سەنتەرێ کۆماتەی مێڤانێ بەرپرسێ رێکخراوا کۆماتەیە

محەمەد حەسەن محەمەد ڕەشید یێ ناسیار ب محەمەد سارکی

سەنتەرێ کۆماتەی مێڤانێ بەرپرسێ رێکخراوا کۆماتەیە

د بەردەوامیا کار چالاکیێن خوە دا، سەنتەرێ کۆماتە یێ دەکۆمێنتکرنا دیرووکا شۆڕشێ ل ڕۆژا ٢٠٢٢⁄٥⁄١٧ ل گوندێ کەڤلەسنێ د بیتە مێڤانێ پێشمەرگێ دێرین محەمەد سارکی و ھەڤپەیڤینەکا ڤیدیۆیی دگەل ساز دکەت و دیرووکا خەبات و سەربۆڕێن وی یێن شۆڕشگێڕی مینا بەلگەنامەکا گرانبھا تۆمار دکەت و دپارێزیت.

تێکۆشەرێ دێرین محەمەد حەسەن محەمەد ڕەشید یێ ناسیار ب محەمەد سارکی ل ساڵا ١٩٤٩ ل گوندێ سارکێ یێ سەر ب دەڤەرا مانگێشکێ ھاتیە سەر دنیایێ، ھەر چەندە نەچوویە قوتابخانێ، لێ پشتی ڕێکەفتنا ١١ ئادارێ خوە فێری خاندن و نڤێسینێ دکەت.

پشتی داستانا لۆمانا بابێ وی دگەل ھەژمارەکا کەس و کار و گوندیێن وی ژ بال ڕژێما عێراقێ ڤە تێن گرتن و ھەتا ساڵا ١٩٦٤ د زیندانێن ڕژێمێ دا دمینن، ئەو ژی نەچار دبن گوندی چۆل دکەن، پشتی ئازادکرنا بابێ وی ڤەدگەریتەڤە گوندی.

محەمەد سارکی پشتی ڕێکەفتنا ١١ ئادارێ ل ڕێکخراوا زاویتە تێتە ڕێکخستن و ل ساڵا ١٩٧٣ دگەل هێزا دهۆکێ دبێتە پێشمەرگە. پشتی دەستپێکرنا شەری ل سالا ١٩٧٤ پشکداریێ دگەلەک شەراندا دکەت، وەکی شەرێن کەلا پیرۆمەرا و گەلیێ دھۆکێ، شکەفتا سمتی، پاشی بەتالیونا وان ل مەهاا ١٩٧٤⁄٨ تێتە ڤەگوھازتن بۆ دەڤەرا بالەکایەتی، بێتواتە و پشکداریێ د گەلەک شەر و داستانێن وێ دەڤەرێ دا دکەت.

ل مەها 11/1974 بەتالیونا وان ڤەدگەریتەڤە دەڤەرا دھۆکێ و ل شکەفتا سمتی و کۆپێ ڕەنیێ (عەلەمێ سۆر، عەلەمێ شین) درێژیێ ب خەباتا خوە ددەت و پشکداریێ د گەلەک شەراندا دکەت.

پشتی شکەستنا شۆڕشا ئەیلولێ و دگەل ھاتنا شەھید مەحمود ئێزدی ل سالا ١٩٧٦ بۆ دەڤەرێ، کاک محەممەد دگەل تاھر بانی و شەوکەت عەلی خەمۆ دبنە ئەندامێن ڕێکخستنێن پارتی دگەل شەهید مەحموود ئێزدی و ئێدی دەست ب خەباتا نھێنی دکەت.

کاک محەمەد ژبلی بەڵاڤکرنا بەڵاڤۆکێن شۆڕشێ و گەھاندنا پێزانینا و دابینکرنا دەرمان و پێدڤیاتیێن شۆڕشێ، هەروەسا ئەو رێبەریێ بۆ مەفرەزەیەکا پێشمەرگەی دکەت بۆ لێدانا خالا کۆنترۆلۆ دوژمنی ل کۆرێن گاڤانا و ھەر ئەو بخوە ل ڕۆژا پاشتر ژبۆ زانینا زیانێن دوژمنی سەحوسیا جھێ وێ چالاکیا پێشمەرگەی دکەت.

کاک محمەد کەلا پێشمەرگاتیێ و خەباتا چیا لێ ددەت لەوما ئەو ل ١٩٨١⁄٥⁄٢٥ پەیوەندیێ ب شۆڕشێ دکەت و ڕۆژا پاشتر دگەل ئێکەم چالاکیا خوە یا لەشکەری ل دژی ھێزێن ڕژێمێ دگەل حامد بالەتەیی و ھەڤالێن وی یێن پێشمەرگە ل ناڤبەرا غەلبۆکێ و باگێرا ئەنجام ددەت.

کاک محەمەد بۆ دەمەکی ل دەڤەرێن شێخان و بەرێ گارێ دمینیت و پاشی

دگەل ڕێکخراوا شەهید وەیسی بانی چەندین چالاکیبن لەشکەری ل دژی ھێزێن داگیرکەرێن ڕژێما عێراقێ ل ناڤبەرا گرسەیسێ و کەمەکا، سەرێ زەنگۆلی، ل سەرێ کورەدێری، ل سەر جادا سەرەکی یا زاویتەی و ل ماسیکێ ئەنجامددەت و زیانێن مەزن دگەھیننە دوژمنی.

ل ھەیفا ١٩٨٢⁄٢ دگەل ڕێکخراوا شەهید وەیسی بانی ل ناڤبەرا گەلیێ دھێ و کەلا شخۆی ھەڤالێ دکتاتۆرێ عێراقێ (دکتۆر عدنان عەزاوی) دگەل چەند پلەدارێن دی دگرن.

ل ساڵا ١٩٨٣ دبیتە ئامر مەفرەزە و ڕێکخراوا وان بۆ دەڤەرا قەندیلی تێت ڤەگوھازتن و پشکداری د وان شەرێن ل سەر ھێزێن بەرەیێ جود هاتینە سەپاندن دکەت و پشتی ھینگێ ڤەدگەرنەڤە دەڤەرا لقا ئێک.

ل ساڵا ١٩٨٤ پشکداریێ د بەرسینگگرتنا ھێرشا دوژمنی بۆ سەر لژنا ناوچا دھۆکێ دا دکەت.

کاک محەمەد د ڤێ دیدارێ دا ئاماژێ ب ڕۆڵێ ژنەکا کورد ل گوندێ کۆڤلی دکەت و دبێژیت:پشتی شکەستنا ھێرشا دوژمنی ل هاڤینا 1984 ھێزێن پێشمەرگەی ل بەربوو چالاکیەکێ ل دژی بنگەھ و بارەگایێن دوژمنی ئەنجامبدەن، ل نێزیک گوندێ کۆڤلی ژنەک وان دبینیت و ژکەیفا سەرکەفتنا ھێزێن پێشمەرگەی دا، دبێژیتە وان” انشا اللە ئەز ببم گوللە بو لوولیێن تڤەنگێن وە).کاک محەمەد سارکی ل ساڵا ١٩٨٥ دگەل ڕێکخراوا شەھید وەیسی بانی بۆ لژنا ناوچا ئاکرێ تێتە ڤەگوھازتن.ل ساڵا ١٩٨٦ پشکداریێ دشەرێ ھنداڤ زاویتە دا دکەت و دوو رەبیبن دوژمنی دگرن، ل ساڵا ١٩٨٧ پشکداریێ د بەرسینگگرتنا ھێرشا دوژمنی بۆ سەر ھەردوو لژنێن شێخان و ئاکرێ دا دکەت و ڕۆلەکێ مەزن د شکەستنا ھێرشا دوژمنی دا دبینیت، پاشی دبیتە بەرپرسێ ڕێکخراوا شەھیدێن پشتا گری و دویفدا بەرپرسیاریا ڕێکخراوا کۆماتەی ل لژنا ناوچا دھۆک وەردگریت و مینا ھێزەکا دەست وەشین چالاکیان ل دەڤەرێ ئەنجامددەن، و گوند بەر گوند بەرسینگێ ھێزێن دوژمنی دگرن.ل ئەنفالێن ڕەشێن 1988خێزان و زاڕۆکێن وی دکەڤنە دەست دوژمنی و ئەوژی ل ١٩٨٨⁄٨⁄٢٢ خوە دگەھینیتە سەر سنوورێ ڕۆژھەلاتێ کوردستانێ و ل سالا ١٩٨٩ دگەل ھەژمارەکا پێشمەرگەی تێتەڤە کوردستانێ دا خێزان و زاڕۆکێن خوە ببەن، لێ سەرکەفتێ نابیت و نەچار دبیت ڤەگەریتەڤە ڕۆژھەلاتێ کوردستانێ و پشکداریێ د کۆنگرا ١٠ ێ یا پارتی دا دکەت.پشتی سەرھەلدانێ ب ئێکجاری ڤەدگەریتەڤە کوردستانێ و تێتە زاویتە و دھۆکێ و دبیتەڤە پێشمەرگە ودبیتە بەرپرسێ ھێزا سێ، پشتی ڕێکخستنا پێشمەرگەی دبیتە فەرماندێ سریێ، پاشی ل سالا 2002 دبیتە فەرماندێ فەوجەکێ ل هێزا ئەرەز یا پاراستنا دامەزراوێن میری ل ھەولێرێ.کاک محەمەد سارکی پشتی خەباتەکا دویر و درێژ و تژی ئەڤرازی و نشیڤی و پشتی ئەرکێ خوە یی نیشتمانی و نەتەوەیی ب باشترین شێوە ئەنجامدای و ووژدانا خوە ھەمبەر گەل و وەلاتێ خوە ئارام کری…. ب پلا مقەدم ھاتیە خانەنشین کرن و ھەمی ھیڤی و ئاواتێن وی ئەون کوردستان یا ئارام و پاراستی بیت.ئەم ژی وەکو سەنتەرێ کۆماتە یێ دەکۆمێنتکرنا دیرووکا شۆڕشێ کاک محەمەد سارکی و گەلەک تێکۆشەرێن دی یێن مە دیرووکا خەباتا وان تۆمار و ئەرشیف کرین ژ ھەژی چاڤدێریەکا پتر و وان شایستەی بەخشینا میدالیا بارزانیێ نەمر دبینین، لەوما ڤێ پێشنیارێ ئاراستەی سەرکردایەتیا پارتی و بارەگایێ سەرۆک بارزانی دکەین