نوری بابۆخکی

نوری بابۆخکی، ئەو پێشمەرگێ چار جاران بریندار بووی وچار برایێن وی شەھید بووین

سەنتەرێ کۆماتە یێ دەکۆمێنتکرنا دیرووکا شۆڕشێ ل ٢٠٢٢⁄٤⁄١٢ دبیتە مێڤانێ پێشمەرگێ دێرین و ھەلگرێ میدالیا بارزانیێ نەمر، کاک نوری بابۆخکی و دیدارەکا ڤیدیۆیی یا درێژ دگەل ئەنجام ددەت و دیرووکا خەباتا وی تۆمار دکەت و ژ ناڤچوونێ دپارێزیت.

نوری خەلیل ئەحمەد عەبدولقادر یێ ناسیار ب نوری بابۆخکی ل ساڵا ١٩٦١ ل گوندێ بابۆخکێ ژ بنەمالەکا شۆڕشگێڕ و کوردپەروەر ھاتیە سەر دنیایێ. بیرەوەریێن ویێن زارۆکاتیێ ل سەردەمێ شۆڕشا ئەیلۆلێ بتنێ بومبەبارانکرن و سێ جارا سۆتن و چۆلکرنا گوندێ وان بوویە. ٤ برایێن وی ل شۆڕشا ئەیلۆلێ دبنە پێشمەرگە و ھەتا شکەستنا شۆڕشێ ل سەر خەباتا خوە بەردەوام دبن.

پشتی شکەستنا شۆڕشێ ل ساڵا ١٩٧٦ ھەر چار برایێن وی بڕێکا شەھید زۆراب و جاسم جاسم تێنە ڕێکخستن، ھەروەسا ئەو بخوە ژی ل ساڵا ١٩٧٧ ل سەر دەستێ جاسم جاسم تێتە ڕێکخستن و دھەمان ساڵدا دگەل ھەڤالێ خوە خورشید حەمید بابۆخکی پەیوەندیێ ب شۆڕشا گولانێ دکەت.

خۆرشید حەمید تڤەنگا خوە یا کلاشنیکۆف ژی ئەوا پشتی شکەستنا شۆڕشا ئەیلۆلێ ڤەشارتی ب ھاریکاری ھەڤژینا خوە دگەل خوە دڕێکا زاخۆ ڕا، پشتی ل ھەردوو چەمێن خابوور و ھیزلی دەرباس دبن، دبەت و هەرسێ پێکڤە خوە دگەھیننە شەڕنەخێ. پاشی برێکا عبدالرحمان گوندکی و محەمەد خالد بۆسەڵی خوە دگەهیننە ھەدریشێ. پاشی دچنە بێرمانێ و ل وێرێ دبیتە پێشمەرگە و دیویفدا ل کۆماتەی دمینن.

کاک نوری پشتی ڕێکخستنا گرۆپێن پێشمەرگەی دچیتە د گەل مەفرەزا عەریف ناسر و ل ساڵا ١٩٧٨ دچیتە دگەل مەفرەزا عبداللە گەلناسکی و هەر وێ ساڵێ ئەو هێرشێ دبەنە سەر بارەگایێ ئەمنا مانگێشکێ.

ل ساڵا ١٩٧٩ مەفرەزا وان دگەل مەفرەزا محمود قەدشی ژ بۆ پاراستنا بارەگایێ شۆڕشێ ل کۆماتەی دمینینن و دھەمان ساڵدا و ل رۆژا 25/5/1979 لەشکەرێ ئیراقێ هێرشەکا دژوار ژ ئەرد و ئەسمانان دکەتە سەر بارەگایێ کۆماتەی و ئەو بەرەڤانیەکا قارەمانانە ژ بارەگایێ خۆ دکەن و دوژمنی دشکێنن و هەلیکۆپتەرەکێ دئێخن و بدەهان کەلەخێن دوژمنی ب ئاڤا خابووری دا دچن.

کاک نوری پشتی دامەزراندنا ڕێکخراوان ل ڕێکخراوا شەھید عبدالڵە بامەڕنی دگەل زھێر بامەرنی درێژیێ ب کاروانێ خەباتا خوە ددەت و ژ بەر سەربۆڕ و چەلەنگیا وی دبیتە ئامر مەفرەزە و ئەندامێ ڕێکخراوێ.

ل ساڵا ١٩٨١ ڕێکخراوا وان بڕیارێ ددەت گولەکا ئاراستەکری ل بەر ئەمنا بامەڕنێ ڤەدەت، لێ مخابن گولە د دەستێ هەڤالێ وان ئەحمەد حاجی حسێن دا دپەقیت و شەھید دبیت.

کاک نوری ل ساڵا ١٩٨١- ١٩٨٣ دبیتە جێگرێ ڕێکخراوا شەھیدێن گەڤەڕکێ کو بەرپرسێ وێ محەمەد حەمدی بوو و پشکداریێ د شەڕێن کەلا شخۆی و ڕەشێوڕێ و لێدانا سێ رەبیێن ماسیکێ دا دکەت.

ل ١٩٨٤⁄١١⁄١٧ پشکداڕیێ د بوسا د ناڤبەرا سێجێ و زڕکا دا دکەت و زریپۆشەکێ د سۆژن.ل ساڵا ١٩٨٥ پشکداریێ د شەڕێ بەرسینگگرتنا هێرشا مەزنا جاش و لەشکەرێ ڕژێمێ بۆ سەر لژنا ناوچا دھۆکێ دا دکەت و ئەو د شەرەکێ گران و دژوار دا ل گوندێ ئالەکینا گەلەک بگرانی بریندار دبیت و ڕەوشا وی گەلەکا مەترسیدار دبیت.ل ساڵا ١٩٨٦ پشکداریێ د شەڕێ سەر دەڤەرا مانگێشکێ و لژنا ناوچا دھۆکێ دا دکەت، ل دوماھیا گولانا ١٩٨٧ دبیتە جێگڕێ ڕێکخراوا دم دم یا سەر ب لژنا دھۆکێ و ل ساڵا ١٩٨٨ دبیتە بەرپرسێ ھەمان ڕێکخراو و دگەل ھەمی ھێزێن لژنا دھۆکێ پشکداریێ د لێدان و ستاندنا ٧ رەبیە و مقەر سریا ل ناڤبەرە زڕکا و ماسیکێ دا دکەت..بەری ئەنفالێن ڕەش ھندەک چاڵاکیێن جۆری د دھۆکێ دا ئەنجام ددەت.پشتی ئەنفالان ئەو خێزانا خوە ژێک ڤەدقتیێن، خێزانا وی ل بانکا دکەڤیتە دەستێ ڕژێمێ، کاک نوری ژی دورپێچکری ل دەڤەرێ بێ خارن و ڤەخارن دمینیت، ب تنێ ھندەک ئار و شەکر ب دەست دکەڤیت و ل چۆل و چیا تووشی ئێشا مەعدێ ژی دبیت.کاک نوری ژ بەر نەخوەشیا مەعیدێ ژبەر خێزانا خۆ نەچار دبیت و پشتی ( لێبوورینا) سیێێ خوە ڕادەستی ڕژێمێ دکەت و وی ژی دبەن بەحرکێ.ل سەرھەلدانێ خوە دگەھینیت زاویتە و ل لەشکەرێ ٣ دگەل عەمید عابد دبیتە ئامڕ ھێز، پاشی دگەل ھێزێن ھەڤبەش درێژیێ ب خەباتا خوە ددەت، پاشی دبیتە جێگرێ ئامر فەوج و ل ساڵا ١٩٩٥- ١٩٩٧ دبیتە ئامر فەوج ل سوپایێ ئێک، ل ١٩٩٩-٢٠٠٣ دبیتە ئەندامێ سوپایێ ئێک ل دھۆکێ، ل ٢٠٠٣-٢٠١٥ دبیتە ئامر بەتالیۆن ل ھێزا پێشمەرگێ ژینگەھێ ل دھۆکێ و پاشی دھێتە ڤەگوھازتن بۆ ھێزا کارۆخ نوکە ژی ب پلا عەقید ئەندامێ فەرماندا کارۆخ یا ژینگەھێ یە..کاک نوری د کاروانێ دویر و درێژێ خەباتا خوەد (٤) جاران بریندار دبیت و ژ بەر دەنگێ ئار بی جییێ بھیستنا گوھێن وی گەلەک کێم بوویە، کاک نوری د مالا خوە دا خودانێ چار برایێن شەھیدە.برایێ وی (ئەحمەد، ھاشم و عبداللە) ل ئەنفالان شەھید بووینە و مەحمود ژی ل ساڵا ١٩٨٦ ل دھۆکێ ب دەستێ ڕژێمێ شەھید بوویەل ٢٠١٨⁄٨⁄١٦ ب میدالیا بارزانێ نەمر تێت خەلاتکرن.ئەو هێشتا یێ بەردەوامە ل سەر کار و ئەرکێ خۆ یێ پێشمەرگاتیێ.