه‌ترووشێ مام مەحمود و ھێزێن پێشمەرگەی ب فەرمانا حسۆ میرخان ڕەخ و دۆرێن ھێزا گەڕۆک (قوە سیارە) یا دوژمنی دگرن. د وی شەڕی دا عەلی عەسکەری، کو وی ده‌می ئێک ژ سه‌رکێشێن پێشمه‌رگه‌ی بوو، ب زمانێ عەرەبی داخوازا خوەڕادەستکرنێ ژ ھێزێن دوژمنی دکەت. ھێزێن دوژمنی بارەگایێ خوە بەرددەن و دچنە د ئاڤاهیێ ڕێڤەبەرێ ناحیێ ڤە. پاشی پشتی ٨-٩ ڕۆژێن دۆرپێچێ ھێزێن پێشمەرگەی ئەترووشێ ژ ھێزێن دوژمنی ئازاد دکەن و دەستی ددانە سەر ھەژمارەکا مەزن یا چەک تەقەمەنیان و وی چەک و تەقەمەنیێ دبەنە شکه‌فتا گوندێ شکه‌فتێ. پشتی وی شەڕی مام مەحمود تڤه‌نگه‌کا بڕنۆیا ناڤنجی (وەسەت) یا چیکی وەردگریت، ئێدی وه‌رگرتنا ڤی چه‌کی مۆرالا وی گه‌له‌ک بلند دکه‌ت.
پاشی مام مەحمود ل سەر فەرمانا عەلی شەعبان دچیتە ھرۆرێ و ل وێرێ زیندانه‌کێ بۆ شۆڕشێ چێدکه‌ن. پاشی پشتی مه‌هه‌کێ ئه‌و دچیتە دەف عیسێ سوار ل بێتاسێ ل ده‌ڤه‌را زاخۆ و نێزیکی سالەکێ ل وێرێ ئه‌رکێ خوه دبینیت. هه‌ر ل وێرێ ل ساڵا ١٩٦٢ ئه‌و لگه‌ل شه‌هید حەجی قادۆگراڤی، ل سه‌ر فه‌رمانا شه‌هید عیسێ سوار، ژبۆ ڕێکخستن و وەرگرتنا خویکێ ژ بۆ شۆڕشێ دچنە دەشتا دووبانێ.
پشتی کو دوژمن هێرشێ دکه‌ته ده‌ڤه‌را باتیفا مام مەحمود لگه‌ل هه‌ڤالێن خوه د هه‌وارا هێزێن پێشمه‌رگه‌ی یێن وی به‌ره‌ی دچن و ١٨ ڕۆژا دکه‌ڤنه شه‌ڕه‌کی گران هه‌ر ژ گوندێ ملا عه‌ره‌بی و هه‌تا نێزیکی باتیفێ. ھێزێن پێشمەرگەی ھەتا سەرێ کەلا شابانیێ دگرن و ھێزێن ڕژێمێ د باتیفادا تێنه دوورپێچکرن. ڕژێم نەچار دبیت ب فڕۆکان ھێزێن خوە ژ باتیفا بڕه‌ڤینیت.
ل ساڵا ١٩٦٣ شەڕێ چیایێ مەتینا دەستپێدکەت، کو هێزه‌کا مه‌زن ژ له‌شکه‌رێ ئیراقێ و له‌شکه‌رێ سوریێ و جاشا هێرشه‌کا مه‌زن به‌ره‌ڤ بامه‌ڕنێ، چیایێ مه‌تینا و مشارا به‌رواری باڵا ده‌ستپێدکه‌ن. مام مەحمود ھرۆری دگەل ئەحمەد شانەی پشکدراریێ د وی شەڕی دا دکەت و دچیتە ناڤێلا ل سه‌رێ چیایێ مه‌تینا. پشتی ١٧-١٨ ڕۆژێن بەرخودانه‌کا بێوێنه و شه‌هید بوونا کۆمه‌کا پێشمه‌رگێن قاره‌مان، ھێزێن پێشمەرگەی کۆلانه‌کێ بۆ هێزێن دوژمنی ڤه‌دکه‌ن، ژ بامه‌ڕنێ، کانی بۆتکێ، گه‌لیێ هه‌سپا، ده‌رگه‌لا موسا به‌گێ و تا چیایێ گابنێرکی، ئێدی هێزێن دوژمنی کێش دبنه د ڤێ ته‌پکێ دا یا پێشمه‌رگه‌ی بۆ وان کۆلای. ھێزێن دوژمنی باره‌گایێ خوه دداننه ده‌رگه‌لا موسا به‌گێ، لگه‌ل چه‌ک و جه‌بلخانه‌یه‌کا مه‌زن. محسن بەگێ به‌رواری ژی باره‌گایێ خوه ددانیته ده‌رگه‌لێ. پێشه‌نگێن هێزێن دوژمنی، کو کۆمه‌کا جاشا بوون دگه‌هنه چیایێ گابنێرکی ل باشوورێ رۆژاڤایێ کانیماسێ و ئێدی پێشمه‌رگه وه‌ک برووسک و باهۆزێ هێرشێ دبه‌نه سه‌ر. هێزا جاشا یا کو گه‌هه‌شتبوو گابنێرکی هه‌ر ب ئێکجاری ژناڤدچیت. ئێدی هه‌ر ژ هنداڤی بامه‌ڕنێ بگره و هه‌تا گه‌لیێ هه‌سپا، ده‌رگه‌لا موسا به‌گێ گابنێرکی، پێشمه‌رگه وه‌ک شێرا هێرشێ دبه‌نه سه‌ر هێزێن دوژمنی. ئێدی قاڕقاڕ و هه‌وارێن له‌شکه‌رێ سوری، جاشا و له‌شکه‌رێ ئیراقێ تێکه‌ل دبن. ئه‌و هێزا مه‌زنا کو پێشمه‌رگه‌ی ئێخستیه ته‌پکا خوه پڕانیا وێ ژناڤچوو و ئه‌و گه‌لیێن چیایێ مه‌تینا تژی که‌له‌خێن جاشا و له‌شکه‌رێ سوری و ئیراقی بوون و هه‌تا بامه‌ڕنێ پێشمه‌رگه‌ی ڕاهێلا وان. ل باره‌گایێ وانێ ده‌رگه‌لا موسا به‌گێ هه‌ژماره‌کا مه‌زنا چه‌ک و جه‌بلخانه و پیدڤیێن له‌شکه‌ری که‌فتنه ده‌ستێ پیشمه‌رگه‌ی، کو هنده‌ک تۆپێن مه‌زن دناڤ دابوون و جارا ئێکێ بوو ئه‌و جۆره تۆپه بکه‌ڤنه ده‌ستێ پیشمه‌رگه‌ی. مام مەحمود دڤێ دیدارێ دا دبێژیت:سەدەمێ سەرەکیێ سەرکەفتنا ھێزێن پێشمەرگەی ل سەر سوپایێ دوو ڕژێمێن داگیرکه‌ر، بیروباوەەریا مللەتی بوو ب بارزانیێ نەمر و باوەریا بارزانیێ نەمر بوو ب مللەتی. چونکە بازانیێ نەمر چ جارا خوە ژ مللەتێ خوە و پێشمەرگەی جودا نەدکر، ئەگەر پێشمەرگە برسیبا دا ئەو ژی خوە برسی ھێلیت. بڕاستی بارزانیێ نەمر سەرکردەیه‌کێ دادپەروەر و ڕێبەرەکێ دلۆڤان بوو.
پشتی ڤی شەری و بۆ جارا ئێکێ ھەر پێشمەرگەیه‌ک پێنج دینارا دگەل ھندەک تویتنێ و بەرکێن چه‌قماقا ئاگری و دەڤکێن ڕیھتراشینێ وەرگرتن، وی دەمی شیانێن شۆڕشێ ھەر ھندە بوون، لێ بیروباوەرێن پێشمەرگەی و مللەتی گەلەک بھێزبوون و چاڤێ کەسێ ل قازانج و بەرژەوەندیێن کەسی و تایبەت نەبوو.
مام مەحمود ھرۆری پشتی ڕێکەفتنا ١١ ئادرا ساڵا ١٩٧٠ ھەتا ساڵا،١٩٧٤ وه‌ک کادره‌کی کۆمه‌ڵایه‌تی ل گوندێن رۆژئاڤایێ ده‌ڤه‌را به‌رواری باڵا د ئه‌رکی دا بوویه.
پشتی کو دوژمن ل بهارا ساڵا 1974 هێرشێ دکه‌ته‌ڤه کوردستانێ، ئەحمەد شانە دبیتە فه‌رماندێ بەتالیۆنه‌کا هێزا ئامێدیێ و باره‌گایێ وان دکه‌ڤیته گەلیێ بێسرێ. مام مەحمود ژی ل هه‌مان به‌تالیونێ دبیتە فه‌رماندێ سریێ و 11 مه‌ها ل گەلیێ بێسرێ درێژیێ ب خەباتا خوە ددەت. پاشی به‌تالیونا 3 یا هێزا ئامێدیێ تێته دامه‌زراندن و محمه‌د عه‌لی بناڤی دبیته فه‌رماندێ وێ و مام مه‌حمود ژی دبیته فه‌رماندێ سریێ ل وێ به‌تالیونێ و به‌تالیونا وان تێته ڤه‌گوهاستن بۆ ده‌ڤه‌را باڵه‌کایه‌تی و تاکو شکه‌ستنا ئادارا 1975 ئه‌و ئه‌رکێ خوه ل باکوورێ ڕه‌واندزێ دبینن. مام مەحمود ل سەر داخوازا کاک ئیدریسێ جانەمارگ ژبۆ دیتنا بارزانیێ نەمر دچیتە حاجی ئومه‌ران و ژ بۆ جارا ئێکێ ئه‌و ب دیتنا بارزانیێ نەمر شاد دبیت و وب شەڤێ ل بارەگایێ بارزانیێ نەمر دمینیت. ڕۆژا پاشتر کاک ئیدریس وی ب ئەرکەکی دسپێریت و وی ژبۆ دیتنا محەمەد عەلی بناڤی دھنێریتە نەغەدێ.
ل ده‌مێ شکه‌ستنا شۆڕشێ ل ئادارا 1975 مام مەحمود و خێزانا خوە ئاوارەیی ئیرانێ دبن و ل دەستپێکێ ٤٠ ڕۆژا ل زێوە دمینن، پاشی وان دگەل ٥٠ خێزانا دبەنه باژێڕێ ئاراک. پشتی ھینگێ وان ڤه‌دگوهێزنه ئوردوگایێ جەھرۆم ل باشوورێ ئیرانێ و ٦ مه‌ها ل بن چادرا دژین و وان دبەنە خۆلێن پیشەیی. پشتی ٦ مه‌ها جارەکا دی وان ڤەدگەڕیننەڤە ئاراک. مام مەحمود ل وێرێ دەست بکاری دکەت. بەری شۆڕشا ئێسلامیا ئیرانێ کادرێ پارتی حەبیب کەلەش نامەیه‌کا کاک ئێدریسێ جانەمەرگ بۆ مام مەحمودی دئینیت. دنامێ دا کاک ئیدریس داخوازدکه‌ت کو ئەو و سەید سالح و مەلا تاھرێ ڕەشاڤایێ بچنه باژێڕێ کەرەج ده‌ف وی. ئەو ژی تێنه کەرەج و کاک ئێدریس دبینن و فەرمانێ ددەته وان کو لژنەیه‌کا پارتی ب نھێنی ل باژێڕێ ئه‌و لێ دامه‌زرینن. ئێدی مام مەحمود، د. کەمال کەرکووکی، سەید سالح و مەلا تاھرێ ڕەشاڤایێ لژنەیه‌کا پارتی ل ئاراک دادمەزرینن.
ل ساڵا 1979 ئه‌و و هه‌ڤالێن خوه پشکداریێ د کۆنگرا ٩ یا پارتی دا که‌ن. پشتی کۆنگره‌ی ئه‌و ڤه‌دگه‌ڕنه‌ڤه ئاراک. پاشی کاک ئیدریس بارزانی بڕێیا حه‌مید به‌رواری وان ئاگه‌هدار دکه‌ت کو مالێن خوه ڤه‌گوهێزنه رۆژهه‌لاتێ کوردستانێ دا نێزیکی مه‌یدانا خه‌باتێ ببن. ئه‌و ژی ل سەر فەرمانا کاک ئیدریس ڤەدگەڕیتە ڕۆژھەلاتێ کوردستانێ و ماڵا خوه دئینیته نه‌غه‌ده و ده‌ست بکارێ پێشمه‌رگاتیێ دکه‌ت و دبیتە فه‌رماندێ بەتالیۆنێ و دەست ب تۆمارکرنا ناڤێن پێشمەرگەی دکەت. مام مەحمود ناڤێن ١٠٥ پێشمەرگا تۆماردکەت و د چیتە دگەل سەیدایێ نەجمدین یوسڤی. ئه‌و ل دەستپیکێ ل خنێره‌ی، ده‌ڤه‌را لۆلان ئه‌رکێ خوه دبینیت و پاشی دگەل ده‌سته‌یا ڤه‌کۆلینێ (ھەیئا تەفتێشی) ب سەرپەرشتیا فازل میرانی، ھشیار زێباری و نەجمەدین یوسفی، پاییزا 1981 دچیتە ده‌ڤه‌را لقا ئێک. ل سەر پرا بلبل، ل سه‌ر ڕووبارێ زێی، فڕۆکێن سەمتیێن دوژمنی تێنە سەر وان. فازل میرانی و ھشیار زێباری و سەیدایێ نەجمدین و ھەژمارەکا پێشمەرگەی دنیڤا ڕویباری دا باڵاڤا خوە دکر. ئەو نەچاردبن خوە دبن داراڕا ل ڕەخ و دۆرێن ڕویبارێ زێی خوە بپارێزن. فرۆکێن دوژمنی بڕەکا پەزی دبینن و دکەنه ئارمانج و پتر ژ١٠٠ پەزی دکوژن. پشتی ھینگێ ئه‌و دچنه گوندێ تروانش و گوندێ ئێکمالێ ل ده‌ڤه‌را به‌رواری باڵا. پاشی دچنە بارەگایێ لقا ئێک ل کۆماتەی. وی دەمی دکتۆر جەرگیس بەرپرسێ لقێ بوو، حەبیب کەلەش، سەید سالح و دکتۆر ڕزگار کارگێڕێن لقێ بوون. دبیتە قەرەبالغەکا مەزن ل باره‌گایێ لقێ، ژبه‌ر هندێ ئه‌و نەچاردبن بچنه ناڤ مالێن پێشمه‌رگه‌ی ل گه‌ڤه‌رۆکێ به‌رامبه‌ر هه‌ردوو گوندێن ئێکماله ومه‌رگه‌هێ یێن باکوورێ کوردستانێ. مام مەحمود ٤ مه‌ھا دگەل لژنا تەفتێشی دمینیت. لژنا تەفتێشی ھەمی ڕێکخراو و مەفرەزا ئێک ئێکە گازی دکەت و دگەل وان دڕوینێت.
دۆماهییا سالا 1981 ل زڤستانا وێ ئه‌و ڤەدگەڕنەڤە. د ڕێ دا دیسا ئه‌و دچنە گوندێ ئێکمالێ و بەفر لێدکەت، پاشی دچنه گوندێ بێتکارێ و ئێدی گوند بەرگوند دچن. بەفر ڕێکا وان دگریت، فازل میرانی بڕێڤە گێژ دبیت. گیرۆبوونا وان دبیتە جھێ مەترسیێ بۆ سەرکردایەتیا پارتی، لۆما بەرھەڤیێن ھنارتنا ھێزەکا پێشمەرگەی د دویف وان ڕا تێنه‌کرن. لێ دوماهیێ پشتی ١٨ ڕۆژان ژنوی دگەھنه باره‌گایێ سه‌رکردایه‌تیێ ل رۆژهه‌لاتێ کوردستانێ. جاره‌کا دی مام مه‌حمود دچیته‌ڤه خنێره‌ی سه‌ر ئه‌رکێ خوه یێ پێشمه‌رگاتیێ به‌رده‌وام دبیت.
ل ساڵا 1984 سه‌یدایێ نجم الدین یوسڤی دبیته به‌رپرسێ لقا ئێک و مام مەحمود ژی لگه‌ل وی ڤەدگەڕیتەڤە لقا ئێک. هه‌ر ل بهارا هه‌مان ساڵ ئه‌و لگه‌ل به‌رپرسێ لقێ سه‌یدایێ نجم الدین و به‌رپرسێ له‌شکه‌ریێ لقێ سه‌ید سالح گه‌ڕه‌کا درێژ ل ده‌ڤه‌رێن هه‌ر پێنج لژنێن لقا ئێک دکه‌ن. هه‌ر ژ لژنا ئامێدیێ، زاخۆ، دهۆک، شێخان و پاشی ئاکرێ، گه‌ڕا وان نێزیکی سێ مه‌ها ڤه‌دکێشیت و د وێ گه‌ڕێ دا ل ئێڤاریا 10/4/1984 هه‌ردوو ڕێکخراوێن شه‌هیدان شه‌عبان غه‌فار و شه‌عبان عومه‌ر کو دگه‌ل وان دا بوون، لگه‌ل هێزه‌کا لژنا شێخان و دهۆکێ، هێرشێ چه‌په‌رێن دوژمنی یێن مێرگا هه‌له‌فیێ دکه‌ن ل ناڤبه‌را ئاشه‌وا و سه‌رسنکێ و وان دگرن. دڤێ چالاکیێ دا 4 پێشمه‌رگه شه‌هید و 9 ژی برینداردبن.
پاشی جاره‌کا دی ل ساڵا 1986دگەل سەیدایێ نەجمدین یوسفی دەست ب گەڕەکا دی ل گوندێن دەڤەرا بەھدینان دکەن. ئه‌و دچنه گوندێ ئێکمالێ و ھەشت ڕۆژا دگەل ٣٠ پێشمەرگا ل مالا تاھر ئێکمالایی دمینن. ئێدی گوند بەر گوند دچن و ھەر گوندێ بگەھنێ سەیدایێ نەجمدین سمینارەکێ لێ پێشکەش دکەت. پاشی دچنه گوندێ ئێمینکێ و ل وێرێ ڕه‌بیا دوژمنی ته‌قێ ل وان دکه‌ت. ئه‌و ل ئێمینکێ شیڤێ دخۆن، خەلکێ گوندێ بەرێ بھار تۆڕەدبن کو دسەر وان ڕا دربازبووینە و شیڤا خوە بریە گوندەکێ دی. پشتی ھینگێ دچنه گوندێ خورپنیێ و پاشی دچن هیرشی ڕەبیێن غەلبووکێ دکه‌ن و وان دگرن. پشتی هینگێ لیوا دھۆکێ تۆپباران دکەن. پاشی دچنه دەڤەرا زاخۆ و باره‌گایێ فرقا سوپایێ دوژمنی ل زاخۆ تۆپباران دکەن.
د ده‌مه‌کی دا کو هێزا وان ئاماده‌کاریێن لێدانا باره‌گایێ لیوایا له‌شکه‌رێ دوژمنی یێ باتیفێ دکه‌ت، ناڤبه‌را جه‌عفه‌ر بێسفکیێ مسته‌شارێ جاشا و ڕژێما ئیراقێ تێکدچیت، ل سه‌ر ڤه‌گوهاستنا فه‌وجا وی ژ مانگێشکێ بۆ ده‌ڤه‌ره‌کا دی. دڤی کاودانی دا ڕژێما ئیراقێ جه‌عفه‌ری دگریت و پێشمه‌رگه ژی بهاریکاریا برازا و جێگرێ وی سیف الله بێسفکی مانگێشکێ ڕزگار دکه‌ن و سه‌یدایێ نجم الدین و مه‌لا ره‌مه‌زان بهه‌شتی سه‌رپه‌رشتیا ڤێ چالاکیێ دکه‌ن.
ھەر ل ساڵا ١٩٨٦ جەنابێ سەرۆک مه‌سعود بارزانی تێتە لقا ئێک و دگه‌ل جه‌نابێ وی دا ده‌سته‌یا ڤه‌کۆلینێ (هه‌یئا ته‌فتیشی) ژی تێت، کو پێکهاتبوو ژ د.جه‌رگیس حه‌سه‌ن، هشیار زێباری و زه‌عیم عه‌لی. جه‌نابێ سه‌رۆکی و ده‌سته‌یا ڤه‌کۆلینێ ژ ئه‌نجامێ ڤه‌کۆلینێن دوور و درێژ گه‌له‌ک گوهڕینا ل سنوورێ لقا ئێک ئه‌نجامدده‌ن، کو ئێک ژ وان دانانا د. رۆژ نوری شاوه‌یس وه‌ک به‌رپرسێ ئێکێ یێ لقا ئێک و ره‌مزی شه‌عبان وه‌ک به‌رپرسێ دووێ و سەیدایێ نەجمدین ژی تێته ڤه‌گوهاستن بۆ باره‌گایێ سه‌رکردایه‌تیێ ل ڕۆژھەلاتێ کوردستانێ. مام مه‌حمود ژی جاره‌کا دی لگه‌ل سه‌یدای تێته ڤه‌گوهاستن بۆ باره‌گایێ سه‌رکردایه‌تیێ.
مام مەحمود و ھێزا خوەیا پێشمەرگەی ل ساڵا ١٩٨٧ دگەل محەمەد مه‌لا قادر و سەیدایێ نەجمدین و خالد ئاژگەیی دچنە ده‌ڤه‌را باڵه‌کایه‌تی ل شێخ وەسان. ڕژێمێ بەری ھینگێ ئەو دەڤەر کیمیا بارانکربوو. ئەو ژ بلی دوو پیرەژنا کەسێ دی ل وێرێ نابینن. پاشی دچن هێرشی رەبیێن سەرێ چیایێ سەفینی دکه‌ن و وان دگرن. سه‌رۆک جاش ئەنوەر بەگێ بێتواتەی وان تۆپباران دکەت، به‌رامبه‌ر ڤێ ھێزێن پێشمەرگەی ژی دچن 5000 سەرێن پەزێ وی دئینن.
ل ساڵا ١٩٨٨ ئەنفال دەستپێدکەن، مام مەحمود ژی ڤەدگەڕیتە نەغەدە ل ڕۆژھەلاتێ کوردستانێ و ھەتا سەرھەلدانێ ل وێرێ دمینیت.
پشتی سەرھەلدانێ دیسان ئه‌و دگەل سەیدایێ نەجمدین و زەعیم عەلی تێتە دھۆکێ. ل کۆچا ملیۆنی دچنه زاویتە و سەرسنکێ و پاشی دچن ل کەلا شێروانێ بارەگایێ خوە ددانن. پشتی دان و ستاندنێن دگەل ڕژێما ئیراقێ دەستپێدکەن سەرۆک بارزانی دچیتە دەف وان و دوێرێ ڕا دچیتە بەغدا.
پاشی ئه‌و بارەگایێ بەرەیێ کوردستانی دئیننه زاویتە، مام مەحمود ژی دچیتە مالا خوە ل نەغەدە و ھەتا ساڵا ١٩٩٤ ل وێرێ دمینیت.
ساڵا 1994 ئه‌و ماڵا خوه دئینیته دهۆکێ و دبیتە فه‌رماندێ فەوجێ و ئەفسەرێ لەشکەری ئەنوەر ئیسماعیل تروانشی ژی دبیتە جێگرێ وی. فەوجا وان تێته ڤه‌گوهاستن بۆ سپیلکی و پشتی هینگێ د شه‌ڕێن ناڤخۆ دا پشکدار دبن. مام مەحمود دبێژیت: سەرەڕای کو ئەم ل بەرەیێ شەڕی بووین، لێ ڕوژانە ئەنوەر مەشق و ڕاێھێنانێن سەربازی ب ھێزێن پێشمەرگەی دکرن.
بڕیار تێته دان کو فه‌وجا وان بچیته بسه‌ر لیوایه‌کێ ڤه کو کەڤنە سەرۆک جاشەک فه‌رماندێ وێ لیوایێ یه. لێ مام مەحمود پێگیریێ ب وێ بڕیارێ ناکەت. گەڤ لێ تێنە کرن کو ئەگەر وێ بڕیارێ جیبجی نەکەت ئێدی چ بۆ وی ناھێته کرن. مام مەحمود ل سەر ڤێ بڕیارێ برووسکەکێ بۆسەرۆکی دکەت و وێ بڕیارێ ددەته ڕاوەستاندن.
کوڕێن مام مه‌حمود ژی رێبازا وی گرتیە و پشکداری د شەڕێ داعش دا کریە. کوڕێ وی ێنجبەر دشەڕێ داعش دا بریندار دبیت. فەرھادێ کوڕێ وی ژی ئەفسەرە ل ئاسایشێ و عەلی ژی کادره‌کێ پارتیە ل ھۆڵەندا.
مام مه‌حمود ل کۆنگرا پارتی یا ١٣ ل ساڵا ٢٠١٠ ژ لایێ سەرۆک بارزانی ڤە ب میدالیا بارزانیێ نەمر تێتە خەلاتکرن.
پشتی دەزگەھێ ئەیلۆلێ تێتە دامەزراندن ئه‌و دبیتە ئه‌ندامێ دەزگەھێ ناڤبری. پاشی ل ساڵا ٢٠١٧ ب بڕیارا سەرۆک بارزانی ب پله‌یا لیوا تێته خانەنشینکرن. نوکە ژی بەرپرسێ دەزگەھێ ئەیلۆل و گولانێ یه ل دھۆکێ و یێ و بەردەوامە ل سەر خەباتا خوە.
سه‌نته‌رێ کۆماته
یێ دێکومهنت کرنا دیرووکا شۆڕشێ
کار و ئه‌رکێ سه‌نته‌رێ کۆماته دێکۆمێنت کرن و پاراستنا دیرووکا شوڕشێ یه ژ مرن و ژناڤچوونێ.
ڤی سهنتهری ب ستافهکێ بچووک و شیانێن ساده، لێ ب ڤیان و باوهریهکا مه‌زن، وه‌ک پێنگاڤا خوه یا کاری یا ئێکێ، ده‌ست ب کۆمکرن، دێکۆمنێت کرن و تۆمارکرنا دیرووکا خه‌بات و شۆڕشا کوردستانێ کریه.
