سەنتەری کۆماتەی یێ دەکۆمێنتکرنا دیرووکا شۆڕشێ ل رۆژا 11/گولانا/2022 ل گوندێ گەڕبەراسکێ دبیتە مێڤانێ پێشمەرگێ بەرگری مللی قەسیم سەفەر سەعدون گەڕبەراسکی و ھەڤدیتنەکا ڤیدیۆیی یا درێژ لگەل سازدکەت و دیرووکا خەباتا وی تۆمار دکەت و ژ ناڤچوونێ دپارێزیت.
قەسیم سەفەر سەعدون ل سالا 1955 ل گوندێ گەڕبەراسکێ یا سه‌ر ب ناحیا بامه‌رنێ ڤه ھاتیە سەر دنیایی.
ل مه‌ها ئه‌یلولا ساڵا 1963 له‌شکه‌رێ هه‌ردوو ده‌وله‌تێن ئیراق و سوریێ لگه‌ل جاشێن ئیراقێ هێرشه‌کا دڕندانه دکه‌نه سەر چییایێ مەتینا و د وی شه‌ڕێ دا سه‌فه‌رێ بابێ قه‌سیمی لگه‌ل کۆمه‌کا دیا پێشمه‌رگێن قاره‌مان شه‌هیدبن. ئه‌و هێشتا زارۆک بوویه. مرۆڤێن وان وی دبه‌نه گوندێ قومریێ کو ته‌رمێ بابێ ویێ شه‌هید ل وێرێ بوویه، و هه‌ر ل وێرێ ژی تێته ڤەشارتن.
پشتی شەھیدبوونا بابێ وی، برایێ وی عبدللە ل سەر داخوازا شەھید ئەسعەد خۆشەڤی تڤەنگا بابێ خوە ھەلدگریت و دبیته پێشمه‌رگه. کاک قەسیم ژی ل ساڵا 1969 د ژیێ 14 ساڵیێ دا دبیتە پێشمەرگە ل ھێزا دھۆکێ و ھەتا شکەستنا شۆڕشێ ل بهارا 1975 ل گەلیێ دھۆکێ درێژیێ ب خەباتا خوە ددەت.
ل ساڵا 1977 شه‌هید نەوزاد نزارکی (محه‌مه‌د سه‌عید عه‌لی) تێته گوندێ گەڕبەراسکێ و ڕێکخراوەکا ڕێخستنا پارتی یا نھێنی ژ کەس و کار و گوندیێن وی ئاڤادکەت. ئەڤ ڕێکخراوە پشتی شەھیدبوونا نەوزاد نزارکی، ب ناڤێ وی تێته بناڤکرن و دبیته ڕێکخراوا شه‌هید نه‌وزاد نزارکی.
کاک قەسیم ل ساڵا 1981 هه‌م وه‌ک کادره‌کێ ڕێکخستنا پارتی و هه‌م ژی وه‌ک جه‌نگاوه‌ره‌کی به‌رگری مللی، ئەو و پسمامێ خوە حازم بەرپرسیاریا ھێزا بەرگری مللی ل گوندێ گه‌ربه‌راسکێ وەردگرن و وەکو ھێزەکا یەدەکا لەشکەری و ڕێکخستنی ئەرکێ پاراستنا گوندێن دەڤەرێ ژ هێرشێن دوژمنی و پشته‌ڤانی و هاریکاریا پێشمه‌رگه‌ی و شۆڕشێ دگرنه سه‌ر ملێ خوه.
ژ بلی ڤی ڕۆڵێ کاک قاسم و کەس و کارێن خوە دگێڕا، گوندێ گەڕبەراسکی ب خوە ژی هه‌م ژ چه‌ند ئالیان ڤه هه‌ڤسنوور بوو لگه‌ل بنگه‌هێن دوژمنی و هه‌م ژی ویستگەھێ بێنڤەدان و ب خودانکرن و دەبازکرنا پێشمەرگەی بوو، بۆ دەڤەرێن شێخان و ئاکری. ل گۆرەی وان دەکۆمێنتێن ل چالاکیا ئازادکرنا مانگێشکێ دا ل ساڵا 1986 کەتینه دەست شۆڕشێ، گەڕبەراسکێ گوندێ ھەری پاقژێ دەڤەرێ بوو کو بهیچ شێوه‌یه‌کی ده‌ستێ ڕژێمێ و سیخوڕێن وێ نه‌هاتیه دناڤڕا.
ل ساڵا 1985 کاک قەسیم و برایێ خوە عەبدوللا، ڕێکخستنەکا نھێنی د ناڤ مامۆستایێن گوندی دا کو خەلکێ دھۆکێ بوون و هنده‌ک ژ وان ژن بوون، ئاڤا دکەن و ب ئاوایەکێ بەردەوەم خزمەتەکا مەزن، ژ دابینکرنا دەرمان و پێداویستیێن ڕۆژانە یێن پێشمەرگەی و پێزانینێن ل سەر ڕژێمێ پێشکەشی شۆڕشێ پێشکەش دکر.
کاک قاسم و هه‌ڤالێن خوه یێن به‌رگری مللی یێن گوندێ گه‌ڕبه‌راسکێ وەکی مەفرەزەکا ڕێکوپێکا سەربخوە گەلەک چالاکیێن لەشکەری ل دژی ھێزێن ڕژێمێ ئەنجامددان، وه‌کی بەرسینگگرتنا ھێرشا دوژمنی ل ساڵا 1981 بۆ سەر گوندێ گەڕبەراسکێ، سۆتنا دوو ترۆمبێلێن لەشکەری ل سەر جادا کانیکا، ھێرشا دوژمنی بۆ سەر لژنا ناچا دھۆکێ و زاخۆ ل هاڤینا 1984، شەڕێ، به‌رسینگرتنا هێرشا جاشا بۆ سه‌ر کورێمێ و کوڤلی وب ده‌هان جارا به‌رسینگرتنا هێرشێن له‌شکه‌ر و جاشان بۆ سه‌ر ده‌ڤه‌را با‌مه‌ڕنێ-تنێ-شرتێ و داودیێ.
ل نیسانا ساڵا 1984 برایێ وی سبحی دگەل هێزه‌کا پێشمه‌رگه‌ی ل گوندێ دوستەکا ل ده‌شتا قائیدیا دکەڤنه بەر ھێرشا جاش و له‌شکه‌رێ ڕژێمێ و پشتی بەرگریەکا قەھرەمانانە بریندار دبیت، پاشی ئەو دگەل 4 پێشمەرگێن دی بساخی دکەڤنه دەستێن ھێزێن دوژمنی و تێنه سێدارەدان.
ل ئەنفالێن سالا 1988 ئه‌و دگەل کەس و کارێن خوە ئاوارەیی باکوورێ کوردستانێ دبن و ھەتا سەرھەلدانێ ل که‌مپا مێردینێ ئاکنجی دبن.
پشتی سەرھەلدانێ ڤەدگەیتەڤە کوردستانێ و دبیتەڤە پێشمەرگە و بەرپرسیاریا ڕێکخراوا کوورا وەردگریت، پاشی دچیتە لژنا ناوچا دھۆک. ل سالا 1994 تێتە ڤەگوھازتن بۆ لیوا 2 یا ھەڤپشک دگەل و ھەتا ساڵا 2004 ل سەر ئەرکێ خوە یێ پێشمەرگاتیێ بەردەوام دبیت و پشتی ھینگێ تێته خانەنشینکرن.
کاک قەسیم وەکو خۆبەخش پشکداریێ د شەرێ دژی تیرۆرستێن داعشدا ژی ل بەدریکێ و شەنگالێ دکەت.
سه‌نته‌رێ کۆماته
یێ دێکومهنت کرنا دیرووکا شۆڕشێ
کار و ئهرکێ سه‌نته‌رێ کۆماته دێکۆمێنت کرن و پاراستنا دیرووکا شوڕشێ یه ژ مرن و ژناڤچوونێ.
ڤی سهنتهری ب ستافهکێ بچووک و شیانێن ساده، لێ ب ڤیان و باوهریهکا مهزن، وه‌ک پێنگاڤا خوه یا کاری یا ئێکێ، دهست ب کۆمکرن، دێکۆمنێت کرن و تۆمارکرنا دیرووکا خهبات و شۆڕشا کوردستانێ کریه.
