ئەم 36 ساڵیا وەغەرا ئەندازیارێ ئاشتیێ و دیپلۆماسیێ برێز ببیرتینین

پرانیا وان پێشمەرگە و خەباتکەرێن ئەڤە ساڵەکە مە وەک سەنتەرێ کۆماتە هەڤپەیڤین لگەل کری، کو دبنە 123 پێشمەرگە و خەباتکەر، بتایبەتی ئەوێن ئەڤ نەمرە دیتی و تێکەلی لگەل کری، هەمی دووپاتیێ ل سەر هندێ دکەن کو ئەو هەمی گاڤا زەلامێ ڤەکرنا گریێن ئاسێ بوو دناڤ بزاڤا ڕزگاریا کوردستانێ دا.
ژ کارێن بەرچاڤێن شەهید ئیدریسی رێڤەبەریا کاروبارێن شورشێ و سەرپەرشتیکرنا شەرێن بەرگریێ ل شۆڕشا ئەیلولێ، ئامادەکاریێن شۆڕشا گولانێ و بەردەوام بهێزئێخستن و برێڤەبرنا شۆڕشێ.
ژ بلی هندێ کو هەمی دەما ئەو وەک چاکسازەکی بوو ژ بۆ هەموو ئارێشێن ناڤا پارتی و شۆڕشێ و گەلەکێ هۆستا بوو دڤی باری دا.
لێ دڤێت ژبیرنەکەین ژی کو ئەو دیپلوماتەکی گەلەک ژیر و هێژا و سەرکەفتی بوو و بڤێ زیرەکی و هۆشمەندیا خوە ژی ئەو شیا پارتی و شۆڕشێ ژ گەلەک ئاستەنگێن دژوار دەرباز بکەت.
یا هەری گرنگ ژی ئەو بوو کو ئەو خەمخۆرەکی مەزنێ ئێکرێزیا هێزێن کوردستانێ بوو و لۆما ژی هەر ل سەر دەستێ وی، پشتی گەلەک ساڵێن درێژێن شەڕ و ناکۆکیان، هێزێن کوردستانێ ل سەر مێزەکێ کۆمبوون و هەمی پێکڤە ئاشت بوون، کو دوماهیێ ژی ئەڤ ئاشتیە بوو هێڤێنێ دامەزراندنا بەرەیێ کوردستانی.
مخابن ئەڤ سەرکردێ مەزن بەری 36 سالا وەکی ئەڤرۆ و د ژیەکی گەلەک بچویک و د دەمەکی دا کو کورد و کوردستان گەلەک پێدڤی ب وی بوون وەفاتکر.
هزار سلاڤ ل گیانێ پاکێ تە بن ئەی سەرکردە و ئەندازیارێ ئاشتی و دیپلوماسیێ کاکە ئیدریسێ جانەمەرگ.