مستەفا مزوری، ئەو پێشمەرگێ شۆڕشێ پەیوەندی ب وی کری
د چارچۆڤێ بزاڤ و خوەدا، سەنتەرێ کۆماتە یێ دەکۆمێنتکرنا دیرووکا شۆڕشێ، ل ٢.٢٢⁄١⁄٢٧ بوو مێڤانێ پێشمەرگێ دێرین و ھەلگرێ میدالیا بارزانی مستەفا مزوری و دیدارەکا دویرو درێژ یا ڤیدیۆیی ل سەر دیرووکا خەبات و تێکۆشینا وی تۆمار و ئەرشیفکر.
ژ لایەکێ دی، سەنتەرێ کۆماتە مژویلی قۆناغا دوماھیێ یا پێداچوونێ یە ب بیرەوەرێێن کاک مستەفای دا، کو ل نێزیک مینا پەرتوکەکا دەولەمەند و تژی سەربۆڕ، چیرۆک و یستگەھێن گرنگێن ژیانا وی یا شۆڕشگێڕی ژ لایێ سەنتەرێ مە ڤە دێ ھێتە وەشاندن.
دەمێ مرۆڤ بەحسێ دیرووکا شۆڕشێن گەلێ کورد دکەت، ناڤێن ھندەک قەھرەمانان ل ڕێزێن پێشیێ خۆ دسەپینن، ب ڕەنگەکێ کو نە چ ڤەکۆلەر و نەژی چ ناڤەندێن ئەکادیمی نەشێن، بێلایەن و ب ڕەنگەکێ زانستی، بێی دیارکرنا ڕۆڵ، پێگەھ و کاریگەریا وان ل سەر ڕێڕەوا شۆڕشێ، چو گاڤان د وی بیاڤی دا باڤێژن.
مستەفا مزیری ژی ئێکە ژ وان قەھرەمانێن ناڤێ وی و شۆڕشا گولانێ پێکڤە ھاتین گرێدان و ب چ ڕەنگان ژێکڤەنابن.
بەلکۆ ئەم دشێین بێی دوودلی بێژین کو کاک مستەفا ئێکە ژ وان خەباتکەرێن دەستپێکی یێن ڕێ ل پێشیا شۆڕشێ گولانێ خوەشکری و شۆڕشێ پەیوەندی پێ کری.
کاک مستەفا ژ دایکبوویێ ١٩٥١⁄٣⁄١٢ یێ باژێرێ مۆسلە، خەلکێ گوندێن بەربور و شکەفتندوانێ یێن گرێدای دەڤەرا ئەترویشێ یە.
ل ١٩٧٠⁄٤⁄١ پەیوەندیێ ب ڕێزێن پارتی دکەت شەرەفا ئەندامەتیا پارتی ل لژنا دەڤەرا شێخان وەردگریت، ل ١٩٧٠–١٩٧٤ دبیتە ئەندامێ لژنا ئێکەتیا لاوێن دیموکراتا کوردستانێ، ل ١٩٧٤⁄٣⁄٥ پەیوەندیێ ب شۆڕشا ئەیلۆلێ دکەت و دبیتە نڤێسەرێ بەتالیۆنا دوو ل ھێزا شێخان- ئاکرێ.
پشتی شکەستنا شۆڕشا ئەیلولێ، کاک مستەفا ل جھێ ژ دایکبوونا خوە ل پاژێرێ مۆسل ئاکنجی دبیت، لێ بھیچ ڕەنگەکی حەویا وی ناھێت و نەشێت کەتوارێ شکەستنێ ئەوێ دەرئەنجامێ پیلانگێڕیا دوژمنان ل سەر گەلێ کورد ھاتی سەپاندن قەبۆل بکەت، ھەمی ھزر و بیرێن وی د بەرخودان و د جارەکا دی ڤەژاندنا شۆڕشێ دا کۆم دبن.
لەوما کاک مستەفا ل ١٩٧٥⁄٨⁄٢٥ دگەل برایێ خوە یێ سنێلە خالد ھیرۆ و محەمەد سەلیم بریفکی، باژێرێ مۆسل دھێلیت و ڕیا چارەنڤیسەکێ نەدیار دگریت ب ئۆمێدا سەروشنی گەشکرنا چرێسکا شۆڕشێ خۆ ل چیایێن کوردستانێ ئاسێ دکەت.
کاک مستەفا ل باییزا ساڵا ١٩٧٥، بەری چ دەنگۆیێن دەسپێکرنا شۆڕشا گولانێ ھەبن، دەست ب نوژەنکرنا ڕێکخستنێن پارتی ل دەڤەرا بەھدینان دکەت و ڕێ ل ھەمبەر دەستپێکرنا شۆڕشەکا نوی ل کوردستانێ خوەش دکەت و دبیتە ئێک ژ وان کادرێن سیاسی و لەشکەری یێن ھەری دەستپێکی ئەوێن دەست ب
خەباتێ کری بەری چریسکا شۆڕشا گولانێ ھەل ببیت.
ل ناڤبەرا ساڵێن ١٩٧٥–١٩٨٠ وەکو کادرەکێ مەیدانی و جھێ باوەریا سەرکردایەتیا دەمکی یاشۆڕشێ و ل دەڤەرێن ئامێدیێ، زاخۆ، دھۆک، سێمێل کار دکەت و بەرپرسیاریا لژنا ناوچا خەبات یا گەڕۆک وەردگریت و پێگەھەکێ گرنگێ جەماوەری بدەستڤەتینیت.
ئەندامەتیا لژنێن ناوچێن دھۆک، شێخان و زاخۆ وەردگریت، پاشی ل ساڵا ١٩٨١ دبیتە ئەندامێ دەستەیا ڤەکۆلینا لقێ ئێک.
ل ١٩٨٧⁄١⁄١ دبیتە کارگێڕێ لژنا ناوچا ئامێدیێ ھەتا دەستپێکرنا ئەنفالێن ڕەش.
ل ساڵا ١٩٨٨ دکەڤیتە بەر ھەوا ئەنفالان و دوماھیک کەس دبیت کوردستانێ بجھ دھێلیت، دوان کاودانێن دژوار ژی دا و ل ژێر بومبەبارانا چەکێ کیمیاوی باوەریێ ب شۆڕشێ و سەرکەفتنا گەلێ کورد ژ دەست نادەت، بەلکۆ ب مۆرالەکێ بلند ڤە دبێژیت، مللەتێ کورد و دێ بسەرکەڤیت، پاشی دبیتە پەنابەر ل ڕۆژھەلاتێ کوردستانێ و ل ١٩٩٠⁄٢⁄٢٨ بەرپرسیاریا لژنا ڕێکخستنا لقێ ئێک وەردگریت.
کاک مستەفا ھەر دگەل دەستپێکرنا سەرھەلدانا پیرۆز ل ١٩٩١⁄٣⁄٢١ ڤەدگەریتەڤە کوردستانێ و پشکداریێ ژی د سەرھەلدانا گەلێ کوردستانێ دا دکەت.
ل١٩٩١⁄٧⁄٢٠ دبیتە ئەندامێ لقێ ئێک و ب ئەڕکێ دامەزراندنا لژنا ناوچا سێمێلێ دھێتە ڕاسپارتن و پاشی دبیتە بەرپرسێ لژنا ناوچا ئامێدیێ، پاشی دبیتە فەرماندێ لەشکەرێ پێنج ل دەڤەرا شێخان، پاشی دبیتە ڕێڤەبەرێ ئاسایشا ئامێدیێ.
ل ١٩٩٣⁄١١⁄١٧ دبیتە کارگێڕێ نڤێسینگەھا ڕێکخستنا لقێ ئێک و بەرپرسێ دیفچوون و پشکنێنێ و پاشی بەرپرسێ سەرژمێری و تۆمارێ.
ل ١٩٩٨⁄٤⁄١٣ وەکو ئەندامێ لژنا دیڤچوون و پشکنێنێ دھێتە ڤەگوھازتن بۆ فەرماندەییا لەشکەرێ کوردستان (فەلەک) ل سەلاحەدین.
ل ٢٠٠٠⁄١١⁄١٧ دبیتە بەرپرسێ ڕێکخستنا لەشکەری ل فەرماندا سپیلکی.
ل ٢٠٠٢⁄٨⁄٣١ دھێتە،ڤەگوھازتن بۆ بەشێ میرە ل ڕێڤەبەریا فەلەک ل ھەولێرێ.
ل ٢٠٠٤⁄٣⁄١٧ دبیتە گارگێڕێ لقێ ١٤ ل مۆسل ول ٢٠١١⁄١١⁄١٢ جارەکا دی دھێتە ڤەلوھازتن وەکۆ ئەندامێ لژنا ڕاوێژ بۆ لقێ ئێک.
کاک مستەفای پشکداری د کۆنگرێن ( نەھێ، دەھێ، یازدێ، دوازدێ) یێن پاڕتی دا کریە.
ل ٢٠١٧⁄٥⁄٢٥ ب ھەلکەفتنا (٣٢) وەمین بیرەوەریا شۆڕشا گولانا پێشکەفتخواز میدالیا ( پێشمەرگەھێ دێرێن) ژ لقێ ئێکێ پارتی وەرگریت.
ل ٢٠١٨⁄٨⁄١٦ و پشتی ٤٣ ساڵێن خەباتا بەردەوام ژ لایێ سەرۆک بارزانێ ڤە ب میدالیا بارزانیێ نەمر دھێتە خەلاتکرن.
کاک مستەفا ھەتا نوکە ژی وەکو ئەندامێ لژنا ڕاوێژ ل لقێ ئێک یێ بەردەوامە ل سەر خەباتا خوە.
