حسنی یوسف شامل
مێرخاسه‌ک ژ ماڵباته‌کا فیداکار و وه‌ڵاتپارێز
سەنتەرێ کۆماتە یێ دەکۆمێنتکرنا دیرووکا شۆڕشێ ل رۆژا 9/5/2022 ل گوندێ بەرزویرێ ل ده‌ڤه‌را زاخۆ دبیتە مێڤانێ پێشمەرگێ دێرین حسنی یوسف شامل و چاڤپێکەفتنەکا ڤیدیۆییا درێژ دگەل ئەنجام ددەت و دیرووکا خەباتا وی تۆمار و ئەرشیف دکەت.
حسنی یوسف شامل ل ساڵا 1957 ل گوندێ بازنگیرا یێ سەر ب ناحیا شه‌رانشێ ڤە ھاتیە سەر دنیایێ. ئه‌و ل ساڵا 1974 دگەل شەھید حەمید حەفزوللا ل ھێزا ئامێدیێ دبیتە پێشمەرگە و پشکداریێ د شەرێ کەلیا شەدایێ دا دکەت، پشتی ھینگێ لگه‌ل بەتالیۆنا تەیمەز سێلکی درێژیێ ب خەباتا خوە ددەت و دیڤدا تێنە ڤەگوھازتن بۆ ده‌ڤه‌را باڵه‌کایه‌تی و ل وێرێ دمینیت ھەتا شکەستنا شۆڕشێ.
ئه‌و ل مه‌ها گولانا 1976 پەیوەندیێ ب شۆڕشێ دکەت و دبیتە پێشمەرگە. ئه‌و دگەل عەمەرێ لەعلێ، محەمەد موسا، ئەحمە و محەمەد میرزا دگەل چەند پێشمەرگێن دی کو ھەژمارا وان ھەشت بوون، ئێکەم گەڕا خوە بۆ دەڤەرا زاخۆ ئەنجامددەن و پەیوەندیێ ب ڕێکخستنێن پارتی دکەن و ھەر دڤێ گەڕێ دا، کو بتنێ کلاشنیکۆفەک و بڕنۆیەک دگەل وان دا هه‌بوون، ئێکەمین چالاکیا لەشکەری ل دژی ھێزێن ڕژێمێ ل پشتا چیایێ کێڕەی ئەنجامددەن و زیانێن گیانی یێن مەزن دگەھیننه دوژمنێ. هێزه‌کا مه‌زنا دوژمنی وان دۆرپێچ دکه‌ت و ئه‌و دوو ڕۆژان بێ خوارن دمینن، کاک حسنی و ھەڤالاکێ خوە دچنه گوندێ ھۆدانێ یێ باکوورێ کوردستانێ نانی بۆ هه‌ڤالێن خوه دئینن.
ڕژێم پشتی ڕاکرنا خەلکێ گوندان ھەوڵا سۆتنا وان گوندا ددەت، مه‌فره‌زا وان بەرسینگێ ھێزێن دوژمنی دگرن و دربه‌کی باش ل دوژمنی دده‌ن، پاشی چالاکیەکا لەشکەری ل خوارێ تەحلەی ئەنجامددەن و چەندین سەربازێن ڕژێمێ دکوژن، پاشی هێرشێ دکه‌نه ڕەبیا دوژمنی ل باسکێ شەش دارا، دویڤدا ل کەشانێ بۆسەکێ ل پێشیا زیلەکا سەربازێن رژێمێ ددانن.
ل مه‌ها 11/1976 مه‌فره‌زا وان ل سەرێ زاخۆ هێرشێ دکه‌نه خالا پشکنینا ڕژێمێ.
پشتی ڤان چالاکیان کاک حسنی خوه ڤه‌دگوهێزیته لگه‌ل مەفرەزا غازیێ سینەمێ کو باره‌گایه‌کی ده‌مکی ل ئەڤلھێ هه‌بوو.
ئه‌و دچنه گه‌ڕه‌کێ ل ده‌ڤه‌رێ د ڤه‌گه‌ڕی دا تێنه پشتا گوندێ بۆسه‌لێ پاشی تێنه ناڤ کاڤلێ گوندێ پیربلا، دا هنده‌ک فیشه‌کێن ڤه‌شارتی بینن ل وێرێ دکەڤنە بۆسا دوژمنی. پاشی دیار دبیت هێزه‌کا مه‌زنا دوژمنی هێرشا ئینای ژ بۆ گرتنا بارەگایێ ئەڤلھێ. ل وێرێ شه‌ڕه‌کی گران ڕوودده‌ت و دڤی شه‌ڕی دا محەمەدێ غازیێ سینەمێ، کو لاوه‌کی هێژا و به‌رکه‌تی و کادره‌کی زانا و شاره‌زا دچه‌ند چه‌ند زمانان دا، شەھید دبیت و لەشێ وی ژی دکەڤیت دەستێ دوژمنی.
ل ساڵا 1977 ده‌ما مه‌فره‌زا وان ب سه‌رپه‌رشتیا غازیێ سینەمێ ژ گه‌ڕه‌کێ ڤه‌دگه‌ڕن و دگه‌هنه گوندێ کویرانشێ یێ سه‌ر سنووری، ھەلیکۆپتەرێن ڕژێمێ سەربازان ل سەر سنۆری ل پشت وان بەرددەن خوارێ و شەر دناڤبەرا پێشمەرگەی و ھێزێن ڕژێمێ دا چێدبیت، د وی شه‌ڕی دا پێشمەرگەیه‌ک ب ناڤێ مه‌لا عەبدال شەھید دبیت و چەند پێشمەرگێن دی ژی بریندار دبن.
هه‌ر ل پایزا 1977 شەھید حەمید خەفزوللا، حەمید خاستی و شەھید ئیشۆ، وەیسی بانی دگەل ھەژمارەکا دی یا پێشمەرگەی ژ ڕۆژھەلاتێ کوردستانێ تێنه هه‌رێما ئێک، پشتی ھینگێ کاک حسنی دگەھیتە مەفرەزا حەمید حەفزوللای.
یەحیا برایێ کاک حسنی ل ساڵا 1978 ل شەڕێ ھەکاریێ شەھید دبیت. دهه‌مان ساڵ دا به‌رپرسێ وی حەمید حەفزوللا ژی شەھید دبیت. ئه‌ڤ هه‌ردوو کاره‌ساته د ئێک ساڵ دا بۆ کاک حسنی چامه‌کا مه‌زن بوو. له‌وما سه‌رکردایه‌تیێ داخواز ژ وی کر کو ئه‌و ده‌مه‌کی بمینیه ل ماڵ دناڤ مالباتێ دا هه‌تا خه‌ما وان پجه‌ک ڤه‌دڕه‌ڤیت.
ل ساڵا 1979 بابێ کاک حسنی پشکداریێ د کۆنگرا 9 یا پارتی دا دکەت. مخابن ده‌رد و به‌ڵا ژ ڤێ ماڵباتا وه‌ڵاتپارێز ڤه‌نابن و ل رۆژا 19/12/1980 حکومه‌تا ترکی برایێ وی فریق دگەل 13 کەسێن دی، کو پڕانیا وان پێشمه‌رگه بوون ل گوندێ بێجھێ یێ باكوور دگریت و ڕادەستی ڕژێما عێراقێ دکەت.
هه‌رچه‌نده ڕژێما ئیراقێ ل ساڵا 1982 لێبوورینه‌کا گشتی ژی دده‌ت، لێ دیسان ئیستخباراتا فرقا زاخۆ ئه‌و نه‌به‌ردان و داخوازکر کو به‌رامبه‌ر وان هنده‌ک زیندانیێن کو ل ده‌ڤ شۆڕشێ بوون بێنه به‌ردان، له‌وما ل 17/7/1982 ل سوارا سته‌ورێ ل ناڤبه‌را ئه‌ڤلهێ و که‌شانێ، ئه‌و لگه‌ل هنده‌ک زیندانیێن ل ده‌ف شۆڕشێ هاتنه گوهاڕتن و ئازاد بوون.
ل ساڵا 1980 حەمید خاستی دبیتە بەڕپرسێ ڕێکخراوا شەھید حەمید حەفزوللا یا سەر ب لژنا ناوچا زاخۆ ڤه، ئێدی کاک حسنی دگەل ڕێکخراوا ناڤبری درێژیێ ب خەباتا خوە ددەت و پشکداریێ دهه‌ژماره‌کا مه‌زنا شەڕ و داستانێن دەڤەرا زاخۆ دا دکەت.
ل لساڵا 1984 ڕێکخراوا وان بۆ لژنا ئامێدیێ تێته ڤەگوھازتن و رۆژا 30/10/1984 پشکداریێ د داستانا سەرێ ئامێدیێ دا دکەت، کاک حسنی د ڤێ داستانێ دا بەری پێشمەرگە بچەکێ گران ل بارەگایێ سریا سوپایێ ڕژێمێ گولەباران بکەت، ب کلاشنیکۆفا خۆ ھێرشێ دبەته سەر بارەگایێ سریێ و ھەرچەندە ھەڤالێن وی ھۆشداریێ ددەنێ، لێ ئه‌و د وێ کەله‌ژانا شەڕی دا بەردەوامیێ ب ھێرشا خوە ددەت و دبێژیت: گولله‌یێن دوژمنی د لەشێ مە ناچن. د ڤێ داستانێ دا دوو شەھید و هه‌شت برینداران ددەن، لێ پێشمەرگە ئارمانجا خوە پێکتینیت و پتر ژ 30 کلاشنیکۆف و گەلەک تەقەمەنی دکەڤیتە دەستێ وان.
ل شه‌ڕێن ناڤوده‌نگێن نیسانا 1987 کاک حسنی پشکداریێ د بڕینا جادا کانی ماسی- بێگۆڤا دا دکەت و هه‌روه‌سا پشکداریه‌کا کاریگه‌ر د داستانێن سۆتکی، بامه‌ڕنی و کانیماسێ دا دکه‌ت. ک ب سه‌دان کوشتی و دیل و ب هزاران پارچه چه‌کێن ده‌ستکه‌فتی هه‌بوون. دیسان ئه‌و سێ جارا پشکداریێ د گرتنا فه‌جا شه‌رانشێ دا دکه‌ت و بەری ئەنفالان پشکداریێ د گرتنا فەوجا دێمکا ژی دا کەت.
ل ئه‌نفالێن 1988 ئه‌و ب مالباتڤه ئاواره‌ی که‌مپا ئامه‌دێ دبیت و ل کەمپێ ژی ڕۆلەکێ باش د پاراستنا کادرێن پارتی ژ دەستێ نەحەز و سیخوڕێن ڕژێمێ دبینیت.
ل سه‌رهلدانا 1991 ئه‌و تێته کوردستانێ و به‌رده‌وامیێ دده‌ته ئه‌رکێ خوه یێ پێشمه‌رگاتیێ، ب تایبه‌تی ل هه‌می شه‌ڕێن به‌ڕه‌ڤانیکرنێ ژ کوردستانێ، ب تایبه‌تی ل دژی ڕێکخراوێن تروریستی. پاشی ل ساڵا 2013 ب پلا ملازم تێته خانەنشینکرن.
کاک حسنی د درێژیا خەباتا خوە ل شه‌ڕێ کویرانشێ بریندار دبیت و برایێ وی یەحیا ل شه‌ڕێ ھەکاریێ شەھید دبیت، ھەروەسا بابێ وی ژی ل کریارا تروریستیا ساڵا 1995 ب تی ئێن تی ل زاخۆ شەھید دبیت.
