بتنێ دوو ھەیڤ مابوون خواندنا خوە بدوماھی بینیت لێ نەگەھشت.

نەمرود یوسف عەودیشو

بتنێ دوو ھەیڤ مابوون خواندنا خوە بدوماھی بینیت لێ نەگەھشت.

رۆژا 23 ئادارا 2022 سەنتەرێ کۆماتە ل باژێرێ شێخان بوو مێڤانێ ڤی خەباتکەرێ پاک و د هەڤپەیڤینەکا چەند دەمژمێری دا ژیان و خەبات و سەرهاتیێن ڤی پێشمەرگێ ماندی نەناس تۆمارکرن ژ بۆ ئەرشیفکرن و پاراستنێ.نەمرود یوسف عەودیشو، ناسیار ب نەمرود شێخانی ل ساڵا ١٩٦١ ل گوندێ ئافریڤا ل دەڤەرا شێخان ھاتیە سەر دنیایێ، خواندنا سەرەتایی و ناڤنجی ل شێخان ب دوماھێ ئینایە، پاشی ل ئامادەیا پێشەسازی ل دھۆکێ درێژیێ ب خاندنا خوە ددەت. ل ساڵا ١٩٧٧ د شانا نەورۆز دا، دگەل ماجد سەعدی تێتە ڕێکخستن د ناڤ ڕێزێن پارتی دیموکراتی کوردستان دا. ل ساڵا ١٩٧٩ کو بتنێ دوو ھەیڤ ژ بۆ تمامکرنا خواندنا وی دمینن، ڕێکخستنا وی ئاشکرا دبیت و نەچار دبیت پەیوەندیێ ب شۆڕشا گولانێ بکەت، و دگەل مەفرەزا مەحمود قەدشی ھەتا ساڵا ١٩٨٠ دبیتە پێشمەرگە. ل ساڵا ١٩٨٠ دگەل ٤٠ قوتابیێن کو ژبەر بەعسیا ژ دهۆکێ رەڤینە و بوونە پێشمەرگە، دچیتە مەکتەب سیاسی ل رۆژهەلاتێ کوردستانێ. د ھەمان ساڵدا پشکداریێ د خۆلا کادرێن بێتەلێ دا دکەت، ھەروەسا سەرپەرشتیا وان قوتابیان ژی دکەت. پاشی وەک کادرێ بێتەلێ تێتە ڤەگوھازتن بۆ دەڤەرا قەندیلی.ل مەها ١١ ساڵا ١٩٨٠ ڤەدگەڕیتەڤە بارەگایێ مەکتەب سیاسی ل ڕاژان و پاشی وەکو کادرێ بێتەلێ دچیتە لقێ ١ ل کۆماتە، لێ پشتی ھەیڤەکێ دەزگایێ بێتەلێ خراب دبیت، نەچار دەزگای ببەت و دگەل ھەڤالێ خۆ یونس بچیتەڤە مەکتەب سیاسی ل ڕاژان و د ھەمان دەمدا ل ساڵا ١٩٨١ دگەل ١٠ کەسێن دی پشکداریێ د خۆڵەکا کادران دا دکەت. پاشی ڤەدگەڕیتەڤە بارەگایێ لقا ئێک ل کۆماتەی.ل پایزا ساڵا ١٩٨١ تێتە ڤەگوھازتن بۆ کارگێریا لژنا شێخان- ئاکرێ و ل دەستپێکێ دبیتە بەرپرسێ ڕێکخستنێ و پاشی بەرپرسێ دارایی و کارگێڕیێ لژنێ.نەمرود شێخانی د درێژیا خەباتا خۆ یا پێشمەرگاتیێ دا پشکداریێ د گەلەک شەر و داستانان دا دکەت، مینا، زاویتە، سیار و سپیندارا و گەلەک شەڕێن دی.ل دوماھیا ساڵا ١٩٨٥ بۆ ماوەیەکی ل بارەگایێ لقێ١ دمینیت و دھەمان ساڵ دا دچیتە ڕۆژھەلاتێ کوردستانێ و ل گوندەکی ل نێزیکی ئورمیێ ئاکنجی دبیت. ل ساڵا ١٩٨٦ بەرف تورکیا دچیت و دەمەکێ درێژ ل ستەمبۆلێ دمینیت. پاشی ل سالا ١٩٨٧ دگەل خێزانا خۆ برێکا UNHCR وەک پەنابەر ل کەنەدا تێتە وەرگرتن. ل وێرێ ژی پەیوەندیێ ب ڕێکخستنێن پارتی دکەت ودبیتە ئەندامێ ڕێکخراوێ و بەردەوام دبیت ل سەر خەباتا خوە.ل ساڵا ٢٠١٧ بڕیارێ ددەت ب ئێکجاری ڤەگەریتەڤە کوردستانێ و ل ھەیڤا ٩ د ھەمان سالدا دبیتە ئەندامێ لقێ شێخان یێ پارتی و بەڕپرسێ ئیدارێ وھەتا نوکە ل سەر خەباتە خوە بەردەوامە.