ژ پشتا خوە ب گرانی برینداردبیت، سەچمە دگەهن سەر ستوینا پشتا وی، لێ ژ بەر نەبوونا دختۆر و برینپێچا، هەڤالەکێ وی برینا وی بۆ درویت.

مستەفا باپیر عەبدوللا یێ ناسیار ب مستەفا کێڤڵی

ژ پشتا خوە ب گرانی برینداردبیت، سەچمە دگەهن سەر ستوینا پشتا وی، لێ ژ بەر نەبوونا دختۆر و برینپێچا، هەڤالەکێ وی برینا وی بۆ درویت.

سەنتەرێ کۆماتە یێ دەکۆمێنتکرنا دیرووکا شۆڕشی ل ١٥/٦/٢٠٢٢ ل دهۆکی- تاخێ کێڤڵا دبیتە میڤانێ پێشمەرگێ دێرین مستەفا کێڤڵی و دیدارەکا ڤیدۆیی دگەل سازدکەت و دیرووکا خەبات و تێکۆشینا وی مینا بەلگەنامەکا گرنگ تۆماردکەت و ژ ناڤچوونێ دپاڕێژیت.

مستەفا باپیر عەبدوللا یێ ناسیار ب مستەفا کێڤڵی ل ساڵا ١٩٥٧ ل گوندێ کێڤڵا یێ سەر ب دەڤەرداریا سێمێلێ ڤە هاتیە سەر دنیایێ، نەچوویە قوتابخانێ لێ ل سەر دەستێ مامۆستایێ پێشمەرگە سالح هاشم شاخکی فێرێ خواندن و نڤێسینێ بوویە و پەرتووکا مشتاخا (چیا ژ گوتنێن پێشیا) یا سەیدایێ مەلا مەحمودێ دێرشەوی خواندیە، ل ساڵا ١٩٧٤ ل هێزا دهۆك دگەل بەتالیۆنا نەعمۆ سەمەد بوویە پێشمەورگە و پاشی بوویە ئامر سری، هەر د وێ ساڵێ دا پشکداری د شەڕێ قەشەفرێ دا کریە و دگەل هەڤالێن خوە یێن پێشمەرگە هێرشا سۆپا و جاشان تێكشکاندیە و سەرکەفتنەکا مەزن تۆمارکریە.

پشتی شکەستنا شۆڕشێ ژبۆ دەبارا ژیانا خوە و مالا خوە چایخانەکێ ل سێمێلێ ڤەدکەت، لێ ڕژێم چایخانا وی دگریت، وی ژی بۆ ماوێ ٧ ڕۆژان دەستەسەر دکەت، نەچار دبیت مالا خوە ببەتە کێڤڵا و دەست ب پالەتیێ و کارێ جووتیاریێ بکەت.

پشتی هینگێ ناڤێ وی بۆ لەشکەریا نەچاری تێت، پشتی ژ لەشکەریا ناچاری ژی خلاس دبیت، جارەکا دی ناڤێ وی بۆ خزمەتا یەدەك تێت.

ل ساڵا ١٩٧٩دچیتە زاخۆ و هەوڵددەت د ڕێیا باکوورێ کوردستانێ ڕا خوە بگەهینیتە ناڤ ڕێزێن شۆڕشی، ئەو خوە دگەهینیتە گوندێ مەحسدێ، پاشی ب هاریکاریا سماییل ئاغای دچیتە دەف عەزیز ئاغای و گوند بەر گوند دچیت هەتا دگەهیتە گوندێ بێجهێ و پاشی ژی دچیتە هەدریشی.

ل گوندێ هەردریشێ مەفرەزەکا پێشمەرگەی دبینیت و دگەل وان دچیتە مەرگەهێ و پاشی دگەهیتە بارەگایێ هەرێما ئێك کو وی دەمی ئەبۆ عنتەر و سەید حەمید لێبوون.

پشتی مام مستەفا دگەهیتە کۆماتەی، سەعید دمبۆ ڤەکۆلینێ دگەل دکەت و شەش هەیڤا ل لقێ دمینیت، پشتی هینگێ بۆ لژنا دەڤەرا دهۆکێ تێتە ڤەگوهازتن و ل ساڵا ١٩٨٠ دگەل مەفرەزا خالد کۆچەر دەست ب خەباتا خوە یا پێشمەرگاتیێ دکەت وگەڕا خوە یا ئێکی دگەل وێ مەفرەزێ بۆ گوندێ بێلیزانێ دبەن ،پاشی بەرەڤ دەڤەرا مانگێشكی ڤە دچن و دگەهنە گوندێ کورێمە، پێشمەرگە ل سەر مالێن گوندی بەلاڤ دبن، ئەو هند دزانن کو سوپا و جاشێن ڕژێمێ گوند یێ دوورپێچکری و دبتە شەڕ و تەقە د ناڤبەرا هێزێن دوژمنی و یێن پێشمەرگەیدا، پێشمەرگە تەڕابەڕا دبیت و هەر ئێك ب ڕەخەکێ ڤە دچیت، دوو هەڤالێن وان یێن پێشمەرگە برینداردبن، کو ئێك ژوان رەجەب گەرماڤی بوو، ب گرانی ژ سەرێ خوە بریندار دبیت و دکەڤیتە دەستێن جاشا. پشتی هینگێ پێشمەرگە ئێکودوو دبینن و بەرڤ گوندێن کوڕکا، بلێجانێ و غولدیا ل بەر خابووری دچن.پشتی هینگێ دچن گوندێ برجینێ، لێ ل گوندێ دەرگەلا شێخا دکەڤنە بۆسا جاشێن شێخ سەلام.مام مستەفا کێڤڵی و شەهید دلۆ کەمەکێ ب تنێ ل سەر ڕێیا مانگێشکێ بۆسەکێ ل پێشیا سەربازێن ڕژێمێ ددانن و سەربازەکێ دکوژن، لێ رەبیەکا نێزیكی وان گەلەك تەقێ ل وان دکەت، لێ خۆشبەختانە ب سلامەتی دەربازدبن.پشتی هینگێ ل دەشتا دوبانێ بۆسەکێ ددانن و ( جیش شەعبی) یەکی کو هاتبوو دەف مختارێ گوندی دا جاشا قەیتبکەت دگرن و ژچەك دکەن.ل ساڵا ١٩٨١ دگەل ڕێکخراوا شەهید رەشید بێشینکی چالاکیەکێ ل سەنتەرێ گوندێ بامەڕنێ ئەنجام ددەن.مام مستەفا دگەل مەفرەزا خوە ل گوندێ ئەرزێ بەرسینگێ پێشڕەویا هێزێن دوژمنی دگرن و نەقیبەکی دگەل ١٥ سەربازان دکوژن و ٩ سەربازان ژی بدیلی دگرن هەروەسا تۆپەکا ٦٠ملم دگەل ١٥ کلاشینکۆفێن بن رکێب وەکو دەستکەفتی ڕادکەن، د ڤی شەڕی دا سێ پێشمەرگە ژی ب خەلەتی برینداراردبن.مام مستەفا پشکداریێ د بەرسینگگرتنا پێشرەویا دوژمنی بۆ سەر باسکێ ئۆزمانا و شەڕێ بانیا شاوریکێ دا دکەت، د وی شەڕێ دا هەڤالێ وان کامیران شەهیددبیت و پێشمەرگەکێ دی ژی بریندار دبیت.ل ساڵا ١٩٨٤ پشکداریێ د بەرسینگگرتنا هێڕشا دوژمنی بۆ سەر هەردوو لژنێن دهۆك و زاخۆ دا دکەت، مام مستەفا ژ لایەکی و شەهید شەدیق حەجی حسێن گولی ژ لایەکێ دی بەرسینگێ هێرشا جاشێن دوژمنی دگرن و هێرشا وان دشکێنن وپشتی ٦ ڕۆژێن شەڕی، دوژمن ٤٠ کەلەخێن خوە ل مەیدانا شەڕی دهێلیت و دڕەڤیت.ل ساڵا ١٩٨٦پشکداریێ د بەرسینگگرتنا هێرشا دوژمنی بۆ سەر زێوا عەبۆ و زێوا شەفیق دا دکەت، لێ ل سەرێ چییای دکەڤیتە بەر هێڕشا فڕۆکێن دوژمنی و ژ پشتا خوە ب گرانی برینداردبیت، دوەختەکی دا کو چ دختۆر و برینپێچنەبوون برینا وی دەرمان بکەت، مام مستەفا نەچاردبیت برینا پشتا خوە بێخیتە دەستێ کەسەکێ نەدختۆر نەبرینپێچ، ئەو کەس ژی ل گورەی زانینا خوە برینا وی ددرویت و تیماردکەت، هەرچەندە سەچمێن گوللا مۆشەکێ گەهشتبوونە سەر ستونا پشتا وی و هەتا نوکە ژی دپشتا وی دانە.مام مستەفا ل ساڵا ١٩٨٧ پشکداریێ د شەرێ گەڤەڕکێ-چەمانکێ دا ژی دکەت و د وی شەڕی دا هەژمارەکا سەربازان دکوژن و ٩ سەربازێن دی ژی ب دیلی دگرن، د وی شەڕی دا زاهر کۆڤلی شەهید دبیت و عزەتدین سەعدۆ ژی بریندار دبیت.مام مستەفا پشتی هاتنا سەرۆکی بۆ لقا ئێك بۆ ڕێکخوارا شەهید زۆراب (ئەزمڕ) تێتە ڤەگوهازتن، ئەو مالا خوە ژی تینیتە گوندێ کارە و پشکداریێ د داستانا کانیماسێ دا دکەت.ل ١١/١/١٩٨٨ پشکداریێ د داستانا دێرەلۆکێ دا دکەت پشتی هینگێ ل مها ٣/١٩٨٨ دگەل شوکری نێروەیی و هیزەکا پارتیا کومۆنیستا ئیراقی پشکداریێ د گرتنا رەبیێت کۆخێن بەرچی دا دکەت و ب ٧ خولەکا وان رەبیان دگرن، د وی شەڕی دا کامل تروانشی و یوسف سەرەڕۆیی شەهید دبن و محەمەد محسن ژی بریندار دبیت.مام مستەفا پشتی ئەنفالێن ساڵا ١٩٨٨ لگەل خێزان و برا و کەس وکارێن خوە ئاوارەیی باکوورێ کوردستانێ بدیت و هەتا سەرهەلدانێ ل کەمپا مۆشی دمینن.ل مها ١٠/١٩٩١ ئەو و خێزان و کەس و کارێن خوە کو هەژمارا وان پێنج خێزان بوون، ڤەدگەڕن کوردستانێ و هەمی ژی دبێ مال و حالن، نەچاردبن ل خانێن عەرەبێن تەعریبێ ئاکنجی ببن.مام مستەفا جارەکا دی ل لژنا دەڤەرا سێمێلێ دەست ب خەباتا خوە یا پێشمەرگاتیێ دکەتەڤە و هەتا ساڵا ١٩٩٣ ل وێرێ دمینیت، پاشی دبیتە ئەفسەر ل ئاسایشا سێمێلێ هەتا ساڵا ٢٠٠٠، پاشی دبیتە نەقیب ل هێزا سپیلکی، لێ پشتی هینگێ ڤەدگەڕیتەڤە ئاسایشا سێمێلی، پاشی بۆ سەر میلاکێ پێشمەرگەی تێتە ڤەگوهازتن، لێ مخابن ل ساڵا ٢٠٠٦ بێر بەرچاڤوەرگرتنا خەبات و قوربانیدانین وی ب پلا (عەریف اول) تێت خانەنشینکرن.مام مستەفا لگەل ٤ برایێن خوە پێشمەرگە بوون و ئەو ب درێژاهیا خەباتا خوەدا گەلەك جاران بریندار بوویە، کو دوماهی جار ل ساڵا ١٩٨٧ ل بارەگایێ لقا ئێك دکەڤیتە بەر هێرشا چەکێ کیمیاوی، د ئەنجامدا پەقیشکێن ئاڤێ ل سەر لەشی وی و نەخاسمە ل سەر سەروچاڤێن وی چێدبن بۆ چەندین ڕۆژان بیناهیا چاڤێن خوە ژ دەست ددەت، پشتی هینگێ هێدی هێدی بیناهیا چاڤێن خوە ب ڕۆژێ دبیڕا ژ دەستددەت، بتنێ بشەڤێ سیناهیەکا کێم دبینیت. نوکە ژی پشتی چەندین جەلتا لێدای هەردوو پێن وی ژ لڤینێ ژ کار کەتینە.دەمێ سەنتەرێ مە ئەڤ هەڤدیتن دگەل مام مستەفای ئەنجام دای، وی هیچ شیانێن لڤین و ڕابوون و روینشتنێ بێ هاریکای نەماینە و مینا کەسەکێ پەککەفتی و نوخپۆش ل سەر تەختی، ژیانا خوە ب گەلەك ئێش ئازاران ڤە دبوورینیت.