پێشمه‌رگێن کۆماته‌ی سوپاسدارێن ته‌نه‌ جه‌نابێ کاک نێچیرڤان بارزانی

پێشمه‌رگێن کۆماته‌ی سوپاسدارێن ته‌نه‌ جه‌نابێ کاک نێچیرڤان بارزانی

پار دروست وه‌کی ئه‌ڤرۆکه‌ سه‌نته‌رێ مه‌ یێ کۆماته‌ی ده‌ست ب کارێ خوه‌ یێ دێکۆمێنتکرن و ئه‌رشیفکرنا دیرووکا شۆڕشێ کر. رۆژا 28/11/2021 مه‌ ئێکه‌مین هه‌ڤپه‌یڤینا خوه‌ لگه‌ل کادر و پێشمه‌رگه‌یه‌کی هه‌ردوو شۆڕشێن ئه‌یلول و گولان و سه‌رهلدانێ ئه‌نجامدا و دوهی ژی مه‌ هه‌ڤپه‌یڤینا خوه‌ یا 103 ئه‌نجامدا.
ژ بلی هندێ کو پاراستنا چیرۆکێن خه‌باتا ڤان قاره‌مانان و دیرووکا وان بخوه‌ سامانه‌کێ مه‌زنه‌ ژ بۆ دیرووکا مه‌ و نفشێن مه‌ یێن پاشه‌رۆژێ، هه‌روه‌سا هه‌ڤدیتن لگه‌ل وان و گوهداریکرنا چیرۆکێن خه‌باتا وان بخوه‌ ژی، دچاڤێن ڤان خه‌باتکه‌ران دا ڕێزگرتنه‌کا مه‌زن و کاره‌کی پیرۆزه‌.
ل گۆره‌ی سه‌ربۆرا مه‌ یا ساڵه‌کێ لگه‌ل ڤان سه‌ربازێن ووندا، پڕانیا وان دژبیرکرینه‌، دپاشگوهڤه‌هاڤێتینه‌، د دانعه‌مرن، دنه‌خۆشن و دبێچاره‌نه‌. لۆما ده‌ما ئه‌و دبینن کو هنده‌ک که‌س و ده‌زگا هه‌نه‌ پویته‌ی دده‌نه‌ وان، سه‌را دده‌ن و گوهداریا چیرۆکێن خه‌باتا وان دکه‌ن و ل دیرووکا وان خودان ده‌ردکه‌ڤن، هه‌روه‌کی گوله‌کا چرمسی و مه‌لیل ل به‌ر تیرۆژکا رۆژێ کوزری و تۆ ئاڤه‌کا ته‌زی به‌رده‌یه‌ سه‌ر و به‌لگێن وێ گه‌ش دبن و گولا وێ سه‌رێ خوه‌ بلندکه‌ت و خوه‌ ل به‌ر بای دهه‌ژینیت، ئاها وه‌سا ڕه‌نگ و سیمایێ ڤان جامێران ڤه‌دبیت و گه‌ش دبن و سه‌د جارا دبێژن: ئاها مه‌ به‌س ئه‌ڤه‌ دڤێت، مه‌ قه‌سر و تومبێل و پاره‌ نه‌ڤێن، مه‌ ڕێزگرتن و پویته‌دان و ژبیرنه‌کرن دڤێت.
هه‌لبه‌ت ئه‌م ژی وه‌ک سه‌نته‌رێ کۆماته‌، یێ کو ب هاریکاری و پشته‌ڤانی و دلسۆزیا جه‌نابێ کاک نێچیرڤان بارزانی جێگرێ سه‌رۆکێ پارتی دیمۆکراتی کوردستان هاتیه‌ ڤه‌کرن، به‌رده‌وام دبێژینه‌ وان کو: ئه‌گه‌ر جه‌نابێ وی نه‌با سه‌نته‌رێ کۆماته‌ ژی نه‌دبوو. ئه‌ڤ سه‌نته‌ره‌ به‌رهه‌مێ دلسۆزی و پشته‌ڤانیا جه‌نابێ ویه‌. دیسان ئه‌گه‌ر پشته‌ڤانی و هه‌ماهه‌نگیا کاک ئاکۆ محه‌مه‌د به‌رپرسێ تۆڕا میدیایا ڕووداو ژی نه‌با، ئه‌ڤه کاره‌ هۆسا جوان و ڕێکوپێک برێڤه‌ نه‌دچوو.
ژ به‌ر هندێ ژی هه‌ما بێژه‌ هه‌می خه‌باتکه‌رێن کو مه‌ هه‌ڤپه‌یڤین لگه‌ل کرین، ژ پێشمه‌رگا، زیندانیێن سیاسی، به‌رگری مللی و نانده‌هێن شۆڕشێ، هه‌می پێکڤه‌ سوپاسدار و منه‌تدارێن جه‌نابێ کاک نێچیرڤان بارزانی نه‌ و لاڤا نزایێن خێرێ بۆ دکه‌ن و ژ خودێ د خوازن وی و سه‌رۆک بارزانی بۆ گه‌ل و وه‌ڵاتێ مه‌ بپارێزیت.
هه‌لبه‌ت ئه‌م ژی وه‌ک ستافێ سه‌نته‌رێ کۆماته‌ ژ دل و گیان سوپاسیا جه‌نابێ وی دکه‌ین، کو وه‌ک سه‌رکرده‌یه‌کی دلسۆز و وه‌ڵاتپارێز و خه‌مخۆرێ دۆزا کوردستانێ، ل گازیا مه‌ خودان ده‌رکه‌تی و پشتی 11 ساڵێن گازی و ده‌رگه‌هـ قوتانا گه‌له‌ک ده‌زگه‌هان، جه‌نابێ وی خوه‌ ل پاراستنا ڤێ دیرووکا زێڕین کریه‌ خودان و ئه‌ڤرۆکه‌ بسایا سه‌رێ جه‌نابێ وی ئه‌م شیاین پشکه‌کا باش ژ دیرووکا خه‌باتا گه‌لێ خوه‌ ژ مرن و ژناڤچوونێ ڕزگار بکه‌ین. هه‌روه‌سا ژ دل و گیان سوپاسیا کاک ئاکۆ محه‌مه‌د دکه‌ین وه‌ک پشته‌ڤانه‌کێ به‌رده‌وام ژ بۆ ڤی کارێ مه‌.
ل دوماهیێ ئه‌م ژی سۆزێ دده‌ین کو وه‌کی رۆژێن پێشمه‌رگاتیا چیای ب دلسۆزی، ب رژدی، ب پاکی و بێ راوه‌ستان خزمه‌تا پاراستنا دیرووکا گه‌لێ خوه‌ بکه‌ین. هیڤیدارم ژیان ڕێ بده‌ته‌ مه‌ کو نه‌ ته‌نێ دیرووکا بسه‌دان قاره‌مانان لێ یا بهزاران ئه‌م تۆماربکه‌ین و ئه‌رشیف بکه‌ین و بکه‌ینه‌ گه‌نجینه‌یه‌ک ژ بۆ په‌رتووک، فلم، رۆمان و کارێن دیێن هێژا.

سه‌نته‌رێ کۆماته‌
یێ دێکۆمێنتکرن و ئه‌رشیفکرنا دیرووکا شۆڕشێ
28/11/2022