سەنتەرێ کۆماتە یێ دەکۆمێنتکرنا دیرووکا شۆڕشێ، ب مەرەما ئەنجامدانا دیدارەکا ڤیدیۆیی و تۆمارکرن و ئەڕشیفکرنا خەباتا پێشمەرگە و تێکۆشەرێ دێرین (تەیب عومەر ئەبابەکر) ڕاڤینی ل ڕۆژا دووشەمبی ڕێکەفتی ٣٠/١/٢٠٢٣ سەرەدانا وی کر ل مالا وی، لێ مخابن ڕەوشا ساخلەمیا وی یا گەلەك خراب کو چەندین سالە دگەل ئێش ئازارێن برینداربوونا خوە یا گران ل داستانا کانیماسێ دژیت ڕی نەدا مە وەکو پێتڤی ئەرکێ خوە ب جی بینین.
تەیب عومەر ئەبابەکر ڕاڤینی، یێ ناسیار ب تەیب ڕاڤینی ل ساڵا ١٩٥٦ ل گوندێ ڕاڤینا یێ سەر ب دەڤەرا کانیماسێ هاتیە سەر دنیایێ، وی خواندنا خوە یا سەرەتایی و ناڤنجی ل کانیماسێ و زاخۆ خواندیە و سالەکێ ژی خواندنا ئامادەیی ل دهۆکێ خواندیە.
تەیب ڕاڤینی دگەل هەلبوونا چریسکا شۆڕشا گولانێ ل ساڵا ١٩٧٦ دبیتە ئەندامێ ڕێکخستنێن نهێنی یێن پارتی دیموکراتی کوردستان و دناڤ جەگێ دوژمنی دا دکەڤیتە بزاڤ و چالاکیان ل دژی ڕژێمێ. ل ساڵا ١٩٧٩ ڕێکخستنا وانا نهێنی تێتەئاشکەراکرن لێ خۆشبەختانە کاك تەیب ناکەڤیتە دەستێن ڕژێمێ، بەلکو دەملدەست پەیوەندیێ ب ڕێزێن شۆڕشێ دکەت و دگەل مەفرەزا شەهید مەلا رەمەزان (بهەشتی) دبیتە پێشمەرگە.
د هەمان ساڵ دا پشکداریێ د چاندنا ١٢ مینان دا دکەت ل سەر ڕێکێن هاتن و چوونا لەشکەرێن ڕژێمێ ل جهێن جودایێن دەڤەرێ.
ل ساڵا ١٩٨٠ وەکو کادر بۆ مەفرەزا شەهید شەعبان غەفار تێتە ڤەگوهازتن و پشکداریێ د چالاکیەکێ دا دکەت ل گوندێ ئەرەدنا ژێری کو دوو پلەدارێن بەعسیا د وێ چالاکیێ دا تێنە گرتن و ئێک ژی تێتە کوشتن.
پاشی کاک تەیب بۆ ڕێکخراوا شەهید شەعبان عومەر کو بەرپرسێ وێ سەید نایف چەلکی بوو تێتە ڤەگوهازتن و هەتا ساڵا ١٩٨٦ ل وێ ڕێکخراو درێژیێ ب خەباتا خوە ددەت و پشکداریێ د چەندین چالاکیێن لەشکەری دا دکەت وەکی:
-تۆپبارانکرنا بارەگایێ فەوجا دوژمنی و سەنگەرێن دەوروبەر ل ساڵا ١٩٨١ ل گوندێ ڕاڤینا.
-ستاندنا سەنگەرەکا دوژمنی ل چییایێ گابنێرکی و لێدانا ئێکا دی ل ساڵا ١٩٨٢.
-لێدانا دوو سەنگەرێن دوژمنی و گرتنا ئێکادی ل ساڵا ١٩٨٢ ل ئاشاوا و دەست بسەرداگرتنا هەژمارەکا چەك و تەقەمەنیێن دوژمنی.
-گرتنا سەنگەرا دوژمنی ل سەرێ حەمێ ل ساڵا ١٩٨٢ و کوشتنا هەژمارەکا سەربازێن دوژمنی و ب دیلگرتنا ٨ سەربازێن دی و دەست بسەرداگرتنا هەموو ئەو چەك و تەقەمەنیێن دوژمنی ئەوێن د وی سەنگەری دا.
-چالاکیا لێدانا بارەگایێ سریا لەشکەرێ ئیراقێ ل بێبووزیێ ل سالا 1980.
– ژ چەککرنا چەکدارێن جیش الشعبی ل نسرا و رەبەتکێ سالا 1980.
-لێدانا بارەگایێ دوژمنی ل کۆمتێ ئاڤ خوێ ل ساڵا ١٩٨٢ ل نێزیکی گوندێ تویلەرێ.
-چالاکیا برنا پەزێ عزت الدوری ل ساڵا ١٩٨٣ ل مالطایێ بەرامبەر دەستدرێژیێن دوژمنی ل سەر پەز و کەوالێن خەلکی ل دەڤەرێن ئازاد.
-لێدانا فەوجا سۆتکی و سەنگەرێن دەوروبەر ل ساڵا ١٩٨٥.
ل ساڵا ١٩٨٥ خێزان و کەس و کارێن تەیب ڕاڤینی ژ لایێ ڕژێمێ ڤە تێنە گرتن و دەرئێخستن بۆ دەڤەرێن ڕزگارکری و ڕژێمێ دەستێ خۆ دانا سەر و مال و ملکێن وان و تالانکرن.
