تێکۆشەرێ دێرین مستەفا عبدالقادر حەسەن لیناڤایی

دچارچۆڤێ بزاڤ و چاڵاکیێن خوەدا، سەنتەرێ کۆماتە یێ دەکۆمێنتکرنا دیرووکا شۆڕشێ سەرەدانا پێشمەرگێ دێرینێ شۆڕشا ئەیلۆلێ مستەفا عبدالقادر حەسەن لیناڤایێ کر و بیردانکا خەباتا وی ب ھەڤپەیڤینەکا ڤیدیۆیی مینا دەکۆمێنتەکا دیرووکی و یا گرنگا شۆڕشا ئەیلۆلێ تۆمارکر و ژ ناڤچوونێ پاراست.

تێکۆشەرێ دێرین مستەفا عبدالقادر حەسەن لیناڤایی ل ساڵا ١٩٤٧ ل گوندێ لیناڤا یێ سەر ب دەڤەرا دۆسکیا ڤە ھاتیە سەر دنیایێ، ھەر ل دەستپێکا ژیێ خوە یێ گەنجاتیێ ئاگەھ ژ بزاڤ و چاڵاکیێن ڕێکخستنێن پارتی ل لیناڤا دبیت و ھەست ب ئێش و ئازارێن مللەتێ خۆ دکەت، لەوما ل ساڵا ١٩٦٢ د ژیێ ١٥ سالیێ دا و پشتی بارزانیێ نەمر دگەھیتە دەڤەرا دۆسکیا، دگەل محەمەد شندۆخی پەیوەندیێ ب ھێزا فەرماندێ نەمر عیسێ سوار دکەت، ئێکەم چاڵاکیا پشکداری تێدا کری، بڕێنا تێلێن پەیوەندیێن ڕژێمێ یێن تێلەفۆنا بوو ل سێمێلێ، پاشی پشکداریێ د لێدانا فەوجا زاخۆ ل نێزیکی گوندێ حەسەن ئاڤا ل ساڵا ١٩٦٢ دا دکەت، کو د وی شەڕی دا ژ بلی کوشتنا ھژمارەکا زۆر یا سەربازێن ڕژێمێ، ١٧٨ سەرباز ژی تێن ئێخسیرکرن و ھەمی ترۆمبێلێن وان تێن سۆتن و چەکەکێ گەلەک مەزن ژی دکەڤیت دەستێ پێشمەرگەی، پشتی ڤی شەڕی دگەل پێشمەرگەی ڕاستی بۆمبەبارانا فڕۆکێن ڕژێمێ دھێت، کو د ئەنجامدا ٤ پێشمەرگێن پارزانی شەھید دبن و ھەڤالەکێ وی ب ناڤێ یاسین ژ سەرێ خوە بریندار دبیت و پاشی ل خەستەخانا قومریێ یا شۆڕشێ ل دەڤەرا بەرواری باڵا شەھید دبیت.

مستەفا لیناڤایی سەرەدەریەکا گەلەک مرۆڤانە دگەل ئێخسیران دکەت و گەلەک ب توندی ل دژی ھەر ڕەفتارەکا نە ژ ھەژی د دەر دەھەقێ وان دا ڕادوەستیت، پشتی ڤی شەڕی پشکداریێ د لێدانا قشلا پێشابیرێ دا دکەت.

ل ساڵا ١٩٦٣ پشکداریێ د شەڕێ ب ناڤ و دەنگێ چیایێ مەتینا و بەرسینگگرتنا (لوا یەرمۆک) یا سوپایێ سوریێ دا دکەت، ئەوا ژ بۆ پشتەڤانیا سوپایێ عێراقێ پشکداری د وی شەڕی دا کری و ڕاست شکەستن و شەرمەزاریەک مەزن ھاتی.

پێشمەرگێ دێرین مستەفا لیناڤایی پشتی دامەزراندنا ھێزا دھۆک ل ژێر فەرماندەییا عەلی خەلیل ل ساڵا ١٩٦٣ دھێتە ڤەگوھازتن بۆ ڤێ ھێزێ و دگەل سەرقۆل ئەحمەد حەجی محێ درێژیێ ب خەباتا خوە ددەت و پشکداریێ د شەڕێ بەرسینگگرتنا ھێڕشێن جاشا ل چیایێ تەحا ل ھنداڤ دھۆکێ دا دکەت.

ل ساڵا ١٩٦٥دگەل بەرپرسێ خوە ئەحمەد حەجی محێ دچیتە دەف عەلی خەلیل، بشتی ھێنگێ ئەحمەد حەجی محێ ل داستانا ب ناڤ و دەنگا زۆزک و ھندرین شەھید دبیت.

پشتی پەیمانا ١١ ئادارێ دبیتە پاسەوانێ سنۆری و پشکداریێ د خۆلەکا چەکێ پشتەڤانیێ ( دۆشکە، ئاڕبیجی و تۆپ) دا دکەت و پاشی دبیتە ( عدد قاذفة).

پشتی شەڕی ل ساڵا ١٩٧٤ دەستپێکریە ڤە پشداریەکا کارا دگەل سەید سالح و حەمید حەفزواللە و محەمەد حەسەن باجلۆری د لێدان و پاشی ژی ئازادکرنا کێلیا شەدایێ دکەت، کو د وی شەڕی دا سەید عەلی یێ برایێ سەید سالح شەھید دبیت، دویفدا دبیتە ئامر سری و پشکداریێ د ھێرشا گرتنا کۆپێ ڕەنیێ دا دکەت.

مستەفا لیناڤایی دبێژیت:

پشتی گرتنا ڤان جھێن ستراتیژی ڕژێمێ، ژ بەر تۆپبارانا بەردەوام یا ھێزێن پێشمەرگەی ل سەر ھێزێن وێ، ھزر ل بەردانا دھۆکێ دکر، ژبۆ کێمکرنا کاریگەریا تۆپخانا شۆڕشێ دوژمنی 12 شەڤ و 12 رۆژان ل سەرێک هێرش ئینانە سەر شکەفتا سمتی و کۆپێ ڕەنیێ، لێ، ھەمی هێرشێن دوژمنی ژ لایێ پێشمەرگەی ڤە ھاتنە شکاندن.

مستەفا لیناڤایی ژ بەر چەلنگیا وی ب ئەنجامدانا ھندەک کریارێن تایبەت ل ناڤ باژێڕێ دھۆکێ ژی د ھێتە ڕاسپارتن.

پشتی شکەستنا شۆڕشێ ل کوردستانێ دمینت و ل ساڵا ١٩٩١ پشکداریێ د سەرھەلدانا پیرۆزدا دکەت و دبیتە ئەندامێ لژنا کۆمەڵاێەتیێ و ل ساڵێن نۆتا خانەنشین دبیت و نۆکە ژی یێ ل دھۆکێ ئاکنجی یە.