عزێر تویلەری دژیەکێ کورت دا، خەباتەکا درێژ تۆمارکر.

سەنتەرێ کۆماتە د بەردەوامیا دەکۆمێنتکرنا دیرووکا شۆڕشێ دا ل ٢٠٢٢⁄٣⁄١٣ ل گوندێ شندۆخا دبیتە مێڤانێ پێشمەرگێ دێرین عزێر تویلەری و لاپەڕێن خەباتا وی یا پێشمەرگاتیێ ب ھەڤپەیڤینەکا ڤیدیۆیێ تۆماردکەت و ژ ناڤچوونێ دپارێزیت.

عزێر (مەسیحا) حسێن زبێر تویلەری ل ساڵا ١٩٦٣ ل گوندێ تویلەرێ یێ سەر ب ناحیا کانی ماسێ ڤە تێتە دنیایێ و ھەتا ساڵا ١٩٧٩ ل گوندێ خۆ کارێ جوتیاریێ دکەت و ھاریکاریا مالا خۆ دکەت، پشتی ھینگێ گوندێ وان ژی مینا ب سەدان گوندێن دەڤەرێ تێتە و کاڤلکرن و وان ڤەدگوهێزنە باژێروکێ باتیفا، ل وێرێ ژ ئەگەرێ لێدانا سیخوڕەکێ ڕژێمێ کو زۆرداری ل خەلکی دکر، نەچار دبیت د ل دویڤ داخوازا بابێ خوە دچیتە دناڤ ڕێزێن شۆڕشێ، لێ ژبەر بچویکاتیا ژیێ وی وەکو پێشمەرگە ناھێتە وەرگرتن، نەچار دبیت ڤەدگەڕیتەڤە دەف بابێ خوە ل باتیفا، لێ جارەکا دی بابێ وی وێ دھنێریتەڤە ناڤ ڕێزێن شۆڕشێ و ئەو ژی خوە دگەھینیتە پێشمەرگێ دێرین فوئاد میرانی و دگەل وی دچیتە بارەگایێ لقا ئێک ل کۆماتەی و دژیێ ١٦ ساڵی دا دبیتە پێشمەگەکێ پەیت و چەڵەنگ و ل ساڵا ١٩٨٠ پشکداریێ د شەڕێ گرتنا رەبیا سوارکا وەلێ و شەڕێ گرتنا سەر حەمێ دا،دکەت.

ڵ ناڤەڕاستا ساڵا ١٩٨٠ دگەل ھندەک پێشمەرگانە ب سەرپەرشتیا شەهید شەعبان غەفار دچیتە مەکتەبا سیاسی ژ بۆ ئیانانا چەکی و ھەژمارەکا چەکێ گران و یێ سڤک دئینن و ڤەدگەرنەڤە کۆماتەی.

ل ھەیڤا ١٩٨٠⁄٩ دگەل ھێزێن لقێ و لژنا ئامێدیێ دچنە چیایێ مەتینا، دڤێ گەڕێ دا پشکداریێ د گەلەک کرێارێن لەشکەری دا دکەت وەکی (گرتنا رەبیا تروانش، ھێرشا فرۆکێن دوژمنی ل کانیا بەستێ، شەڕێ بناڤودەنگێ کەلا شخۆ ل دەڤەرا مەتینی و شەڕێ کانیا باسکاو بێبۆزیێ، ل دەڤەرا ئەترووشێ).

ل ساڵا ١٩٨١ دگەل ڕێکخرەوا شەھید عەلی عبیداللە پشکداریێ د شەڕێ کانیکا تا و شەڕێ شێلازا دا دکەت. ل ساڵا ١٩٨٣ پشکداریێ د پەرسینگگرتنا لەشکەرکێشیا ڕژێما تورکیا بۆ سەر بارەگایێن پارتی دا دکەت. ل ساڵا ١٩٨٤ پشکداریێ د شەڕێ سەرێ ئامێدیێ، رەبیا تنێ، ڕاکرنا رەبیا سەرێ ئیسفکا دا دکەت.

ساڵا ١٩٨٧ پشکداریێ د شەڕ و داستانێن، فەوجا سۆتکی، بامەڕنێ، کانی ماسێ و بێبادێ دا دکەت و ل ساڵا ١٩٨٨ پشکداریێ د داستانا دێرەلۆکێ دا دکەت.

پشتی ئەنفالان لگەل هەڤالێن خوە چەندین شەڤ و ڕۆژێن سەخت و گران د چیایێ مەتینی ڕا دەرباز دکەت و پاشی قەستا توخوبێن تورکیا دکەت، لێ ژ لایێ ڕژێما تورکیا ڤە تێتە گرتن، پشتی چەند ڕۆژان تێت ئازادکرن و ل کەمپا دیاربەکرێ ئاکنجی دبیت. پشتی سەرھەلدانێ ڤەدگەریتەڤە کوردستانێ و درێژیێ ب خەباتا خوە ددەت و پشکداریێ د شەڕێن دژی داعش و حەشدا شەعبی دا دکەت، کاک عزێر د دڕێژاھیا خەبات و تێکۆشینا خوە دا چەندین پۆست و بەڕپرسیاریێن لەشکەری وەردگریت:

ل ساڵا ١٩٨٢ دبتە ئەندام مەفرەزە و ل ١٩٨٦ دبیتە جێگرێ بەرپرسێ رێکخراوا شەهید علی عبیداللە و ل ١٩٨٨ دبیتە بەڕپرسێ ڕێکخراوا پیرس.

ل ساڵا ١٩٩٢ دبیتە جێگرێ ھێزا ١٧ و پاشی دبیت ئامر سریا ١٧ یاھەڤبەش، ل ١٩٩٣ دبیتەجێگرێ فەوجا ٢٣، ل ٢٠٠٥ دبیتە ئەندامێ سۆپایێ ٤، ھێزا ٢ ل بەشێ دیڤچوونێ، ل ساڵا ٢٠١١ دبیتە جێگرێ ھێزا ٢ و ل ساڵا ٢٠١٧ دبیتە مقەدەم و ھەتا نوکە ژی بەردەوامە ل سەر خزمەتا خوە.

کاک عزێر بهندێ یێ بەرنیاسە دناڤ هەڤالێن خوە یێن پێشمەرگە دا کو هەمی دەما کەسەکی قارەمان، نەفس بچویک، ڕەوشت بلند، هەڤال خۆش و وەفادار بوویە.